Wan Atikol Blong Givhan Long Ol Woman We Narafala i Tritim Nogud Olgeta

Hemia fastok blong atikol ya “Sefti Blong Ol Woman—Samting We Baebol i Talem” we i stap long jw.org. I gat wan link long en blong atikol ya we yu save klik long hem blong daonlodem mo printim atikol ya, nao yu save foldem i kam wan traket we i gat fo pej. Wan sista long Yunaeted Stet we nem blong hem Stacy i talem se: “Mi printim sam kopi blong traket ya, nao mi mo wan narafala sista i tekem i go long wan ples long teritori blong kongregesen blong mifala, we ol woman oli go stap long hem taem narafala i tritim nogud olgeta.”

Wan woman we i wok long ples ya, i askem sipos hem i save gat sam moa kopi blong traket ya blong givimaot long ol woman we oli slip long ples ya. Ale, oli givimaot 40 traket bakegen mo 30 kad blong jw.org. Long wan narafala taem we oli gobak, woman we i stap lukaot long ples ya i askem blong ol sista oli soemaot olsem wanem oli stap mekem Baebol stadi, blong ol narafala woman oli luk.

Stacy mo tu narafala sista oli go long wan narafala ples olsem bakegen we ol woman oli stap slip long hem, mo oli givimaot faef kopi blong traket ya. Ol woman ya oli askem sipos oli save gat sam moa. Wan woman we i wok long ples ya i talem se: “Traket ya bambae i givhan long ol woman long ples ya.” Hem i gohed i se: “Mifala i nidim ol toktok olsem.” Taem ol sista oli gobak long wan narafala taem blong soemaot olsem wanem yumi stap mekem ol Baebol stadi, plante woman oli kam luk, mo i gat tu long olgeta we oli wantem kam long wan miting long Haos Kingdom long nekis wiken.

Stacy i talem se: “Mifala i sapraes blong luk se plante woman oli laekem tumas naesfala atikol ya. Taem yumi printim mo foldem i kam wan traket, hemia i mekem se i isi blong serem gud nius blong Kingdom long ol woman we narafala i tritim nogud olgeta. Taem mifala i luk we ol woman ya oli glad tumas blong kasem traket ya, hemia i tajem hat blong mifala. Mifala i wantem luk olsem wanem Jehova bambae i gohed blong givhan long mifala, blong tokbaot gud nius long olgeta.”