UYINMWẸ ỌGHE IMA NE IVBIOTU E KRISTI
Uyinmwẹ Esi Kevbe Ọghọ Ne U Mwẹ Gha Sẹtin Fi Ẹmwa Ekhọe Werriẹ
Ikpia nibun ne ẹi ka ga e Jehova keghi do suẹn gha ga e Jehova rhunmwuda uyinmwẹ esi ọghe ọvbokhan iran. Vbọrhirhighayehẹ, ikhuo eso keghi zin egbe ọlọghọmwa nibun vbe obọ arowa iran vbe ọwara ukpo nibun, a te miẹn wẹẹ arowa iran do fiwerriẹ. (1 Pit 2:21-23; 3:1, 2) Adeghẹ u rri oya vbe obọ arowa ruẹ, hia ne u ye gha ya emwi esi khọnmiotọ yan emwi dan. (Rom 12:21) A sẹtin miẹn wẹẹ, ọdafẹn ruẹ i rhie ehọ nuẹn ta yi vbe u ghaa kporhu ma rẹn, sokpan, uyinmwẹ esi ruẹ gha sẹtin yae fiwerriẹ.
Deghẹ ọdafẹn ruẹ i ga e Jehova, ye gha mwẹ amuroro daa re. (Fil 2:3, 4) Gha mwẹ ẹnina kevbe agiẹngiẹn daa arowa ruẹ, u ghi vbe hia ne u gha ru iwinna nọ bi yọ ruẹ egbe. Deghẹ ọdọ ruẹ na gha gu ruẹ guan, u ghi gbehọ kotọ danmwehọ re. (Jems 1:19) Gha mwẹ izinegbe, gi ọdafẹn ruẹ rẹn wẹẹ, u hoẹmwẹ ọnrẹn. Deghẹ arowa ruẹ i ya obọ esi mu ruẹ, u ghi yerre wẹẹ, imudiase ne u mwẹ wa ya ẹko rhiẹnrhiẹn e Jehova.—1 Pit 2:19, 20.
GHEE VIDIO NỌ MWẸ UHUNMWUTA NỌ KHARE WẸẸ, E JEHOVA ẸRE Ọ RHIE ẸRHIỌN YE IMA IWU NE IMA MIEKE NA SẸTIN MU IHẸ ỌGHE IMA, VBE IYEKE ỌNI, A GHI RHIE EWANNIẸN YE AVBE INỌTA NA:
De vbene emwi ghaa ye hẹ ne Grace Li vbe ọ da ru orọnmwẹ?
De emwi nọ yae suẹn gha ruẹ e Baibol?
De isievẹn ne Ọtẹn Nokhuo Li werriẹ aro daa vbe ọ ghi dinmwiamẹ nẹ kevbe wẹẹ vbọ ya sẹtin zin egbe ẹre?
De erhunmwu ne Ọtẹn Nokhuo Li ghaa na vbekpae arowa re?
De afiangbe ne Ọtẹn Nokhuo Li he miẹn rhunmwuda uyinmwẹ esi ne ọ mwẹ?
Uyinmwẹ esi kevbe ọghọ wa kakabọ ru ekpataki!