UYINMWẸ ỌGHE IMA NE IVBIOTU E KRISTI
Ahoẹmwọmwa Ẹre Ọ Ya E Jehova Gbe Ọmwa Hin Ọkhọ Rre
A gha wẹẹ a gbe ọmwa hin ọkhọ rre, emwi na mobọ yae kha ọre na maa ọmwa emwi kevbe na bu ọmwa ude, sokpan emwi ọvbehe nọ demu ọre na dia ọmwa ye odẹ nọ khẹke. E Jehova keghi gbe ima hin ọkhọ rre ne ima mieke na gha ga irẹn vbene irẹn gualọe yi. (Rom 12:1; Hib 12:10, 11) Ugbẹnso, ọ sẹtin da ima sẹ ugboloko vbe a gha gbe ima hin ọkhọ rre, sokpan deghẹ ima na miẹn ọnrẹn yi, e Jehova ghi miẹn ima yi, afiangbe nibun ghi vbe sẹ ima obọ. (Itan 10:7) De emwi nọ khẹke ne ọmwa nọ khian gbe ọmwa ọvbehe hin ọkhọ rre kevbe ọmwa na gbe hin ọkhọ rre kọ ye orhiọn?
Ọmwa nọ khian gbe ọmwa hin ọkhọ rre. Avbe ediọn, evbibiẹ emọ kevbe emwa ọvbehe gha khian gbe ọmwa hin ọkhọ rre, ọ khẹke ne iran ya egbe tae Jehova, iran ghi ya ahoẹmwọmwa kevbe ekhọe esi ru ẹre. (Jer 46:28) Ọ gha khọnrẹn wẹẹ adia nọ wegbe ẹre u khian rhie ne ọmwa, gi ẹre gha re adia nọ khẹke ọmwa nii, u ghi vbe ya ahoẹmwọmwa ru ẹre.—Tai 1:13.
Ọmwa na gbe hin ọkhọ rre. Vbe na rhirhi ya gbe ruẹ hin ọkhọ rre, ghẹ khuan ẹnrẹn rua, lelẹe vbobọvbobọ. (Itan 3:11, 12) Ai miẹn ọmwa nẹi gualọ adia rhunmwuda emwa ni ma gba ẹre ima khin. Odẹ ughughan ẹre ima ya miẹn adia na. Ma keghi miẹn adia vbe ima ghaa tie Baibol kevbe vbe ima ghaa rre iko. Ugbẹnso, agbaziro ọghe ediọn ni buohiẹn vbe gbe ọmwa hin ọkhọ rre. Ma ghaa lele adia na rhie ne ima, agbọn gha maan ima, ma ghi vbe gha mwẹ arrọọ ọghe etẹbitẹ.—Itan 10:17.
GHEE VIDIO NỌ MWẸ UHUNMWUTA NỌ KHARE WẸẸ, EMWA NE JEHOVA HOẸMWẸ ỌNRẸN “ẸRE Ọ GBE HIN ỌKHỌ RRE,” IYEKE ỌNI, A GHI ZẸ EWANNIẸN YE AVBE INỌTA NA:
De vbene Ọtẹn Nokpia Canon ya loo arrọọ ọghẹe hẹ vbe ọ ye kherhe, sokpan de vbene emwi ghi ya fi werriẹ hẹ?
De vbene Jehova ya gbe ẹre hin ọkhọ rre vbe odẹ ọghe ahoẹmwọmwa?
Gha ya aro nọ ghaan ghee odẹ ne Jehova ya gbe ima hin ọkhọ rre
De emwi ne ima miẹn ruẹ vbe emwi ẹwaẹn ọghẹe?