INỌTA 4
De Emwi Nọ Khẹke Ne I Ru Deghẹ I Na Mu Emwi Rria?
DE EMWI NE UWẸ GHA RU?
Ghee igiemwi na ghee: Vbe ẹghẹ ne Tim vbe ihua re ya gha gbe ibọru, nene ibọru na de gbe ewindo nọ rre ọkpẹn owa iran, ọ na wa guọghọ.
Adeghẹ uwẹ ọre Tim, de emwi ne u gha te ru?
MUẸN RORO ẸSẸSẸMWẸSE!
ỌKPA VBUWE EMWI EHA NA ẸRE U GHA RU:
Lẹẹ fua.
Bu abe gbe ọmwa ọvbehe.
Wa ta ẹmwata, u vbe tae wẹẹ u gha dẹ yọ.
Ekhọe ruẹ sẹtin wa gha tama ruẹ ne u ru e nokaro. Sokpan ọ gha maan sẹ deghẹ u na miẹn abakuru ọghuẹ kue—ọre windo ẹre u guọghọ ra emwi ọvbehe ẹre u mu rria.
EMWI EHA NỌ SIẸRE NỌ NA KHẸKE NE U MIẸN ABAKURU ỌGHUẸ KUE
Emwi nọ khẹke nọ.
E Baibol khare wẹẹ: ‘Ma hoo ne ima gha ta ẹmwata vbe emwi hia.’—Hibru 13:18.
Emwa ni miẹn abakuru ọghe iran kue ẹre emwa mobọ yabọ.
E Baibol khare wẹẹ: “U gha gbe gue orukhọ ruẹ, agbọn i maan ruẹ ẹdẹ, miẹn iran kue ne u vbe zobọ vbọ, Osanobua gha tohan ruẹ.”—Itan 28:13.
Sẹ ehia, ọ keghi yẹẹ Osanobua.
E Baibol khare wẹẹ: ‘E Jehova keghi khuiwu ọmwa ero, sokpan ọmwa ata ẹre irẹn sikẹ.’—Itan 3:32.
Karina nọ rre ukpo 20 na gha rhiẹre lẹre, ne erhae ghẹ bẹghe ẹre ighẹ ebe na rhie nẹ, ne ọ khian ya zẹ igho rhunmwuda ulẹ dan nọ rhiere vbe ọ fi imọto. Karina keghi kha wẹẹ “Ukpo ọkpa ghi gberra nẹ, erha mwẹ na do miẹn ọnrẹn. I na wa la ẹmwẹ!”
De emwi nọ ghi miẹn ruẹ vbọ? Karina na kha wẹẹ: “Adeghẹ a na gha muẹn lẹre ighẹ abakuru na ru, te a yae werriegbe mu emwi hia rria, rhunmwuda te u khian ye vbare vbe odaro!”
EMWI NỌ KHẸKE NE U RU DEGHẸ U NA RU ABAKURU
E Baibol khare wẹẹ: “Ẹghẹ hia ma hia ya ba emwi ku ru.” (Jems 3:2) Zẹvbe ne ima ka ruọre, ọmwa nọ mwẹ imuegberriotọ kevbe nọ ru emwi enọwanrẹn ẹre ọ miẹn kue vbe ọ gha ru abemwikuru.
Emwi ọkpa gha ru ruẹ, u ghi ya ogieva waan. Ovbialeke ọkpa na tiẹre Vera keghi kha wẹẹ: “Deghẹ I na ru abemwikuru, ọ keghi rhie ẹwaẹn mẹ. Egbe emwi vberriọ gha sunu vbe ẹdẹ ọvbehe, I ghi rẹn vbene I gha lae hẹ. Ọna keghi ru iyobọ mẹ sayọ, ne I gha ya ẹwaẹn yin.” Gia ziro yan odẹ eso ne u gha ya ru ọna.
U mu ikẹkẹ erhaa rria vbe ẹghẹ ne u ya gha fi ẹre. De emwi ne u khian ghi ru?
Ghẹ zẹdẹ tae rre, vbene u na mwẹ ọnrẹn vbe orhiọn wẹẹ erhaa i khian vbe rẹn.
Tama erhaa emwi nọ wa sunu zẹẹ.
Tama erhaa emwi nọ sunu sokpan u ghi wẹẹ ọmwa ọvbehe ẹre ọ siẹre.
U gbokhuẹre vbe edanmwẹ rhunmwuda wẹẹ u ma tie ebe khẹ ọre. De emwi ne u khian ghi ru?
U ghi wẹẹ nene edanmwẹ lọghọ gbe.
U ghi miẹn kue wẹẹ uwẹ ẹre ọ ma muegbe ẹre yotọ.
U ghi wẹẹ, rhunmwuda ne ọmamwaemwi na mu ohu ruẹ ẹre ọ siẹre.
Adeghẹ u na gha muẹn roro abakuru ọghuẹ, u ghi yevbe ọmwa nọ fi imọto khian, nọ ya ughegbe nọ rre uwu imọto ya ghee iyeke
Nia, gia werriegbe ghee avbe igiemwi na, gia ba kha wẹẹ uwẹ ọre (1) erhaa, ra (2) ọmamwaemwi ruẹ. De aro ne erhaa kevbe ọmamwaemwi ruẹ khian ya ghee ruẹ deghẹ u na wa miẹn ọnrẹn kue ighẹ abakuru ọghuẹ? De aro ne iran khian ya ghee ruẹ deghẹ u na gbe gue ẹre?
Nia, muẹn roro ighẹ abakuru ne u ru vbe ne ukpo, u ghi yae zẹ ewanniẹ ye avbe inọta na.
De abakuru ne u ru? Vbua ya lae hẹ?
I na gbe gue ẹre.
I na bu abe gbe ọmwa ọvbehe.
I wa miẹn ọnrẹn kue.
Adeghẹ u ma miẹn ọnrẹn kue ighẹ abakuru ne u ru vbe ẹghẹ nii, de vbene ekhọe ruẹ ghi gha ye hẹ?
I na ghọghua—ọmwa rhọkpa ma rẹn vbekpa re!
Ekhọe mwẹ na gha fi mwẹ uwẹnrhiẹn—I gha te wa ta ẹmwata.
De odẹ nọ maan sẹ ne u gha te ya lae?
De ẹwaẹn ne abakuru ne u ru ghi rhie nuẹ?
VBE UWẸ A GHEE ẸRE HẸ?
Vbọsiẹ ne emwa eso i na hoo ne iran miẹn abakuru ọghe iran kue?
De aro ne emwa khian ya gha ghee ruẹ deghẹ u na gha gbe gue abakuru ruẹ? Sokpan de aro ne iran khian ya gha ghee ruẹ deghẹ u na gha miẹn abakuru ruẹ kue?—Luk 16:10.