INỌTA NE AVBE IGBAMA NỌ
Vbia Khian Ru Vbe Ọse Mwẹ Gha Ru Emwi Nọ Da Mwẹ?
Emwi nọ khẹke ne u rẹn
Ẹ i mwẹ ọse ruẹ ma zẹdia ru emwi nọ gha da ruẹ. Rhunmwuda ne ima na re emwa ni ma gba, avbe ọse ima, uhiẹn ya sẹ egbe ọse ne ima ghi gu obọ ẹre sẹ, sẹtin ru emwi ra ta emwi nọ gha da ima sẹ ugboloko. Ọghe ne ẹmwata, ọmwa nọ ma gba, ẹre uwẹ vbe khin. A gha gele we na ghee ẹre, ẹ i mwẹ uwẹ ma he vbe ru emwi eso nọ sọnnọ emwa ọvbehe.—Jems 3:2.
U sẹtin miẹn emwi eso nọ gha da ruẹ vbe intanẹt. Vbe igiemwi, ọvbokhan okpia ọkpa na tie ẹre David keghi kha wẹẹ: “U ghaa rre intanẹt, u na bẹghe avbe efoto ne avbe ọse ruẹ munnọ vbe iran sọyẹnmwẹ egbe, u sẹtin do gha nọ egbe ruẹ wẹẹ, vbọzẹ ne iran ma na gie na tie mwẹ. Ẹghẹ nii, u sẹtin do gha roro ẹre wẹẹ, iran ma ka ruẹ yọ, ẹko ghi vbe gha rriara ruẹ.”
U sẹtin gualọ odẹ ya sọfurre yọ.
Emwi ne u gha sẹtin ru
Ghee egbuẹ ghee. E Baibol wẹẹ: “Ohu gha muẹn, zin egbe ẹre, uyinmwẹ ọzuọ nọ na gha rhie emwi nọ sọnnọ ọmwa ye ekhọe.”—Asan Ibo 7:9.
“Ugbẹnso, vbe okiekie, u sẹtin do bẹghe ẹre wẹẹ, emwi nọ sunu nii, ma te sẹ na mu ohu yi.”—Alyssa.
Muẹn roro: Ọmwa ne ohu rherhe mu ẹre u khin ra? U gha sẹtin hia ne u gha rhie aro gberra abakuru ọghe emwa ọvbehe ra?—Asan Ibo 7:21, 22.
Muẹn roro ere na lae miẹn deghẹ a na gha yabọ emwa. E Baibol wẹẹ: “Ọmwa gha ru ruẹ emwi nọ ma khẹke, uyinmwẹ ọmọ ẹguae nọ adeghẹ u yangbe ẹre.”—Itan 19:11.
“Ọ gha khọnrẹn ne ọmwa ru emwi nọ sọnnọ ruẹ, te ọ khẹke ne u ya ekhọe hia yabọe, ọni nọ wẹẹ, u i khian rhie ẹmwẹ nii ye ẹko, ra ne u gha ye ọmwa nii ẹre rre inugba nọ khin, nọ mieke na gha rinmwian ruẹ. U gha yabọ ọmwa nẹ, ghẹ dọlegbe mu ẹmwẹ nii rre.”—Mallory.
Muẹn roro: Ọna sẹ na si ukankan yi ra? U gha sẹtin wa ya obọ wuo ekhọe, ne ọfunmwegbe mieke na gha rrọọ ra?—Kọlọsi 3:13.
Ma gha gi emwi gha si ẹzọ ne ima vbe ọse ima vbe ẹghẹ hia, ọ yevbe na miẹn wẹẹ, te ima kie ẹkhu ye otọ, ne oni oguozizi la uwu owa
Muẹn ẹmwẹ ọmwa nii roro. E Baibol wẹẹ: “Wa ghẹ wa rẹn ọghe enegbe uwa ọkpa, sokpan, wa vbe gha mu ọghe emwa ọvbehe roro.”—Filipai 2:4.
“Deghẹ avbe ọse na hoẹmwẹ egbe, iran na vbe gha rhie ọghọ ne egbe, ọ gha ru iyobọ ne iran ya sọfurre ye ẹzọ nọ rhirhi de rre, rhunmwuda, iran ma hoo ne iku iran rhia.”—Nicole.
Muẹn roro: U gha sẹtin rhie aro tua emwi eso nọ maan vbe iziro ọghe ọmwa nii ra?—Filipai 2:3.
Uhunmwu ẹmwẹ nọ rrọọ: U gha rẹn emwi nọ khẹke ne u gha ru, vbe a gha ru ruẹ emwi nọ da ruẹ, ọ gha wa ru iyobọ nuẹn, uhiẹn vbe u gha waan nẹ. Hia ne u ruẹ ọre nian.