De Emwa Ni Danmwehọ Vbe Ẹghẹ Ne Okpamẹ Ya Rhọọ? De Emwa Ni Ma Danmwehọ?

Emwa nibun ni ghaa rrọọ vbe ẹghẹ e Noa wa gha ru emwi dan. Gẹnẹsis 6:5

Adam vbe Ivi ghi suẹn gha biẹlẹ, emwa na do gha bun vbe uhunmwu otagbọn. Vbene ẹghẹ ya khian, odibosa eso keghi deba e Setan sọtẹ daa Osanobua.

Iran kegha die uhunmwu otagbọn, iran na do gha mu akpa ọghe ikpia yọ, ne iran mieke na gha viọ ikhuo rọnmwẹ. Ikhuo ne iran viọ rọnmwẹ keghi biẹlẹ avbe arhuan ni khọọ kevbe ni wegbe.

Uhunmwu otagbọn hia na do vuọn ne emwa ni ru emwi dan. E Baibol khare wẹẹ, emwi dan na do “gbaa emwa hia obọ vbe ehe hia kevbe wẹẹ, iro dan ọkpa ẹre ọ wa rre iran ekhọe vbe ẹghẹ hia.”

E Noa keghi họn ẹmwẹ ne Osanobua, ọ na kan okọ zẹvbe ne Osanobua wẹẹ ne ọ ru ẹre. Gẹnẹsis 6:13, 14, 18, 19, 22

Ọmwa esi ẹre Noa wa gha khin. E Jehova keghi tama e Noa wẹẹ irẹn khian ya okpamẹ guọghọ emwa dan ni ghaa rre agbọn vbe ẹghẹ nii.

Osanobua na vbe tama e Noa ne ọ kan okọ nọkhua; ọ na wẹẹ ọ gha ghi kan rẹn nẹ, ọ ghi viọ ẹgbẹe ọre kevbe avbe aranmwẹ ughughan la uwu ẹre.

E Noa kegha ya obọ sekhae ma emwa wẹẹ Okpamẹ gha rhọọ, sokpan iran ma rhie. Emwa eso na gha giẹ e Noa; eso na gha mu ohu ẹre.

Vbe Noa ghi kan nene okọ fo nẹ, ọ na viọ avbe aranmwẹ la uwu ẹre.