De Emwi Ne U Gha Miẹn Ruẹ Vbe Avbe Ihuan Ọghomwa (Original Songs)?

De nọ yẹẹ ruẹ sẹ vbuwe ihuan hia ni he ladian vbe Jw Broadcasting? Vbọzẹe nọ na yẹẹ ruẹ? Emwi nọ sunu vbe ẹdẹgbegbe ẹre a mobọ mu ladian vbe avbe vidio ọghe ihuan na. Ma hia keghi miẹn ere vbe avbe ihuan na rhunmwuda, uhunmwuta ughughan ẹre ọ mwẹ kevbe wẹẹ, odẹ ughughan ẹre a vbe ya so ẹre. Vbọrhirhighayehẹ, ẹi re te a wa ya avbe ihuan na sọyẹnmwẹ egbe kẹkan.

Dọmwadẹ ihuan ni ladian vbe Jw Broadcasting keghi maa ima emwi nọ gha ru iyobọ ne ima vbe arrọọ ọghe ima. Ihuan eso keghi ru iyobọ ne ima ya gha mwẹ akugbe, udinmwẹ, ahoẹmwọmwa kevbe amuẹtinyan; eso keghi ru iyobọ ne ima ya gha mu ọghọ ye emwa egbe kevbe ne ima gha zẹ ọse ni maan. Eso vbe avbe ihuan na vbe guan kaẹn vbene a khian ya werriegbe bu e Jehova gha dee, vbene a khian ya gha yabọ egbe, vbene a khian ya de imudiase ọghomwa yi kevbe vbene a khian ya ru sayọ vbe ugamwẹ e Jehova. Uhiẹn, ọ mwẹ ọkpa nọ guan kaẹn odẹ nọ khẹke ne ima ya gha loo efoni. De emwi eso ne uwẹ tobọ uwẹ he ruẹ vbe avbe ihuan na?

GHEE VIDIO ỌGHE IHUAN NỌ MWẸ UHUNMWUTA NỌ KHARE WẸẸ ENA HIA GHA MWẸ AMUSẸ, IYEKE ỌNI, A GHI ZẸ EWANNIẸN YE AVBE INỌTA NA:

• De afiangbe eso nọ dee vbe odaro ne ọdọ vbe amwẹ na mu roro?—Gẹn 12:3

• De emwi nọ khian gele ya ima gha mwẹ ilẹkẹtin wẹẹ, e Jehova gele mwẹ ẹtin nọ khian ya mu eyan rẹn hia sẹ?

• De emwa eso ne ima khian werriegbe miẹn vbe odaro nọ khian ya ima gha sọyẹnmwẹ?

• De vbene ayayẹro ne ima mwẹ wẹẹ, Arriọba Osanobua gha rre ya ru iyobọ ne ima ya zin egbe ọlọghọmwa ughughan ne ima werriẹ aro daa nia?—Rom 8:25