Te Avbe Osẹe Jehova Fi Ẹmwẹ Ni Rre Baibol Werriẹ, Nọ Mieke Na Gua Iyayi Ọghe Iran Ro Ra?
Ẹn o, ima ma ru vberriọ. Vbene ẹmwata, iyayi ọghe ima eso rrọọ ne ima fi werriẹ rhunmwuda ne iran ma na gua e Baibol ro.
Ẹi re avbiẹ ezanzan ma ru vbekpae Baibol, ma ke do zedu e New World Translation of the Holy Scriptures ladian vbe ukpo 1950. Sokpan, ọ te sẹ ẹghẹ na, e Baibol ughughan na ghaa miẹn vbe ẹghẹ nii, ẹre ima ghaa loo kevbe wẹẹ, avbe Baibol nii ẹre iyayi ima vbe hẹnhẹn egbe yan. Vbe igiemwi, gi ima ziro yan emwi eso ne Avbe Osẹe Jehova yayi ke ẹghẹ nọ kpẹre gha dee, vbe iyeke ọni, u ghi ghee ẹre ghee, deghẹ ọ gua e Baibol ro.
Emwi ne ima yayi: Osanobua i re Osa Ne Agbeha. E Zion’s Watch Tower nọ ladian vbe July 1882 khare wẹẹ: “Emwa ni tie ebe ima wa rẹn wẹẹ, ima yayi ighẹ Jehova, Jesu kevbe orhiọn nọhuanrẹn rrọọ. Sokpan ima ma yayi wẹẹ, imamwaemwi ọghe Osa Ne Agbeha gua e Baibol ro.”
Emwi ne Baibol khare: “E Jehova ne Osa mwa keghi re Jehova ọkpa.” (Diuteronomi 6:4, The Holy Bible, ne Robert Young zedu ẹre) “Sokpan Osanobua ọkpa ma mwẹ, ọni ọre Evbavba nọ yi emwi hia, ọmwa ne ima rre agbọn na, Nọyaẹnmwa ọkpa kẹkan ẹre ọ vbe rrọọ, ọni ọrọre Jesu Kristi, ọmwa na lekpa ẹre yi emwi hia, ọmwa ne ima lekpa ẹre vbe rre agbọn.” (1 Kọrinti 8:6, E Baibol Edo) Jesu tobọre khare wẹẹ: “Evbavba . . . kpọlọ sẹ mwẹ.”—Jọn 14:28, E Baibol Edo.
Emwi ne ima yayi: Emwa dan i khian gha giẹn vbe ẹrinmwi erhẹn vbe etẹbitẹ. E Zion’s Watch Tower nọ ladian vbe June 1882 keghi mwẹ uhunmwuta nọ khare wẹẹ, “Uwu Ẹre Orukhọ Ya Ha Osa,” nọ ladian vbe ebe Rom 6:23 vbe E Baibol Edo. Ọ khare wẹẹ, “Ẹmwẹ na wa rriẹ, ẹi vbe lọghọ na rẹn otọ re. Sokpan, ọ ye kpa ọmwa odin wẹẹ, emwa nibun ni khare wẹẹ iran ya e Baibol yi, ye gbodan ghee ẹmwẹ nọ rre uwu ẹre, iran na keghi kha wẹẹ, te emwa orukhọ khian gha giẹn vbe ẹrinmwi erhẹn vbe etẹbitẹ.”
Emwi ne Baibol khare: “Ọmwa nọ ru orukhọ ẹre ọ khian wu.” (Ezikiẹl 18:4, 20, King James Version) Oya ne Osanobua khian rri emwa dan re, ọre “ọfuan etẹbitẹ,” ẹi re ẹrinmwi erhẹn ẹre ọ khian viọ iran yi.—2 Tẹsalonaika 1:9, E Baibol Edo.
Emwi ne ima yayi: Arriọba Osanobua keghi re Arriọba ne gele gele, ẹi re emwi nọ rre ọmwa ẹkokoudu. Zion’s Watch Tower nọ ladian vbe December 1881, ghi guan kaan Arriọba Osanobua, ọ na wẹẹ: “Osanobua gha ghi mu Arriọba ọghẹe gbọ nẹ, irẹn ghi fuẹn arriọba ọghe emwa nagbọn hia.”
Emwi ne Baibol khare: “Vbe ẹghẹ avbe nikhaevbisẹ na, Osanobua ẹrinmwi gha mu arriọba ne ẹi ra fo vbe otọ gbọọ. Ai ra vbe sẹtin khọn rẹn ẹdẹ, sokpan, irẹn gha fuẹn avbe arriọba nii fẹẹrẹ, irẹn ghi gha rrọọ ẹdẹdẹmwẹdẹ.”—Daniẹl 2:44, E Baibol Edo.
New World Translation ọkpa ẹre Avbe Osẹe Jehova wa loo ya yẹrike emwi ne iran yayi ra?
Ẹn o, ma wa loo e Baibol ughughan vbe iwinna ikporhu iyẹn nọ maan ne ima ru. Ma ghaa gu ọmwa ruẹ e Baibol, ma sẹtin mu New World Translation ọghomwa ne ọmwa nii ọghe ọhẹ, ma i vbe miẹn ọmwa nii igho ye Baibol ne ima maa re. Sokpan, deghẹ ima na miẹn ọmwa nọ hoo ne irẹn gha ya e Baibol ọvbehe ruẹ emwi, ma ghi loo e Baibol ọghẹe ya gha maa re emwi.