De Emwi Ne Baibol Tae Vbekpa Evba Ya Rra Aro Kevbe Emwi Itegbe Na Ya Haan?

Ewanniẹn ne Baibol rhie ye inọta na

E Baibol ma wa mobọ guan kaẹn uhunmwuta na, ọrheyerriọ, ọ ma vbe kha wẹẹ emwi dan nọ deghẹ a na gha loo evba ya rra aro (makeup), ra emwi itegbe ughughan na ya haan. E Baibol ma wa mobọ nianian ẹmwẹ ukhuegbe ọghe ima, sokpan, ọ rhie igiọdu ne ima, ne “ose ọghe [ima] gha re ọghe ekhọe” kevbe ne ima “ya ufumwẹ kevbe ekhọe ọmẹhẹ gha te egbe.”​—1 Pita 3:3, 4.

Ẹ i emwi dan deghẹ ima na gha ya emwi ughughan te egbe

• Avbe ikhuo na guan kaẹn vbe Baibol ni ya ekhọe hia ga e Jehova vbe gha te egbe. E Rebeka ne ọvbokhan Aizik ne ovbi Ebraham, keghi rri oroka ọghe igoru ye ihue, ọ na mu emwiobọ ọghe igoru ye obọ, ọ na vbe ya emwi itegbe ọghe ighobioye ughughan ya te egbe; obọ Ebraham nọ khian ghi do gha re erha ọdọ ẹre, ẹre avbe emwi itegbe na ke rre. (Gẹnẹsis 24:22, 30, 53) Ẹsta vbe kue yọ na “ma re egbe ose,” vbe a mu ẹre egbe ye otọ zẹvbe oloi e Pẹsia. (Ẹsta 2:7, 9, 12) Usun emwi na loo ro ne Ẹsta sẹtin gha re “cosmetics,” ra “evba ya rra aro ughughan.”​—New International Version; Easy-to-Read Version.

• E Baibol keghi loo emwi itegbe na ya haan ya ru igiemwi eso ni maan. Vbe igiemwi, ọmwa nọ bu ọmwa ude nọ maan, a na yae gie “oroka igoru emwi itegbe na ya igoru nọ maan sẹ ru.” (Itan 25:12) Deba ọni, Osanobua tobọre keghi ya obọ nọ ya mu Ivbi Izrẹl ya gie vbene okpia ya loo emwiurhu, emwiobọ, kevbe emiehọ ya mu ọvbokhan rẹn egbe ye otọ. Avbe emwi itegbe na ẹre ọ ya ‘ose ọghe agbẹnvbo Izrẹl gha nọnọ.’​—Ẹzikiẹl 16:11-​13.

Iziro ni ma gba ne emwa eso mwẹ vbekpa evba ya rra aro kevbe emwi itegbe na ya haan.

Iyayi nọ ma gba: Ne oloi ighẹ e Jezibẹl ne ọmwa dan na “ba itiro” rhie ma wẹẹ, ọ ma khẹke na gha loo evba ya rra aro.​—2 Ọba 9:30.

Ẹmwata nọ rrọọ: Rhunmwuda ne Jezibẹl na gha mwẹ obọ vbe imamase kevbe nọ na do emwa izigha, ẹre ọ si ẹre na na bu ohiẹn gbe ẹre, ẹ i re rhunmwuda vbene ọ ya mu egbe hẹ.​—2 Ọba 9:7, 22, 36, 37.