Arrọọ Ọwuẹ Ne Uhimwẹ Kha Yan Nọ Ra?

Owiẹ mwẹdẹ ọkpa, okpia ọkpa nọ do ẹki kegha khirhi nọ ya vba okẹhoho sokpan okhian ma kẹ ọre ọ ma ghi vba ne okẹhoho. Ọ ghi kpẹ vbe ẹghẹ owiẹ nii, ọ keghi họn avbe iyẹn​​—⁠wẹ ne okẹhoho ne ọ ma ghi vba de rẹn khuan. Emwa hia ni la okẹhoho ni wa wulo.

Vbe ẹghẹ eso, ma keghi họn avbe iyẹn vbekpa edọmwade emwa ni ye ọkẹkherhe laeban emwi udomwirri ohannabe. Emwa ghi kha, “Ọ ma he sẹ ẹghẹ uwu ọghiran.” Adeghẹ emwa eso na wu, iran ghi kha, “Ẹdẹ ọre ọ gbae.” Eso keghi yaeyi wẹ ke ẹghẹ ne a ya biẹ ọmwa dandandan kpaọ, uhimwẹ ọnrẹn keghi re ne a mwamwaẹn yotọ lekpae uhi evbaguẹhita. Emwa ọvbehe yaeyi wẹ avbe emwidan na ru vbe enarrianusin ẹre a rri oya yi vbe arria na, kevbe avbe emwi esi na ru vbe arria na keghi re na gha miẹn isaẹnse ẹre vbe arria nọ dee. Egbe emwa vbenian ni ye uhimwẹ yi roro wẹ lekpa a ru emwi esi kevbe lekpa na kun azọ isara eso, iran gha sẹtin fiẹewerriẹ uhimwẹ ọghiran. Ẹwaẹn rre avbe iziro na ra?

Ẹwaẹn Gele Rre avbe iziro na Ra?

Gi ima guan yan iziro nokaro. Adeghẹ uhimwẹ ọghe ọmwa na gha re ne uhi eso kha yan vbene ọ na ya vba ọkhọ nọ ru, zẹvbe nọ guaẹro avbe iwinna nọ winnaẹn, nian a ghi muẹngbọ kevbe nọ rhie ẹtin ne uhi na? Ọ gha kẹ u muotuẹ gha rrie otọ ẹvbo ọrriọvbe u ke ghi rhie aro sotọ do miẹn ititin avbe uhi okhian imọto ne a rẹn otọre nọ mwẹ emwamwa isaẹnse kevbe azọmwa uhi. Wẹ gha roro wẹ te avbe uhi ni tobiran gha rre evba kevbe gha winna vbene ọmwa rhọkpa i na rhie ẹtin ne iran ra?

Nian gi ima guan yan iziro nogieva. Usẹ nọ rrọọ vbe arria na ye na, ere na miẹn vbe avbe emwidan na ru vbe ne arrianusin nọ ra? Adeghẹ emwa eso na ru orukhọ ughaghe vbe ne arrianusun sokpan ọ ma rẹn emwi rhọkpa vbekpa ẹre nian, de vbene ọ gha ya sẹtin dọlọeyi hẹ? Adeghẹ irẹn ma rẹn emwi nọ siẹe ighẹ usẹ nọ ye, de vbene egbe usẹ vberriọ gha sẹtin ru iyobọ ne irẹn hẹ ya fiwerriẹ khien enọmasẹ? Ẹi gẹle re emwi nọkhẹke.

Gi ima ru igiemwi ẹnrẹn: Roro vbekpa ọmọ nọta avbe ohoghe vbe ẹghẹ hia. Vbọ khin adeghẹ erhae gbe uhi nẹẹn nọ ru afiwerriẹ sokpan ọ he nọ ya tama rẹn emwi nọ ru khọọ? Ne ọmọ sẹtin winna ẹsẹsẹmwẹse vbe owebe, ra gha yin ẹse sayọ. Ọrheyẹrriọ, vbene a ma na tama rẹn wẹ emwi dan ẹre nọ ne a gha ta ohoghe, irẹn i sẹtin zẹdẹ rorẹe miẹn wẹ ọkhẹke nọ da obọ ohoghe na ta yi. Ọna ma ne ne ọmọ ra, ra ọ khẹke nẹẹn? Nọ dekaẹn usẹ ye orukhọ na ru vbe ne arrianusin, okhuo ọkpa khare: “Ẹi re emwi ẹwaẹn na miẹn wẹ ne I gha susẹ vbe arrọọ mwẹ hia rhunmwuda emwi eso ne I ma rẹn emwi rhọkpa vbekpa ẹre. Ii mwẹ azẹ rhọkpa ne egbemwẹ sokpan ne I rhan obọ miẹn ọnrẹn zẹvbe evbavbavbegbe vbe ẹdẹ agbọn mwẹ.”

A ya uhimwẹ yi sẹtin vbe gha mwẹ avbe evbọ si ikuaengbe ọvbehe. Ugbẹn vbe a gha werriẹ aro da avbe emwi nọwegbe ra irrioya nọ ma khẹke, emwa eso sẹtin zọe vbe iro, ugbẹn vbe ọna ghi re vbene imẹ hi hẹ, ‘Te I gha wa miẹn ọnrẹn yi zẹẹ.’​ Emwa ọvbehe vbe yaeyi wẹ na kun azọ ugamwẹ nọghan eso ra lẹkpa a dọlọ emwi mwamwa vbe owa, iran gha sẹtin fi evbaguẹhita ọghiran werriẹ. Zẹvbe evba laemiẹn, emwa ghi loo igho ọrhẹnrhẹn kevbe uhiẹn ọ ghi ya de ye obọ avbe ikpata vbe izigan.

Avbe Evbọzẹe Kpataki Ne A Na Susẹ

De emwi ne Baibol tae vbekpa uhimwẹ kevbe avbe orukhọ ọghe arrianusin “ọghe ọmwa”? E Baibol nianniaẹn tama ima: “Emwa ni rre agbọn rẹnrẹn ighẹ iran gha wulo; sokpan iran ni wulo nẹ ma rẹn emwi rhọkpa hiehie . . . Emwihia ne obọ ruẹ gba re, ye ẹtin ruẹn hia ruẹe rhunmwuda a gha rrie aiwua nẹ ai ghi ru emwi rhọkpa, iro i ghi rrọ, irẹnmwi i ghi rrọ, ẹwaẹn i ghi rrọ vbe Siọẹl [Idin], ne ehe ne uwẹ rrie.” [New World Translation of the Holy Scriptures] (Asan-Ibo 9:​5, 10) Vbe ẹmwẹ ọvbehe, ọmwa gha wu, irẹn i ghi sẹtin ro iro ra nọ winna. Irẹn i mwẹ evbọ rrọọ nẹi wu kevbe ẹre ọ siẹe ne ai khian na sẹtin dọlegbe biọe zẹvbe ọmwa ọvbehe.

Vbọzẹ, nian, ne oguomirẹ na yevbe nọ siẹn yan emwa eso, ẹi re emwa ọvbehe? Vbe okaro vbe ehia, Asan-Ibo 9:​11 tama ima: “Ẹghẹ kevbe evbamaro amakọ nọ rhuan emwa hia.” [New World Translation of the Holy Scriptures] Vbe ẹghẹ hia, emwi udomwurri sunu ne emwa kẹkan rhunmwuda wẹ iran keghi rre ehe nọmakhẹke vbe ẹghẹ nọmakhẹke. Gi ima werriegbe gha rrie igiemwi ne a ka ye unu kaẹn usin vbe okhuẹn nokaro. Ẹdẹ gbegbe, rhunmwuda evbọzẹe ughughan, emwa i ghi vba okẹhoho, okerhẹn ra okotọ. Vbe ẹghẹ ne emwi udomwirri ohannabe rhọkpa ma na sunu, emwa ghi rherhe mian mian avbe evbọsunu ne a ma ka yọ. Sokpan vbe ẹghẹ ne oguoro gha ya sunu, eso ni miẹn uhunmwu vbọ sẹtin gha roro wẹ ọ ma he ye sẹ ẹghẹ ne iran khian ya wu.

Avbe oguomirẹ sẹtin gha re ne emwa nagbọn gha sẹtin vbe si, kevbe wẹ ọni keghi re evbọ siẹe nogieva ne emwa na susẹ. Asan-Ibo 8:9 khare wẹẹ: “Agbọn na ne emwa eso na mwẹ ẹtin emwa ọvbehe ghi gha sẹ usẹ lele iran.” Emwa eso ni rre asẹ sẹtin loo ẹtin ọghiran ghe ihan, sokpan emwa ghi gha sẹ usẹ yọ. Yevbe gberra ọna, odẹ arrọọ ọghe ọmwa sẹtin gha re nọ ya dekaẹn odẹ ne avbe emwi ghi ya sunu. Zẹvbe igiemwi avbe uyinmwẹ dan sẹtin si ikuaengbe ye egberran mwẹ ọghe ọmwa, kevbe avbe akpa negbọmwa nagbi khan yi sẹtin su gha rrie avbe aguegbemuobọ nọ rhiae. Galatia 6:7 khare: “Emwikemwi ne ọmwa kọe ọre ọ gha vbe rhọ.”

Ne evbọ siẹe nogieha ne uniẹn emwa nagbọn na susẹ keghi mwẹ evbọ gha deba ẹmwata wẹ ma keghi rrọọ vbuwe “avbe ẹdẹ nokiekie.” Vbe odẹ avbe ukpo arria isẹn eva nọ gberra, Jesu keghi tae yotọ vbekpa ufomwẹ ọghe avbe emwamwa emwi na: “Ẹvbo na gha mu okuo gie nọkpa, otọ arriọba na ghi mu okuo gie nọkpa, ukhunmwu kevbe igbohiotọ ghi gha rre ehe hia. . . . Ọkhọ gha miotọ serriọ ne a gha na miẹn wẹẹ ahoẹmwọmwa ọghe enibun gha worua.” (2 Timoti 3:1; Matiu 24:​3, 7, 12) Zẹvbe ne avbe ihe ẹghẹ ọghe agbọn ya kulo kevbe uyinmwẹ oguo kevbe avbe oguoro ya muanyọ, ọ keghi re ne a gha roro kaẹn wẹ te ima gha wa kakabọ susẹ avbe oguomirẹ sayọ.

Vbọrhirhighayehẹ, odaro ọghe uniẹn emwa nagbọn ma wa gha re nọ so ebiebi! Vbe iyeke vbe ọ gie avbe okiekie ẹdẹ nẹ, Jesu khare: “Ọmwa nọ ziengbe ya sẹ ufomwẹ, ọre ọ gha miẹn fan. A gha kporhu iyẹn nọma ọghe ne arriọba na la otọ agbọn hia nẹ zẹvbe osẹe ne emwa hia, iyeke onii, ufomwẹ ghi do rre.” (Matiu 24:​13, 14) Ne Arriọba ne a guankaẹn vbemwa keghi re ne arriọba ne Osanobua mugbọ vbe ẹrinmwi ne Jesu Kristi na re na zẹe zẹvbe Ọba. Arriọba ọghe Osanobua gha rherhe do guọghọ avbe uyinmwẹ dan hia nọ rre uhun otagbọn, ọ ghi lae vberriọ do mu emwamwa emwi na ye na do sẹ ufomwẹ. Umiẹn adọlọ mwamwa arrọọ ne uhun otagbọn gha do miẹn! “Ọ gha khiẹn ameve hia hin aro iran rre. Uwu i ghi ra gha rrọ ọ ọvbehe ra akhiẹ ra obalọ. A ho emwi nẹdẹ hia bẹkun nẹ.” (Arhiema 21:⁠4) Ẹn, iyẹn nọma ẹre ọna wa gele khin!

De Emwi Ne Odaro Ọwuẹ Hẹnhẹn Egbe Yan?

De emwi ne ima gha ru ne a ya sọyẹnmwẹ avbe afiangbe ne Arriọba ọghe Osanobua gha viọ rre? E Baibol tae gboo: “Agbọn na kevbe emwi ne agbọn gualọ ni rrọọ hia, te ehia gberra khian, sokpan, ọmwa nọ ru vbene Osanobua ho ọ gha rrọọ ẹdẹdẹmwẹdẹ.” (1 Jọn 2:​17) Enii ni ru ahoo ọghe Osanobua gha mwẹ ayayẹro ọghe ne a ya gha rrọọ vbe ẹdẹdẹmwẹdẹ vbe uhun otagbọn vbe ototọ ọdakha ọghe Arriọba ọghẹe. Vbe nẹmwata, na ru ahoo ọghe Osanobua, te u gha rre vbe okaro do rẹn ahoo ọghẹe. Ọnii re ọ siẹe ne Jesu na khawẹ: “Ọna ọrọre nene arrọọ nẹi mwẹ ọfo wẹ ne emwa nagbọn rẹn ruẹn zẹvbe Osanobua ọkpa nọ re ọghe ẹmwata kevbe ne iran rẹn Jesu Kristi, ọmwa ne uwẹ gie.” (Jọn 17:⁠3) Lekpa a ruẹ ne Baibol, u gha sẹtin do rẹn ne ahoo ọghe Osanobua ọghe ẹmwata, Jehova, zẹvbe nọ vbe ye nene avbe imamwaemwi ọghe Jesu Kristi. Ọna keghi re izowẹ omuhẹn kpataki nọ su rrie afiangbe ọghe arrọọ ẹtẹbitẹ.

Odaro ọwuẹ i re ne uhimwẹ kha yan. Nọghaya ghayerriọ, ọ keghi hẹnhẹn egbe yan avbe azẹ ne uwẹ ru nian. Rhunmwuda evbọ siẹe na, Osanobua lobọ ọgbenbe e Baibol ọkpa, tọn urhu mu guan: “Te I tama uwa nian ne uwa zẹ vbọ, adeghẹ ẹfe nọ ra uwu, adeghẹ afiangbe Osanobua nọ ra ihẹn. I kevbe tie agbọn vbe ẹrinmwi ne iran sosẹ ye ne uwa zẹ vbọ. Wa zẹ ẹfe ne uwa mieke na gha rrọọ, uwa kevbe ivbi uwa.” (Diuteronomi 30:19) Te uwẹ gha zẹ ne u ya ruẹ Baibol kevbe ne u ya ru ahoo ọghe Osanobua na miẹn wẹ a vbe ye ayayẹro ọghe arrọọ ẹtẹbitẹ kevbe oghọghọ fiangbe uwẹ!

Avbe Osẹe Jehova gha wa ghọghọ ne iran ya guẹ ruẹ ne Baibol vbe ọghe ọhẹ. Lahọ gbẹn gie ima vbe adirẹsi nọ sikẹ ruẹ sẹ vbe na gbẹnnẹ ye ototọ vbe mwa.