IRUẸMWI 29

Vbọ Sunu Daa Ima Vbe Ima Gha Wu Nẹ?

Na Printi Ladian

Ọmwa ne u hoẹmwẹ ọnrẹn he wu ẹdẹ ra? U ghaa rre uwu obalọ vberriọ, u sẹtin gha roro ẹre wẹẹ: ‘Vbọ sunu daa ima vbe ima gha wu nẹ? Ma mwẹ ayayẹro wẹẹ ima gha dọlegbe miẹn emwa ima ni wulo ra?’ Vbe iruẹmwi na kevbe nọ lelẹe, ma gha ziro yan ewanniẹn ni fu ọmwa ẹko rre, ne Baibol rhie ye avbe inọta na.

1. Vbọ sunu daa ima vbe ima gha wu nẹ?

Jesu keghi ya uwu gie ovbe nọ dinmwi. Ọmwa ghaa rre ovbe nọ dinmwi, ẹi ghi zẹdẹ rẹn emwi rhọkpa nọ sunu. De vbene uwu ya yevbe na ghee ovbe hẹ? Ọmwa gha wu nẹ, ẹi ghi họn ẹmwẹ obalọ, ohioro i ghi vbe muẹn, ọ gha khọnrẹn wẹẹ, ọ te kakabọ hoẹmwẹ avbe ọsiọre kevbe ẹgbẹe ọre. E Baibol khare wẹẹ, “iran ni wulo nẹ ma rẹn emwi rhọkpa.”—Tie Asan-Ibo 9:5.

2. De iyobọ nọ ye ne ima vbe ima gha rẹn ẹmwata nọ dekaẹn uwu?

Emwa nibun keghi mu ohan uwu, erriọ iran vbe ya mu ohan emwa ni wulo nẹ! Sokpan emwi ne Baibol tae vbekpa uwu gha sẹtin mu ruẹ orhiọn sotọ. Jesu khare wẹẹ: “Ẹmwata gha fan uwa.” (Jọn 8:32, NW) Ugamwẹ eso keghi maa emwa re wẹẹ, ọmwa gha wu nẹ, ọ mwẹ emwi nẹi wu vbe egbe ẹre. Sokpan, e Baibol gi ima rẹn wẹẹ, ọna i re ẹmwata. Vbene ẹmwata, ọmwa nọ wu nẹ i ghi rri oya. Emwa ni wulo nẹ ma vbe rẹn emwi rhọkpa, rhunmwuda ọni, iran i sẹtin rhie ikuanegbe ne ima. Nọnaghiyerriọ, esa i rrọọ na gha zọ ese gie iran, ra na gha ga iran; esa i vbe rrọọ na gha na erhunmwu ne iran.

Emwa eso wẹẹ iran sẹtin gha gu emwa ni wulo nẹ guan. Sokpan, ọni i sẹtin sunu. Ma ruẹ ọre ban wẹẹ, “iran ni wulo nẹ ma rẹn emwi rhọkpa.” Emwa ni roro ẹre wẹẹ, iran gu emwa iran ni wulo guan, ma rẹn wẹẹ, avbe ugbogiorinmwi ẹre iran gele gu guan rhunmwuda, te avbe ugbogiorinmwi mu akpa ọghe emwa ni wulo nẹ yọ. Ma gha gele rẹn ẹmwata nọ dekaẹn uwu, ọ keghi gbogba ga ima vbe obọ avbe ugbogiorinmwi. Ọna ẹre ọ zẹe ne Jehova na ya obọ sekhae ne ima, ne ima ghẹ gualọ odẹ ne ima gha ya gu emwa ni wulo nẹ guan, rhunmwuda, ọ rẹnrẹn wẹẹ, avbe ugbogiorinmwi sẹtin la evba la ima egbe.—Tie Diuteronomi 18:10-12.

GUALỌ OTỌ RE SAYỌ

Gia ziro yan rẹn sayọ, emwi ne Baibol maa ima re vbekpa uwu. Ọna gha ya amuẹtinyan ne u mwẹ daa Osanobua wegbe sayọ, rhunmwuda, u gha do rẹn wẹẹ, zẹvbe Osa ọghe ahoẹmwọmwa, ẹi rri emwa ni wulo nẹ oya.

Okpia ọkpa vbe ivbi ẹre eva negiẹrẹ tota ye aga vbe ẹdẹ na ree ọvbokhan rẹn. Ẹgbẹe kevbe avbe ọse rre evba, iran gha mu iran orhiọn sotọ.

3. Emwi nọ gele sunu daa emwa ni wulo nẹ

Vbe uhunmwu otagbọn hia, iyayi ughughan ẹre emwa mwẹ, vbe nọ dekaẹn emwi nọ sunu daa ima vbe ima gha wu nẹ. Ehia i sẹtin wa gha re ẹmwata.

Vbe nọ dekaẹn emwi nọ sunu daa emwa ni wulo nẹ, de iyayi ne emwa mobọ mwẹ vbe ẹdogbo ne u ye?

Ne u ya rẹn emwi ne Baibol khare vbekpa ọna, kpee VIDIO na.

E VIDIO: Vbọ Sunu Daa Emwa Ni Wulo Nẹ?—Abọ Ne Kuẹi Vbọ (1:19)

Efoto: Efoto na mu ladian vbe vidio nọ mwẹ uhunmwuta nọ khare wẹẹ, ‘Vbọ Sunu Daa Emwa Ni Wulo Nẹ?—Abọ Ne Kuẹi Vbọ.’ 1. Ikun orinmwi rre ebẹdi vbe owa isinmwiegbe. 2. Okpia ọkpa nọ rre uwu okọ erhẹn gha vbiẹ. Orhunmwu ọkpa tota ye ọre oberhọmwa, vbene nọkpa na tota ye ọre obiyọmwa.

Tie Asan-Ibo 3:20, iyeke ọni, uwa ghi ziro yan avbe inọta na:

Zẹvbe na tie ẹre vbe ako na, vbọ sunu daa emwa ni wulo nẹ?
Ọ mwẹ emwi nẹi wu vbe egbe ọmwa, vbe ọmwa gha wu nẹ ra?

E Baibol tama ima vbekpa uwu ọghe ọsie Jesu na tie ẹre Lazarọs. Zẹvbe ne u ya tie Jọn 11:11-14, yẹrẹro emwi ne Jesu tae vbekpa uwu ọghe Lazarọs. Iyeke ọni, uwa ghi ziro yan avbe inọta na:

Vbe Jesu a ya gie uwu?
Vbe ọna maa ima re vbekpa emwi nọ sunu daa emwa ni wulo nẹ?
Vbe uwẹ a ghee ẹre hẹ ighẹ odẹ ne Baibol ya gie uwu?

4. Ẹmwata nọ dekaẹn uwu keghi fan ima

Ma gha rẹn ẹmwata nọ dekaẹn uwu, ma i ghi mu ohan emwa ni wulo nẹ. Tie Asan-Ibo 9:10, NW, iyeke ọni, uwa ghi ziro yan inọta na:

Emwa ni wulo nẹ gha sẹtin rhie ikuanegbe ne ima ra?

Ma gha rẹn ẹmwata nọ dekaẹn emwa ni wulo nẹ, emwi rhọkpa i khian ghi ya ima gha zọ ese gie iran, ra ne ima gha ga iran. Tie Aizaia 8:19, NW, kevbe Arhie Maan 4:11, iyeke ọni, uwa ghi ziro yan inọta na:

De aro ne uwẹ yayi wẹẹ e Jehova ya ghee ọmwa nọ ga ọmwa nọ wu nẹ, ra nọ ya gha gualọ iyobọ vbe obọ ọmwa nọ wu nẹ?

Efoto: Ilele kevbe ugie ne emwa do ya rhie uyi ne emwa ni wulo nẹ. 1. Okpia ọkpa diguẹ gha na erhunmwu vbe odaro idin, ọ viọ evbare ye evba, nọ ya sisara ne ọmwa nọ wu nẹ. 2. Ikpia eha gha ku, iran mu egbe na ya do ugie vbe ẹvbo iran. 3. Ẹbu emwa gha do ugie, iran viọ aro ekpo yọ, ni yevbe ugboloko uhunmwu emwa ni wulo nẹ, eso vbe uwu iran viọ ugboloko na kaa re ọghe emwa mwẹ obọ, vbe ẹdẹ ne iran do ugie orinmwi (Day of the Dead). — Ẹmwata nọ dekaẹn uwu, ẹre ọ fan ima vbe ilele ni sọnnọ e Jehova

5. Ẹmwata nọ dekaẹn uwu keghi fu ima ẹko rre

Emwi na maa emwa nibun re ọre wẹẹ, iran gha wu, te iran khian rri oya ye orukhọ ne iran ru. Sokpan, ọ keghi fu ima ẹko rre, ne ima na rẹn wẹẹ, emwa ni wulo nẹ i rri oya, uhiẹn ya sẹ egbe emwa ni ru orukhọ nọ wegbe. Tie Rom 6:7, iyeke ọni, uwa ghi ziro yan inọta na:

Zẹvbe na tie ẹre vbe ako na, u bẹghe ẹre wẹẹ, te uwu fan ọmwa hin obọ ẹtin orukhọ rre. Nọnaghiyerriọ, uwẹ yayi wẹẹ, ọmwa nọ wu ye rri oya ye orukhọ nọ ka ru ra?

Zẹvbe ne u ya rẹn e Jehova sayọ, u gha do bẹghe ẹre wẹẹ, ẹghẹ ọkpa i rrọọ nọ khian ya rri emwa ni wulo nẹ oya. Tie Diuteronomi 32:4 kevbe 1 Jọn 4:8, iyeke ọni, uwa ghi ziro yan avbe inọta na:

Uwẹ yayi wẹẹ Osa na gie re vbenian na, gha kue yọ ne emwa ni wulo nẹ gha rri oya ra?
Ẹmwata nọ dekaẹn uwu mu ruẹ orhiọn sotọ ra? Vbua gu kha vberriọ?

EMWA ESO KEGHI KHA WẸẸ: “Ohan wa mu mwẹ rhunmwuda, I ma rẹn emwi nọ khian sunu daa mwẹ vbe I gha wu nẹ.”

De avbe ako ọghe Baibol ni fu ọmwa ẹko rre, ne u gha sẹtin tie ma ọmwa vberriọ?

OLIKA ẸMWẸ

Ọmwa gha wu, ọni ọre arrọọ ọghẹe sẹ ufomwẹ. Emwa ni wulo nẹ i rri oya, iran i vbe sẹtin rhie ikuanegbe ne emwa ni rre agbọn.

Ogbewerriẹ

Vbọ sunu daa ima vbe ima gha wu nẹ?
De iyobọ nọ ye ne ima vbe ima gha rẹn ẹmwata nọ dekaẹn uwu?
De vbene ẹmwata nọ dekaẹn uwu ya fu ima ẹko rre hẹ?
Ẹdẹ na ruẹ iruẹmwi na fo:

Emwi Ne U Gha Ru

Hia ne u rẹn ọnrẹn ye uhunmwu, ako ọkpa vbe Baibol nọ rre iruẹmwi na, ne u gha ya sẹtin rhan otọ re ma ọmwa ọvbehe, emwi nọ sunu daa emwa ni wulo nẹ.

Emwi Ọvbehe Ne U Gha Ru:

Your other goal

RUẸ SAYỌ

Ghee evba gele ya e “soul” ra evbọ rrọọ kha vbe Baibol.

“Vbọ Re Evbọ Rrọọ (Soul)?” (Ọ rre intanẹt)

Gualọ otọ re deghẹ Osanobua rri emwa dan oya vbe ẹrinmwi erhẹn.

Ẹrinmwi Erhẹn Gele Rrọọ Ra? (3:07)

Ọ zẹdẹ khẹke ne ima gha mu ohan emwa ni wulo nẹ ra?

Orhiọn Emwa Ni Wulo Nẹ—Iran Gha Sẹtin Ru Iyobọ Ne Ima Ra? Iran Gha Sẹtin Kuan Ima Ra? Iran Gele Rrọọ Ra? (ebe ẹmu)

Ghee vbene orhiọn okpia ọkpa ghi ya sotọ hẹ, vbe ọ ghi do rẹn emwi nọ gele sunu daa ima vbe ima gha wu nẹ.

“Ewanniẹn Ni Dagbẹn Ne I Miẹn Vbe Baibol Keghi Wa Mu Mwẹ Ekhọe” (The Watchtower, February 1, 2015)