Elẹta Ne Ẹbu Nọ Su Gbẹn Rre

Etẹn Ni Ghaan:

Rhunmwuda ne ima na hoẹmwẹ Osanobua kevbe emwa ọvbehe, ẹre ọ si ẹre ne ima na “ya emwa ni rre agbẹnvbo hia khian erhuanegbe.” Ọna ẹre ọ vbe si ẹre ne ima na “dinmwi iran ye amẹ.” (Mat 28:​19, 20; Mak 12:​28-31) Adeghẹ ima na ya ekhọe hia hoẹmwẹ emwa, ọ wa mwẹ iyobọ nọkhua nọ ye. Adeghẹ ima na gha mwẹ ahoẹmwọmwa vbenian, ma gha sẹtin ru iyobọ ne “emwa hia ni mu egbe, ne iran ya ru emwi nọ gha ya iran gha mwẹ arrọọ ọghe etẹbitẹ.”—Iwinna 13:48.

Vbe ẹghẹ nọ gberra, emwi ne ima wa mobọ gha ru ọre wẹẹ, ma ghi hia ne ima rẹn ẹmwẹ hia ne ima khian ta ye uhunmwu vbe ima gha khian kporhu; ebe ẹre ima vbe mobọ gha viọ ne emwa. Nian, emwi nọ ghi khẹke ne ima gha ru, ọre ne ima hia ne ima gha mwẹ alaghodaro vbe odẹ ne ima ya gu emwa guan. Ma hoo ne ima gha ta ẹmwẹ nọ gha mu emwa ekhọe, ne ima ya rhie ẹre ma wẹẹ, ma hoẹmwẹ iran. Ọna rhie ma wẹẹ, te ima gha gbarokotọ ne ima mieke na rẹn emwi nọ gha mu iran ekhọe, ma ghi vbe mu egbe ne ima ya fi ẹmwẹ ne ima khian ta werriẹ deghẹ ọ na de vberriọ. De vbene ebe na khian ya ru iyobọ ne ima hẹ?

Iruẹmwi 12 ẹre ọ rre ebe na. Avbe iruẹmwi na, guan kaan emwi eso nọ khẹke ne ima ru, ne ima mieke na rhie ẹre ma wẹẹ, ma hoẹmwẹ emwa kevbe wẹẹ, ma hoo ne ima ru iyobọ ne iran ya khian erhuanegbe Jesu. Ma gha miẹn emwi ruẹ vbe igiemwi ọghe Jesu ra ọghe erhuanegbe ẹre ni ghaa rrọọ vbe ẹghẹ nẹdẹ vbe dọmwadẹ iruẹmwi ni rre ebe na. Evba gu gbẹn ebe na, ọre nọ ru iyobọ ne ima ya rẹn odẹ ughughan ne ima gha ya sẹtin rhie ẹre ma wẹẹ, ma hoẹmwẹ emwa, ẹ i re na wa rẹn ẹmwẹ na khian ta ye uhunmwu kẹkan. Ẹmwata nọ wẹẹ, ma gha sẹtin loo emwi hia na guan kaẹn vbe dọmwadẹ iruẹmwi vbe iwinna ikporhu ọghe ima, sokpan, vbe ebe na, ma gha bẹghe uyinmwẹ eso nọ wa gele khẹke ne ima gha mwẹ vbe ẹghẹ okaro ne ima ya gu emwa guan, ra vbe ima gha werriegbe ya miẹn iran, ra vbe ima ghaa ya e Baibol ma iran emwi.

Zẹvbe ne u ya tie dọmwadẹ iruẹmwi ni rre ebe na, hia ne u muẹn roro, vbene u khian ya rhie emwi ne u tiere ye uyinmwẹ hẹ, vbe u ghaa kporhu ma emwa ni rre ẹdogbo ne u ye. Hia ne u gi ahoẹmwọmwa ne u mwẹ ne Jehova kevbe emwa ọvbehe gha wegbe yọ. Ẹmwata nọ wẹẹ, emwi bun nọ gha sẹtin ru iyobọ nuẹn ya ya emwa ọvbehe khian erhuanegbe Jesu, sokpan, ahoẹmwọmwa na ẹre ọ khian wa mobọ ru iyobọ nuẹn.

Uyi nọkhua wa nọ ne ima, ne ima vbe uwa na koko winna kugbe. (Zẹf 3:9) Erhunmwu ne ima na ọre ne Jehova fiangbe uwa wọrhọwọrhọ zẹvbe ne uwa ya rhie ẹre ma wẹẹ, wa hoẹmwẹ emwa kevbe zẹvbe ne uwa ya ru iyobọ ne emwa ya khian erhuanegbe Jesu!