IRUẸMWI 06
De Vbene Arrọọ Ya Suẹn Hẹ?
“Obọ [Osanobua] ẹre arrọọ ke rre.” (Psalm 36:9, NW) Uwẹ ya ọni yi ra? Emwa eso keghi kha wẹẹ, te emwi hia wa de rre vbe udomwurri. Adeghẹ erriọ gele nọ, ọni nọ wẹẹ, te ima wa rre agbọn na kẹkan. Sokpan deghẹ e Jehova ẹre ọ yi arrọọ, ọni rhie ma wẹẹ ọ mwẹ evbọzẹe nọ na yi ẹre.a Gia ziro yan emwi ne Baibol tae vbekpa vbene arrọọ ya suẹn hẹ, kevbe evbọzẹe nọ na khẹke ne ima yaeyi.
1. De vbene agbọn na kevbe emwi hia ni rre orere iso ya gha rrọọ hẹ?
E Baibol khare wẹẹ: ‘Vbe omuhẹn, Osanobua keghi yi agbọn kevbe emwi hia ni rre iso.’ (Gẹnẹsis 1:1) Avbe umẹwaẹn nibun kue yọ wẹẹ, agbọn na kevbe emwi hia ni rre iso mwẹ omuhẹn. De vbene Osanobua ya yi iran hẹ? “Ẹtin” ẹnrẹn nọ re orhiọn nọhuanrẹn, ẹre ọ ya yi emwi hia, ya sẹ egbe avbe orhọnmwẹ kevbe planẹt ughughan.—Gẹnẹsis 1:2.
2. Vbọzẹ ne Osanobua na yi uhunmwu otagbọn na?
Te Jehova yi agbọn na, nọ gha re “ehe ne emwa gha yin,” ọ ma wa yi ẹre kua kẹkan. (Aizaia 45:18) Ọ keghi yi agbọn na vbe odẹ nọ gha ya fu emwa egbe rre, ọ na vbe viọ emwi hia na ya yin agbọn yọ, ne emwa nagbọn mieke na sẹtin dia ẹre ya vbe etẹbitẹ. (Tie Aizaia 40:28; 42:5.) Avbe umẹwaẹn khare wẹẹ, uhunmwu otagbọn na lughaẹn ne planẹt nikẹre. Vbọ gberra uhunmwu otagbọn na, e planẹt ọvbehe i rrọọ ne emwa nagbọn gha sẹtin dia.
3. Vbọ ya emwa nagbọn lughaẹn ne avbe aranmwẹ?
Vbe Jehova ghi yi agbọn na nẹ, ọ na suẹn gha yi emwi ni mwẹ arrọọ ye uwu ẹre. Vbe okaro, ọ keghi yi emwi okọ ughughan kevbe avbe aranmwẹ. Iyeke ọni, “Osanobua na ghi yi ene okpia nọ yevbe irẹn.” (Tie Gẹnẹsis 1:27, NW.) Vbọ ya emwa nagbọn lughaẹn? Emwa nagbọn ọkpa ẹre Osanobua yi nọ gha yevbe irẹn, nọ rhie ma wẹẹ, ma gha sẹtin ya egbe taa re vbe odẹ nọ ya rhie ahoẹmwọmwa ma, odẹ nọ ya ya obọ esi mu emwa hia kevbe odẹ nibun ọvbehe. Ọ vbe yi ima ne ima sẹtin gha ruẹ urhuẹvbo ughughan, ne ima sẹtin gha bẹghe emwi nọ mose, ọ ghi vbe gha yẹẹ ima, kevbe ne ima sẹtin gha danmwehọ ihuan nọ rhiẹnrhiẹn. Deba ọni, ma ọkpa ẹre ọ vbe sẹtin rhie ugamwẹ ne Ayi ọghomwa, avbe aranmwẹ i sẹtin.
GUALỌ OTỌ RE SAYỌ
Gia ziro yan evbọ so igiẹ yọ wẹẹ te a yi emwi hia kevbe wẹẹ, te emwi hia ne Baibol tae vbekpa vbene a ya yi emwi ughughan hẹ wa gba. Gia vbe ziro yan emwi ne uyinmwẹ esi ọghe emwa nagbọn maa ima re vbekpa Osanobua.
4. Te a yi emwi hia ni mwẹ arrọọ
Adeghẹ a na gha tian emwa nagbọn ye emwi ne iran kun, agharhemiẹn wẹẹ evbayi ẹre iran ghee re ya kun ẹnrẹn, de ọmwa nọ ghi khẹke na tian ye nene evbayi ne iran ghee re? Kpee VIDIO na, iyeke ọni, uwa ghi ziro yan inọta nọ lelẹe.
De evbayi eso ne emwa nagbọn he ghee ya kun emwi?
Owa hia mwẹ ọmwa nọ bọe kevbe nọ ru emwamwa rẹn. Sokpan de ọmwa nọ ghi yi emwi ughughan ne ima bẹghe vbe agbọn na? Tie Hibru 3:4, iyeke ọni, uwa ghi ziro yan avbe inọta na:
De nọ yẹẹ ruẹ sẹ vbe uwu emwi ughughan ne Osanobua yi?
Uwẹ ghee ẹre wẹẹ ọmwa ne ẹwaẹn gba na, gha yayi wẹẹ, te a yi emwi hia ni rre agbọn na kevbe orere iso ra? Vbua gu kha vberriọ?
U ka rẹn ra?
U gha miẹn uhunmwuta kevbe vidio ughughan ni dekaẹn ọna vbe jw.org, vbe ototọ uhunmwuta na tie ẹre “Was It Designed?” kevbe “Viewpoints on the Origin of Life.”
“A rẹnrẹn ighẹ owa hia mwẹ ọmwa nọ bọe, Osanobua ọrọre ọmwa nọ bọ emwi hia”
5. Te emwi hia ne Baibol tae vbekpa vbene a ya yi emwi ughughan hẹ wa gba
Ebe Gẹnẹsis uhunmwu ẹnrẹn 1, keghi gie vbene a ya yi agbọn na kevbe emwi hia ni rrọọ. Ẹmwata ẹre Baibol gele ta ra, ra ohoghe nọ? Kpee VIDIO na, iyeke ọni, uwa ghi ziro yan inọta ni lelẹe.
E Baibol wẹẹ ikpẹdẹ ehan ẹre Osanobua ya yi emwi hia. Ikpẹdẹ ehan kẹkan nọ mwẹ ughaẹdẹ 24 nọ ra?
Uwẹ gele yayi wẹẹ emwi ne Baibol tae vbekpa vbene a ya yi emwi hia hẹ gba ra? Vbua gu kha vberriọ?
Tie Gẹnẹsis 1:1, iyeke ọni, uwa ghi ziro yan inọta na:
Avbe umẹwaẹn wẹẹ, agbọn na kevbe emwi hia ni rre iso mwẹ omuhẹn. Vbe ọna ya gua emwi nọ rre ako ọghe Baibol na ro hẹ?
Emwa eso roro ẹre wẹẹ, ughaghe emwi ọkpa ne Osanobua yi, ẹre ọ ghi do khian emwi ughughan. Tie Gẹnẹsis 1:21, 25, 27, iyeke ọni, uwa ghi ziro yan avbe inọta na:
Zẹvbe nọ rre ako ọghe Baibol na, ẹmwata gele nọ wẹẹ, emwi ọkpa ne Osanobua yi, ẹre ọ ghi do khian avbe aranmwẹ kevbe emwa nagbọn ra? Ra te Osanobua yi emwi “ughughan” ni mwẹ arrọọ?b
6. Emwa nagbọn keghi lughaẹn ne evbayi nikẹre
Te ima wa lughaẹn ne avbe aranmwẹ. Tie Gẹnẹsis 1:26, iyeke ọni, uwa ghi ziro yan inọta na:
Ma ne emwa nagbọn ne Osanobua yi nọ gha yevbe irẹn keghi mwẹ ahoẹmwọmwa kevbe ẹnina. Vbe ọna maa ruẹ re vbekpa aro ọmwa ne Osanobua khin?
EMWA ESO KEGHI KHA WẸẸ: “Emwi hia ne Baibol tae vbekpa vbene a ya yi emwi ughughan hẹ keghi re ohoghe.”
Vbua ghee ẹre hẹ? Vbua gu kha vberriọ?
OLIKA ẸMWẸ
E Jehova ẹre ọ yi emwi hia ni rre agbọn na kevbe ni rre orere iso.
Ogbewerriẹ
Vbe Baibol a ta vbekpa vbene agbọn na kevbe emwi hia ni rre iso ya do gha rrọọ hẹ?
Te Osanobua yi emwi hia ra, ra emwi ọkpa nọ yi, ẹre ọ ghi do khian emwi ughughan?
Vbọ ya emwa nagbọn lughaẹn ne evbayi nikẹre?
RUẸ SAYỌ
Ghee emwi eso ni sosẹ yọ wẹẹ, te a gele yi emwi ughughan ni rre agbọn na.
Ghee vidio nọ rhie ẹre ma, vbene erha ọmọ gha ya sẹtin rhan otọ vbene a ya yi emwi hia ma ovbi ẹre, zẹvbe ne Baibol ya gie ẹre.
Gualọ otọ re, ne u mieke na rẹn deghẹ imamwaemwi ọghe wẹẹ te emwi hia rre vbe udomwurri gua emwi nọ rre Baibol ro.
“Emwi Ọkpa Ne Osanobua Yi, Ẹre Ọ Ghi Do Khian Emwi Ughughan Ra?” (Ọ rre intanẹt)
Ghee ẹre deghẹ avbe ugboloko nẹdẹ na miẹn kevbe emwi ughughan ne avbe umẹwaẹn he gualọ otọ re miẹn, so igiẹ yọ wẹẹ te a gele yi emwi hia, ra te emwi hia de rre vbe udomwurri.
Ọta Isẹn Nọ Khẹke Na Nọ Vbekpa Vbene Arrọọ Ya Suẹn Hẹ (ebe ẹmu)
a Ma gha ziro yan evbọzẹe ne Osanobua na yi emwa nagbọn vbe Iruẹmwi 25.
b Ẹmwẹ na ighẹ “ughughan” na loo ro vbe ako ọghe Baibol na, keghi re ẹmwẹ na ya gie emwi hia nọ ghi mwẹ arrọọ nẹ.