Emwi Nọ Gha Ya Ahoẹmwọmwa Ne Ima Mwẹ Ne Egbe Gha Wegbe Sayọ

1-2. (a) Vbọ ya ukọ e Pọl kha wẹẹ ahoẹmwọmwa ẹre ọ “sẹ” ẹre? (b) De inọta ne ima khian zẹ iro yan?

VBE ukọ e Pọl ghi guan kaẹn amuẹtinyan, emwi ne ima ya aro yi kevbe ahoẹmwọmwa, ọ na wẹẹ “nọ ghi wa sẹ vbe uwu eha na, ọre ahoẹmwọmwa.” (1 Kọr 13:13) Vbọ ya e Pọl kha vberriọ? Vbe odaro, esa i khian ghi gha rrọọ ne ima gha mwẹ amuẹtinyan wẹẹ, Osanobua gha mu agbọn ọgbọn rre, ra ne ima ya aro ye avbe afiangbe ne ima khian miẹn vbe agbọn ọgbọn nii, rhunmwuda vbe ẹghẹ nii, Osanobua gha ru ena hia nẹ. Sokpan, esa gha ye gha rrọọ ne ima ya hoẹmwẹ e Jehova kevbe emwa ọvbehe. Vbene ẹmwata, te ahoẹmwọmwa ne ima mwẹ ne Jehova kevbe emwa ọvbehe khian ye gha wegbe sayọ vbe etẹbitẹ.

² Ugbẹnvbe a miẹn wẹẹ, te ima khian ye gha rhie ahoẹmwọmwa ma vbe etẹbitẹ, ma gha zẹ iro yan inọta eha. Nokaro, vbọzẹ nọ na khẹke ne ima hoẹmwẹ egbe? Nogieva, de vbene ima khian ya rhie ẹre ma hẹ wẹẹ, ima hoẹmwẹ egbe? Nogieha, de emwi ne ima gha ru, ne ahoẹmwọmwa ọghe ima gha wegbe sayọ?

VBỌZẸ NỌ NA KHẸKE NE IMA HOẸMWẸ EGBE?

3. Vbọzẹ nọ na khẹke ne ima hoẹmwẹ egbe?

³ Vbọzẹ nọ na ru ekpataki ne ima hoẹmwẹ egbe? Ọkpa vbe usun emwi nọ si ẹre ọre wẹẹ, ahoẹmwọmwa ẹre a ya rẹn Ivbi Otu e Kristi ọghe ẹmwata. E Jesu keghi tama avbe ukọ ọghẹe wẹẹ: “Adeghẹ uwa hoẹmwẹ egbe ọre emwa hia gha na rẹn wẹẹ erhuanegbe mwẹ ọre uwa khin.” (Jọn 13:35) Deba ọni, ma gha hoẹmwẹ egbe, ọ ghi ya ima gha mwẹ akugbe. Ukọ e Pọl keghi gie ahoẹmwọmwa zẹvbe emwi nọ “gba emwi hia kugbe gbain.” (Kọl 3:14) Vbọrhirhighayehẹ, emwi ọvbehe kpataki wa ye rrọọ nọ zẹe nọ na khẹke ne ima gha hoẹmwẹ egbe. Ukọ e Jọn keghi gbẹn gie etẹn wẹẹ: “Ọmwaikọmwa nọ hoẹmwẹ Osanobua gha vbe hoẹmwẹ ọtiọnrẹn.” (1 Jọn 4:21) Ma ghaa rhie ẹre ma wẹẹ, ma hoẹmwẹ emwa ọvbehe, te ima vbe rhie ẹre ma wẹẹ, ima hoẹmwẹ Osanobua.   

4-5. Rhan otọ vbene ahoẹmwọmwa ne ima mwẹ ne Osanobua ya ginna ahoẹmwọmwa ne ima mwẹ ne etẹn ima hẹ.

⁴ De vbene ahoẹmwọmwa ne ima mwẹ ne Osanobua ya ginna ahoẹmwọmwa ne ima mwẹ ne etẹn ima? Gia ru igiemwi yọ, muẹn roro vbene ẹkokoudu ima kevbe abọ ughughan ọvbehe vbe egbe ima ya winna kugbe hẹ. Ọ mwẹ eke ne ọbo ebo gha ya obọ kaẹn vbe urhuabọ ọghe obọ ima, ọ ghi sẹtin rẹn adeghẹ ẹkokoudu ọghe ima winna ẹse. De vbene igiemwi na ya dekaẹn ahoẹmwọmwa na rhie ma hẹ?

⁵ Zẹvbe ne ọbo ebo ya rẹn deghẹ ẹkokoudu ọmwa winna ẹse, vbọ gha ya obọ kaẹn ihe ọkpa vbe obọ re, ima gha vbe sẹtin rẹn deghẹ ima gele hoẹmwẹ Osanobua, vbe ima gha mu ukpa mu uwerhẹn ghee ahoẹmwọmwa ne ima mwẹ ne emwa ọvbehe. Adeghẹ ima na bẹghe ẹre wẹẹ, ahoẹmwọmwa ne ima mwẹ ne etẹn ima ma ghi wegbe, ọ rhie ma wẹẹ, ahoẹmwọmwa ne ima mwẹ ne Osanobua ma ghi vbe wegbe vberriọ. Sokpan adeghẹ ima na gha rhie ẹre ma vbe ẹghẹ hia wẹẹ, ma hoẹmwẹ etẹn ima, ọni rhie ma wẹẹ, ahoẹmwọmwa ne ima mwẹ ne Osanobua wa kakabọ wegbe.

6. Vbọzẹ nọ na khẹke nọ gha kpokpo ima vbe orhiọn, deghẹ ima na bẹghe ẹre wẹẹ, ahoẹmwọmwa ne ima mwẹ ne etẹn ima ma ghi wegbe? (1 Jọn 4:​7-9, 11)

⁶ Ọ wa khẹke nọ gha kpokpo ima vbe orhiọn, deghẹ ima na bẹghe ẹre wẹẹ, ahoẹmwọmwa ne ima mwẹ ne etẹn ima ma ghi wegbe. Vbọzẹ? Rhunmwuda, ọ rhie ma wẹẹ, te ima ghi fẹko khian rree ne Jehova. Ukọ e Jọn keghi wa gbe ọna ẹro rua vbọ khare wẹẹ: “Ọmwa nọ ma sẹtin hoẹmwẹ ọtiọnrẹn ne irẹn bẹghe, ẹ i khian vbe sẹtin hoẹmwẹ Osanobua nọ ma he bẹghe.” (1 Jọn 4:20) De emwi ne ọna ma ima re? Ma ghaa hoo ne ima ya ẹko rhiẹnrhiẹn e Jehova, ọ khẹke ne ima “hoẹmwẹ egbe.”—Tie 1 Jọn 4:​7-9, 11.

DE VBENE IMA KHIAN YA RHIE ẸRE MA HẸ WẸẸ, IMA HOẸMWẸ EGBE?

7-8. De odẹ eso ne ima gha ya sẹtin rhie ẹre ma wẹẹ, ima hoẹmwẹ egbe?

⁷ Ẹ i re avbiẹ inugba ẹre Baibol tama ima ne ima gha “hoẹmwẹ egbe.” (Jọn 15:​12, 17; Rom 13:8; 1 Tẹs 4:9; 1 Pit 1:22; 1 Jọn 4:11) Vbọrhirhighayehẹ, ekhọe ọghomwa ẹre ahoẹmwọmwa ke rre, sokpan ọmwa rhọkpa ma rẹn emwi nọ rre ima ekhọe. Nọnaghiyerriọ, vbe ima khian ghi ya rhie ẹre ma wẹẹ, ima hoẹmwẹ egbe? Ẹmwẹ ne ima ta kevbe uyinmwẹ ọghe ima ẹre ọ khian rhie ẹre ma.

⁸ Odẹ bun ne ima gha ya sẹtin gi etẹn ima rẹn wẹẹ, ma hoẹmwẹ iran. E Baibol gi ima rẹn odẹ eso ne ima gha ya sẹtin ru ọna, ọ khare wẹẹ: “Wa gha ta ẹmwata ma egbe.” (Zẹk 8:16) “Uwa gu egbe gha rrọọ vbe uwu ọfunmwegbe.” (Mak 9:50) “Ọ gha de ọghe ọghọ na rhie ne egbe, wa ghi mu asanikaro.” (Rom 12:10) “Wa gha rhan obọ miẹn egbe yi.” (Rom 15:7) “Uwa gha ya ekhọe hia yabọ egbe.” (Kọl 3:13) “Wa gha kpa egbe ihẹ.” (Gal 6:2) “Wa gha . . . fu egbe ẹko rre.” (1 Tẹs 4:18) “Uwa . . . gha rhie ẹtin ye egbe iwu.” (1 Tẹs 5:11) “Wa ghi vbe gha na erhunmwu ne egbe.”—Jems 5:16.

9. Vbọzẹ ne ifuẹko ne ima rhie ne emwa ọvbehe na re odẹ ne kpataki na ya rhie ahoẹmwọmwa ma? (Vbe ya ghee efoto.)

⁹ Gi ima zẹ iro yan odẹ ọkpa ne ima gha ya sẹtin rhie ẹre ma wẹẹ, ma hoẹmwẹ etẹn ima. Ukọ e Pọl khare wẹẹ: “Wa gha . . . fu egbe ẹko rre.” Vbọzẹ ne ifuẹko na rhie ne emwa ọvbehe na re odẹ ne kpataki na ya rhie ahoẹmwọmwa ma? Ebe ọkpa ghi rhan otọ ẹmwẹ ne Pọl loo ro mwa na zedu ẹre ghee ‘ifuẹko,’ ọ na wẹẹ emwi nọ demu ọre “na mudia ke ọmwa nọ rre uwu ọlọghọmwa nọ wegbe, na mieke na sẹtin rhie igiọdu nẹẹn.” Nọnaghiyerriọ, ma ghaa rhie ifuẹko ne ọtẹn nọ rre ibavbaro, te ima ru iyobọ nẹẹn nọ mieke na ye sẹtin gha rre odẹ na, nọ rrie arrọọ. Ẹghẹ ke ẹghẹ ne ima ya rhie ifuẹko ne ọtẹn, te ima rhie ẹre ma wẹẹ, ma hoẹmwẹ ọtẹn nii.—2 Kọr 7:​6, 7, 13.

10. De vbene ẹnina kevbe ifuẹko ya rhilo ginna egbe hẹ?

¹⁰ Na gha mwẹ ẹnina kevbe na gha rhie ifuẹko ne ọmwa wa kakabọ rhilo ginna egbe. Odẹ vbo? Ọmwa nọ mwẹ ẹnina gha miẹn ọmwa nọ rre uwu ọlọghọmwa, ọ ghi gha gualọ odẹ ke odẹ nọ khian ya rhie ifuẹko kevbe iyobọ ne ọmwa nii. Ma ghaa mwẹ ẹnina, ẹre ima khian na sẹtin rhie ifuẹko ne emwa ọvbehe. E Pọl keghi rhan otọ re wẹẹ, ẹnina ne Jehova mwẹ ne emwa ẹre ọ gua ẹre kpa ya rhie ifuẹko ne emwa. Ọ keghi gie Jehova zẹvbe “Erha nọ mwẹ itohan nọkhua kevbe Osanobua ne ifuẹko hia ke obọ ẹre rre.” (2 Kọr 1:3) Zẹvbe nọ rre study note ọghe ako na, e Pọl keghi loo ẹmwẹ na ighẹ “itohan nọkhua” ya gie ẹnina na mwẹ daa emwa ọvbehe. A keghi tie Jehova “Erha ra Ẹzi ọghe itohan nọkhua rhunmwuda ọmwa nọ gele mwẹ ẹnina ẹre Jehova khin.” Ẹnina ne Jehova mwẹ ẹre ọ gua ẹre kpa ya rhie ifuẹko ne ima “vbe uwu ọlọghọmwa hia ne ima la gberra.” (2 Kọr 1:4) Zẹvbe ne amẹ ẹzẹ nọ hianrẹn ya fu ima egbe rre, vbe ohanmwẹ amẹ ghaa gbe ima, erriọ e Jehova vbe ya fu ima ẹko rre vbe ima ghaa rre uwu ibavbaro. Vbọ gha de ọghe na gha mwẹ ẹnina, kevbe na gha rhie ifuẹko ne emwa ọvbehe, vbe ima khian ya sẹtin ya egbe taa e Jehova hẹ? Emwi ọkpa nọ gha ru iyobọ ne ima ọre, ne ima gha mwẹ avbe uyinmwẹ ni gha ru iyobọ ne ima ya gha rhie ifuẹko ne emwa ọvbehe. De usun avbe uyinmwẹ na kha na?

11. Zẹvbe nọ rre ebe Kọlose 3:12 kevbe 1 Pita 3:​8, de avbe uyinmwẹ eso nọ khẹke ne ima gha mwẹ, nọ gha ya ima hoẹmwẹ emwa ọvbehe, ne ima mieke na sẹtin rhie ifuẹko ne iran?

¹¹ Vbọ khian ru iyobọ ne ima ya hoẹmwẹ emwa ọvbehe, ne ima mieke na sẹtin “gha . . . fu egbe ẹko rre” vbe ẹdẹdẹgbe? Ọ khẹke ne ima gha daa ne egbe, ma ghi gha mwẹ agiẹngiẹn daa etẹn, ma ghi vbe gha mwẹ ekhọe esi. (Tie Kọlose 3:12; 1 Pita 3:8.) De vbene avbe uyinmwẹ na khian ya ru iyobọ ne ima hẹ? Ma ghaa mwẹ ẹnina kevbe avbe uyinmwẹ esi na, ọ ghi gua ima kpa ya gha rhie ifuẹko ne emwa ọvbehe vbe iran ghaa rre ibavbaro. Zẹvbe ne Jesu tae, “emwi nọ vuọn ọmwa ekhọe, ẹre unu ta ladian. Vbe uwu aza ọghe emwi esi ne ọmwa esi mwẹ, ẹre ọ ke viọ emwi esi ladian.” (Mat 12:​34, 35) Ifuẹko ne ima rhie ne etẹn ima ni rre ibavbaro, keghi re odẹ ọkpa kpataki ne ima ya rhie ẹre ma wẹẹ, ma hoẹmwẹ iran.

VBỌ KHIAN RU IYOBỌ NE IMA, NE AHOẸMWỌMWA NE IMA MWẸ NE EGBE GHA WEGBE SAYỌ?

12. (a) Vbọzẹ nọ na khẹke ne ima gha begbe? (b) De inọta ne ima khian ghi zẹ iro yan?

¹² Ma hia hoo ne ima “ye gha hoẹmwẹ egbe.” (1 Jọn 4:7) Sokpan, ọ khẹke ne ima ye ẹmwẹ ne Jesu tae rre, vbe ọ khare wẹẹ, “ahoẹmwọmwa ọghe emwa nibun [gha] do worua.” (Mat 24:12) E Jesu ma ya ọna kha wẹẹ, erhuanegbe irẹn nibun i khian ghi gha mwẹ ahoẹmwọmwa. Vbọrhirhighayehẹ, ọ khẹke ne ima gha begbe, rhunmwuda agbọn ne emwa i na mwẹ ahoẹmwọmwa ẹre ima sẹ fi. Ne ima na mwẹ ọna vbe ekhọe, gi ima zẹ iro yan inọta ne kpataki na: Vbe ima khian ya sẹtin rẹn deghẹ ahoẹmwọmwa ne ima mwẹ ne etẹn ima ye wegbe?

13. Vbe ima khian ya sẹtin rẹn deghẹ ahoẹmwọmwa ne ima mwẹ ne etẹn ima ye wegbe?

¹³ Odẹ ọkpa ne ima gha ya sẹtin rẹn deghẹ ahoẹmwọmwa ne ima mwẹ ne etẹn ima ye wegbe, ọre vbe ima gha mu ukpa mu uwerhẹn ghee emwi ne ima ru, vbe emwi eso gha sunu. (2 Kọr 8:8) Ukọ e Pita ya unu kaẹn ọkpa vbe usun emwi na kha na, ọ khare wẹẹ: “Nọ ghi wa sẹ ehia, wa ya ekhọe hia hoẹmwẹ egbe, rhunmwuda, ahoẹmwọmwa ẹre ọ gue orukhọ nibun.” (1 Pit 4:8) Nọnaghiyerriọ, emwi ne ima ru vbe ọtẹn gha ru emwi nọ sọnnọ ima, gha ya ima rẹn deghẹ ahoẹmwọmwa ne ima mwẹ ne etẹn ima ye wegbe.

14. Zẹvbe nọ rre ebe 1 Pita 4:​8, de egbe ahoẹmwọmwa nọ khẹke ne ima gha mwẹ? Ru igiemwi yọ.

¹⁴ Gia zẹ iro yan ẹmwẹ ne Pita tae. Vbe abọ nokaro ọghe duviẹn 8, e Pita keghi guan kaẹn egbe ahoẹmwọmwa nọ khẹke ne ima gha mwẹ, ọ we ne ima ya “ekhọe hia hoẹmwẹ egbe.” Ẹmwẹ ne Pita ya gie na ya “ekhọe hia hoẹmwẹ egbe” vbe ako na, ọre na “niẹn emwi ladian.” Abọ nogieva vbe uviẹn nii keghi ya ima rẹn vbene ahoẹmwọmwa vbenian khian ya sẹtin ru iyobọ ne ima hẹ, ọ keghi gue orukhọ ọghe etẹn ima. Vbe na ghee ukpọn eso nọ niẹn, na ya gu emwi, te ima gha vbe hia vbe odẹ ke odẹ ne ahoẹmwọmwa ne ima mwẹ ne etẹn ima gha wegbe sayọ, nọ mieke na sẹtin gue “orukhọ nibun” ne iran ru daa ima. Ne ako na na wẹẹ, te ahoẹmwọmwa “gue orukhọ nibun” rhie ma wẹẹ, te ọ khẹke ne ima gha yabọ. Zẹvbe na gha ya sẹtin ya ukpọn gue ihuẹn, ahoẹmwọmwa gha vbe sẹtin gue orukhọ kevbe abakuru ọghe emwa ọvbehe.

15. Adeghẹ ahoẹmwọmwa ne ima mwẹ ne etẹn ima na wegbe, vbọ khian ru iyobọ ne ima ya ru? (Kọlose 3:13)

¹⁵ Ọ khẹke ne ahoẹmwọmwa ne ima mwẹ kakabọ wegbe, ne ima mieke na sẹtin yabọ etẹn ima vbe iran gha ru ima khọọ, uhiẹn deghẹ ọ na gha lọghọ ne ima ru vberriọ. (Tie Kọlose 3:13.) Ma ghaa yabọ emwa ọvbehe, ọ rhie ma wẹẹ, ahoẹmwọmwa ne ima mwẹ gele wegbe kevbe wẹẹ, ma hoo ne ẹko gha rhiẹnrhiẹn e Jehova. De emwi ọvbehe nọ gha ru iyobọ ne ima ya gha rhie aro gberra abakuru ọghe emwa ọvbehe?

16-17. De emwi ọvbehe nọ gha ru iyobọ ne ima ya gha rhie aro gberra emwi nọ ma sẹ emwi ne emwa ọvbehe ru ima re? Ru igiemwi yọ. (Vbe ya ghee efoto.)

¹⁶ Gha rhie aro tua uyinmwẹ esi ọghe etuẹn, ghẹ gha rhie aro tua ako ne iran i na hia. Gia ghee igiemwi ọkpa. Gia kha wẹẹ, uwẹ vbe etẹn eso gba ya sọyẹnmwẹ egbe, ọ ghi bu ẹghẹ ne uwa khian ya kpa, uwa hia na gba mu efoto. U keghi mu efoto nii sẹ igbaha, a i rẹn deghẹ ọkpa ma na gha maan vbọ. Nian, efoto eha ẹre u ghi mwẹ nian. Sokpan, u na bẹghe ẹre wẹẹ, ọtẹn nokpia ọkpa wa suku aro ye uhunmwu vbe ọkpa vbe efoto ne u mu. Vbua khian ghi ru efoto nii hẹ? U ghi delete ẹre, rhunmwuda u ye mwẹ efoto eva ọvbehe ne emwa hia na gha mumu ogiẹ, uhiẹn ya sẹ egbe ọtẹn nokpia na.   

¹⁷ Ma gha sẹtin ya avbe efoto nii gie emwi ne etẹn ru ima re. Vbe ẹghẹ nibun ima vbe etẹn vbe gba sọyẹnmwẹ egbe, egbe ẹghẹ vberriọ wa vbe ya ima ghọghọ. Sokpan gia kha wẹẹ, vbe uwu ẹghẹ na, ọtẹn ọkpa na ta ẹmwẹ eso ra ọ na ru emwi nọ sọnnọ ruẹ. Vbọ khẹke ne u ru? Ẹ i re te ọ vbe khẹke ne u rhie ẹre hin ekhọe rre, zẹvbe ne u vbe ya delete efoto nii ra? (Itan 19:11; Ẹfis 4:32) Ma gha sẹtin mianmian emwi nọ ma sẹ emwi ne ọtẹn ima ru ima re, rhunmwuda ọtẹn nii vbe ru emwi esi nọ ya ima gha ghọghọ. Ọni ẹre ọ khẹke ne ima gha yerre, ẹre ọ vbe khẹke ne ima gha rhie aro tua.

EVBỌZẸE NE AHOẸMWỌMWA NA KAKABỌ RU EKPATAKI VBE ẸDẸNẸRẸ

18. De emwi ne ima ruẹ re vbekpa ahoẹmwọmwa vbe ako iruẹmwi na?

¹⁸ Vbọzẹ nọ na khẹke ne ima ye gha mwẹ ahoẹmwọmwa nọ wegbe daa etẹn ima? Zẹvbe ne ima he ruẹ ọre sin, ma gha hoẹmwẹ etẹn ima, te ima rhie ẹre ma wẹẹ, ma hoẹmwẹ e Jehova. Vbe ima khian ya rhie ẹre ma hẹ wẹẹ, ma hoẹmwẹ etẹn ima? Odẹ ọkpa ne ima gha ya sẹtin ru ọna, ọre ne ima gha rhie ifuẹko ne iran. Ma gha sẹtin “gha . . . fu egbe ẹko rre” adeghẹ ima na gha mwẹ ẹnina. Vbọ khian ru iyobọ ne ima, ne ahoẹmwọmwa ne ima mwẹ ne egbe gha wegbe sayọ? Ma ghi gha hia vbe odẹ ke odẹ ne ima gha yabọ emwa ọvbehe.

19. Vbọzẹ nọ na kakabọ ru ekpataki vbe ẹdẹnẹrẹ, ne ima gha rhie ẹre ma wẹẹ, ima hoẹmwẹ egbe?

¹⁹ Vbọzẹ nọ na kakabọ ru ekpataki vbe ẹdẹnẹrẹ, ne ima gha rhie ẹre ma wẹẹ, ima hoẹmwẹ egbe? Ukọ e Pita gi ima rẹn evbọzẹe, ọ khare wẹẹ: “Ufomwẹ ọghe emwi hia sotọ fo nẹ. Nọnaghiyerriọ . . . wa ya ekhọe hia hoẹmwẹ egbe.” (1 Pit 4:​7, 8) De emwi ne ima ya aro yi we ọ gha sunu, zẹvbe ne ufomwẹ agbọn dan na ya sikẹ otọ? E Jesu keghi tae yotọ emwi nọ khian sunu daa erhuanegbe ẹre, ọ khare wẹẹ: “Agbẹnvbo hia ghi vbe gha khẹko uwa rhunmwuda mwẹ.” (Mat 24:9) Ne ima mieke na sẹtin miẹn uhunmwu, ọ khẹke ne ima gha mwẹ akugbe. Ma ghaa mwẹ akugbe, Esu i khian sẹtin wannọ ima, rhunmwuda ma mwẹ ahoẹmwọmwa nọ re ọza nọ “gba emwi hia kugbe gbain.”—Kọl 3:14; Fil 2:​1, 2.