Vbene A Ya Guẹ Sayọ vbe Iwinna Ikporhu—Vbene a Ya Ma Emwa Na Gu Ruẹ E Baibol Hẹ Odẹ Nọ Khẹke Na Ya Ruẹ Ne Egbe Ọmwa

Evbọzẹ Ne Ọ Na Ru Ekpataki: Ne emwa ne ima gu ruẹ e Baibol mieke na sẹtin gha mwẹ alaghodaro vbe odẹ ọghe orhiọn, te ọ khẹke ne iran gha kọe ye ekhọe ọghe iran ighẹ avbe imamwaemwi ni dinmwi ni rre uwu Evbagbẹn Nọhuanrẹn. (Hib. 5:12–6:1) Ẹrhiọn ẹre a loo ya ruẹmwi. Ọ dekaan na gha ye emwi ọghe ọgbọn na ruẹ, taa emwi na ka rẹn, a ghi vbe rẹn otọre, ere nọ rrọọ deghẹ a na yae ru emwi. (Itan 2:1-6) Adeghẹ emwa na gu ruẹ e Baibol na ruẹ ne egbe iran vbene a ya ru ezanzan hẹ, ọna gha ru iyobọ ne iran ya gha loo ebe ọghomwa ya rhie ewanniẹ ye avbe inọta ni dekaan e Baibol. Adeghẹ iran na rhiegba yọ, ne iran gha rhiẹre ye uyinmwẹ emwi ne iran ruẹ, ọna gha ru iyobọ ne iran ya sẹtin ziengbe edanmwẹ ne Ivbiotu e Kristi werriẹ aro daa.—Luk 6:47, 48.

Vbene A Ya Ruẹ Hẹ:

Uwa ke suẹn iruẹmwi ke iruẹmwi, giẹ rẹn vbene ọ ru ekpataki hẹ na gha nọ iyobọ ọghe Jehova vbe erhunmwu.—Jọn 14:26; 1 Kọr. 2:10.
Wa ke ẹghẹ okaro nii gha rhie igiọdu ne ọmwa nu gu ruẹ emwi nọ gha muegbe iruẹmwi e Baibol ọghẹe yotọ. Mu ebe ọghuẹ ma rẹn kevbe nu ma re vbene u ya vinnọ emwi ye avbe olika ẹmwẹ kevbe avbe ifiẹmwẹ ne kuẹi hẹ.
Khama ọmwa nu gu ruẹ emwi wẹẹ, ọ khẹke ne ewanniẹ nọ khian gha zẹ gha re ẹmwẹ ọghe obọre. Ghẹ gie ne iruẹmwi ye fuẹnrẹn, na miẹn wẹẹ uwẹ gha nọ ọta, ọmwa nu ma re emwi ghi wa vbe rhie ewanniẹ yọ zẹvbe nọ rre ebe.
Rhie igiọdu ne ọmwa nu gu ruẹ emwi nọ gha tie ako ọghe evbagbẹn nọhuanrẹn vbe ẹdẹgbegbe. Giẹre ma rẹn, emwamwa nọ rre jw.org, nọ ru iyobọ ne ọmwa ya sẹtin gha tie e Baibol vbe ẹdẹgbegbe. Ọ keghi gualọ atamuolọyan na sẹtin họọnrẹn, e Baibol na tie ne egbe ọmwa vbe ẹdẹgbegbe zẹvbe emwi nọ gu ọmwa obọ ro, sokpan ẹrhiọn na loo yọ, i re na mu rria.—Psm. 1:2, 3
Ma ọmwa nu gu ruẹ emwi vbene a ya loo Research Guide for Jehovah’s Witnesses ra Watchtower Library ra Watchtower ONLINE LIBRARY ya gualọ avbe ewanniẹ ọghe avbe inọta ni dekaan e Baibol. Ru iyobọ nẹ nọ rẹn avbe ikpẹmwẹ ni mudia ye ihe ebe ọghomwa ughughan na mobọ loo vbe iko.

Danmwẹ Ọna Ghee vbe Uki Na:

Uwa gha ghi ruẹ ibu ọta ra uhunmwuta ọkpa fo nẹ, u ghi nọ ọmwa nu gu ruẹ Baibol nọ ye ifiẹmwẹ kuẹi gbẹrọrriẹ emwi nọ da wa ruẹ fo. Adeghẹ u i mwẹ ọmwa nu gu ruẹ e Baibol, ruọre vbene a ya loo ifiẹmwẹ kuẹi hẹ ya gbẹrọrriẹ ako ọghe Evbagbẹn Nọhuanrẹn ra okhuẹn ọghe The Watchtower, nu mieke na gha rẹn otọre sayọ emwi nu tie.