UYINMWẸ ỌGHE IMA NE IVBIOTU E KRISTI
Ya Ekhọe Hia Mu Ẹtin Yan Ẹmwẹ Ne Baibol Tae
Ẹmwẹ Osanobua gha sẹtin fi ẹdagbọn ima werriẹ. (Hib 4:12) Vbọrhirhighayehẹ, ma ke sẹtin miẹn ere vbe avbe ibude ni rre uwu ẹre, ọ khẹke ne ima ya ekhọe hia yayi wẹẹ “ẹmwẹ Osanobua” gele nọ. (1 Tẹs 2:13) De emwi ne ima gha ru, ne ima mieke na ya ekhọe hia yayi wẹẹ ẹmwata ẹre ọ rre uwu e Baibol?
Gha tie Baibol vbe ẹdẹgbegbe. Zẹvbe ne u ya tie ẹre, gbarokotọ ne u mieke na bẹghe emwi nọ rhie ẹre ma wẹẹ, e Jehova ẹre ọ gele yan ẹmwẹ nọ rre uwu ẹre. Vbe igiemwi, tie ẹmwẹ ibude nọ rre ebe Itan, u ghi vbe muẹn roro vbene ẹmwẹ nọ rre uwu ẹre gha ya sẹtin ru iyobọ ne ima ya gha ya ẹwaẹn ru emwi vbe ẹdẹnẹrẹ.—Itan 13:20; 14:30.
Gualọ uhunmwuta ọkpa ne u gha hoo ne u ruẹ vbekpa re. Hia ne u rẹn emwi ughughan ni rhie ẹre ma wẹẹ, ẹmwẹ Osanobua ẹre Baibol gele khin. Gha rrie uhunmwuta na tie ẹre, “The Bible” kevbe “Inspired by God” vbe Research Guide for Jehovah’s Witnesses. Deghẹ u hoo ne u rẹn emwi ughughan ni rhie ẹre ma wẹẹ, ẹmwẹ nọ rre Baibol ma he fi werriẹ, ya tie Appendix A3 ọghe New World Translation.
GHEE VIDIO NỌ MWẸ UHUNMWUTA NỌ KHARE WẸẸ, EVBỌZẸE NE IMA NA . . . MU ẸTIN YAN ẸMWẸ OSANOBUA, IYEKE ỌNI, A GHI ZẸ EWANNIẸN YE AVBE INỌTA NA:
De vbene emwi eso na vinnọ ye egbekẹn na miẹn vbe Ọgua Osa nọ rre Karnak vbe Igipt, ya so igiẹ yọ wẹẹ ẹmwata ẹre emwi hia ni rre Baibol gele khin?
De vbene ima ya rẹn wẹẹ, ẹmwẹ nọ rre Baibol ma he fi werriẹ?
Na na miẹn wẹẹ, e Baibol ye rrọọ do sẹ ẹdẹnẹrẹ, de vbene ọna ya ya ruẹ rẹn wẹẹ Ẹmwẹ Osanobua gele nọ?—Tie Aizaia 40:8