UYINMWẸ ỌGHE IMA NE IVBIOTU E KRISTI
Adẹwerriegbe Ẹre Ọ Zẹ Ighẹ Arriọkpaegbe Rrọọ
Ugie Ayere keghi ya ima muẹn roro ighẹ avbe afiangbe ne ima khian miẹn vbe odaro rhunmwuda adẹwerriegbe. Usun avbe afiangbe na keghi re arriọkpaegbe. Ẹi ahoo ọghe Jehova te nọ, ne ima gha wu. Ọni ẹre ọ siẹ ne ọ na da ọmwa sẹ ugboloko deghẹ ọmwa nọ sikẹ ọmwa na wu. (1 Kọr 15:26) Ọ wa balọ e Jesu vbe ọ bẹghe emwa viẹ vbe Lazarọs wu. (Jọn 11:33-35) Ugbẹnvbe a miẹn wẹẹ Jesu ọre ọmwa nọ wa rhiẹre ma aro ọmwa ne Erhae khin, ma gha sẹtin gha mwẹ ilẹkẹtin wẹẹ, ọ wa balọ e Jehova vbe irẹn gha dẹghe ima, vbe ima gha khiẹ rhunmwuda emwa ni sikẹ ima ni wu. (Jọn 14:7) E Jehova wa khẹ nọ rre ighẹ ẹdẹnẹdẹrriọ, ne irẹn khian ya huẹn eguọmwadia irẹn ni wulo kpaegbe, ọ vbe khẹke ne ima yaro yọ.—Job 14:14, 15.
Ugbẹnvbe a miẹn wẹẹ Osa ọghe emwamwa ẹre Jehova khin, iziro nọ gbae nọ deghẹ ima na yayi wẹẹ ọkade ọkade ẹre emwa ni wulo khian ya gha rriọkpaegbe. (1 Kọr 14:33, 40) Na gha te ya miẹn wẹẹ orinmwi ẹre ima ghi ree, ọbokhian ẹre ima khian ghi gha gbe ne emwa ni wulo. Uwẹ muẹn roro ighẹ arriọkpaegbe na ra, katekate vbe u gha rre uwu akhiẹ ra? (2 Kọr 4:17, 18) Uwẹ kpọnmwẹ Jehova ye ikpemehe ọghe adẹwerriegbe kevbe ne ọ na gima rẹn vbuwe Evbagbẹn Nọhuanrẹn wẹẹ emwa ni wulo gha rriọkpaegbe ra?—Kọl 3:15.
De ọse ruẹ ra ọtuẹn ne u wa hoo ne u werriegbe miẹn?
De emwa eso vbe Baibol ne u mobọ hoo ne u miẹn kevbe ne u vbe gu guan?