Vbọ Re Ẹmwẹ Akhasẹ?

Ewanniẹn ne Baibol rhie ye inọta na

Ẹmwẹ akhasẹ ọre ẹmwẹ nọ ke obọ Osanobua rre. E Baibol khare wẹẹ, “ẹmwẹ nọ ke obọ Osanobua rre ẹre emwa nagbọn ghaa ta, zẹvbe ne orhiọn nọhuanrẹn ya gha dia iran.” (2 Pita 1:20, 21) Nọnaghiyerriọ, akhasẹ ọre ọmwa ne Osanobua gie ẹre uhunmwu, nọ ya tama emwa ọvbehe.​—Iwinna 3:18.

De vbene Osanobua ya gha gu avbe akhasẹ guan hẹ?

Obẹlẹ ughughan ẹre Osanobua loo ro ya gi avbe akhasẹ rẹn emwi nọ rre irẹn ekhọe:

• Ẹmwẹ na gbẹn. Asẹ ọkpa ghaa rrọọ ne Osanobua ya loo obẹlẹ na, ọni ọre ẹghẹ nọ ya tobọre gbẹnnẹ Uhi Igbe ladian mu ne Mozis.​—Ẹksodọs 31:18.

• Ọ loo avbe odibosa ya gu emwa guan. Vbe igiemwi, Osanobua keghi loo odibo ọghẹe ya gi e Mozis rẹn ẹmwẹ nọ khian tama e Fero ne Ọba Igipt. (Ẹksodọs 3:2-4, 10) Deghẹ ọ hoo ne iran wa ta ẹmwẹ nii zẹvbe nọ wa ya tae ma iran, ọ ghi loo odibo ọghẹe ya tama nene akhasẹ nọ gbẹn nene ẹmwẹ ye otọ. Ọna wa sunu vbe egbe Mozis, odibo ọkpa keghi tama rẹn wẹẹ: “Gbẹnnẹ avbe ẹmwẹ na, rhunmwuda te imẹ ya avbe ẹmwẹ na gu uwẹ ta ile kevbe Ivbi Izrẹl.”​—Ẹksodọs 34:27.a

• Umian. Ugbẹnso Osanobua ghi wa mu umian ma avbe akhasẹ, vbene iran i na vbiẹ. (Aizaia 1:1; Habakọk 1:1) Eso vbe avbe umian na ghi wa yevbe emwi nọ gele sunu ghee mwẹ ghee ruẹ sẹrriọ wẹẹ, nene akhasẹ ghi kue gha mwẹ obọ vbe emwi ni sunu. (Luk 9:28-36; Arhie Maan 1:10-17) Vbe ẹghẹ eso, ọ ghi yevbe na miẹn wẹẹ, te avbe akhasẹ vbiẹ, vbe uwu ẹghẹ nii, e Jehova ghi mu umian ma iran. (Iwinna 10:10, 11; 22:17-21) Osanobua vbe gu avbe akhasẹ guan vbe imina.​—Daniẹl 7:1; Iwinna 16:9, 10.

• Osanobua vbe gha dia iziro ọghe iran. Osanobua vbe gha dia iziro ọghe avbe akhasẹ, ne iran mieke na sẹtin gbẹn ẹmwẹ ọnrẹn ye otọ. Ọna keghi wa gu ẹmwẹ ne Baibol tae ro, vbọ khare wẹẹ: “Osanobua ẹre ọ dia emwa ya gbẹnnẹ emwi hia ni rre Ebe Nọhuanrẹn yotọ.” Ẹmwẹ na ighẹ “Osanobua ẹre ọ dia emwa,” a gha vbe sẹtin zedu ẹre vbenian, “Osanobua ẹre ọ hinrọn yan iran.” (2 Timoti 3:16; The Emphasised Bible) Osanobua keghi loo orhiọn nọhuanrẹn ọghẹe ra ẹtin ẹnrẹn ya mu iro ọghẹe ya ekhọe eguọmwadia ẹre. Osanobua ẹre ọ yan ẹmwẹ ne iran gbẹnnẹ, sokpan avbe akhasẹ na ẹre ọ gbẹnnẹ avbe ẹmwẹ nii ye otọ.​—2 Samuẹl 23:1, 2.

Emwi ni khian sunu vbe odaro ọkpa, ẹre ẹmwẹ akhasẹ mobọ dekaẹn ra?

Ẹo, ẹ i re emwi ni khian sunu vbe odaro ọkpa ẹre ẹmwẹ akhasẹ wa dekaẹn. Vbọrhirhighayehẹ, ẹmwẹ akhasẹ ni bun ni rre Baibol guan kaẹn vbene emwi khian gha ye hẹ vbe odaro. Vbe igiemwi, ẹghẹ hia ẹre avbe akhasẹ ọghe Osanobua ya gha ya obọ sekhae ne Ivbi Izrẹl vbekpa emwi dan ne iran ru. Iran vbe guan kaẹn afiangbe ne Ivbi Izrẹl khian miẹn deghẹ iran na fi werriẹ, kevbe emwi nọ wegbe nọ khian rruan iran vbe odaro deghẹ iran ma fi werriẹ. (Jerimaia 25:4-6) Owẹ ne Ivbi Izrẹl zẹ, ẹre ọ khian ta nọ gha sẹ vbe egbe iran.​—Diuteronomi 30:19, 20.

Igiemwi ọghe ẹmwẹ akhasẹ ni rre Baibol, nọ ma guan kaẹn emwi nọ khian sunu vbe odaro

• Vbe asẹ ọkpa, Ivbi Izrẹl na rinmwian Osanobua nọ ru iyobọ ne iran, Osanobua keghi gie akhasẹ ọre bu Ivbi Izrẹl, nọ ya gi iran rẹn wẹẹ rhunmwuda ne iran ma na họn ẹmwẹ ne irẹn, ẹre ọ si ẹre ne irẹn ma na ru iyobọ ne iran.​—Giọgis 6:6-10.

• Vbe Jesu ghi gu okhuo e Sameria nii guan, ọ keghi gi ẹre rẹn emwi eso nọ sunu daa re vbe ẹghẹ eso nọ gberra, nẹi ghẹ te rẹn vbe ẹ i re wẹẹ Osanobua ẹre ọ mu ẹnrẹn ma rẹn. Okhuo na keghi gie Jesu zẹvbe akhasẹ, agharhemiẹn wẹẹ Jesu ma ya unu kaẹn emwi nọ khian sunu daa okhuo na vbe odaro.​—Jọn 4:17-19.

• Vbe uwu ẹghẹ na khian na bu ohiẹn e Jesu, avbe eghian rẹn na ya emwi gue ẹre aro, iran na gha nọ rẹn wẹẹ: “Adeghẹ akhasẹ ẹre u khin, tama ima, de ọmwa nọ fi ruẹ emwi?” Ẹ i re te iran ghaa tama e Jesu nọ ta emwi nọ gha sunu vbe odaro, sokpan te iran hoo nọ loo ẹtin Osanobua ya rẹn ọmwa nọ fi ẹre emwi.​—Luk 22:63, 64.