Vbene A Ya Loo Avbe Vidio Ni Guan Kaẹn Iruẹmwi E Baibol

Ma mwẹ e vidio enẹ ne ima loo vbe ikporhu, ni guan kaẹn vbene ima ya gu emwa ruẹ e Baibol hẹ. Vbọzẹ na na ru edọmwadẹ vidio na ladian?

• 

  Vbọzẹe Ne A Gha Na Ruẹ E Baibol?—Nọ Taẹn Nọ Rrọọ: Te a ru e vidio na ladian nọ mieke na ya emwa ni rre ugamwẹ ughughan gha hoo ne iran rẹn emwi nọ rre uwu e Baibol. Ọ rhie igiọdu ne emwa ne iran gualọ ewanniẹn ọghe inọta ne kpataki nibun ne emwa nọ, vbe uwu e Baibol. A vbe guan kaẹn ọta ọkpa ne Baibol rhie ewanniẹn yi vbe vidio na. Ọ vbe rhan otọ emwi ne ọmwa gha ru, deghẹ ọ hoo na do gha gu ẹre ruẹ e Baibol.

• 

  Vbọzẹe Ne A Gha Na Ruẹ E Baibol? (ne kuẹi nọ rrọọ): Te vidio na vbe yevbe nọ taẹn nọ rrọọ, sokpan ọni ya igbaha tan sẹ ọre. Ọ gha wa ru iyobọ ne ima vbe ima ghaa kporhu vbe ẹdogbo ne emwa i na mobọ miẹn ẹghẹ ya danmwehọ ima.

• 

  De Vbene Iruẹmwi Ọghe Baibol Ye Hẹ? Te a ru e vidio na ladian ne emwa mieke na gha hoo ne ima do gha gu iran ruẹ e Baibol vbe ọghe ọhẹ. Ọ vbe rhie ewanniẹn ye ọta eso ne emwa nọ vbekpa odẹ ne ima ya gu emwa ruẹ e Baibol. Ọ na vbe guan kaẹn emwi ne ọmwa gha ru, deghẹ ọ hoo na gha gu ẹre ruẹ e Baibol.

• 

  Sọyẹnmwẹ Iruẹmwi E Baibol Ruẹ: Te a ru e vidio na ladian na mieke na gha kpee ẹre ma emwa na gu ruẹ e Baibol. Agharhemiẹn wẹẹ ipapa nogieva ọghe ebe na tie ẹre Sọyẹnmwẹ Arrọọ Vbe Etẹbitẹ! ẹre a na guan kaẹn e vidio na, a gha vbe sẹtin kpee ẹre ma emwa vbe a ghaa gu iran ruẹ ebe ẹmu na tie ẹre Sọyẹnmwẹ Arrọọ Vbe Etẹbitẹ! E vidio na guan kaẹn emwi ughughan ni rre uwu ebe na, kevbe emwi eso na ru vbe a ghaa gu ọmwa ruẹ ebe na.

Agharhemiẹn wẹẹ, ọ mwẹ emwi nọ si ẹre na na ru avbe vidio na ladian, ma gha sẹtin kpee ẹre ma emwa, ma gha vbe sẹtin sẹnd ẹre gie iran, vbe ẹghẹ ke ẹghẹ ne ima hoo ne ima ya ru vberriọ. A rhie igiọdu ne avbe etẹn, ne iran rẹn emwi ne avbe vidio na guan kaẹn, iran ghi vbe gha loo ẹre ẹse vbe ikporhu.