Gha Mwẹ Udinmwẹ

Emwi Ne Jesu Ru

E VIDIO: Jesu Rhie Ibude Ne Igbama Ọkpa Nọ Rre Ukpo Ọdakha

1. Ghee VIDIO na, ra u ghi tie Mak 10:​17-22. Iyeke ọni, u ghi mu avbe inọta na roro:

1. De emwi esi ne u yayi wẹẹ e Jesu bẹghe vbe egbe okpia nii nọ rre ukpo ọdakha?

2. Vbua ya rẹn wẹẹ, ahoẹmwọmwa kevbe udinmwẹ ne Jesu ghaa mwẹ ẹre ọ yae bu okpia nii ude?

Vbe Ima Miẹn Ruẹ Vbe Obọ E Jesu?

2. Te ọ khẹke ne ima gi ọmwa ne ima gu ruẹ e Baibol rẹn wẹẹ, ma hoẹmwẹ ọnrẹn; sokpan, te ọ vbe khẹke ne ima wa gi ẹre rẹn emwi nọ gha ru, nọ miehe na sẹtin khian ọsie Jehova.

Ya Egbe Taa E Jesu

3. Ru iyobọ ne ọmwa ne u gu ruẹ e Baibol ya rẹn emwi eso nọ gha sẹtin ru, u ghi vbe ru iyobọ nẹẹn ya musọe.

1. Loo abọ na tie ẹre “Emwi Ne U Gha Ru” nọ rre dọmwadẹ iruẹmwi vbe Sọyẹnmwẹ Arrọọ Vbe Etẹbitẹ! ya ru iyobọ nẹẹn.

2. Ru iyobọ nẹẹn ya rẹn emwi eso nọ gha sẹtin ru nian kevbe emwi eso nọ gha sẹtin ru vbe odaro.

3. Gha tian rẹn vbe ẹghẹ hia vbe u gha bẹghe alaghodaro nọ mwẹ.

4. Ọ khẹke ne u rẹn emwi eso nọ gha sẹtin mu idobo ye ọre egbe, u ghi vbe ru iyobọ nẹẹn ya rẹn emwi nọ khẹke ya ru.

1. Nọ egbuẹ wẹẹ:

   • ‘Adeghẹ ọmwa ne I gu ruẹ e Baibol i zẹ owẹ nọ khẹke nọ zẹ nọ mieke na sẹtin dinmwiamẹ, vbọ mu idobo ye ọre egbe?’

   • ‘De iyobọ ne I gha sẹtin ru nẹẹn?’

2. Na erhunmwu gie Osanobua nọ rhie udinmwẹ nuẹn ya sẹtin tama ọmwa ne u gu ruẹ e Baibol emwi nọ khẹke nọ ru, kevbe ne u sẹtin tae vbe odẹ nọ gha rhie ẹre ma wẹẹ u hoẹmwẹ ọnrẹn.

5. Dobọ iruẹmwi ọghẹe yi deghẹ ẹ i mwẹ alaghodaro.

1. U ghaa hoo ne u rẹn deghẹ ọmwa ne u gu ruẹ e Baibol mwẹ alaghodaro, nọ egbuẹ wẹẹ:

   • ‘Ọmwa ne I gu ruẹ e Baibol rhie emwi nọ ruẹ ye uyinmwẹ ra?’

   • ‘Ọ yo iko ra? Ọ vbe tama emwa ọvbehe vbekpa emwi nọ ruẹ ra?’

   • ‘Adeghẹ ọ kpẹẹ re nọ ke ruẹ e Baibol, ọ hoo nọ do gha re Osẹe Jehova ra?’

2. Adeghẹ ọmwa ne u gu ruẹ e Baibol ma mu egbe nọ ya gha mwẹ alaghodaro:

   • Tama rẹn wẹẹ, ọ khẹke nọ tota nọ muẹn roro, emwi nọ si ẹre ghee iyeke.

   • Fẹko gi ẹre rẹn evbọzẹe ne u khian na dobọ iruẹmwi nii yi.

   • Tama rẹn emwi eso nọ gha winna yan deghẹ ọ hoo ne uwa werriegbe suẹn gha ruẹ emwi.