I Ma Te Yayi Wẹẹ Osanobua Rrọọ

VBENE I KA GHA YE HẸ

Igue ọkpa nọ rre Saxony, vbe otọ ẹvbo na ka gha tie ẹre German Democratic Republic (GDR) ẹre a na biẹ mwẹ. Ẹgbẹe ne a na ya obọ esi mu egbe, ẹre I na waan, te evbibiẹ mwẹ wa vbe maa mwẹ uyinmwẹ esi ke otọ rre. Emwamwa arriọba ọghe GDR ọre Communism. Vbe emwamwa arriọba na, asẹ ọkpa ẹre emwa hia mwẹ. Rhunmwuda ọni, emwa nibun ni ghaa rre Saxony ma gha ka ẹmwẹ ugamwẹ yọ. I ma te yayi wẹẹ Osanobua rrọọ amaiwẹ. Iyayi ne I ghaa mwẹ wẹẹ Osanobua i rrọọ kevbe wẹẹ asẹ ọkpa ẹre emwa hia mwẹ, keghi gbọzinian vbe ekhọe mwẹ. Ọna ẹre ọ ya mwẹ gha ru emwi hia ne I ghaa ru, I ke do gba vbe ukpo 18.

Te emwamwa arriọba ọghe GDR wa gha yẹẹ mwẹ, rhunmwuda ne I na gha roro ẹre wẹẹ, ai ya aro gbe ọmwa rhọkpa re vbọ. Te I wa vbe yayi wẹẹ, ọ ma khẹke ne emwa eso fe sẹ eso; te ọ khẹke na miẹn wẹẹ, emwi ne orhunmwu ọkpa mwẹ, ogieva re ghi vbe gha mwẹ ọnrẹn. Rhunmwuda ọni, I na ghi deba otu ni ye emwamwa na ike. Vbe I ghi rre ukpo 14, I keghi rhie egbe ye iwinna akpehuan, ne a na ya ebe nẹi ghi maan ru emwi ọgbọn. Arriọba ọghe ẹvbo na tie ẹre Aue keghi gbọyẹmwẹ ye iwinna ne I ghaa ru, rhunmwuda ọni, iran na mu uyi yọ mwẹ egbe (award) zẹvbe ọmọ otọ nọ rẹn enegbe. I na ghi do rẹn emwa eso ni ghaa rre ukpo nọ yo vbe arriọba ọghe GDR, agharhemiẹn wẹẹ ọvbokhan ẹre I ghaa khin. Rhunmwuda ọni, I kegha roro ẹre wẹẹ emwi ne I ru na, gha wa ya agbọn maan mwẹ.

Sokpan vbe udomwurri, emwi hia keghi zẹ ebagha. Vbe ukpo 1989, ogba ekẹn na ya fian e Berlin ye ihe eva (Berlin Wall) keghi de, emwamwa arriọba ọghe Eastern Europe na vbe fi werriẹ. Emwi nibun keghi sunu nọ wa kpa mwẹ odin. I na vbe do bẹghe ẹre wẹẹ, arriọba GDR i ya obọ ọkpa mu emwa hia, vbene I te roro ẹre yi. Vbe igiemwi, iran ma gha ya obọ esi mu emwa ni ma deba emwamwa arriọba ọghe GDR. Egbe emwi vbenian ma te zẹdẹ khẹke, rhunmwuda te ima te wa yayi wẹẹ, asẹ ọkpa ẹre emwa hia mwẹ. Vbe a ghi na miẹn nia wẹẹ, emwi hia i ye vbene ọ te khẹke nọ gha ye? Ọna ẹre ọ ghi wa gha kpokpo mwẹ vbe orhiọn.

Ẹre I na ghi rhie egbe ye ihuan na so kevbe iwinna ona (art). Vbe I ghi la owebe ne a na ruẹ vbene a ya so ihuan hẹ, I na gha mwẹ ọnrẹn vbe orhiọn wẹẹ, I gha ke ọni ladian nẹ, I ghi gha rrie owebe nọ yo, ẹghẹ nii, I ghi do gha re ọmwa nọ so ihuan kevbe nọ ru iwinna ona. Vbene ẹghẹ ya khian, uyinmwẹ mwẹ na wa kulo, I na ghi yevbe ọmọ na ma koko ẹse. I na wa gha ru vbene ọ khọn mwẹ, I na gha munọ ikhuo. Vbe uwu ena hia, I ma gha mwẹ oghọghọ nọ sẹ otọ ẹko. Rhunmwuda ne orhiọn mwẹ ma na sotọ, ọ kegha rhie egbe ma vbe iwinna ona ne I ru. Emwi hia na wa pirhi yọ mwẹ aro. I na gha nọ egbe mwẹ wẹẹ, ‘Vbe a rrie, vbe a ke dee vbe agbọn na?’

Vbe I ghi miẹn ewanniẹn ọghe inọta hia ni ghaa kpokpo mwẹ vbe orhiọn, ọ na wa kpa mwẹ odin. Vbe akota ọkpa vberriọ vbe I ye rre owebe, mẹ vbe ivbi esuku eso na gha guan vbekpa vbene emwi khian gha ye hẹ vbe odaro. Ovbialeke ọkpa na tie ẹre Mandya vbe gha gu ima rre evba vbe ẹdẹrriọ, ọkpa vbe Osẹe Jehova ẹre nọ. Ọ mwẹ emwi ọkpa nọ ta vbe akota nii, ne I i khian sẹtin mianmian. Ọ keghi tama mwẹ wẹẹ: “Andreas, u ghaa hoo ne u rẹn eke na rrie vbe agbọn na kevbe eke na ke dee, ya tie Baibol.”

Vbe ọ ghi ta ẹmwẹ na ma mwẹ, I na ka gha gbawawẹ deghẹ e Baibol gha sẹtin ru iyobọ mẹ, sokpan I na vbe gha hoo ne I gele rẹn emwi ne Baibol tae vbekpa ẹmwẹ na. Ẹre Mandy na ghi wẹẹ ne I ya tie ebe Daniẹl uhunmwu ẹnrẹn 2; ako ne I tie re nii keghi yan mwẹ unu ruan. Ako nii keghi guan kaẹn arriọba emwa nagbọn ughughan ni khian gha khaevbisẹ do sẹ ẹghẹ ne ima ye na. E Mandy keghi maa mwẹ ẹmwẹ akhasẹ ọvbehe ni rre Baibol, ni dekaẹn emwi ni khian sunu vbe odaro. Erriọ ẹre I ghi ya suẹn gha miẹn ewanniẹn ọghe avbe inọta ni te gha kpokpo mwẹ vbe orhiọn! Sokpan, a vba gbẹnnẹ ẹmwẹ akhasẹ na yotọ? De ọmwa nọ wa sẹtin ta ẹmwẹ akhasẹ vbenian, nọ na gele sunu zẹvbe na wa ya tae yotọ zẹẹ? Te ọna ghi rhie ma wẹẹ Osanobua gele rrọọ ra?

VBENE BAIBOL YA FI ẸDAGBỌN MWẸ WERRIẸ

E Mandy keghi gie mwẹ ma okpia ọkpa na tie ẹre Horst kevbe ọvbokhan rẹn ighẹ Angelika, ni re Osẹe Jehova; ọdọ vbe amwẹ na, ẹre ọ ghi ru iyobọ mẹ ya rẹn otọ e Baibol sayọ. Aro mwẹ keghi rherhe dae wẹẹ, Avbe Osẹe Jehova ọkpa, ẹre ọ wa mobọ loo eni Osanobua nọ re Jehova, iran ẹre ọ vbe maa emwa re wẹẹ, eni Osanobua ọre Jehova. (Psalm 83:​18, NW; Matiu 6:⁠9) I na vbe do ruẹ ọre wẹẹ, Osanobua ru emwamwa, ne emwa nagbọn ya gha rre paradais vbe uhunmwu otagbọn na vbe etẹbitẹ. Psalm 37:​9, NW khare wẹẹ: “Emwa ni mu ẹtin yan e Jehova, ẹre ọ khian yin agbọn na.” Ọ kegha sẹ mwẹ ọyẹnmwẹ ne I na do rẹn wẹẹ, ẹkpotọ vbenian kie ne ọmwaikọmwa nọ hia vbe odẹ ke odẹ, nọ gha lele uhi Osanobua ni rre Baibol.

Vbọrhirhighayehẹ, ẹrhiọn ne I loo ro, I ke do sẹtin ru afiwerriẹ nọ khẹke, ne I mieke na gha lele ilele ni rre Baibol i re nekherhe. Zẹvbe ọsihuan kevbe ọmwa nọ guẹ ona, I keghi wa runagban. Rhunmwuda ọni, I na do gha tọn egbe mu. Ọmwa nọ tọn egbe mu i sẹtin ga Osanobua, nọnaghiyerriọ, I na ghi hia ne I gha mu egbe rriotọ. Sokpan ọ wa lọghọ mwẹ, I ke do sẹtin mu uyinmwẹ alama oghẹ fua. U miẹn vbene I gbọyẹmwẹ ye izinegbe kevbe itohan ọghe Jehova hẹ, kevbe odẹ ne aro ọre ya sẹ otọ vbe egbe emwa ni hia, ne iran gha ya ilele ọghe Baibol ru emwi vbe arrọọ ọghe iran!

Ke na wa ya biẹ mwẹ do fi ẹghẹ ne I ya gha rre ukpo 18, emwamwa arriọba ọghe ẹvbo ne I na waan kevbe ne I ma na yayi wẹẹ Osanobua rrọọ, ẹre ọ wa gbọzinian vbe ekhọe mwẹ; sokpan ke ẹghẹ nii gha dee, adia ni rre Baibol, ẹre I ghi ya ru emwi vbe ẹdagbọn mwẹ. Te Baibol wa kakabọ fi mwẹ werriẹ! I i ghi si osi ba ẹmwẹ vbene emwi khian gha ye hẹ vbe ẹdẹ nakhuẹ, I na ghi do rẹn evbọzẹe ne I na rre agbọn. Vbọ ghi rre ukpo 1993, I keghi dinmwiamẹ zẹvbe ọkpa vbe Osẹe Jehova. Vbọ ghi rre ukpo 2000, mẹ vbe Tabitha na gba ru orọnmwẹ. Okhuo nọ wa zọghae vbe iwinna ugamwẹ e Jehova ẹre nọ. Ẹghẹ hia ẹre ima ya kporhu ma emwa, ne iran do rẹn ilele ni rre Baibol. Emwa nibun ne ima kporhu ma keghi re emwa ni ma yayi wẹẹ Osanobua rrọọ. Emwamwa arriọba ọghe ẹvbo ima, ẹre ọ wa vbe gbọzinian vbe ekhọe iran. Ekhọe hia keghi sẹ mwẹ ọyẹnmwẹ, ne I na sẹtin ru iyobọ ne emwa vbenian ya do rẹn e Jehova.

AFIANGBE NE I HE MIẸN

Vbe I da suẹn gha gu Avbe Osẹe Jehova mu obọ, ẹko ma zẹdẹ rhiẹnrhiẹn evbibiẹ mwẹ yọ hiehie. Sokpan iran keghi do bẹghe ẹre wẹẹ, ke obọ ne I ya suẹn gha gu Avbe Osẹe Jehova mu obọ, te uyinmwẹ mwẹ ghi wa fi werriẹ. Nia, te iran ghi vbe tie Baibol, iran vbe yo iko ọghe Avbe Osẹe Jehova. Ọna keghi ya mwẹ sọyẹnmwẹ.

Mẹ vbe Tabitha ne ọvbokhan mwẹ wa sọyẹnmwẹ orọnmwẹ ọghe ima, rhunmwuda ne ima na hia, ne ima gha ya ilele ni rre Baibol ru emwi. Vbe igiemwi, emwi awua nọ, ne ọdọ ra amwẹ fi owẹ ye oha. Ne ima na lele adia na nọ rre Baibol, ẹre ọ zẹe ighẹ imẹ vbe ọvbokhan mwẹ gba ẹko egbe.​—Hibru 13:4.

Te orhiọn mwẹ ghi wa sotọ, I i ghi vbe si osi ba ẹmwẹ ẹdẹ nakhuẹ. Ọkpa vbe eguọmwadia Osanobua ni rre uhunmwu otagbọn hia, ni mwẹ ọfunmwegbe kevbe akugbe, ẹre imẹ ghi vbe khin. Ẹgbẹe ọkpa ẹre ima khin. Obọ esi ẹre ima ya mu egbe. Ma i ya aro gbe ọmwa rhọkpa re. Erriọ ẹre ọ gele khẹke ne emwi gha ye. Ọna ọre emwi ne I wa gha gualọ ke otọ gha dee.