Yee Amwẹ E Lọt Rre

Otọ e Kena ẹre Ebraham vbe Lọt ghaa ye. Vbene ẹghẹ ya khian, Ebraham vbe Lọt na do gha mwẹ emwi irri nibun. Rhunmwuda ọni, otọ ne iran mwẹ ma ghi sẹ aranmwẹ ọghe iran na gha kọn. Ebraham na ghi tama e Lọt wẹẹ: ‘Ma i khian ghi sẹtin gha rre eke ọkpa. Lahọ, uwẹ zẹ eke ne uwẹ khian gha rrie vbọ, ne imẹ vbe zẹ obọ nọkpa.’ Ọna keghi rhiema wẹẹ ọmwa nọ mu ọghe emwa ọvbehe roro ẹre Ebraham ghaa khin, ra ẹi re erriọ?

E Lọt na do bẹghe ẹre wẹẹ otọ nọ rre ọkpẹn e Sọdom wa mose. Iran wa mwẹ amẹ vbe otọ nii, erriọ irunmwu wa vbe ya gba ehe hia. Ẹre Lọt vbe ẹgbẹe ọre na gha rrie evba.

Emwa dan ẹre ọ wa gha rre Sọdom kevbe Gomorra. Vbene iran ghi ru emwi dan sẹ, Osanobua na wẹẹ irẹn khian guọghọ iran. Sokpan Osanobua hoo ne Lọt vbe ẹgbẹe ọre miẹn fan, rhunmwuda ọni, ọ na gie odibo eva ne iran do tama e Lọt vbe ẹgbẹe ọre, ne iran kpa hin ẹvbo nii rre. Avbe odibosa nii keghi tama iran wẹẹ: ‘Uwa zẹgiẹ kpa hin ẹvbo na rre! E Jehova khian guọghọe rua.’

E Lọt ma wa kpa vbobọvbobọ. Ọ na gha siegbe. Ẹre avbe odibosa nii na ghi si iran ladian hin ẹvbo nii rre, vbene iran na tama e Lọt vbe ẹgbẹe ọre wẹẹ: ‘Uwa rhulẹ ne uwa mieke na miẹn fan! Wa ghẹ ghee iyeke. Adeghẹ uwa na ghee iyeke, uwa gha wu!’

Vbe iran ghi sẹ e Zoa, e Jehova na ghi hihiẹ erhẹn kue Sọdom vbe Gomorra. Ẹvbo nii na ghi guọghua. Ọvbokhan e Lọt ma họn ẹmwẹ ne Jehova, ọ na ghee iyeke, ẹre ọ na ghi khian orrẹ umwẹ! E Lọt vbe ivbi ẹre nikhuo na miẹn fan rhunmwuda ne iran na họn ẹmwẹ ne Jehova. Ẹi mwẹ ọ ma balọ iran wẹẹ iye iran ghee iyeke. Sokpan, iran wa ghọghọ wẹẹ, iran họn ẹmwẹ ne Jehova.