E Pọl Keghi “Kpọnmwẹ Osanobua, Orhiọn Keghi La Ẹre Iwu”

Vbe etẹn ni rre Rom ghi họn wẹẹ e Pọl dee, iran keghi khian okhian nọ rrie odẹ ibiriki 40 (64 km), ne iran mieke na ya miẹn ọnrẹn. De vbene emwi ne iran ru na ghaa ye Pọl hẹ? “Ugbẹnvbe Pọl ghi miẹn iran, ọ na kpọnmwẹ Osanobua, orhiọn keghi la ẹre iwu.” (Iwinna 28:15) Emwa wa rẹn e Pọl zẹvbe ọmwa nọ rhie igiọdu ne etẹn ni rre dọmwadẹ iko ne ọ mu otuẹ yo, sokpan vbe ẹghẹ na nia, ne irẹn ya re oleghan, te a ghi vbe gha rhie igiọdu nẹẹn.—2 Kọr 13:10.

Vbe ẹdẹnẹrẹ, avbe ọgbaroghe ọghe otako keghi mu otuẹ yo edọmwadẹ iko, ne iran mieke na ya rhie igiọdu ne etẹn nikpia kevbe etẹn nikhuo. Ọ vbe mwẹ ẹghẹ ne egbe ya wọọ iran, ẹghẹ ne iran ya si osi kevbe ẹghẹ ne iro ya han iran vbene eguọmwadia Osanobua nikẹre vbe ye. Ọgbaroghe ọghe otako kevbe amwẹ ọnrẹn gha werriegbe mu otuẹ gha die iko ne u ye, de emwi ne u gha ru ne u mieke na vbe rhie igiọdu ne iran?—Rom 1:11, 12.

• 

  Hia ne u gha rre iko na do a ke ladian vbe iwinna ikporhu iyẹn nọ maan. Ọ keghi rhie igiọdu ne ọgbaroghe ọghe otako vbe ọ gha bẹghe vbene etẹn ya rhiegbe iran ladian vbe iwinna ikporhu iyẹn nọ maan vbe uzọla nii. (1 Tẹs 1:2, 3; 2:20) Roro ẹre ghee deghẹ u gha vbe sẹtin rhie obọ ye iwinna arọndẹ ọghe ovbi ẹghẹ kherhe vbe uki ne ọgbaroghe ọghe otako ya mu otuẹ rrie iko ruẹ. U sẹtin vbe lele irẹn vbe ọvbokhan rẹn winna vbe ikporhu, irẹn ra ọvbokhan rẹn sẹtin vbe deba ruẹ vbe u ghaa khian gu ọmwa ruẹ e Baibol. Iran hoo ne iran gha gu etẹn ughughan winna vbe ikporhu, ya sẹ egbe etẹn ni da suẹn gha kporhu ra etẹn ni roro ẹre wẹẹ iran i mobọ gua kporhu.

• 

  Gha re ọmwa nọ zẹ emwi obọ. U sẹtin mwamwa ehe khẹ iran ne iran gha dia, u sẹtin vbe le evbare ne iran. U gha ru vberriọ, iran ghi rẹn wẹẹ u hoẹmwẹ iran. Iran ma yaro ye emwi nọ bun gbe.—Luk 10:38-42.

• 

  Gha danmwehọ re vbe ọ ghaa guan, u ghi vbe gha lele adia nọ rhie nuẹ. Ọgbaroghe ọghe otako keghi ru iyobọ ne ima ya rẹn emwi eso ne ima gha ru, nọ gha ya ima gha mwẹ alaghodaro vbe ugamwẹ ọghe Jehova. Ugbẹnso, ọ sẹtin rhie adia nọ wegbe ne ima. (1 Kọr 5:1-5) Ọ keghi sẹ ọre ọyẹnmwẹ vbe ọ gha bẹghe ẹre wẹẹ emwa ni họn ẹmwẹ kevbe emwa ni mu egbe rriotọ ẹre ima khin.—Hib 13:17.

• 

  Rhiẹre ma wẹẹ u gbọyẹmwẹ ye iwinna ne iran ru. Tama ọgbaroghe ọghe otako vbe amwẹ ọnrẹn, ere ne u he miẹn vbe iwinna ne iran ru. U sẹtin ya unu tama iran, u sẹtin gbẹn elẹta gie iran, u sẹtin vbe rhie kadi ne iran.—Kọl 3:15.