‘Walk by Faith, Not by Sight’

Vbe ọ ghi bu ẹghẹ nẹ ivbi iyokuo ya lẹga Jerusalẹm kevbe ẹghẹ ne iran ya guọghọe, ukọ Pọl keghi gbẹn wẹẹ, zẹvbe ivbi iyokuo ni gu obọ Kristi ne iran khin, te ọ khẹke ne Ivbiotu e Kristi yaro yọ wẹẹ, emwi gha wegbe mu iran, kevbe ne iran ghẹ muẹn karo, ẹmwẹ irọkhegbe kevbe na sọyẹnmwẹ egbe. (2 Tim. 2:3, 4) Rhunmwuda wẹẹ oguomirẹ gha rherhe hiẹ yan emwa nagbọn ni ma rẹn Osanobua, ọ khẹke ne amuẹtinyan ọghomwa wegbe, ne ima mieke na sẹtin gha rhie aro tua emwi orhiọn vbe ẹghẹ hia. (2 Kọr. 4:18; 5:7) Ghee ne vidio nọ mwẹ uhunmwuta nọ khare wẹẹ ‘Walk by Faith, Not by Sight.’ (Gha rrie jw.org, kevbe ne u ghee ototọ ne ako PUBLICATIONS > VIDEOS.) U ghi yẹrẹro vbene emwi ikpakpa na rhikhan mu kankankan, do ya khian ifi nọ zẹbe nọ mu Naham kevbe Abital hẹ. Vbe iyeke ọni, loo avbe inọta na ya ru ogbewerriẹ.

(1) Vbọ re ‘emwi osọnnọ’ . . . nọ mudia ye ehe nọ huanrẹn’ vbe orre nokaro, kevbe wẹẹ, de owẹ ọghe ẹgiẹgiẹ nọ khẹke ne Ivbiotu e Kristi ni ghaa rrọọ vbe Jerusalẹm zẹ? (Mat. 24:15, 16) (2) Vbọzẹ ne ọ na gha gualọ amuẹtinyan na sẹtin lẹẹ hin ẹvbo nii rre? (3) De emwi eso ne iran sẹ rae ne iran mieke na sẹtin lẹẹ? (4) Vbọzẹ ne Naham kevbe Abital na gha si obọ ẹgogo ghee iyeke? (Mat. 24:17, 18) (5) De emwi ọvbehe ne Rachel werriẹ aro daa, vbọ khian kpa hin Jerusalẹm rre, nọ mu amuẹtinyan ọghẹe ye edanmwẹ? (Mat. 10:34-37; Mak 10:29, 30) (6) De vbene Etan ya rhie igiemwi esi yotọ hẹ vbe nọ dekaan amuẹtinyan kevbe ilẹkẹtin na mwẹ yan e Jehova? (7) De vbene emwi ya wegbe mu Ivbiotu e Kristi hẹ vbe Pella? (8) De vbene amuẹtinyan ọghe Naham kevbe Abital ya fẹko do khian ne hogha hẹ? (9) De vbene Jehovah ya gbaroghe Ivbiotu e Kristi ni ghaa rrọọ vbe Pella hẹ? (Mat. 6:33; 1 Tim. 6:6-8) (10) De vbene ima khian ya yegbe taa Ebraham kevbe Sera hẹ vbe ẹdẹ okiekie ne ima ye na? (Hib. 11:8-10) (11) De emwi ne Naham kevbe Abital ghaa mu roro nọ ya ekhọe iran muẹn wẹẹ, ne iran werriegbe gha rrie Jerusalem, kevbe vbọzẹ nọ gha gia na kha wẹẹ iziro ọghe iran ma gba? (Luk 21:21) (12) De vbene emwi gele gha ye hẹ vbe Jerusalẹm vbe ẹghẹ ne Naham kevbe Abital ghi ya werriegbe sẹ evba? (13) Vbọzẹ ne ima gha na yae khian nọ wegbe sayọ, ighẹ amuẹtinyan ọghomwa vbe ẹghẹ na nia—a te miẹn wẹẹ ufomwẹ agbọn na rre?—Luk 17:31, 32; 21:34-36.

Na gha khian vbuwe amuẹtinyan keghi rhiema wẹẹ, (1) na gha mwẹ ilẹkẹtin yan adia ọghe Jehova, (2) na gha zẹ owẹ lele adia ọghẹe, kevbe (3) na gha rhiẹre ma wẹẹ emwi orhiọn ẹre ọ ru ekpataki ne ima sẹ emwi ikpakpa. Giẹ gha re atamuolọyan ọghe ima vbe ẹghẹ hia wẹẹ, te ima khian gha khian vbuwe amuẹtinyan, vbe ne ima na mwẹ ilẹkẹtin wẹẹ, “agbọn na kevbe emwi ne agbọn gualọ ni rrọọ hia, te ehia rhie gberra khian, sokpan ọmwa nọ ru vbene evbavba hoo, ọ gha rrọọ vbe ẹdẹdẹmwẹdẹ.”—1 Jọn 2:17.