Avbe Igbama—Vbe U Ra Ya Loo Arrọọ Ọghe Uwa Hẹ?
“I GUALỌ enọ wa ma sẹ ẹsẹsẹmwẹse vbuwe ẹdẹ agbọn mwẹ.” Erriọ ọ tae ighẹ ọvbokhunvbi ọkpa. Vbene ai na gbe awawẹ uwẹ gha vbe gualọ egbe ọre. Sokpan de vbene u ra ya miẹn “enọmasẹ” vbe arrọọ ruẹ hẹ? Avbe avbiogbẹ kevbe avbe ihegbe ọwuẹ, ughaghe uhiẹn avbe ọmamwaemwi ọwuẹ, gha sẹtin tae wẹ a gha miẹn igho wọrhọwọrhọ ẹre ọ la rre kevbe orhiẹnrhiẹn ukpo iwinna eso nọhionkhuẹn—ọ gha re nọ ọdunna ẹn!
Vbọrhirhighayehe e Baibol, ye obọ sekhae ne avbe ihọnrre wẹ na gha khu arunagban ọghe emwi ikpakpa re emwi kẹkan nọ “yevbe ne a khu ẹhoho khian.” (Asan-Ibo 4:4) Rhunmwuda evbọ khin, ibozẹghẹ vbe avbe ihọnrre gele khuẹe mu ẹfe kevbe otiti. Enii ni gele khuẹe mu ẹfe kevbe otiti do gha miẹn egbiran vbuwe orriara irohanmwa ẹghẹ hia. “Ọyevbe ẹkpẹti ohogha.” “u gha ghi ya yọn ghe uwu ẹre nẹ, emwi rhọkpa i rre vba.” erriọ ọtae ighẹ igbama ovbi e Britain ọkpa nọ khu iruẹmwi nọhionkhuẹn, Ẹmwata, iwinna vbe ẹghẹso sẹtin rhie emwiewe rre kevbe ayọmwaẹro. Sokpan ẹi sẹtin ye ẹko vọa evbare “ọghe orhiọn” ọwuẹ. (Matiu 5:3) Yevbesọni, 1 Jọn 2:17 yobọ sekhae wẹ “agbọn na . . . rhie gberra khian.” Uhiẹn adeghẹ uwẹ na gha re ne emwi dunna na vbuwe agbọn na, ọ ghi gha re ọghe ovbiẹghẹ-kherhe.
Asan-Ibo 12:1 yae tua avbe igbama: “Ye Ayi ne ọ yii uẹ rre vbe ne u he na re ọvbokhan na.” Ẹn, odẹ nọ giaru nọmasẹ ọre ne u ye arrọọ ọwuẹ ru emwi vbuwe iwinna ọghe Jehova Osanobua. Sokpan okaro, te u gha somwa nọ gha rre ugamwẹ ọghe Osanobua. De vbene u gha ya sẹtin ru vberriọ hẹ? Kevbe de emwi ne arrọọ ọghe ugamwẹ Osanobua dekaẹn?
Na Somwa na Gha re Osẹe Ọghe Jehova
Ne a ya muẹnhẹn, u gha họnrẹn ahoo na ya ga Osanobua—kevbe ne ahoo nii i gheghe rre ikika, uhiẹn agharhemiẹn avbe evbibiọ na gha re emwa ivbi Otu e Kristi. Te uwẹ gha re nọ mwẹ aguegberu ọghe obọruẹ da e Jehova. “Erhunmwu ne a na gha ru iyobọ nuẹn ne u ya gha mwẹ aguegberu ọghe obọ ruẹ da e Jehova,” vbene ọ tae ighẹ ọvbokhunvbi ọkpa.—Psalm 62:8; Jems 4:8.
Rom 12:2 niannian ukpowẹ ọvbehe ne u gha zẹ. Ọ khare: “Wa . . . sẹtin rẹn emwi ne Osanobua ho emwi ne ọ maan, ne ọ yẹ ọre kevbe ne ọ gbae.” Wẹ he miẹn vbe uwẹ tobọruẹ a gha gbe awawẹ ye emwi eso ne a ka maa ruẹn re ra? Ẹghẹ ni lele ẹmwẹ ibude ọghe Baibol ‘wẹ gha rẹn’ wẹ avbe emwi na ẹmwata nọ! Ru azanzan emwi ọghe obọruẹ. Tie Baibol kevbe avbe ebe nagbẹnnẹ nọ hẹnhẹngbe yan Baibol. Ọrheyerriọ, na gha ruẹ vbekpa Osanobua i re ẹwaẹn ebe ọkpa. Rhie ẹghẹ ne u ya roro yan emwi ne u tiere nọ miehe na rọn la ruẹ ẹkokoudu nọ muama emwi. Ọnọna gha ye ahoẹmwọmwa ruẹn da Osanobua gha wan.—Psalm 1:2, 3.
Nọ lelẹe, hia ne u ya ghae emwi ne u ruẹ, iyẹn na ma muegbe ẹre ughaghe ne uwa gba rre owebe. Ikporhu ọghe onurho ya sẹ onurho ọ ghi re izowẹ nọ lelẹe. Wẹ sẹtin dekun vbe ẹghẹso ọmwa ne uwa gba yo owebe vbe u a gha kporhu khian, ọna sẹtin ye egbe wọ ruẹ vbe okaro. Sokpan e Baibol yae tua ima ne a “ghẹ gie ekhue iyẹn nọma muẹn.” (2 Timoti 1:8) Igiuhun ọghe arrọọ kevbe ayayẹro ẹre uwẹ rhie rre! Vbọzẹ ne ekhue ẹre gha na muẹn?
Nian, adeghẹ avbe evbibiọ na gha re ivbi Otu e Kristi, wẹ ka yegbe ba iran vbe uwu iwinna na. Sokpan uwẹ gha sẹtin ru gberra ne u mudia ye onurho hunwan kitikpọ ra nu rhie avbe ebe iyẹn kevbe asobọrrie ne emwa kẹkan ra? Uwẹ gha sẹtin guan vbe u ra sẹ onurho, ne u loo Baibol ya ma ọyan owa emwi ra? Adeghẹ ẹire erriọ, nọ iyobọ vbe obọ avbe evbibiọ ra ọmwa nọwẹro vbuwe iko. Giẹ gha re vbakọnrẹn ne u sẹ ihe zẹvbe enọ ye iyẹn nọma wewe nọ ma he dinmwiamẹ!
Ẹghẹ eso gha ghi gberra, wẹ gha re nọ gua kpaọ ne u ya ye egbe fiohan—ru eyan ghe Osanobua wẹ u gha ga irẹn ke ẹghẹ ni kpaọ. (Rom 12:1) Vbọrhirhighayehẹ, ayegbe fiohan i re emwi ẹkhokho kẹkan. Osanobua gualọ emwahia ne a “ye unu mwa tae ladian a keghi miẹn mwa fan.” (Rom 10:10) Vbe ẹghẹ ọghe idinmwiamẹ, u ghi ye unu tae ladian, vbe okaro amuẹtinyan ọwuẹ. Idinmwiamẹ vbe uwu amẹ ghi lelẹe. (Matiu 28:19, 20) Na miẹn kue yọ, idinmwiamẹ keghi re izowẹ nọ wegbe. Sokpan ghẹ siegbe ghe iyeke rhunmwuda u roro wẹ ughaghe u i khian sẹtin musọe. Adeghẹ uwẹ na hẹnhẹn egbe yan Osanobua nọ rhie ẹrhiọn rre, irẹn gha rhie nuẹn “ẹtin ne ọ sẹ ehia” ya ru iyobọ nuẹn ya mudia gbain.—2 Kọrinti 4:7; 1 Pita 5:10.
U gha ghi dinmwiamẹ nẹ, u ghi do khiẹn ọkpa vbe Osẹe ọghe Jehova. (Aizaia 43:10) Ọna gha do gha mwẹ evbọkhin kpataki yan vbene u gha ya loo arrọọ ruẹ hẹ. Ayegbe fiohan dekaẹn ne ọmwa ‘mianmian enegbe ẹre.’ (Matiu 16:24) U sẹtin do yangbe evbakọnrẹn ọghe ne egbe ruẹ eso kẹe kevbe osi emwi kevbe ‘gualọe ye okaro arriọba ọghe Osanobua.’ (Matiu 6:33) Ayegbe fiohan kevbe idinmwiamẹ erriọ ọ kie ẹkpotọ nọbun yotọ ne a ya ru vberriọ. Gi ima ziro yan eso vbọ.
Avbe Ẹkpotọ Ne A Ya Ga Osanobua Ẹghẹ-Rhinrin
● Na ru arọndẹ keghi re ọkpa vbe egbe ẹkpotọ na. Arọndẹ nọ ye iyẹn wewe keghi re ovbi Otu e Kristi nọ dinmwiamẹ na yegbe ta nọ ru emwamwa nọ ya loo ọ gha ghi kanmwa gbe ukẹdẹ 70 vbe dọmwadẹ uki nọ ya gha kporhu iyẹn nọma. Na do loo ẹghẹ nọ taẹn vbe orere gha ru iyobọ nuẹn ya guaekpao iwẹro ọghe ikporhu kevbe imamwaemwi ifuẹro. Avbe arọndẹ nibun miẹn emwi ẹwaẹn ọyẹnmwẹ ọghe na ru iyobọ ne emwa ni ruẹ Baibol ne iran do khiẹn avbe Osẹe ni dinmwiamẹ. De iwinna uki nọ gha sẹtin gha yerriọ zẹvbe oghaza kevbe ẹkovọnmwẹ nọ rrọọ?
Ne a miẹn emwi loo ya de egbe yi, avbe arọndẹ nibun sẹ keghi mwẹ iwinna ọghe ẹghẹ-kuẹi. Enibun ru emwamwa yotọ khẹ ọde ọghe iwinna na luwe ne a ruẹ iwinna obọ vbe owebe ra vbe obọ evbibiran. Adeghẹ uwẹ kevbe evbibiọ rorẹe wẹ ọ gha re evbọkhẹke ne u gha mwẹ evbaruẹre eso na ya do yọ vbe iyeke owebe nogieva, gha mwẹ ọnrẹn vbe ekhọe vbuwe iro ọwuẹ, ẹi re ne u ya khuan igho ọkpẹntẹnkpẹn, sokpan ne u ya rhieba ugamwẹ ruẹn kevbe ughaghe ne u ya ga zẹvbe ọguọmwadia ọghe ẹghẹ-rhinrin.
Ọrheyerriọ, evbarhie aro da vbe ẹdẹ agbọn ọghe arọndẹ keghi re, ẹi re iwinna uki ọghẹe, sokpan ugamwẹ ọghẹeọni ọre nọ na ru iyobọ ne emwa ọvbehe ya miẹn arrọọ! Vbọzẹ ne u i khian na ru arọndẹ zẹvbe evbakọnrẹn ọghuẹ? Nọ kpẹkpẹ nọ, iwinna arọndẹ keghi su fi avbe ukpo amuyọmọ ọvbehe. Vbe igiemwi, avbe arọndẹ eso ghi kpaọ gha rrie avbe ako ne a na gualọ iyobọ nọkhua ẹsẹse, ọghe emwa ni ye iyẹn Arriọba wewe. Emwa ọvbehe keghi ruẹ urhu ẹvbo ọrriọvbe nọ ya ga ọ ma gha re vbe iko ẹdogbo ọghe urhuẹvbo-ọrriọvbe ọgha re uhiẹn vbe otọe ọrriọvbe. Ẹn, na gha ru arọndẹ keghi re odẹ ọghe arrọọ nọ rhie ere rre!
● Ugamwẹ Azẹyisi keghi re ẹkpotọ ọvbehe nọ kie yotọ. Ke 1943 gha de e Watchtower Bible School of Gilead kpemehe avbe arọndẹ nisomwa na ye iruẹmwi esiesi ma re emwi ye ugamwẹ azẹyisi. Enirrie egie ebe miẹn igiuhun ọghe ne a ya ga zẹvbe enikporhu ọghe ẹghẹ-rhinrin vbe avbe otọe ọrriọvbe. Vbuwe enibun vbe avbe otọe na, ulomwẹ arrọọ keghi re nọ wegbe, rhunmwudọni egberranmwẹ kevbe ẹrhiọn keghi re evba gualọ vbe ugamwẹ azẹyisi. Agharhemiẹn erriọ nọ, avbe enigavbisi sọyẹnmwẹ arrọọ nọ mwẹ evbọdemu.
● Ne Ministerial Training School keghi re na mu gbọo ne a ya maa ediọn kevbe eguọmwadia ni somwa emwa ni he re okhiọnkpa. Ne iruẹmwi na sigboo ọghe izọla-erẹnrẹn tan obọ gbae egbe avbe uhunta zẹvbe iwinna nọ bi yọ ediọn egbe kevbe eguọmwadia iwinna, emwamwotu kevbe ẹmwẹ na guan vbe idagbo. Eso keghi re na gie nọ ya ga vbe otọe ẹvbo ọghiran. Emwa ọvbehe keghi re ne a tama nọ miẹnrẹn yi iwinna ọghe otọe ọrriọvbe.
● Ugamwẹ Bẹthẹl dekaẹn ne a ya ga zẹvbe enirhiegbe ladian vbe ọkpa vbuwe abotu ọghe avbe Osẹe Jehova. Eso vbuwe ẹgbẹe Bẹthẹl ga tara vbe uwu eke ne a na gbẹnnẹ avbe ebe ni mwẹmi ọghe Baibol. Emwa ọvbehe keghi re na rhie avbe iwinna nọ ru iyobọ na, zẹvbe ni gbaroghe avbe owa na bọlọe kevbe avbe emadogua ra igbaroghe emwi ikpakpa ọghe ẹgbẹe Bẹthẹl. Iwinna hia keghi re avbe ukpo amuyọmọ nọhianrẹn ọghe ugamwẹ e Jehova. Yevbe deba ẹre, enii ni rre Bẹthẹl mwẹ ọyẹnmwẹ ne a ya rẹn wẹ emwikemwi ne iran ru, ọ rhie ere ne oghẹn nibun ọghe etẹn ọghiran vbe ọlẹga otagbọn.
Ẹghẹso etẹn ni mwẹ ifuẹro kpataki keghi re na gie na tie nọ do ga vbe Bẹthẹl. Vbọrhirhighayehẹ, nibunsẹ keghi miẹn iruẹmwi ọghiran iyeke vbe iran sẹ evba. Enii ni rre Bẹthẹl i ga rhunmwuda emwi ẹfe ikpakpa sokpan iran mwẹ isọkẹn ye evbare ne a kpemehe ẹre, eke ne adia, kevbe agiẹghẹ kherhe na ya da egbe yi. Igbama ọkpa ọghe ẹgbẹe Bẹthẹl gie ugamwẹ ọghẹe vbe odẹ vbenian: “Ọyunnuan nọ! Evbalele keghi re nọ sievẹn, sokpan I miẹn afiangbe nọbun nẹ ne a ya ga vbe mwa.”
● Ugamwẹ Uhun otagbọn kue yọ ne ọmwa gha mwẹ oghae vbe avbe abotu na bọlọ kevbe avbe Ọgua Arriọba. Eguọmwadia Uhun otagbọn, zẹvbe na tie iran, keghi mu okhian yo avbe otọe ọrriọvbe ya ru iyobọ vbe iwinna na bọlọ vberriọ. Ọna keghi re aro ugamwẹ nọhianrẹn, nọ vbe khọ iwinna ọghe enii ni bọ owugamwẹ ọghe Sọlomọn. (1 Ọba 8:13-18) Ne avbe emwamwa na ya gbaroghe avbe eguọmwadia uhun otagbọn keghi khọ ọghe enii ni rre ẹgbẹe Bẹthẹl. U miẹn ukpo amuyọmọ ne etẹn nikpia kevbe nikhuo na mwẹ ne a na ga vbuwe ako ọghe iwinna urhomwẹ da e Jehova!
Ye Evbọrrọọ-Hia Ga e Jehova
Ne a do gha ga e Jehova keghi re odẹ nọ ghi wa masẹ ne u ya loo arrọọ ruẹ. Vbọzẹ ne a ma na ziro yan evbakọnrẹn ọghe obọmwa ne a ya ga Osanobua ẹghẹ-rhinrin? Gu avbe evbibiọ gba ziro yan ugamwẹ ẹghẹ-rhinrin, ediọn ni rre iko ruẹ, kevbe enọgbaroghe otako ọwua. Adeghẹ uwẹ mwẹ ekhọe ọyẹmwẹ ghe Bẹthẹl, Gilead, ra Ministerial Training School, ya do avbe iko ọghe emwa ni vbuẹe ne a do vbe avbe asikoko otako kevbe asikoko ọghe odin.
Vbe ẹmwata, ẹire emwa hia ọre ọ khian somwa ra nọ gha sẹtin ru ugamwẹ ẹghẹ-rhinrin. Ẹghẹso ọlọghọmwa egberranmwẹ, ẹmwẹ igho nọ mu rri, kevbe evbọbiyọmwa egbe ọghe ẹgbẹe keghi fiaẹn kanmwa inu ne a gha sẹtin ru. Vbọrhirhighayehẹ, ivbi Otu e Kristi hia ni ghi yegbe fiohan gha yae ru emwi evbawaru ọghe Baibol: “Ye ekhọe ruẹ hia, ẹrhiọn ruẹn hia, otọe ẹko ruẹ hia, kevbe ẹtin ruẹn hia hoo ẹmwẹ Nọyanruẹn Osanobua ruẹ.” (Matiu 22:37) Jehova hoo ne uwẹ ru enọghi masẹ hia na miẹn wẹ evba vbavbegbe ọwuẹ kue yi ne u ru. Rhunmwudọni, ihe ẹghẹ ke ihe ẹghẹ ne u rhirhi a ye, ye ugamwẹ Jehova ru evba rhie aro da vbe arrọọ ọwuẹ. Fian okhuo ne ẹtin ruẹn gha sẹ ọghe ugamwosa. Ẹn, “ye Ayi ne ọ yii uẹ rre vbe ne u he na re ọvbokhan na”—uwẹ gha re na fiangbe etẹbitẹ rhunmwuda ne u na ru vberriọ!