De Emwi Nọ Khian Ya Ẹgbẹe Gha Mwẹ Oghọghọ?

EMWI NE BAIBOL KHARE

“Oghọghọ nọ ne iran ni họn ẹmwẹ ọghe Osanobua kevbe ni lelẹe!”—Luk 11:28, New World Translation.

ODẸ NẸ IYAYI NA KHIAN YA RU IYOBỌ NUẸ

Ahoẹmwọmwa nọ ke ekhọe rre. —Ẹfisọs 5:28, 29.

Ọghọ nọ sẹ otọ ẹko.—Ẹfisọs 5:33.

Agbẹkunsotọ ọghe ẹmwata. —Mak 10:6-9.

MA GHA SẸTIN GELE YAEYI EMWI NE BAIBOL KHARE RA?

Ẹẹn, rhunmwuda emwi eva:

• Osanobua ẹre ọ muẹn gbọọ emwamwa ọghe ẹgbẹe. E Baibol khare wẹẹ, Osanobua ne Jehova ẹre ọ “he ẹgbẹe hia . . . eni.” (Ẹfisọs 3:14, 15) Ọni rhiema wẹẹ, e Jehova ẹre ọ muẹn gbọọ emwamwa ọghe ẹgbẹe. Vbọsiẹ ne ọni na mwẹ evbọ demu?

  Roro ẹre ghee: Adeghẹ evbare na rhiẹnrhiẹn mu ruẹ ukpẹ, kevbe wẹẹ, u hoo ne u rẹn emwi na ya lẹe, de ọmwa ne u khian nọ? Ẹi khian gberra ọmwa nọ lẹe.

  Erriọ vbe ye, obọ e Jehova, nọ muẹn gbọọ emwamwa ọghe ẹgbẹe, ẹre ima khian na miẹn otọre, emwi nọ ya ẹgbẹe mwẹ oghọghọ.—Gẹnẹsis 2:18-24.

• Osanobua gbaroghe ruẹ. Ẹgbẹe gha wa miẹn ere vbọ, deghẹ iran na gha gualọ adia ọghe Jehova vbuwe Ẹmwẹ ọghẹe nọ re Baibol. Vbọsiẹ? “Rhunmwuda irẹn . . . gbaroghe ruẹ.” (1 Pita 5:6, 7) Umamwẹ ruẹ ẹre Jehova gualọ, kevbe wẹẹ te ibude ọghẹe wa deyọ!—Itan 3:5, 6; Aizaia 48:17, 18.