LAEF STORI
Ol Samting We Mi No Save Fogetem Long Wok Blong Kingdom
Wan dei long yia 1947, ol misinari oli stap mekem Wajtaoa Stadi long haos misinari long Santa Ana, long kantri ya El Salvado. Wantaem nomo, ol bigbigfala ston oli faerap long haos mo oli kam insaed long doa we i open. Ol pris blong Katolik oli pusum ol yangfala boe blong mekem samting ya. I no longtaem, ol pris oli lidim wan bigfala grup i kam long haos. Oli kros tumas, mo sam long olgeta oli karem stik faea, sam narafala oli karem aedol. Blong tu aoa, oli stonem haos mo oli stap singsingaot se, “!Mama Meri bambae i laef! !Jehova bambae i ded!” Oli wantem mekem ol misinari oli fraet blong oli ronwe. Mi mi wan long ol misinari ya we oli stap long miting ya 67 yia bifo.a
TU YIA bifo, mi mo Evelyn Trabert i tren long namba 4 klas blong Wajtaoa Baebol Skul Blong Gilead, klosap long Ithaca, long New York. Afta, oli sanem mitufala i go long El Salvado blong mekem wok blong misinari, mo mi mi stap long ples ya klosap 29 yia. Be bifo we mi storian long laef blong mi olsem misinari, bambae mi eksplenem from wanem mi wantem mekem wok ya.
MIFALA I KASEM TRUTOK
Mi mi bon long yia 1923 long taon ya Spokane, Washington, long Amerika. Papa blong mi John Olsen mo mama blong mi Eva, tufala i joen long skul ya Lutheran, be tufala i no agri long tijing blong helfaea. Tufala i no bilif se God we i lavem yumi i save bonem man long faea. (1 Jon 4:8) Papa blong mi i wok long ples blong wokem bred. Wan naet, wan wokman i tokbaot Baebol long hem, mo i talem se God i no stap bonem man long helfaea. Smoltaem biaen, papa mo mama blong mi i stat blong stadi Baebol wetem ol Witnes blong Jehova. Tufala i kasem save long samting we Baebol i talem long saed blong ded mo laef afta ded.
Mi tingbaot yet fes blong papa mo mama blong mi taem tufala i kasem ol save ya. Tufala i glad tumas blong faenemaot nem blong God Jehova, mo blong save se hem i no wan haf blong Triniti. (Jon 8:32) Long taem ya, mi mi gat 9 yia nomo, be Papa mo Mama tufala i stap talem long mi ol samting we tufala i lanem, mo mi mi kasem save kwiktaem. Mi mi harem gud tumas blong stadi long Baebol mo mi neva les blong ridim. Nating se mi mi stap sem, be mi joen wetem Papa mo Mama blong prij. Long yia 1934, tufala i baptaes, mo long yia 1939, taem mi gat 16 yia, mi tu mi baptaes.
Mi wetem Papa mo Mama long yia 1941, long asembli blong St. Louis, long Missouri
Long hot taem blong yia 1940, Papa mo Mama tufala i salem haos blong mifala, mo mifala i muv i go long Idaho, nao mifala i mekem wok blong paenia. Mifala i rentem wan rum antap long ples blong fiksimap ol trak, mo mifala i yusum rum ya blong mekem ol miting blong kongregesen tu. Long taem ya, sam kongregesen nomo oli gat Haos Kingdom blong olgeta. Plante kongregesen oli rentem wan haos no oli mekem miting long haos blong ol brata mo sista.
Long yia 1941, mifala i go long asembli long St. Louis, long Missouri. Long las dei blong asembli ya we hem i “Dei Blong Ol Pikinini,” oli askem long ol yangfala we oli gat 5 kasem 18 yia blong oli sidaon long ol jea long fored. Long en blong tok blong Brata Joseph F. Rutherford, hem i askem long mifala ol yangfala blong stanap sipos mifala i wantem “obei long God mo King blong hem.” Mifala evriwan i stanap. Nao Brata Rutherford i talem se: “!Yufala i luk! !Hemia 15,000 man bakegen we oli joen blong talemaot Kingdom!” Stret long taem ya, mi mi mekem desisen blong gohed long wok blong paenia go kasem en blong laef blong mi.
OL PLES WE MIFALA I GO BLONG PRIJ
Sam manis afta long asembli, oli askem long mitrifala blong mitrifala i muv i go long taon ya Oxnard long saot California, blong statem wan kongregesen long ples ya. Mitrifala i stap long wan smol haos we trak i pulum. I gat wan bed nomo insaed, ale mi mi slip antap long tebol we mifala i yusum blong kakae long hem. !Hemia i defren olgeta long rum blong mi bifo!
Long namba 7 Disemba 1941, Japan i sakem bom long Pearl Harbor long Hawai, mo long nekis dei, Amerika i joen long Wol Wo Tu. Long taem ya, mitrifala i jes kasem California. Ol sabmarin blong Japan oli stap olbaot long solwota, taswe ol haeman blong taon oli talemaot long evriwan we oli laef klosap long solwota se oli no mas laetem wan laet long naet. Taem i no gat laet, i had blong ol sabmarin oli faenem ples we oli wantem sutum.
Sam manis biaen, long Septemba 1942, mitrifala i go long Niu Wol Tiokratik Asembli long Cleveland, Ohio. Brata Nathan H. Knorr i givim wan tok we mi tingbaot yet, nem blong hem, “?Pis i Save Stap Longtaem?” Hem i eksplenem profet tok blong Revelesen japta 17 we i tokbaot wan “anamol,” i se: “Fastaem hem i laef, be hem i no moa laef naoia. Bambae i no longtaem, hem i kamaot long bigfala hol ya we i godaon we i godaon olgeta.” (Rev. 17:8, 11) Brata Knorr i talem se long taem blong faet, “anamol” ya we i minim Ligofnesen, i lus. Be wan narafala ogenaesesen bambae i girap blong putum pis long wol. Hemia nao samting we i hapen. Long yia 1945, Wol Wo Tu i finis. Afta, Yunaeted Neson i tekem ples blong Ligofnesen. Stat long taem ya, ol Witnes blong Jehova oli talemaot gud nius long plante moa ples long wol. !Hemia i mekem se namba blong ol Witnes i kam antap bigwan!
Setifiket we mi kasem long Gilead
Taem mi harem brata i eksplenem profet tok ya, mi mi kasem save se i gat plante wok yet blong mekem. Taswe, taem oli talemaot se i no longtaem bambae Skul blong Gilead i stat, mi mi wantem go long skul ya blong kam wan misinari. Long yia 1943, oli sanem mi mi go long Portland, Oregon, blong mi mekem wok blong paenia. Long taem ya, mifala i stap yusum gramafon blong prij. Mifala i plei wan rikoding blong ol tok we oli stanap long Baebol, mo mifala i givimaot ol buk we oli tokbaot Kingdom blong God. Be long fulyia, mi mi stap tingbaot wok blong misinari nomo.
Long yia 1944, oli singaot mi mo gudfala fren blong mi Evelyn Trabert, blong mitufala i go long Skul Blong Gilead. !Mi mi glad we mi glad! Long 5 manis we mifala i stap long skul ya, ol tija blong mifala oli soemaot olsem wanem blong stadi Baebol long fasin we mifala i save harem gud long hem. Mifala i luk se ol tija ya oli mekem tingting blong olgeta i stap daon, from we samtaem oli wok long kijin tu blong rerem kakae blong mifala. Long namba 22 Jenuware 1945, mifala i aot long Skul blong Gilead.
MI KAM WAN MISINARI
Long manis Jun long yia 1946, mi mo Evelyn wetem Leo mo Esther Mahan, mifala i kasem Santa Ana, long El Salvado. I klia se kakae long garen i rere finis, mo “i taem blong go tekem.” (Jon 4:35) Sam manis afta, mifala i mekem fas eria asembli long Santa Ana. Mifala i singaot ol man oli kam mo mifala i glad tumas blong luk we klosap 500 man oli kam. Be ol pris oli kros tumas, ale wan wik afta, oli lidim grup ya we mi tokbaot long stat blong stori ya, blong oli kam stonem haos blong mifala. Oli wantem mekem mifala i fraet, blong mifala i aot long taon ya. Be samting ya i jes mekem se tingting blong mifala i kam strong moa blong stap long ples ya, mo blong givhan long ol man. Ol pris ya oli tok strong long ol man se oli no mas ridim Baebol, be plante man oli wantem save trutok. Wan samting nomo, oli no gat naf mane blong pem wan Baebol. Oli glad se mifala i stap lanem lanwis blong Spen, olsem nao mifala i save tijim olgeta long Jehova mo long promes blong hem blong mekem wol ya i kam paradaes.
Mifala i go long sem klas blong Gilead mo afta long El Salvado. Lefsaed kasem raetsaed: Evelyn Trabert, Millie Brashier, Esther Mahan, mi, mo Leo Mahan
Wan long ol faswan we mi mi stadi Baebol wetem olgeta, hemia Rosa Ascencio. Hem i stap wetem wan man, be tufala i no mared. Afta we Rosa i stadi smoltaem, hem i lego man ya. Nao man ya tu i stadi Baebol. Ale tufala i mared, tufala i baptaes, mo tufala i strong blong prij. Rosa i faswan we i kam fultaem paenia long Santa Ana.b
Rosa i gat wan smol stoa blong hem. Be taem hem i go prij, hem i satem stoa ya, mo hem i trastem Jehova se bambae hem i givim samting we hem i nidim. Mo i tru, oltaem i gat plante man i kam long stoa blong hem. Rosa i luksave se Jehova i stap lukaot gud long hem, olsem Matiu 6:33 i talem. Hem i holemstrong long Jehova go kasem we hem i ded.
Mifala ol 6 misinari, mifala i rentem haos blong wan bigfala bisnesman. Wan dei, pris i go luk man ya, mo i tok strong long hem se sipos mifala i gohed blong rentem haos blong hem, bambae oli putumaot hem mo woman blong hem long jos. Be man ya i no fraet, i talem se i oraet nomo sipos oli putumaot tufala. Hem i tok olsem from we hem i harem nogud finis long sam samting we ol pris oli mekem. Hem i talem long mifala se, ‘Yufala i no wari, yufala i save gohed nomo blong rentem haos blong mi.’
WAN MAN WE I SKULGUD I KAM WITNES
Long yia 1955, oli wokem branj ofis ya
Long bigfala taon ya San Salvador, wan misinari i stadi Baebol wetem wan woman we man blong hem i enjinia, nem blong hem Baltasar Perla. Man ya i no moa bilif long God from we hem i luk se plante lida blong skul oli gat tu fes. Be hem i kaen tumas. Nating se hem i no wan Witnes yet, be hem i talem se bambae hem i droem plan blong branj ofis long El Salvado, mo bambae hem i wok fri nomo blong givhan blong bildim.
Baltasar i wok wetem plante Witnes blong bildim branj ofis ya, nao hem i luksave se hem i faenem skul we i tru. Ale, hem i baptaes long namba 22 Julae 1955, mo smoltaem biaen woman blong hem Paulina i baptaes. Tufala pikinini blong Baltasar mo Paulina, tufala tu i mekem wok blong Jehova. Boe blong tufala we nem blong hem tu, Baltasar, hem i wok 49 yia finis long Betel long New York. Hem i wan memba blong Branj Komiti long Yunaeted Stet, mo i wok strong blong givhan long wok blong prij long olgeta ples long wol.c
Taem mifala i stat blong mekem ol bigfala asembli long San Salvador, Brata Baltasar Perla i givhan long mifala, blong mifala i kasem wan bigfala ples blong spot blong mekem asembli long hem. Long fas asembli, haos ya i no fulap nating. Be evri yia, plante moa man oli stap kam gogo, haos ya i smol. Mifala i luk we Jehova i stap blesem hadwok blong mifala. Long ol asembli ya, mi mi luk olgeta we mi bin stadi wetem olgeta. !Mo mi glad tumas taem mi luk se samfala we oli baptaes, olgeta we oli studen blong mi bifo oli stadi wetem olgeta! Mi harem se olgeta ya oli olsem ol smol bubu blong mi.
Brata F.W. Franz i toktok long ol misinari long asembli
Wan dei, mi stap long wan asembli, nao wan brata i kam luk mi mo i talem sore. Mi no luksave hem, mo mi no save from wanem hem i kam talem sore. Nao hem i eksplenem se: “Mi mi wan long ol boe ya we oli stonem haos blong yufala long Santa Ana.” Mi glad tumas blong save se naoia hem i stap joen wetem yumi blong mekem wok blong Jehova. Storian ya i mekem mi mi tingbaot bakegen se taem yumi mekem wok blong Jehova fultaem, yumi harem gud moa long laef blong yumi.
Fas eria asembli we mifala i go long hem long El Salvado
MI GLAD LONG OL JUS WE MI MEKEM
Klosap 29 yia, mi mi gohed blong mekem wok blong misinari long El Salvado. Mi wok long Santa Ana, Sonsonate, Santa Tecla, mo San Salvador. Be papa mo mama blong mi tufala i stap kam olfala, mo tufala i nidim mi, blong mi givhan long tufala. Ale mi prea plante, nao long yia 1975, mi mekem desisen blong lego wok blong misinari mo gobak long Spokane.
Long yia 1979 papa blong mi i ded, mo mi lukaot long mama blong mi blong 8 yia bakegen. Hem i olfala tumas, i no moa save mekem samting hem wan, mo hem i ded taem i gat 94 yia. Mi mi harem nogud tumas, mo samting ya i mekem se mi no moa gat paoa. Mi kasem sik ya shingles we i mekem bel blong mi i soa we i soa. Be mi harem se Jehova i putum han blong hem i goraon long mi mo i lavem mi. Hem i ansa long prea blong mi, i givhan long mi blong mi stanap strong blong winim hadtaem ya. Hem i holem promes blong hem se bambae hem i lukaot long mi taem mi olfala.—Aes. 46:4.
Long yia 1990, mi muv i go long Omak long Washington. Long ples ya, mi prij long ol man we oli toktok lanwis blong Spen, mo mi harem gud blong yusum bakegen ol trening we mi kasem plante yia bifo. Plante we mi stadi Baebol wetem olgeta oli gohed gud gogo oli baptaes. Afta we sam taem i pas, mi mi no moa naf blong lukaot long haos blong mi long Omak. Ale long Novemba 2007, mi muv i go long wan rum klosap long taon ya Chelan, long Washington. Long ples ya, i gat wan kongregesen we ol brata mo sista oli toktok lanwis blong Spen. Oli lukaot gud long mi, mo mi mi talem bigfala tangkiu long olgeta from. Mi nomo mi olfala long kongregesen ya, mo oli lavem mi olsem we mi mi bubu blong olgeta.
Mi mi no mared mo mi no gat pikinini, from we mi wantem mekem wok blong Jehova fastaem. (1 Kor. 7:34, 35) Mi save se i no gat naf taem long laef blong mekem evri samting. Ale, mi jusum blong mekem samting we i moa impoten, hemia blong mekem wok blong Jehova wetem fulhat blong mi. Mi mi givhan long plante blong oli kasem trutok, mo olgeta ya oli olsem ol prapa pikinini blong mi. Long niufala wol, bambae mi gat plante taem blong mekem samting we mi mi wantem. Mi laekem tumas Ol Sam 145:16, we Jehova i promes se bambae hem i “mekem olgeta evriwan oli harem gud,” taem hem i givim samting we oli wantem.
Wok blong paenia i mekem se mi mi yangfala yet long tingting blong mi mo mi harem gud long laef
Naoia, mi mi gat 91 yia, be bodi blong mi i oraet yet. Taswe, mi gohed blong mekem wok blong paenia. Wok ya i mekem se long tingting blong mi, mi olsem yangfala yet, mo mi harem gud long laef. Taem mi mi go long El Salvado fastaem, wok blong prij i jes stat long ples ya. Be naoia, i gat bitim 39,000 pablisa long El Salvado. Nating se Setan i stap traehad, be hem i no naf blong stopem wok blong yumi. Taem mi luk we wok i stap kam antap olsem, mi mi bilif strong se tabu spirit i stap lidim ol man blong Jehova mo givim paoa long olgeta.
a Yu luk 1981 Yearbook of Jehovah’s Witnesses, pej 45 mo 46.
b 1981 Yearbook, pej 41 mo 42.
c 1981 Yearbook, pej 66 mo 67, 74 mo 75.