Emwi Nọ Khian Ru Iyobọ Ne Emwa Na Ya Obọ Atosi Mu

E World Health Organization khare wẹẹ “Obọ atosi ẹre emwa nibun wa ya mu ikhuo vbe agbọn ne ima ye na. Te ọ ghi yevbe emianmwẹ dan nọ vẹẹ wa khian. Te ọ wa khẹke na zẹ emwi ru vbọbọvbobọ.” Iran ye vbe kha wẹẹ, a gha ghae ikhuo ni rre agbọn ye ihe iha, obọ ọkpa vbọ ni he ru orọnmwẹ ra ni mwẹ igbakhian, ẹre a he yin uyinmwẹ atosi na daa, ra na he mu yagha. E UN khare wẹẹ, ọ ghaa mwẹ ukpo ọkpa ne ikhuo 137 ya gha wulo ẹdẹgbegbe, ọ ma gha re ọdafọn iran ra igbakhian iran, ọ sẹtin gha re ọkpa vbe uwu ẹgbẹe, ẹre ọ mwẹ obọ vbe uwu iran.a

Iyẹn nibun gima rẹn vbene uyinmwẹ atosi na he de otọ sẹ hẹ, sokpan iran ma he sẹtin gie ẹre, aro obalọ ne emwa na ya obọ atosi mu la gberra.

Egbe emwi vbenia he sunu daa ruẹ ẹdẹ ra? U rẹn ọmwa nọ he sunu daa ra? Ọ ghaa yerriọ, ẹmwẹ ni rre ototọ mwa na rhie ladian vbe uwu e Baibol, gha ru iyobọ nuẹn.

Adeghẹ ọdafọn ra igbakhian na ya obọ dan muẹn, ẹi re uwẹ ọ siẹ

Emwa gha sẹtin ru iyobọ nuẹn

Osanobua hoẹmwẹ ruẹ

Uyinmwẹ atosi vbenia gha rherhe sẹ ufomwẹ

Vbene u khian ya ru iyobọ ne ọmwa na ya obọ atosi mu

Adeghẹ ọdafọn ra igbakhian na ya obọ atosi muẹn, ẹi re uwẹ ọ siẹ

Emwi Ne Baibol Khare: “Dọmwade ọghọe vbe uwu ima ọre ọ ra na iyẹn egbe ẹre ma Osanobua.”—Rom 14:12.

Ye ọna rre: Ọmwa nọ ya obọ atosi mu ruẹ, ẹre ọ rriabe.

Adeghẹ ọdafọn ra igbakhian na tama ruẹ wẹẹ, uwẹ ẹre ọ siẹ ne irẹn na ya obọ vberriọ muẹn, ohoghẹ ẹre ọ tae. Obọ esi ẹre ọ khẹke na ya gha mu ọvbokhan ọmwa, ẹi re obọ atosi.—Kọlose 3:19.

Ugbẹnso, emwi nibun ẹre ọ siẹ ne emwa na ya obọ atosi mu ọmwa, ọ sẹtin gha re rhunmwuda ọmwa nii mwẹ emianmwẹ ẹrherhe, ra ọ sẹtin gha re ẹgbẹe ne ọ na wan ra ọmwa nọ wa da ayọn gbe egbe nọ. Vbene ọ rhirhi gha ye hẹ, te ọ khian na iyẹn egbe ẹre ma Osanobua. Obọ ọmwa nii ẹre ọ ghi ye deghẹ ọ gha fi uyinmwẹ ọnrẹn werriẹ.

Emwa gha sẹtin ru iyobọ nuẹn

Emwi ne Baibol khare: “Gualọ ude vbe ehe ne a gha na ṣetin bu ruẹ ude hia, ọ gha dunna nuẹn.”—Itan 15:22.

Ye ọna rre: Adeghẹ arrọọ ruẹ rre ikpadede ra u ma rẹn emwi nọ khẹke ne u ru, emwa ọvbehe gha sẹtin ru iyobọ nuẹ.

Vbọzẹe nọ na khẹke ne u nọ iyobọ vbe obọ emwa ọvbehe? Adeghẹ u na gha re ọmwa na ya obọ atosi mu, iro sẹtin gba ruẹ ẹko. Ọ ghaa yerriọ, ọ sẹtin gha lọghọ ruẹ ne u ru azẹ nọ khẹke, rhunmwuda u ma rẹn emwi nọ ru ekpataki sẹ vbe uwu emwi na hae ye ugan na:

• Ehe ne u khian rhie uhunmwu lẹ re yi

• Vbene u khian ya gbaroghe emọ hẹ

• Adeghẹ u gha sẹtin kpemehe ne egbuẹ

• Ahoẹmwọmwa ne u mwẹ ne ọdafọn

• U sẹtin ye gha hoo ne u gu ọdafọn gha rrọọ deghẹ ọ na fi werriẹ.

Ọghe ne ẹmwata, iro sẹtin han ruẹ rhunmwuda vbene emwi hia yuẹ hẹ. De ọmwa ne u gha sẹtin nọ iyobọ vbe obọ ẹre?

Ọse ne u gba ẹko ẹre ra ọkpa vbe ẹgbẹ ruẹ sẹtin ru iyobọ nọ khẹke nuẹn. Adeghẹ u na mu otọ ẹko ruẹ ma ọmwa nọ hoẹmwẹ ruẹ, ọ sẹtin mu ruẹ orhiọn sotọ.

Ọ mwẹ emwa ni ru iyobọ ne emwa ni rre egbe ọlọghọmwa vbenia, u sẹtin ya e fon tie iran, ne iran ru iyobọ nuẹn. Iran gha wa ru iyobọ nuẹn. Iran gha vbe tama ruẹ emwi nọ khẹke ne u ru, ne u ya gbogba ga egbuẹ, ne ẹbe ghẹ mieke na rhuan. Adeghẹ ọdafọn rẹn wẹẹ irẹn mwẹ ọlọghọmwa vbenia kevbe wẹẹ, ọ mu egbe nọ ya fi werriẹ, iran na gha vbe sẹtin ru iyobọ nẹẹn, ya rẹn owẹ nokaro nọ khẹke nọ zẹe.

Emwa ọvbehe rrọọ ni gha vbe sẹtin ru iyobọ nuẹ vbobọvbobọ deghẹ arrọọ ruẹ na gha rre ikpadede. Usun iran na ọre avbe ọbo ebo, avbe nurse kevbe emwa ọvbehe ni fiẹnro egbe iwinna vberriọ.

Osanobua hoẹmwẹ ruẹ

Emwi ne Baibol khare: “[E Jehova]b sikẹ iran, ne agbọn zẹ ọre ẹtin. Ọ vbe miẹn iran hia ne ẹtin emwi hia fo nẹ fan.”—Psalm 34:18.

Ye ọna rre: Osanobua yan rẹn wẹẹ irẹn gha ru iyobọ nuẹn.

E Jehova gele hoẹmwẹ ruẹ. (1 Pita 5:7) Ọ rẹn vbene emwi yuẹ hẹ. Ọ gha sẹtin ya Ẹmwẹ Ọghẹe fu ruẹ ẹko rre. Ọ hoo ne u gha na erhunmwu gie irẹn. Ẹghẹ ke ẹghẹ ne u ya na erhunmwu, tama rẹn nọ rhie ẹwaẹn kevbe ẹtin nuẹn ne u mieke na rẹn emwi nọ khẹke ne u ru.—Aizaia 41:10.

Uyinmwẹ atosi vbenia gha rherhe sẹ ufomwẹ

Emwi ne Baibol khare: “Edọmwade ọghọe gha rrọọ vbe ofumwegbe vbe ugbo azara kevbe oliv ẹre, ọmwarhọkpa i ghi vbe runran ẹẹn. E Nọyaẹnmwa ne Oghodua ru eyan na nẹ.”—Maika 4:4.

Ye ọna rre: E Baibol yan rẹn wẹẹ, ẹghẹ dee ne emwa hia khian ya gha rrọọ vbe uwu ọfumwegbe.

E Jehova ọkpa ẹre ọ khian sẹtin sọfurre ye ọlọghọmwa ne ima hia werriẹ aro da. E Baibol yan rẹn wẹẹ: “Ọ gha khiẹn ameve hia hin aro iran rre. Uwu i ghi ra gha rrọọ ọvbehe, ra akhiẹ ra obalọ. A ho emwi nẹdẹ hia bẹkun nẹ.” (Arhie Maan 21:4) Vbe ẹghẹ nii, ai khian ghi ye emwi dan hia ni sunu daa ima rre. (Aizaia 65:17) Agbọn nọ rhiẹnrhiẹn na ẹre Baibol yan rẹn wẹẹ, ọ gha sẹ ruẹ obọ.