U Gha Sẹtin Ru Emwi Nọ Gha Ya Ẹgbẹe Ruẹ Gha Ghọghọ

E Jehova hoo ne ẹgbẹe gha ghọghọ. (Psm 127:3-5; Asan 9:9; 11:9) Sokpan, ugbẹnso ma i ghọghọ vbe uwu ẹgbẹe, rhunmwuda orhikhan ẹmwẹ agbọn na kevbe abakuru ọghe emwa ne ima gba rre uwu ẹgbẹe. De emwi nọ khẹke ne dọmwadẹ ọghẹe vbe uwu ẹgbẹe ru, ne emwa hia ni rre uwu ẹgbẹe mieke na gha ghọghọ?

Ọ khẹke ne ọdọ gha mu ọvbokhan rẹn tetete. (1 Pit 3:7) Ọ ghi vbe gha mwẹ ẹghẹ nẹẹn. Ẹi ya aro ye emwi ne ọvbokhan rẹn i khian sẹtin ru, ẹghẹ hia ẹre ọ vbe ya gi ẹre rẹn wẹẹ irẹn gbọyẹmwẹ ye emwi hia nọ ru ne irẹn kevbe ẹgbẹe ọghe iran. (Kọl 3:15) Ọ ghi gha tama rẹn wẹẹ irẹn hoẹmwẹ ọnrẹn, ọ vbe gha tian rẹn.—Itan 31:28, 31.

Ọ khẹke ne okhuo gha gualọ odẹ nọ gha ya ru iyobọ ne ọdafẹn ọnrẹn. (Itan 31:12) Ọ ghi gha mu egbe rriotọ ne ọdafẹn ọnrẹn, ọ vbe gha ku obọ gbe ba emwamwa nọ ru. (Kọl 3:18) Ọ ghi gha ya ọghọ vbe ute gu ẹre guan, ẹi vbe ta ẹmwẹ dan vbekpa re vbe iyeke ẹre.—Itan 31:26.

Ọ khẹke ne evbibiẹ emọ gha mwẹ ẹghẹ ne ivbi iran. (Diut 6:6, 7) Iran ghi gha tama ivbi iran wẹẹ iran hoẹmwẹ iran. (Mat 3:17) Iran ghaa dia ivbi iran ye odẹ rhunmwuda emwi ne iran ma ru ẹse, ọ khẹke ne iran gha ya ẹwaẹn ru ẹre, iran ghi vbe rhie ẹre ma wẹẹ iran hoẹmwẹ iran.—Ẹfis 6:4.

Ọ khẹke ne emọ gha rhie ọghọ ne evbibiẹ iran, iran ghi vbe gha họn ẹmwẹ ne iran. (Itan 23:22) Ọ khẹke ne iran gi evbibiẹ iran rẹn emwi nọ kpokpo iran vbe orhiọn kevbe emwi ne iran la gberra. Ọ khẹke ne iran gha rhie ude ne evbibiẹ iran bu iran re, iran ghi vbe gha rhie uyi nọ khẹke ne iran.—Itan 19:20.

GHEE VIDIO NỌ MWẸ UHUNMWUTA NỌ KHARE WẸẸ, GHA SỌYẸNMWẸ VBUWE ẸGBẸE, IYEKE ỌNI, A GHI ZẸ EWANNIẸN YE AVBE INỌTA NA:

• De emwi ne dọmwadẹ iran ru, ne iran mieke na gha mwẹ oghọghọ vbe ẹgbẹe ọghe iran?