Jesu Keghi Kporhu Iyẹn Nọ Maan Ọghe Arriọba

Vbe Jesu wa da dinmwiamẹ, ọ na suẹn gha kporhu wẹẹ: ‘Arriọba Osanobua sotọ nẹ.’ Emwa na gha bi lelẹe zẹvbe ne ọ ya gha mu okhian lẹga e Galili kevbe Judia. Vbe Jesu ghi sẹ e Nazarẹt ne ẹvbo ẹre, ọ na gha rrie sinagọg, ọ na ya wee ebe na kiri ọghe Aizaia, ọ na tie ẹre ladian vbe urhu nọ lae wẹẹ: ‘E Jehova rhie orhiọn nọhuanrẹn ọghẹe mẹ, ne I mieke na sẹtin kporhu iyẹn nọ maan.’ De emwi ne ọ ya ọna kha? Ọ rhiema wẹẹ, agharhemiẹn wẹẹ emwa ghaa hoo ne Jesu wa gha ru emwi ọyunnuan, emwi kpataki nọ rhunmwuda re rre, ọre ne ọ do kporhu iyẹn nọ maan. Ọ na ghi tama emwa ni danmwehọ re wẹẹ: ‘Ẹmwẹ akhasẹ na, wa mwẹ amusẹ vbe ẹdẹnẹrẹ.’

Vbe iyeke ọni, Jesu na gha rrie Okun Ọghe Galili, evba ẹre ọ na miẹn ikpia enẹ ni gbe ehẹn, ni ghi do gha re erhuanegbe ọghẹe. Ọ na tama iran wẹẹ: ‘Uwa lele mwẹ, ne uwa do gha re ọgbehẹn ọghe emwa nagbọn.’ Eni iran na, ọre Pita, Andru, e Jems kevbe Jọn. Vbe ọwarọkpa nii, iran na sẹ iwinna iran rae, iran na lelẹe. Iran na ya gha kporhu vbe Galili vbekpa Arriọba Osanobua. Iran kporhu vbe sinagọg, vbe adesẹ ẹki kevbe idunmwu. Ẹbu emwa nibun ẹre ọ ghaa bi lele iran vbe ehe ne iran rhirhi la. Okhekhe ọghe Jesu keghi gba ehe hia, uhiẹn ya sẹ e Siria.

Vbene ẹghẹ ya gha khian, Jesu na rhie ẹtin eso ne avbe ukọ ọghẹe, ne iran ya gha mu emwa egbe rran kevbe ne iran ya gha khulo orhiọn dan. Emwa nikẹre na ye gha lelẹe zẹvbe ne ọ ya gha kporhu vbe ẹvbo ughughan. Ikhuo eso ni ghaa mwẹ amuẹtinyan, vbe na ghee Meri na vbe tie ẹre Magdalen, Joana kevbe Susana vbe gha ru iyobọ ne Jesu vbe erhuanegbe ẹre.

Vbe Jesu ghi maa erhuanegbe ẹre emwi nẹ, ọ na gie iran ne iran ya kporhu. Zẹvbe ne iran ya gha kporhu khian vbe Galili, emwa nibun na do khian erhuanegbe, iran na vbe dinmwiamẹ. Emwa nibun ghaa hoo ne iran khian erhuanegbe Jesu, rhunmwuda ọni, Jesu na ya iran gie ugbo emwiokọ nọ wo nẹ kevbe nọ sẹ na rhọọ. Ọ na kha wẹẹ: ‘Wa na erhunmwu gie Jehova ne ọ viọ emwa ni winna rre, ne iran do rhọọ emwiokọ.’ Vbe ọ ghi zẹ kpẹẹ, Jesu keghi gie 70 vbe erhuanegbe ẹre, ne iran ya kporhu vbe Judia; ọ na ghae iran eveva. Emwa ughughan ẹre iran ghaa maa re emwi vbekpa Arriọba Osanobua. Vbe erhuanegbe Jesu ghi yo rre, iran na do gha na iyẹn emwi ughughan nọ sunu. Esu ma sẹtin mu idobo ye iwinna ikporhu iyẹn nọ maan.

Jesu keghi tama erhuanegbe ẹre, ne iran ye gha winna iwinna ne kpataki na, vbe irẹn gha kpa gha rrie ẹrinmwi nẹ. Ọ na wẹẹ: ‘Wa kporhu iyẹn no maan na, la uhunmwu otagbọn hia. Wa gha maa emwa emwi vbekpa Ẹmwẹ Ọghe Osanobua, ne uwa vbe gha dinmwi iran ye amẹ.’