Gha Ya Emwi Ne U Ruẹ Ru Iyobọ Ne Emwa Ọvbehe

Ọ wa sẹ ima ọyẹnmwẹ vbe ima gha ruẹ emwi ne egbe ima, sokpan, nọ ghi ya ima sẹ ọyẹnmwẹ sẹ keghi re vbe ima ghaa gu emwa ọvbehe guan vbekpa emwi ne ma ruẹ re. Ebe Itan 11:25 khare wẹẹ: “U ghaa yi emwa ọvbehe obọ, a gha vbe yi uwẹ obọ.”

Ma ghaa gu emwa ọvbehe guan vbekpa emwi ne ima ruẹ re, ọ gha ru iyobọ ne ima ya gha ya emwi ne ima ruẹ ẹre rre, ma ghi vbe gha mwẹ irẹnmwi sayọ. Rhunmwuda ne ima na rẹn wẹẹ, emwi ne ima ruẹ re nii gha vbe sẹtin ru iyobọ ne emwa ọvbehe, te ọ wa ya ima ghọghọ vbe ima ghaa gu iran guan vbekpa ẹre.​—Iwinna 20:35.

Danmwẹ ọnrẹn ghee: Vbe uzọla nọ dee na, hia ne u gualọ ẹkpotọ ne u gha ya gu ọmwa ọvbehe guan vbekpa emwi ne u ruẹ re. Ọ sẹtin gha re ọmwa ruẹ vbe uwu ẹgbẹe, ọmwa ne uwa gba rre iko, ne uwa gba winna, ne uwa gba rre esuku, ọmwa nọ rre ẹdogbo ruẹ ra ọmwa ne u miẹn vbe ikporhu. Hia ne u tae vbe odẹ ọghe abiọmwabiẹ, nọ mieke na gha khuẹrhẹ ne ọmwa ne u gu guan ya rẹn otọ emwi ne u ta.

Yerre wẹẹ: Te ọ khẹke ne u gha ya emwi ne u ruẹ rhie igiọdu ne emwa ọvbehe, ẹ i re ne u yae gha rhie uyi ne egbuẹ.​—1 Kọr 8:1.