IRUẸMWI 23

Ọ Khẹke Ne U Hia Ne U Dinmwiamẹ!

Na Printi Ladian

Jesu wẹẹ te ọ khẹke ne Ivbiotu e Kristi hia dinmwiamẹ. (Tie Matiu 28:19, 20, NW.) Sokpan vbọ re idinmwiamẹ? Vbọ khẹke ne ọmwa ru nọ mieke na gha re ọmwa nọ gbegba nọ gha dinmwiamẹ?

1. Vbọ re idinmwiamẹ?

Evba yae kha ighẹ ẹmwẹ e Grik na ke zedu ẹre ladian ighẹ ẹmwẹ na nọ re “dinmwiamẹ,” ọre na “dinmwi” ọmwa ra emwi ye uwu amẹ. Vbe Jesu dinmwiamẹ vbe Ẹzẹ e Jọdan, te a dinmwi egbe ẹre hia ye uwu amẹ, iyeke ọni, ọ na “ke uwu amẹ ladian.” (Mak 1:9, 10, NW) Ivbiotu e Kristi ọghe ẹmwata ghaa dinmwiamẹ, te egbe iran wa vbe la uwu amẹ fo.

2. De emwi ne ọmwa rhie ma vbe ọ gha dinmwiamẹ?

Ọmwa gha dinmwiamẹ, te ọ rhie ẹre ma wẹẹ irẹn ya egbe fiohan ne Jehova nẹ. De vbene ọmwa ya ya egbe fiohan hẹ? Ọmwa ke dinmwiamẹ, ọ ghi ka tama e Jehova vbe erhunmwu wẹẹ, irẹn ọkpa ẹre irẹn khian gha ga vbe etẹbitẹ. Ọ ghi vbe yan ma e Jehova wẹẹ, ahoo ọghẹe, ẹre irẹn khian ghi gha mu ye okaro vbe arrọọ ọghe irẹn. Ọ ghi vbe mu egbe nọ ya “mianmian enegbe ẹre . . . , nọ gha lele” imamwaemwi kevbe igiemwi ọghe Jesu. (Matiu 16:24, NW) Ọmwa gha ya egbe fiohan, ọ na vbe dinmwiamẹ, ọ ghi do sikẹ e Jehova sayọ, ọ ghi vbe sikẹ emwa ọghe Osanobua.

3. Vbọ khẹke ne ọmwa ru ọ ke dinmwiamẹ?

U ke dinmwiamẹ, ọ khẹke na maa ruẹ emwi vbekpa e Jehova, u ghi vbe do mu ẹtin yan rẹn. (Tie Hibru 11:6.) Zẹvbe ne u ya rẹn e Jehova sayọ, amuẹtinyan kevbe ahoẹmwọmwa ne u mwẹ daa re ghi vbe gha wegbe sayọ. U ghi do gha hoo ne u gha tama emwa ọvbehe vbekpa re kevbe ne u gha ya ilele ọghẹe ru emwi. (2 Timoti 4:2; 1 Jọn 5:3) Ọmwa gha suẹn gha “yin vbene Nọyaẹnmwa hoo,” ọ na “vbe gha ru emwi nọ yẹẹ ọre,” ọ sẹtin do gha hoo nọ ya egbe fiohan nẹẹn kevbe nọ dinmwiamẹ.—Kọlose 1:9, 10.a

GUALỌ OTỌ RE SAYỌ

Gia ziro yan emwi ne ima gha miẹn ruẹ vbe idinmwiamẹ ọghe Jesu kevbe emwi ne ọmwa gha ru, ọ ke zẹ owẹ ne kpataki na.

4. Ma gha miẹn emwi ruẹ vbe idinmwiamẹ ọghe Jesu

Tie Matiu 3:13-17, NW ne u ya rẹn sayọ vbekpa idinmwiamẹ ọghe Jesu. Iyeke ọni, uwa ghi ziro yan avbe inọta na:

Ọmobọ ẹre Jesu ghaa khin vbe ọ dinmwiamẹ ra?
Vbe ọ ya dinmwiamẹ hẹ? Te a sanmwẹ amẹ ku ọre ra?

Jesu ghi dinmwiamẹ nẹ, ọ na suẹn iwinna ne kpataki ne Osanobua waa re. Tie Luk 3:21-23, NW kevbe Jọn 6:38, iyeke ọni, uwa ghi ziro yan inọta na:

Vbe Jesu ghi dinmwiamẹ nẹ, de iwinna nọ mu ye okaro vbe arrọọ ọghẹe?

5. U gha sẹtin dinmwiamẹ deghẹ ọ rrọ ruẹ orhiọn

Vbene u gha ya ya egbe fiohan ne Osanobua hẹ kevbe ne u dinmwiamẹ, sẹtin ka gha kọn ruẹ aro. Sokpan zẹvbe ne u ya ruẹ emwi sayọ, ẹi re ọmwa ẹre ọ khian ghi tama ruẹ ne u zẹ owẹ ne kpataki na. Ne u ya rẹn emwa eso ni he zẹ owẹ ne kpataki na, kpee VIDIO na.

E VIDIO: Vbene U Khian Ya Gha Re Ọsie Jehova Hẹ (1:11)

Tie Jọn 17:3 kevbe Jems 1:5, iyeke ọni, uwa ghi ziro yan inọta na:

Vbọ khian ru iyobọ ne ọmwa ya gha re nọ gbegba nọ gha dinmwiamẹ?

A. Okhuo ọkpa gha na erhunmwu; vbe erhunmwu nii, ọ gha ya egbe ẹre fiohan ne Osanobua.

B. Nene okhuo gha dinmwiamẹ zẹvbe Osẹe Jehova, te egbe ẹre hia wa la uwu amẹ fo.

Ma gha tama e Jehova wẹẹ irẹn ẹre ima khian ga vbe etẹbitẹ, te ima ya egbe fiohan nẹẹn nii
Ma gha dinmwiamẹ, ọ ghi ya emwa rẹn wẹẹ ima ya egbe fiohan ne Osanobua nẹ

6. U gha dinmwiamẹ nẹ, u ghi do gha re ọkpa vbe ẹgbẹe ọghe Jehova

Ọmwa gha dinmwiamẹ nẹ, ọ ghi do gha re ọkpa vbe ẹgbẹe ọghe Jehova nọ rre otagbọn hia. Agharhemiẹn wẹẹ ehe ughughan ẹre ima ke rre, emwi ọkpa ẹre ima yayi, ilele ọkpa ẹre ima vbe lele. Tie Psalm 25:14 kevbe 1 Pita 2:17, iyeke ọni, uwa ghi ziro yan inọta na:

De vbene idinmwiamẹ ya ya ọmwa sikẹ e Jehova kevbe eguọmwadia re hẹ?

Efoto: Ọtẹn nokhuo ọkpa nọ dinmwiamẹ nẹ, gha mu ẹmwẹ etẹn roro; ọ keghi yae sọyẹnmwẹ. 1. Ọ gha fannọ otọ ẹko ẹre ma ọtẹn nokhuo ọkpa. 2. Ọ fẹko da ọtẹn nokhuo ọkpa nọ khian ọmaẹn nẹ yi, zẹvbe nọ ya khian. 3. Ọ gha gu avbe ọsiọre rri evbare; eso khian ọmaẹn nẹ, eso ma he khian ọmaẹn. 4. Irẹn vbe ọtẹn nokhuo ọkpa gha kporhu ma okpia ọkpa. 5. Irẹn vbe etẹn nikhuo eva ni ke ẹvbo ughughan rre gha mu efoto vbe asikoko nọkhua.

EMWA ESO KEGHI KHA WẸẸ: “I ma he mu egbe ne I khian ya dinmwiamẹ.”

Deghẹ erriọ ye vbe ekhọe ruẹ, uwẹ ye ghee ẹre wẹẹ, ọ khẹke ne u dinmwiamẹ ra?

OLIKA ẸMWẸ

Jesu wẹẹ te ọ khẹke ne Ivbiotu e Kristi dinmwiamẹ. Ọmwa ke dinmwiamẹ, ọ khẹke nọ ya ekhọe hia mu ẹtin yan e Jehova, ọ ghi gha lele ilele ọghẹe, ọ ghi vbe ya egbe ẹre fiohan nẹẹn.

Ogbewerriẹ

Vbọ re idinmwiamẹ? Vbọzẹ nọ na ru ekpataki?
De emwi ne ọmwa rhie ma vbe ọ gha dinmwiamẹ?
Vbọ khẹke ne ọmwa ru, a te miẹn wẹẹ ọ ya egbe fiohan, ọ ke do dinmwiamẹ?

Ẹdẹ na ruẹ iruẹmwi na fo:

Emwi Ne U Gha Ru

Ya ghee avbe checklist na ni rre ufomwẹ Abọ 4, “I Mu Egbe Ne I Ya Suẹn Gha Deba Etẹn Ni Rre Iko Yo Ikporhu Ra?” kevbe “I Mu Egbe Ne I Ya Dinmwiamẹ Ra?,” ne u ya rẹn emwi ne u gha ru nọ gha ya ruẹ gbegba.

Emwi Ọvbehe Ne U Gha Ru:

Your other goal

RUẸ SAYỌ

Ghee emwi na gele ya idinmwiamẹ kha.

“Vbọ Re Idinmwiamẹ?” (Ọ rre intanẹt)

Ghee emwi eso ne ọmwa gha ru, ọ ke gbegba nọ gha dinmwiamẹ.

“Ahoẹmwọmwa Ne U Mwẹ Ne Jehova Ẹre Ọ Khian Ya Ruẹ Dinmwiamẹ” (Owa Ọkhẹ, March 2020)

Tie vbekpa emwi nọ gua okpia ọkpa kpa ya dinmwiamẹ.

“Iran Keghi Kie Ẹkpotọ Mẹ Ya Zẹ Nọ Re Ẹmwata Ne Egbe Mwẹ” (The Watchtower, February 1, 2013)

Ghee evbọzẹe ne idinmwiamẹ na re okhuo nọ khẹke ne u fian ne egbuẹ, kevbe odẹ ne u gha ya sẹtin mu egbe ẹre yotọ.

“Ọ Khẹke Ne I Dinmwiamẹ Ra?” (Questions Young People Ask—Answers That Work, Volume 2, uhunmwuta 37)

a Ọmwa gha ka dinmwiamẹ vbe ugamwẹ nọ ka gha ye, ọ khẹke nọ werriegbe dinmwiamẹ. Vbọzẹ? Rhunmwuda, ugamwẹ nọ ka gha ye nii, ma maa re ẹmwata ni rre Baibol.—Ya ghee Iwinna 19:1-5, NW kevbe Iruẹmwi 13.