A Gha Ghae Aranmwẹ Oha Ni Ghaa Rrọọ Vbe Ukpo 50 Nọ Gberra Ye Ihe Igbe, Ọ Ma Sẹ Obọ Ọkpa Vbe Ukhiọnmwẹ Nọ Ghi Rrọọ Vbe Ẹdẹnẹrẹ—De Emwi Ne Baibol Tae?

Vbe October 9, 2024, e World Wildlife Fund keghi kha wẹẹ, emwi eso ne emwa nagbọn ru ẹre ọ si ẹre ne avbe aranmwẹ oha ghi na dibu yọ dibu yọ, emwi nọ da ọmwa ẹre ọna wa khin. Iran vbe kha wẹẹ, “a gha ghae aranmwẹ oha ni ghaa rrọọ vbe ọwara ukpo 50 nọ gberra ye ihe igbe (1970-2020), ọ ma sẹ obọ ọkpa vbe ukhiọnmwẹ nọ ghi rrọọ vbe ẹdẹnẹrẹ.” Iran vbe ya obọ sekhae ne emwa wẹẹ: “Ọna i re emwi na ya ku hiehie, rhunmwuda, adeghẹ ọ na ye gha yerriọ vbe ukpo isẹn nọ dee, emwi nọ wegbe sẹtin sunu daa emwi ni mwẹ arrọọ ni rre uhunmwu otagbọn na.”

Te egbe iyẹn vbenian wa kpa emwa ni bun odin. Ma ma hoo ne emwi rhọkpa sunu daa uhunmwu otagbọn na ne mose mose kevbe avbe aranmwẹ oha ni rrọọ. Vbọzẹ? Rhunmwuda, Osanobua hoo ne ima gha gbaroghe avbe aranmwẹ.—Gẹnẹsis 1:27, 28; Itan 12:10.

Nọnaghiyerriọ, u sẹtin gha nọ wẹẹ, ‘Ma gha gele sẹtin gbogba ga avbe aranmwẹ oha ni rre otagbọn na ra? De emwi ne Baibol tae?’

Emwi ne ima ya aro yi vbe odaro

Ẹ i mwẹ vbene ima gha hia sẹ hẹ, ma i khian sẹtin ru ẹre ne emwi rhọkpa ghẹ sunu daa avbe aranmwẹ oha, Osanobua ọkpa ẹre ọ khian sẹtin gbogba ga iran. E Baibol ka tae yotọ vbe ebe Arhie Maan 11:18 wẹẹ, Osanobua gha “fuẹn iran ruan ighẹ iran ni fuẹn agbọn na.” Emwi eva ẹre ako na ma ima re:

1. 1. Osanobua i khian kue ne emwa wa mu agbọn na rhia fo fẹfẹfẹ.

2. 2. Osanobua gha zẹ emwi ru vbe nẹi khian ghi kpẹẹ gbe. Vbe ima ya rẹn hẹ? Ẹghẹ ne ima wa ye na ẹre emwi ne emwa nagbọn ru, nọ ya avbe aranmwẹ oha dibu yọ, ghi ya tua sẹ.

De vbene Osanobua khian ya sọfurre ye ena hia hẹ? Ọ gha mu Arriọba ọghẹe rre, Arriọba na gha kha yan uhunmwu otagbọn na. (Matiu 6:10) Arriọba na gha ma emwa nagbọn ni hoẹmwẹ Osanobua emwi, ne iran mieke na sẹtin gbaroghe avbe aranmwẹ oha ni rre uhunmwu otagbọn na.—Aizaia 11:9.