?Kingdom Blong God Bambae i Mekem Wanem?

Ansa we Baebol i givim

Kingdom blong God bambae i tekem ples blong olgeta gavman long wol mo i rul long olgeta ples long wol. (Daniel 2:44; Revelesen 16:14) Kingdom blong God bambae i . . .

• Finisim ol man nogud, olgeta we oli stap mekem yumi harem nogud. Baebol i talem se: “Ol man nogud we oli stap mekem ol rabis fasin, bambae God i tekemaot olgeta.”—Ol Proveb 2:22.

• Finisim ol faet. Baebol i talem se: “[God] i stap mekem ol faet i finis long olgeta ples long wol.”—Ol Sam 46:9.

• Mekem ol man oli harem gud mo oli sef. Baebol i talem se: “Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4.

• Mekem wol i kam paradaes. Baebol i talem se: “Draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem.”—Aesea 35:1.

• Mekem evriwan oli glad blong mekem ol wok. Baebol i talem se: “Ol samting we [ol man blong God] oli hadwok long hem, bambae oli save harem gud long hem longtaem. Ol wok we bambae oli stap mekem, bambae oli save go gud.”—Aesea 65:21-23.

• Finisim ol sik. Baebol i talem se: “Bambae i no moa gat man olbaot long kantri ya we i save talem se hem i sik.”—Aesea 33:24.

• Mekem yumi kam yang bakegen mo yumi strong. Baebol i talem se: “Bambae bodi blong man olsem i save kam gud bakegen, i save kam strong olsem we i yangfala nomo.”—Job 33:25.

• Mekem ol dedman oli laef bakegen. Baebol i talem se: “Olgeta man we oli stap long beregraon bambae oli harem voes blong [Jisas], nao oli kamaot.”—Jon 5:28, 29.