Inọta Ne Emwa Nọ

Emwa ọghe Osanobua ẹre ebe Psalm 144:12-15 guan kaẹn ra, ra avbe erhumwunyẹn ni mwẹ ekhọe dan ne a ya unu kaẹn vbe uviẹn 11?

Ẹmwẹ e Hibru ne a loo ro vbe ako na keghi re nọ gia loo vbe odẹ ughughan rhunmwuda ẹi re emwi ọkpa ẹre a yae kha. Ọrheyerriọ, emwi nọ ghi ya ima mwẹ irẹnmwẹ nọgbae ọghe ebe Psalm 144:12-15 ẹre a gbẹnnẹ ye ototọ mwa:

1. Emwi ne uviẹn nikẹre ọghe Psalm 144 khare: Ẹmwẹ ne New World Translation of the Holy Scriptures ne a dọlọ gbẹn vbe 2013 loo ro vbe omuhẹn ọghe uviẹn 12 ọre “odẹ vberriọ.” Ọna rhiema wẹẹ, afiangbe ne a guan kaẹn vbe uviẹn 12 ya sẹ 14 keghi re ọghe emwa imudiase, ọni ọre emwa ni wẹẹ ne Osanobua miẹn iran fan vbe obọ emwa dan vbe uviẹn 11. Ọna ye vbe rhiegbe ma vbe uviẹn 15. Ne ẹmwẹ “oghọghọ” keghi ladian igbava sokpan, ẹi re emwa ughughan ẹre a guan kaẹn mwa. Eguọmwadia e Jehova ẹre a guan kaẹn vbe ako na.

2. Irẹnmwi na keghi guaero emwi ne ako ughughan vbe Baibol khare nọ dekaan vbene Osanobua khian ya fiangbe emwa ni ya ẹkoata gae. Ebe ọsian na keghi guan kaẹn ayayẹro ne gbain ne Devid ghaa mwẹ. Ọ keghi yaro yọ wẹẹ, Osanobua gha miẹn agbẹnvbo Izrẹl fan nẹ vbe obọ eghian, ọ ghi fiangbe iran. Ẹghẹ nii, iran do gha mwẹ ọyẹnmwẹ nọ sẹ otọ ẹko. (Lẹv 26:9, 10; Diut 7:13; Psm 128:1-6) Vbe igiemwi, ebe Diuteronomi 28:4 keghi kha wẹẹ: “E Nọyaẹnmwa gha fiangbe uwa ẹsẹse vbe egbe emọ ni bun, vbe egbe emwiokọ, vbe egbe ẹmila kevbe egbe ohuan.” Vbene ẹmwata, ọfunmwegbe kevbe afiangbe ne Ivbi Izrẹl ghaa mwẹ vbe ẹghẹ ne Solomọn ya kha yan iran keghi re ne iran ma he miẹn egbe ọre ẹdẹ. Yevbesọni, arriọba e Solomọn keghi ya ima rẹn vbene Arriọba e Mẹziaia khian gha ye hẹ.—1 Ọba 4:20, 21; Psm 72:1-20.

Zẹ vbene ima nanaẹn de sin, irẹnmwi ọghe Psalm 144 ne ima ghi mwẹ nia, keghi guaero ayayẹro ne eguọmwadia e Jehova mwẹ ke otọ gha dee. Ayayẹro na ọre wẹẹ, e Jehova gha ghi guọghọ emwa dan nẹ, emwa ni mwẹ imudiase ghi do gha mwẹ ofunmwegbe ọghe etẹbitẹ, Osanobua ghi fiangbe iwinna obọ ọghe iran hia.—Psm 37:10, 11.