UYINMWẸ ỌGHE IMA NE IVBIOTU E KRISTI
Emwi Ne Ọdọ Vbe Amwẹ Gha Ru Nọ Gha Ya Iran Sikẹ Egbe Sayọ
Te Ebraham vbe Sera wa hoẹmwẹ egbe, iran na vbe gha rrie ọghọ ne egbe, te ọ wa khẹke ne avbe ọdọ vbe amwẹ gha ya egbe taa iran. (Gẹn 12:11-13; 1 Pit 3:6) Vbọrhirhighayehẹ, iran vbe werriẹ aro daa ọlọghọmwa eso vbe orọnmwẹ ọghe iran. De emwi ne avbe ọdọ vbe amwẹ gha miẹn ruẹ vbe igiemwi ọghe Ebraham kevbe Sera?
Uwa gha gu egbe guan. Ọdafọn ra ọvbokhan ruẹ gha ya ohu ta ẹmwẹ nọ sọnnọ ruẹ, u ghi gbe ibiẹ rrie, u ghi vbe hia ne u rẹn evbọzẹe nọ na guan vberriọ. (Gẹn 16:5, 6) Uwa ghi hia ne uwa gha ru emwi kugbe. Gi uyinmwẹ ruẹ kevbe ẹmwẹ ne u ta gha rhiẹre ma wẹẹ, u hoẹmwẹ ọdafọn ra ọvbokhan ruẹ. Deba ọni, wa ghi gi asikẹgbe ne uwa gu e Jehova mwẹ gha wegbe sayọ, odẹ ne uwa khian ya ru ọna ọre ne uwa gha tie Baibol ne egbe uwa, uwa ghi gha na erhunmwu, uwa ghi vbe gha ga e Jehova kugbe. (Asan 4:12) Ọdọ vbe amwẹ gha hoẹmwẹ egbe, orọnmwẹ ọghe iran ghi gha rhie uyi gie Jehova rhunmwuda, e Jehova ẹre ọ mu emwamwa orọnmwẹ gbọọ.
GHEE VIDIO NỌ MWẸ UHUNMWUTA NỌ KHARE WẸẸ EMWI NỌ GHA YA ỌDỌ VBE AMWẸ SIKẸ EGBE SAYỌ, IYEKE ỌNI, A GHI ZẸ EWANNIẸN YE AVBE INỌTA NA:
De emwi eso nọ ghaa sunu vbe vidio ne ima ghee re ban, nọ rhiẹre ma wẹẹ Shaan kevbe Kiara ma ghi sikẹ egbe vbene iran ka ye?
Vbọzẹe nọ na khẹke ne ọdọ vbe amwẹ gha gu egbe guan vbe ẹghẹ hia?
De vbene igiemwi esi ọghe Ebraham kevbe Sera ya ru iyobọ ne Shaan kevbe Kiara?
De emwi eso ne Shaan kevbe Kiara ru, nọ ghi ya iran sikẹ egbe sayọ?
Vbọzẹe nọ na khẹke ne ọdọ vbe amwẹ gha yerre wẹẹ, ẹi mwẹ ọlọghọmwa eso ma rhiegbe ma vbe orọnmwẹ ọghe iran?
U gha sẹtin gha mwẹ oghọghọ vbe orọnmwẹ ruẹ!