Amuẹtinyan—Akpa Nọ Ya Ọmwa Deziẹn

AMUẸTINYAN ẹre ọ ya ima digiẹ vbe odẹ ọghe orhiọn. Vbe igiemwi, te Setan hoo nọ si ima digiẹn vbe odẹ ọghe orhiọn, sokpan, amuẹtinyan ẹre ọ ya ima “sẹtin rrọ ẹre ighẹ avbe ifẹnmwẹ erhẹn ne ọka ẹrhia nii filo.” (Ẹfis 6:16) Ma ghaa mwẹ amuẹtinyan, ma gha sẹtin zin egbe avbe ọlọghọmwa ni yevbe utete ne ẹi gia bi. Jesu keghi tama erhuanegbe ẹre wẹẹ: “Deghẹ uwa gele mwẹ iyayi ne ọ kpọlọ sẹ vbe ikpẹ itaba, wa gha sẹtin tama oke na wẹẹ, ‘Kpa vbe emwa gha rrie odọ.’ Ọ ghi gele kpa.” (Mat 17:20) Ugbẹnvbe a miẹn wẹẹ te amuẹtinyan ya ima deziẹn vbe odẹ ọghe orhiọn, inọta nọ ghi khẹke ne ima ziro yan ọre: Vbọ re amuẹtinyan? De vbene aro ne ima ya ghee odẹ ọghe ẹmwata ya dekaẹn amuẹtinyan ne ima mwẹ hẹ? De vbene ima khian ya ya amuẹtinyan ọghe ima wegbe sayọ hẹ? De ọmwa nọ khẹke ne ima mu ẹtin yan?—Rom 4:3.

VBỌ RE AMUẸTINYAN?

Ẹi re ọmwa ya Osa yi ọkpa ẹre ọ khian rhiẹre ma wẹẹ ọ mwẹ amuẹtinyan, rhunmwuda “avbe orhiọn dan vbe yayi [wẹẹ Osanobua rrọọ,] te iran ye guọ zẹzẹzẹ ba ẹmwẹ ohan.” (Jems 2:19) Vbọ ghi re amuẹtinyan?

E Baibol gi ima rẹn wẹẹ emwi eva ẹre amuẹtinyan demu. Nokaro, “amuẹtinyan ọre evba yaro yi wẹẹ, ẹi mwẹ ọ ma sẹ obọ.” (Hib 11:1a, NW) U ghaa mwẹ amuẹtinyan, u ghi gele ya ekhọe hia yayi wẹẹ, eyan hia ne Jehova yan rẹn gha mwẹ amusẹ. Vbe igiemwi, e Jehova keghi tama Ivbi Izrẹl wẹẹ: “Mẹ gu avan kevbe asọn ta ile nẹ, vbene a gha na miẹn wẹẹ, iran rre ye ẹghẹ iran zẹẹ, ilẹ nii, ai sẹtin rra ẹre. Erriọ vbe nọ, I gu e Devid ne ọguọmwadia mwẹ ta ile nẹ, . . . ile na, ai sẹtin rra ẹre.” (Jer 33:20, 21) Ọ mwẹ ẹghẹ ọkpa ne uwẹ he ya gha si osi wẹẹ, ughaghe ẹdẹ i khian ghi gbe ra ebi i khian ghi ro ra? Adeghẹ uwẹ mwẹ ilẹkẹtin wẹẹ, ẹi mwẹ ẹdẹ ma gbe, kevbe wẹẹ ẹi mwẹ ebi ma ro, ọ vbe khẹke ne u gha mwẹ ilẹkẹtin yan Osa nọ yi uki vbe owẹn wẹẹ, ẹmwẹ hia nọ tae gha mwẹ amusẹ!—Aiz 55:10, 11; Mat 5:18.

Nogieva, ne a gha mwẹ amuẹtinyan ọre “ne ekhọe ọmwa mu emwi ne a ma he dẹghe.” Emwi sẹtin mu ọmwa ekhọe sẹrriọ wẹẹ, ọ gha khọnrẹn wẹẹ a ma wa bẹghe emwi nii, a ghi ye yaeyi wẹẹ ọ gele rrọọ. (Hib 11:1b) Vbe igiemwi, ọvbokhan kherhe sẹtin nọ ruẹ wẹẹ, ‘Vbua ya rẹn hẹ wẹẹ ẹhoho rrọọ?’ Agharhemiẹn wẹẹ u ma he bẹghe ẹhoho ẹdẹ, u gha sẹtin ya unu kaẹn emwi eso ni sosẹ yọ wẹẹ ẹhoho gele rrọọ. U sẹtin tama rẹn wẹẹ ẹhoho ẹre ima hiọnrọn, ma họn vbe ẹhoho ghaa hoho, ma vbe bẹghe vbe ẹhoho ghaa mu abọ erhan yo muẹn rre. Ọvbokhan nii gha gele miẹn emwi nọ sosẹ yọ wẹẹ ẹhoho rrọọ, ọ ghi yaeyi, agharhemiẹn wẹẹ ọ ma he ya aro ọre bẹghe ẹhoho ẹdẹ. Erriọ osẹ ni rhiẹre ma wẹẹ Osanobua rrọọ, vbe ya ya ima mwẹ amuẹtinyan.—Rom 1:20.

TE IMA GHA YA EKHỌE HIA GBỌYẸMWẸ YE ODẸ ẸMWATA

Osẹ ọghe emwi ne ima i bẹghe ẹre ọ ya ima mwẹ amuẹtinyan wẹẹ emwi nii gele rrọọ. Nọnaghiyerriọ, ne ima mieke na gha mwẹ amuẹtinyan, te ọ khẹke ne ima gha mwẹ irẹnmwi “ẹmwata.” (1 Tim 2:4) Sokpan ọ ma wa fo ye evba. Ukọ e Pọl keghi kha wẹẹ: “Ekhọe ọre ima ya yayi.” (Rom 10:10) Ọna rhiema wẹẹ, ẹi re te ọmwa khian wa ya ẹmwata yi kẹkan, sokpan ọ ghi ya ekhọe hia gbọyẹmwẹ yọ. Ọna ẹre ọ khian yae gha ru emwi ni ya ẹko rhiẹnrhiẹn Osanobua vbe arrọọ ọghẹe. (Jems 2:20) Ọmwa nọ ma ya ekhọe hia gbọyẹmwẹ ye odẹ ọghe ẹmwata i khian sẹtin fi emwi nọ yayi werriẹ, emwi nọ rre ọre ekhọe, ẹre ọ khian ye gha ru. (2 Pit 3:3, 4; Jud 18) Ọna ẹre ọ si ẹre ne a na miẹn wẹẹ, ẹi re emwa hia ni bẹghe emwi ọyunnuan ni sunu vbe ẹghẹ nẹdẹ, ẹre ọ ghaa mwẹ amuẹtinyan. (Nọm 14:11; Jọn 12:37) Emwa ni ya ekhọe hia gbọyẹmwẹ ye odẹ ọghe ẹmwata, ẹre orhiọn nọhuanrẹn ọghe Osanobua ru iyobọ na ya gha mwẹ amuẹtinyan.—Gal 5:22; 2 Tẹs 2:10, 11.

EMWI NỌ YE DEVID GHA MWẸ AMUẸTINYAN NỌ WEGBE

Ọkpa vbe usun emwa ni ghaa mwẹ amuẹtinyan nọ wegbe ẹre Ọba e Devid ghaa khin. (Hib 11:32, 33) Vbọrhirhighayehẹ, ẹi re etiẹn e Devid hia ẹre ọ ghaa mwẹ amuẹtinyan nọ wegbe vberriọ. Vbe igiemwi, Eliab ne ọtiẹn e Devid ne ọdiọn kegha gu e Devid gui vbe ẹghẹ nọ ya wẹẹ irẹn khian gu e Golaiat gbinna. Uyinmwẹ nọ yinrin na rhiẹre ma wẹẹ, ọ ma gha mwẹ amuẹtinyan nọ wegbe. (1 Sam 17:26-28) Ai biẹ ọmwa biẹ amuẹtinyan, ai vbe rri ọre vbe ukhu, nọnaghiyerriọ, asikẹgbe ne Devid ghaa gu Osanobua mwẹ, ẹre ọ yae gha mwẹ amuẹtinyan.

Vbe Psalm 27, e Devid keghi gi ima rẹn emwi nọ ya irẹn do gha mwẹ amuẹtinyan. (Uviẹn 1) E Devid kegha ru erria yan odẹ ne Jehova ya miẹn ọnrẹn fan vbe obọ eghian ọghẹe. (Uviẹn 2, 3) Ọ kegha ya aro nọ ghaan ghee emwamwa ọghe ugamwẹ ẹmwata. (Uviẹn 4) E Devid ghaa deba eguọmwadia Osanoba ga e Jehova vbe Ọgua Osa. (Uviẹn 6) Ọ ghaa ya ekhọe hia na erhunmwu gie Jehova. (Uviẹn 7, 8) E Devid vbe gha hoo ne Osanobua gha maa irẹn emwi. (Uviẹn 11) Amuẹtinyan ne Devid ghaa mwẹ wegbe sẹrriọ wẹẹ, ọ na ghi nọ egbe ẹre wẹẹ: “Vbia gha te khian ẹmwẹ agbọn mwẹ hẹ, akpawẹ I i mwẹ amuẹtinyan?”—Uviẹn 13, NW.

ODẸ NE IMA KHIAN YA SẸTIN YA AMUẸTINYAN ỌGHE IMA WEGBE SAYỌ

U gha sẹtin gha mwẹ amuẹtinyan vbe na ghee Devid, deghẹ u na gha mwẹ egbe ekhọe ọghe Devid zẹvbe nọ rre ebe Psalm 27. Irẹnmwi nọ gbae ọre ẹyotọ ọghe amuẹtinyan nọ wegbe. Nọnaghiyerriọ, zẹvbe ne u ya tie Ẹmwẹ Osanobua kevbe ebe ne otu gbẹnnẹ ladian, orhiọn nọhuanrẹn ghi ru iyobọ nuẹ ya gha mwẹ akpa na sayọ. (Psm 1:2, 3) Zẹ ẹghẹ kọ ne u ya gha ru erria yan emwi ne u tie. Erria na ru ẹre ọ ya ima gbọyẹmwẹ ye emwi hia ne Jehova ru ne ima. Zẹvbe ne ima ya gbọyẹmwẹ ye emwi hia ne Jehova ru ne ima, amuẹtinyan ne ima mwẹ ghi gha wegbe sayọ. Ọna ẹre ọ khian ghi gua ima kpa ya gha yo iko kevbe ikporhu. (Hib 10:23-25) Amuẹtinyan ẹre ọ vbe ya ima na “erhunmwu” vbe ugbugbẹhia. (Luk 18:1-8) Nọnaghiyerriọ, “gha na erhunmwu vbe ẹghẹ hia,” u ghi gha mwẹ ilẹkẹtin wẹẹ e Jehova “gbaroghe ruẹ.” (1 Tẹs 5:17; 1 Pit 5:7) Amuẹtinyan ẹre ọ ya ima ru emwi esi, emwi esi ne ima ru ẹre ọ ya amuẹtinyan ọghe ima wegbe sayọ.—Jems 2:22.

MU ẸTIN YAN E JESU

Vbe asọn nokiekie ne Jesu gbe vbe agbọn, ọ keghi tama erhuanegbe ẹre wẹẹ: “Wa ya Osanobua yi. Wa vbe ya mwẹ yi ba ẹre.” (Jọn 14:1) Ọna rhiema wẹẹ, ẹi re Jehova ọkpa ẹre ọ khẹke ne ima mu ẹtin yan, ọ vbe khẹke ne ima mu ẹtin yan e Jesu. Sokpan, vbe ima khian ya sẹtin mu ẹtin yan e Jesu hẹ? Gi ima guan kaẹn odẹ eha ne ima gha ya sẹtin ru vberriọ.

Okaro, gha ghee izọese adẹwerriegbe zẹvbe ẹse ọhẹ ne Jehova ru ne uwẹ tobọ uwẹ. Ukọ e Pọl khare wẹẹ: “Iyayi ọre I ghi ya rrọọ vbe uwu ovbi Osanobua, ọmwa ne ọ hoẹmwẹ mwẹ, ọ na rhie ẹdẹ agbọn rẹn mẹ.” (Gal 2:20) U gha gele mu ẹtin yan e Jesu, ẹre u khian na yayi wẹẹ, uwẹ tobọ ruẹ ẹre Jesu wu na, kevbe wẹẹ, izọese adẹwerriegbe ẹre ọ kie ẹkpotọ yọ, ne u gha mwẹ ayabọ ọghe orukhọ. U ghi vbe yayi wẹẹ, izọese adẹwerriegbe na, ẹre ọ ya ruẹ mwẹ ayayẹro ọghe arrọọ etẹbitẹ, ẹre ọ vbe re odẹ nọ ghi hiunsi sẹ, ne Jehova ya rhiẹre ma wẹẹ irẹn hoẹmwẹ ruẹ. (Rom 8:32, 38, 39; Ẹfis 1:7) U gha gele yayi wẹẹ, uwẹ tobọ ruẹ gha miẹn ere vbe izọese adẹwerriegbe, u i khian gha ghee egbe ruẹ zẹvbe ọmwa ne ẹi mwẹ esa nọ ye.—2 Tẹs 2:16, 17.

Nogieva, gha na erhunmwu gie Jehova, ne u mieke na sikẹ ọre sayọ. Izọese adẹwerriegbe ẹre ọ zẹe ighẹ ima sẹtin ya ekhọe hia “gha die odaro ẹkete Osanobua, ehe ne ẹse ọhẹ ye. Evba nii ọre ima gha na miẹn itohan rhie kevbe ẹse ọhẹ ne ọ gha yi ima obọ vbe ẹghẹ ne a na gualọe zẹẹ.” (Hib 4:15, 16; 10:19-22) Erhunmwu ẹre ọ ru iyobọ ne ima ya mudia gbain vbe ẹghẹ edanmwẹ.—Luk 22:40.

Nogieha, gha họn ẹmwẹ ne Jesu. Ukọ e Jọn keghi kha wẹẹ: “Ọmwaikọmwa ne ọ ya Ọmọ yi, mwẹ arrọọ ne ẹi fo, ọmwa ne ọ ma ya ẹmwẹ Ọmọ ru emwi, ẹi khian gha mwẹ arrọọ, sokpan izohu Osanobua gha rrọọ ẹre uhunmwu ẹdẹdẹmwẹdẹ.” (Jọn 3:36) Ẹmwẹ ne Jọn tae na, rhiẹre ma wẹẹ, ọmwa nọ mu ẹtin yan e Jesu, ẹre ọ vbe họn ẹmwẹ nẹẹn. Nọnaghiyerriọ, u ghaa họn ẹmwẹ ne Jesu, ọni rhiema wẹẹ u mwẹ amuẹtinyan daa re. Odẹ ne u khian ya họn ẹmwẹ ne Jesu ọre ne u gha “mu uhi e Kristi sẹ,” ọni nọ wẹẹ, u ghi gha lele iyi hia ne Jesu yi ne ima. (Gal 6:2) U ghaa lele adia nọ ke obọ “ọguọmwadia esi kevbe ne ọ wan” rre, ọni vbe rhiema wẹẹ u họn ẹmwẹ ne Jesu. (Mat 24:45) U ghaa họn ẹmwẹ ne Jesu, ọ gha ru iyobọ nuẹ ya zin egbe avbe ọlọghọmwa ni yevbe okpẹhoho.—Luk 6:47, 48.

GI AMUẸTINYAN RUẸ GHA RE NE ẸI BEGHE

Ọ ghaa mwẹ okpia ọkpa nọ tama e Jesu wẹẹ: “I mwẹ iyayi sokpan ọ ma kpọlọ sẹ. Lahọ ne u yọ mwẹ obọ nọ [wegbe] sayọ.” (Mak 9:24) Okpia na ghaa mwẹ amuẹtinyan, sokpan rhunmwuda ọmwa imuegberriotọ ne okpia na khin, ọ na rẹn wẹẹ, amuẹtinyan ne irẹn mwẹ ma wegbe sẹ. Vbe na ghee okpia na, ọ mwẹ ẹghẹ eso vbe arrọọ ọghe ima, ne ima ya gualọ amuẹtinyan nọ wegbe. Ma hia gha sẹtin ya amuẹtinyan ọghe ima khian wegbe sayọ nia. Zẹvbe ne ima tae dee sin, amuẹtinyan ọghe ima gha khian ne ẹi beghe deghẹ ima tie Ẹmwẹ Osanobua vbe ẹghẹ kevbe deghẹ ima na ru erria yan rẹn. Ọna ẹre ọ khian vbe ya ima gha gbọyẹmwẹ ye emwi hia ne Jehova ru ne ima. Emwi ọvbehe nọ khian vbe ya amuẹtinyan ọghe ima wegbe sayọ ọre deghẹ ima deba etẹn ga e Jehova; ma ghi gha yo iko kevbe ikporhu, ma ghi vbe gha na erhunmwu vbe ẹghẹ hia. Amuẹtinyan ọghe ima gha re nọ deziẹn, ma gha miẹn afiangbe ne wọrhọwọrhọ, ma ghi do gha re emwa ne Jehova gele hoẹmwẹ ọnrẹn.—Jud 20, 21.