ABỌ 2
Uwa Gha Ya Ekhọe Nẹi Beghe Gu Egbe Loo
“Emwi ne Osanobua ku kugbe nẹ, ọmwa rhọkpa ghẹ wannọ iran.”—Mak 10:9
E Jehovah hoo ne ima gha ‘ye aro nọ ghaan ghee ekhọe nẹi beghe.’ (Maika 6:8) Ọna keghi re emwi kpataki vbe orọnmwẹ ruẹ rhunmwuda, ai khian sẹtin mwẹ ilẹkẹtin yan ọmwa na ma gba ẹko ẹre. Ne ahoẹmwọmwa mieke na gha rre uwu ẹkpo ọdọ vbe amwẹ, ọ khẹke ne iran gba ẹko egbe.
Vbe ẹdẹnẹrẹ, orọnmwẹ nibun keghi rre ikpadede rhunmwuda wẹẹ ọdọ vbe amwẹ i ghi ya ekhọe nẹi beghe gu egbe loo. Ne u ya sẹtin gbogba ga orọnmwẹ ruẹ, te u gha ru atamuolọyan eva.
1 GHẸ YE ORỌNMWẸ RUẸ RHẸGHẸ
EMWI NE BAIBOL KHARE: ‘Muẹn karo emwi nọ ru ekpataki sẹ.’ (Filipai 1:10) Orọnmwẹ ruẹ keghi re usun emwi nọ ghi ru ekpataki sẹ vbe arrọọ ọghuẹ, rhunmwuda ọni, ghẹ yae rhẹghẹ.
E Jehova hoo ne u ya ekhọe hia hoẹmwẹ ọmwa ne uwa gba rrọọ vbe orọnmwẹ kevbe ne uwa gha ‘sọyẹnmwẹ arrọọ’ kugbe. (Asan-Ibo 9:9) Ọ wa tae vbe odẹ nọ dewuarorua wẹẹ, ne u ghẹ yangbe ọmwa ne uwa gba rrọọ vbe orọnmwẹ. Nọghayayerriọ, ọ khẹke ne uwa eveva ru emwi ke emwi ne uwa rẹnrẹn wẹẹ ọ gha ye uwa gha mwẹ oghọghọ. (1 Kọrinti 10:24) Gha mwẹ ẹghẹ ne ọmwa ne uwa gba rrọọ vbe orọnmwẹ kevbe ne u gha gbọyẹmwẹ ye emwi nọ ru.
EMWI NE U GHA SẸTIN RU:
Gia miẹn wẹẹ uwa eveva ru emwi kugbe vbe ẹghẹ hia, uwa gha mwẹ ẹghẹ ne egbe ẹsẹsẹmwẹse
Gha mu ẹmwẹ uwa eveva roro, ẹi re ọghuẹ ọkpa
2 GBOGBA GA ẸKOKOUDU RUẸ
EMWI NE BAIBOL KHARE: “Ọmwaikọmwa gha ghee okhuo sẹrriọ ighẹ te aro ẹre ghi viẹn yọ, ọ gu okhuo nii ru oghẹ nẹ sin vbe ekhọe re.” (Matiu 5:28) Adeghẹ ọmwa na gha muẹn roro vbe ẹghẹ hia ighẹ emwi nọ dekaan alamoghẹ, ọ gha gia na kha wẹẹ, te ọ ghẹẹ lẹga ọmwa ne iran gba rrọọ vbe orọnmwẹ.
E Jehova khare wẹẹ ọ khẹke ne u ‘gbogba ga ẹkokoudu ruẹ.’ (Itan 4:23; Jerimaia 17:9) Ne u mieke na sẹtin ru ọna, te u gha begbe vbe emwi ne u ghee. (Matiu 5:29, 30) Yegbe taa odede ighe Job, nọ gu aro ẹre tile wẹẹ irẹn i khian gia aro irẹn wu ye okhuo ọvbehe. (Job 31:1) Ru atamuolọyan wẹẹ, u i khian ghee ughe ne emwa na bannọ uan hiehie. U ghi vbe tamuolọyan rẹn wẹẹ, vbọ gberra ọmwa ne uwa gba rrọọ vbe orọnmwẹ ọkpa, u i khian gha gu ọmwa ọvbehe gbe ọkiẹkiẹ.
EMWI NE U GHA SẸTIN RU:
Giẹ vẹe ne emwa hia rẹn wẹẹ te u wa sikan muẹn ọmwa ne uwa gba rrọọ vbe orọnmwẹ
Gha mu ẹmwẹ ọmwa ne uwa gba rrọọ vbe orọnmwẹ roro. Adeghẹ ọ mwẹ uma ne uwẹ vbe ọmwa ọvbehe gba ye, ne u rẹnrẹn wẹẹ, ọ gha ye ohu mu ọmwa ne uwa gba rrọọ vbe orọnmwẹ, u ghi wa dobọ re yi ẹgiẹgiẹ