I Nogat Wan Narafala Rod Blong Kasem Gudfala Laef

?Yu yu save mekem wanem blong kam klosap long God? Yumi tokbaot finis sam rod ya, we yu save folem blong kam klosap long God, mo fren gud wetem hem:

1. Yumi mas save nem blong God, Jehova, mo yumi mas yusum nem ya

2. Yumi mas toktok wetem hem oltaem, taem yumi prea mo taem yumi stadi long Baebol

3. Yumi mas mekem samting we i mekem Jehova i glad

Folem ol rod ya we yumi jes luk, ?yu yu stap mekem samting we i pulum yu blong kam klosap long God? ?I gat sam samting we yu ting se yu save kamgud moa long hem? Blong talem stret, yu mas traehad blong mekem ol samting ya. Be i gud blong makem frut we bambae i kamaot.

Jennifer wan woman Amerika, i talem se: “Evri samting we yumi traehad blong mekem blong kam klosap long God, oli no blong nating.” Hem i gohed i se: “Taem yumi fren gud wetem God, bambae yumi kasem plante blesing. Bambae yumi trastem God moa, mo tu bambae yumi kasem save ol fasin blong hem. Be samting we i moa impoten hemia se, lav blong yumi long Jehova, bambae i kam strong moa. !Yes, i nogat wan narafala rod blong kasem wan gudfala laef!”

Sipos yu glad blong fren gud wetem God mo kam klosap long hem, ol Witnes blong Jehova oli glad blong givhan long yu. Oli save mekem plan blong stadi Baebol wetem yu, we i fri nomo. Mo tu, yu save kam long ol miting blong olgeta, we oli tokbaot ol save we i stanap long Baebol. Ol miting ya oli mekem long ol Haos Kingdom blong ol Witnes blong Jehova. Long ples ya, bambae yu glad blong joen wetem kampani blong ol man we oli tinghae long fasin ya, blong fren gud wetem God.a Taem yu mekem olsem, bambae yu gat sem filing olsem man blong raetem Ol Sam we i talem se: ‘Taem we mi mi kam stap klosap long God, mi harem se i gud tumas long mi.’—Ol Sam 73:28.