Arhiọkpaegbe Keghi Ya Ima Rẹn Wẹẹ, Osa Nọ Mwẹ Ahoẹmwọmwa, Ẹwaẹn Kevbe Izinegbe Ẹre Jehova Khin

1. Vbọzẹe ne Jehova na suẹn gha yi emwi ughughan?

ẸGHẸ ghaa rrọọ ne Jehova ọkpa ya gha rrọọ. Agharhemiẹn wẹẹ irẹn ọkpa ẹre ọ ghaa rrọọ, te ọ ye gha ghọghọ. Ọrheyerriọ, Osanobua kegha hoo ne emwa ọvbehe vbe gha sọyẹnmwẹ arrọọ. Rhunmwuda ahoẹmwọmwa ne irẹn mwẹ, irẹn keghi suẹn gha yi emwi ughughan.—Psm 36:9; 1 Jọn 4:19.

2. De aro ne Jesu kevbe avbe odibosa ya gha ghee emwi ughughan ne Jehova yi?

² Vbe okaro, e Jehova keghi yi Ovbi ẹre ighẹ Jesu. Ovbi ẹre na, ẹre Jehova ghi loo ya “yi emwi ni rre ẹrinmwi kevbe agbọn na,” uhiẹn ya sẹ egbe ọkhọngborrie ọghe avbe odibosa ni rre ẹrinmwi. (Kọl 1:16) Te Jesu wa gha sọyẹnmwẹ vbe ọ gu Erhae winna. (Itan 8:30) Avbe odibosa ni rre ẹrinmwi vbe gha sọyẹnmwẹ, vbe iran ghi bẹghe ẹre wẹẹ, e Jehova loo ọka iwinna ọghẹe ighẹ Jesu ya yi emwi hia ni rre ẹrinmwi kevbe agbọn. E Baibol khare wẹẹ, te avbe odibosa wa gha “we ne oghọghọ” vbe ẹghẹ ne Osanobua ya yi agbọn na. Ẹi mwẹ iran ma vbe gha ghọghọ vbe iran ghi bẹghe emwi nikẹre ne Jehova yi, katekate, vbe Jehova ghi yi emwa nagbọn. (Job 38:7; Itan 8:31) Dọmwadẹ emwi ne Jehova yi keghi rhiẹre ma wẹẹ, Osa nọ mwẹ ahoẹmwọmwa kevbe ẹwaẹn ẹre Jehova khin.—Psm 104:24; Rom 1:20.

3. Zẹvbe nọ rre ebe 1 Kọrinti 15:21, 22, de ẹkpotọ ne izọese adẹwerriegbe ọghe Jesu kie ne ima?

³ Vbe Jehova yi emwa nagbọn, ọ kegha hoo ne iran sọyẹnmwẹ arrọọ etẹbitẹ vbe agbọn ne mose mose ne irẹn yi. Sokpan vbe Adam vbe Ivi ghi sọtẹ daa Osanobua, ke iran kevbe ivbi iran keghi khian eviẹn ọghe orukhọ kevbe uwu. (Rom 5:12) De emwi ne Jehova ghi ru? Vbobọvbobọ nii, ọ keghi ta vbene irẹn khian ya miẹn emwa nagbọn fan hẹ. (Gẹn 3:15) E Jehova keghi ru emwamwa ọghe izọese adẹwerriegbe ọghe Ovbi ẹre, nọ ya fan ivbi Adam kevbe Ivi hin obọ ẹtin orukhọ kevbe uwu rre. Ẹre ọ na ghi kie ẹkpotọ yọ, ne emwa ya zẹ ne egbe iran, deghẹ iran gha ga irẹn, ne iran mieke na gha rrọọ vbe etẹbitẹ.—Jọn 3:16; Rom 6:23; tie 1 Kọrinti 15:21, 22.

4. De avbe inọta ne ima khian ziro yan vbe ako iruẹmwi na?

⁴ Osanobua yan rẹn wẹẹ irẹn gha huẹn emwa ni wulo kpaegbe. Sokpan, inọta nibun keghi de rre rhunmwuda eyan na. Vbe igiemwi, de vbene Osanobua khian ya huẹn emwa ni wulo kpaegbe hẹ? Emwa ima ni wulo gha rhiọ kpaegbe, ma gha ye rẹn iran ra? De vbene ọ khian gha ye ima hẹ, vbe emwa ima ni wulo gha rhiọ kpaegbe nẹ? Ma ghaa muẹn roro eyan ọghe arhiọkpaegbe ne Jehova ru, de vbene ọ khian ya ru iyobọ ne ima ya gbọyẹmwẹ ye ahoẹmwọmwa, ẹwaẹn kevbe izinegbe ọghe Jehova? Gia ziro yan avbe inọta na.

DE VBENE OSANOBUA KHIAN YA HUẸN EMWA NI WULO KPAEGBE HẸ?

5. Vbọzẹe ne ima gha na kha wẹẹ, ẹi re uhukpa ẹre Osanobua khian ya huẹn emwa ni wulo kpaegbe?

⁵ Ọ gha sẹ ẹghẹ ne Jehova khian ya loo Ovbi ẹre ya huẹn ọkhọngborrie emwa nibun ni wulo kpaegbe, ma gha sẹtin kha wẹẹ, ẹi re uhukpa ẹre iran hia fẹẹrẹ khian ya rhiọ kpaegbe. Vbe ima gu kha vberriọ? Rhunmwuda, ọkhọngborrie emwa ni wulo gha wa ya uhukpa rhiọ kpaegbe, te ehe hia khian wa ye lighi lighi. Sokpan Osanobua ne ima ga i re ọmwa nọ ru emwi lighi lighi, nọghayayerriọ, ọ keghi ru emwi hia ye uhẹn uhẹn, ne ọfunmwegbe mieke na gha rrọọ. (1 Kọr 14:33) Vbe ẹghẹ ne Jehova ya loo e Jesu ya yi uhunmwu otagbọn na, ọ keghi rhiẹre ma wẹẹ, Osa nọ mwẹ ẹwaẹn kevbe izinegbe ẹre irẹn khin. Ọ keghi yi emwi hia fẹẹrẹ ne emwa nagbọn khian ya yin agbọn ọkade ọkade, a te miẹn wẹẹ ọ yi emwa nagbọn. Jesu gha vbe rhie avbe akpa na ma, vbe ọ gha sẹ ukpo arriaisẹn ọkpa nọ khian ya kha. Ẹghẹ nii, ke irẹn kevbe emwa ni khian miẹn uhunmwu vbe okuo Amagẹdọn gha dọlọ uhunmwu otagbọn na yi khẹ emwa ni khian rhiọ kpaegbe.

6. Zẹvbe nọ rre ebe Iwinna 24:15, NW, de emwa eso ne Jehova khian huẹn kpaegbe?

⁶ Odẹ ọkpa kpataki ne emwa ni khian miẹn uhunmwu vbe okuo Amagẹdọn khian ya ru iyobọ ne emwa ni khian rhiọ kpaegbe ọre wẹẹ, te iran khian maa iran emwi vbekpa Arriọba Osanobua kevbe emwi ne Jehova gualọ vbe obọ iran. Vbọ ya ima kha vberriọ? Rhunmwuda, nibun sẹ vbuwe iran ni khian rhiọ kpaegbe keghi re emwa “ni ma ru emwi esi.” (Tie Iwinna 24:15, NW.) Te emwa vbenian gha ru afiwerriẹ nibun vbe arrọọ ọghe iran, ne iran mieke na miẹn ere vbe izọese adẹwerriegbe ọghe Kristi. Na sẹtin do maa iran emwi ighẹ ọkhọngborrie emwa ni khian rhiọ kpaegbe ni ma rẹn e Jehova, ẹi khian gha re iwinna ne kherhe. De vbene a khian ya maa iran emwi hẹ? Te dọmwadẹ ọghẹe vbuwe iran khian gha mwẹ orhunmwu ọkpa ọkpa nọ maa iran emwi ra, vbe na vbe ru ẹre vbe ẹdẹnẹrẹ ra? Ra te a khian viọ iran ye dọmwadẹ iko na mieke na gha maa iran emwi, kevbe wẹẹ, iran gha ghi vbe ruẹ emwi nẹ, iran tobọ iran ghi vbe gha maa emwa ọvbehe ni khian vbe rhiọ kpaegbe emwi? Ẹmwata nọ rrọọ ọre wẹẹ, ma ma wa rẹn; ma gha zin egbe nọ sẹ ẹghẹ nii nẹ. Sokpan emwi ne ima rẹnrẹn ọre wẹẹ, vbe ufomwẹ ọghe Ukpo Arriaisẹn Ọkpa Ne Kristi Khian Ya Kha, te irẹnmwi ọghe Jehova khian gba ehe hia vbe uhunmwu otagbọn na. (Aiz 11:9) Ma wa rẹn wẹẹ, iwinna ọrhẹnrhẹn wa khẹ ima vbe ẹghẹ nii, sokpan ma gha wa sọyẹnmwẹ ọnrẹn!

7. Vbọsiẹ ne eguọmwadia e Jehova khian na gha mwẹ amuroro, vbe ọ gha sẹ ẹghẹ ne iran khian ya maa emwa ni khian rhiọ kpaegbe emwi?

⁷ Vbuwe Ukpo Arriaisẹn Ọkpa Ne Kristi Khian Ya Kha, te eguọmwadia e Jehova hia khian ru afiwerriẹ nọkhua vbe arrọọ ọghe iran, ne iran mieke na sẹtin ya ẹko rhiẹnrhiẹn e Jehova. Nọnaghiyerriọ, te iran khian gha mwẹ amuroro daa emwa ni khian rhiọ kpaegbe, rhunmwuda ẹi khian gha khuẹrhẹ ne emwa vbenian ya gbukhuẹre rua, iziro kevbe uyinmwẹ dan ne iran te mwẹ. (1 Pit 3:8) Vbe nai na gbawawẹ, emwa ni khian rhiọ kpaegbe gha bẹghe vbene eguọmwadia e Jehova mu egbe rriotọ hẹ, kevbe vbene iran hia hẹ, ne iran ru afiwerriẹ vbe arrọọ ọghe iran, ne iran mieke na ya ẹko rhiẹnrhiẹn e Jehova, iran ghi vbe gha hoo ne iran ya egbe taa iran.—Fil 2:12

EMWA IMA NI WULO GHA RHIỌ KPAEGBE, MA GHA YE RẸN IRAN RA?

8. Vbọzẹe ne ima gha na sẹtin kha wẹẹ, ma gha ye rẹn emwa ima ni wulo vbe iran gha rhiọ kpaegbe nẹ?

⁸ Ma gha sẹtin kha wẹẹ, emwa ima ni wulo gha rhiọ kpaegbe, ma gha ye rẹn iran. Vbọzẹe ne ima na kha vberriọ? Vbe igiemwi, arhiọkpaegbe ni sunu vbe ẹghẹ nọ gberra ya ima rẹn wẹẹ, emwa gha rhiọ kpaegbe, e Jehova ghi ru ẹre ne iran gha ye vbene iran ka gha ye a te miẹn wẹẹ iran wu, iran ghi vbe gha guan vbene iran ka ya guan, odẹ ne iran ya roro emwi i vbe fiwerriẹ. Yerre wẹẹ, ovbe, ẹre Jesu ya gie uwu. Ọ na vbe gi ima rẹn wẹẹ, vbene a huẹn emwa ni vbiẹ kpaegbe vbe ovbe, erriọ ẹre a khian vbe huẹn emwa ni wulo kpaegbe. (Mat 9:18, 24; Jọn 11:11-13) Emwa gha rhiọrre vbe ovbe, iran i fiwerriẹ, vbene iran ye iran ke lovbiẹ, erriọ iran vbe ye vbe iran gha rhiọrre nẹ. Ọ na gha mwẹ emwi ne iran ghaa mu roro iran ke lovbiẹ, ọni ẹre iran khian ye gha mu roro vbe iran gha rhiọrre nẹ. Gia guan kaẹn emwi nọ sunu dae Lazarọs vbe ọ ghi rhiọ kpaegbe nẹ. Vbe ẹghẹ ne Jesu ya huẹn ọnrẹn kpaegbe, ikpẹdẹ enẹ ẹre ọ ghaa ye nọ ghi ya wu, egbe ẹre vbe suẹn gha kẹkẹ nẹ. Ọrheyerriọ, vbe Jesu ghi huẹn ọnrẹn kpaegbe, uhukpa ẹre etiọnrẹn ya rẹn ọnrẹn, vbe nai na gbawawẹ, e Lazarọs wa vbe yi iran ẹro.—Jọn 11:38-44; 12:1, 2.

9. Vbọzẹe ne emwa ni khian rhiọ kpaegbe i khian na wa khian emwa ni gbae vbobọvbobọ?

⁹ E Jehova yan rẹn wẹẹ, ma ghaa rre ototọ ukhamwẹ ọghe Kristi, orhunmwu ọkpa i rrọọ nọ khian kha wẹẹ, “irẹn khuọnmwi.” (Aiz 33:24; Rom 6:7) Ọna rhiema wẹẹ, egbe ne emianmwẹ i ye, ẹre emwa ni wulo khian gha mwẹ vbe iran gha rhiọ kpaegbe nẹ. Vbọrhirhighayehẹ, iran i khian wa khian emwa ni gbae vbobọvbobọ nii. Iran gha wa khian emwa ni gbae vbobọvbobọ, ọ sẹtin do gha lọghọ ne emwa iran yi iran ẹro. Ọ khọ wẹẹ, kherhe kherhe, ẹre emwa nagbọn khian ya fẹko gha khian emwa ni gbae, vbe Ukpo Arriaisẹn Ọkpa Ne Kristi Khian Ya Kha. Vbe ufomwẹ ọghe Ukpo Arriaisẹn Ọkpa Ne Kristi Khian Ya Kha, e Kristi ghi werriegbe mu emwi hia fẹẹrẹ ye obọ Erhae. Ẹghẹ nii, emwamwa ne Jehova mwẹ ne uhunmwu otagbọn na mwẹ amusẹ nẹ, emwa nagbọn hia ghi do khian emwa ni gbae.—1 Kọr 15:24-28; Arhie 20:1-3.

DE VBENE Ọ KHIAN GHA YE IMA HẸ, VBE EMWA IMA NI WULO GHA RHIỌ KPAEGBE?

10. De vbene ọ khian gha ye ruẹ hẹ vbe emwa ruẹ ni wulo gha rhiọ kpaegbe?

¹⁰ De vbene ọ khian gha ye ruẹ hẹ, vbe u gha bẹghe ẹre wẹẹ, emwa ruẹ ni wulo rhiọ kpaegbe? Te u khian gha viẹ ra, ra te u khian gha giẹ? Ra te u khian zẹ ihuan so, ne u ya rho e Jehova? Vbe nọ rhirhi gha ye hẹ, u gha bẹghe iyobọ nọkhuọkhua ne Jehova kevbe Ovbi ẹre ighẹ Jesu ru nuẹn, ne iran na huẹn emwa ruẹ kpaegbe, ẹi mwẹ u ma hoẹmwẹ iran sayọ.

11. Zẹvbe nọ rre ebe Jọn 5:28, 29, de emwi ne emwa ni họn ẹmwẹ ne Osanobua khian sọyẹnmwẹ ọnrẹn?

¹¹ Muẹn roro, ọyẹnmwẹ nọ khian gha sẹ emwa ni khian rhiọ kpaegbe vbe iran gha sẹtin ban akpa nẹdẹ mu fua, ne iran mieke na ya ẹko rhiẹnrhiẹn e Jehova. Emwa ni sẹtin ru egbe afiwerriẹ vbenian, ẹre ọ khian sọyẹnmwẹ arrọọ etẹbitẹ. Sokpan nọ ne iran ni ghi sọtẹ daa Osanobua vbe ẹghẹ nii, Osanobua gha wabọ iran rua, ne iran ghẹ mieke na si olighi ye agbọn ọghe Paradais.—Aiz 65:20, NW; tie Jọn 5:28, 29.

12. De afiangbe ne Jehova khian rhie ne eguọmwadia ọghẹe ni khian gha rre uhunmwu otagbọn na?

¹² Arriọba Osanobua gha suẹn gha kha yan uhunmwu otagbọn na nẹ, ẹmwẹ nọ rre ebe Itan 10:22, NW ghi mwẹ amusẹ vbe egbe eguọmwadia e Jehova hia. Ako nii khare wẹẹ: “Afiangbe ọghe Jehova ẹre ọ zẹ ẹfe ku ọmwa, ẹi vbe rhie obalọ ba re.” Orhiọn nọhuanrẹn ọghe Jehova gha ru iyobọ ne iran, ne iran ya khian emwa ni fe vbe odẹ ọghe orhiọn. Ọni rhiema wẹẹ, iran ghi do gha mwẹ ekhọe ọghe Kristi sayọ, zẹvbe ne iran ya fẹko khian emwa ni gbae. (Jọn 13:15-17; Ẹfis 4:23, 24) Vbene ẹdẹ ya gbe, iran ghi gha wegbe yọ; ọni rhiema wẹẹ, iran i khian ghi gha khuọnmwi, erriọ uyinmwẹ ọghe iran khian vbe ya gha maan sayọ. U miẹn ọyẹnmwẹ nọ khian gha sẹ ima vbe ẹghẹ nii! (Job 33:25) Sokpan, ma ghaa muẹn roro, eyan ọghe arhiọkpaegbe ne Jehova ru, de vbene ọ khian ya ru iyobọ ne ima hẹ?

GBỌYẸMWẸ YE AHOẸMWỌMWA ỌGHE JEHOVA

13. Zẹvbe nọ rre ebe Psalm 139:1-4, de vbene arhiọkpaegbe khian ya rhiẹre ma wẹẹ, te Jehova gele rẹn ima hia sẹ otọ ibiẹ?

¹³ Zẹvbe ne ima ka ruẹ ọre sin, e Jehova gha huẹn emwa ni wulo kpaegbe, ọ ghi ru ẹre ne iran gha ye vbene iran ka gha ye iran ke wu. Muẹn roro: E Jehova rẹn emwi hia ne u mu roro, ọ rẹn vbene u ya guan hẹ, kevbe vbene u ya ru emwi. Ọna ma ya ruẹ rẹn wẹẹ, e Jehova hoẹmwẹ ruẹ? Ọna rhiema wẹẹ, e Jehova gha khian huẹn ruẹ kpaegbe, ọ ghi ru ẹre ne u gha ye vbene u ka gha ye. Emwi hia ne u ghaa mu roro u ke wu, u ghi ye ye ehia rre. Ọba e Devid wa vbe rẹn wẹẹ, te Jehova rẹn dọmwadẹ ima sẹ otọ ibiẹ. (Tie Psalm 139:1-4.) De vbene ọ ye ruẹ hẹ vbe ekhọe, ne u na rẹn wẹẹ e Jehova rẹn emwi hia fẹẹrẹ vbekpa ruẹ?

14. De vbene ọ khian gha ye ima hẹ vbe ima ghaa muẹn roro, vbene Jehova rẹn ima sẹ hẹ?

¹⁴ Ọ ma khẹke ne ohan gha mu ima rhunmwuda ne ima na rẹn wẹẹ, e Jehova rẹn emwi hia vbekpa ima. Vbọzẹe? Rhunmwuda, te Jehova gele hoẹmwẹ ima ẹsẹsẹmwẹse. Aro nọ ghaan ẹre Jehova ya ghee dọmwadẹ ọghẹe vbuwe ima. Ọ rẹn emwi hia ni sunu vbe arrọọ ọghe ima. Ọ vbe rẹn evbọzẹe ne ima na mwẹ uyinmwẹ eso, nọ ya ima lughaẹn ne emwa ọvbehe. U miẹn vbene ọna fu ọmwa ẹko rre hẹ! Ọ khẹke ne ima kọe ye orhiọn wẹẹ, e Jehova gu ima rrọọ vbe ẹghẹ hia. Ọ rẹn emwi hia ne ima la gberra, erriọ ẹre ọ vbe ya gualọ ẹkpotọ nọ khian ya ru iyobọ ne ima.—2 Krọ 16:9.

GBỌYẸMWẸ YE ẸWAẸN ỌGHE JEHOVA

15. De vbene eyan ọghe arhiọkpaegbe ya ya ima rẹn wẹẹ, Osa nọ mwẹ ẹwaẹn ẹre Jehova khin?

¹⁵ Ọmwa ghaa mu ohan uwu, avbe eghian sẹtin la evba la re egbe. Iran sẹtin ya ẹmwẹ uwu ghaghae sẹrriọ wẹẹ, ọ ghi do ya emwa ni sikẹ ọre dẹ. Ọ sẹtin vbe yangbe emwi nọ yayi. Sokpan eghian i khian sẹtin ya ẹmwẹ uwu ghagha ima ne ima yangbe emwi ne ima yayi, rhunmwuda ma rẹnrẹn wẹẹ, iran na dobọ gbe ima rua, e Jehova gha huẹn ima kpaegbe. (Arhie 2:10) Ma rẹnrẹn wẹẹ, emwi rhọkpa i rrọọ ne eghian khian ru ima re, nọ gha sẹtin wannọ ima hin akharha ọghe Jehova rre. (Rom 8:35-39) U ma bẹghe ẹre wẹẹ, ẹwaẹn wa rrọọ ne Jehova na ru eyan ọghe arhiọkpaegbe ma ima? Rhunmwuda eyan ọghe arhiọkpaegbe, ohan i mu ima deghẹ avbe ikpayẹ ọghe Esu na gha ya ẹmwẹ uwu ghagha ima, ne ima yangbe emwi ne ima yayi. Nọghayayerriọ, eyan na keghi ya ima mwẹ udinmwẹ, ne ima ya sẹtin da imudiase ọghe ima yi ya sẹ ufomwẹ.

16. De inọta nọ khẹke ne u nọ egbuẹ re? De vbene ewanniẹn ọghe avbe inọta na khian ya ru iyobọ nuẹn hẹ, ne u ya rẹn deghẹ u mu ẹtin yan e Jehova?

¹⁶ Adeghẹ avbe eghian ọghe Jehova na gha ya ẹmwẹ uwu ghagha ruẹ, uwẹ mwẹ ilẹkẹtin wẹẹ e Jehova gha huẹn ruẹ kpaegbe ra? De vbene u khian ya rẹn wẹẹ, u mwẹ egbe ilẹkẹtin vberriọ? Nọ egbuẹ wẹẹ, ‘Atamuolọyan ne imẹ ru vbe ẹdẹgbegbe rhiẹre ma wẹẹ, mẹ mu ẹtin yan e Jehova ra, ọ gha khọnrẹn nọ gha re atamuolọyan ne kherhe ra nọkhua?’ (Luk 16:10) Inọta ọvbehe ne u gha sẹtin nọ egbuẹ ọre wẹẹ, ‘Odẹ ne I ya loo arrọọ mwẹ rhiẹre ma wẹẹ, I mu ẹtin yan e Jehova wẹẹ ọ gha kpemehe emwi ne I gualọ mẹ, deghẹ I na mu Arriọba ọghẹe ye okaro ra?’ (Mat 6:31-33) Adeghẹ ‘ẹẹn’ ọre ewanniẹn ne u rhie ye avbe inọta na, ọni rhiema wẹẹ u mu ẹtin yan e Jehova kevbe wẹẹ, u muegbe ne u ya da imudiase ọghuẹ yi vbe u gha werriẹ aro daa edanmwẹ vbe odaro.—Itan 3:5, 6.

GBỌYẸMWẸ YE IZINEGBE ỌGHE JEHOVA

17. (a) De vbene arhiọkpaegbe ya ya ima rẹn wẹẹ, Osa nọ mwẹ izinegbe ẹre Jehova khin? (b) De vbene ima khian ya rhiẹre ma wẹẹ ima gbọyẹmwẹ ye izinegbe ọghe Jehova?

¹⁷ E Jehova mwamwa ẹghẹ yọ nẹ, nọ khian ya fuẹn agbọn Esu na rua. (Mat 24:36) Te Jehova khian zin egbe khẹ ẹghẹ nọ mwamwa yọ, rhunmwuda, ọ gha fuẹn agbọn na rua vbe nọ te sẹ ẹghẹ ne irẹn mwamwa yọ, ọ ghi yevbe na miẹn wẹẹ irẹn i mwẹ izinegbe. Ọ kpẹẹ re nọ ke hoo nọ huẹn emwa ni wulo kpaegbe, sokpan ọ ma he ye ru vberriọ. (Job 14:14, 15) Rhunmwuda, te irẹn zin egbe khẹ ẹghẹ nọ khẹke ne irẹn khian ya huẹn iran kpaegbe. (Jọn 5:28) Te ọ wa khẹke ne ima gbọyẹmwẹ ye izinegbe ọghe Jehova. Vbe ima gu kha vberriọ? Rhunmwuda ne Jehova na mwẹ izinegbe, ẹkpotọ keghi kie ne emwa nibun ya “fiwerriẹ hin orukhọ iran rre,” uhiẹn do sẹ egbe ima. (2 Pit 3:9) E Jehova hoo ne emwa nibun gha mwẹ arrọọ ọghe etẹbitẹ. Nọnaghiyerriọ, vbe ima khian ya rhiẹre ma wẹẹ ima gbọyẹmwẹ ye izinegbe ọghe Jehova? Ọ khẹke ne ima gha gualọ emwa ni mwẹ ekhọe ata, na ya miẹn ọnrẹn yi ighẹ odẹ nọ su rrie arrọọ ọghe etẹbitẹ, ma ghi vbe ru iyobọ ne iran, ne iran mieke na do hoẹmwẹ e Jehova kevbe ne iran vbe gae. (Iwinna 13:48) Ẹghẹ nii, ẹkpotọ ghi vbe do kie ne iran ya deba ima ga e Jehova; ẹkpotọ vberriọ i ghẹ te kie ne iran, akpawẹ e Jehova i mwẹ izinegbe.

18. Vbọzẹe nọ na khẹke ne ima gha mwẹ izinegbe vbe egbe emwa ọvbehe?

¹⁸ E Jehova rẹnrẹn wẹẹ, ma i khian sẹtin gha re emwa ni gbae, vbe ẹi re te ọ sẹ ufomwẹ Ukpo Arriaisẹn Ọkpa Ne Kristi Khian Ya Kha. Vbene ọ te sẹ ẹghẹ nii, te Jehova khian ye gha mwẹ izinegbe vbe egbe ima, ọ ghi gha yabọ ima vbe ima gha ru abakuru. Nọnaghiyerriọ, te ọ khẹke ne ima ya egbe tae Jehova, ne ima gha mwẹ izinegbe vbe egbe emwa ọvbehe, ma ghi gha rhie aro tua akpa esiesi ne iran mwẹ. Gia ziro yan igiemwi ọghe ọtẹn ima nokhuo ọkpa. Ọdafẹn ọtẹn nokhuo na kegha re ọmwa nọ si osi gberra egbe; te osi nọ si ẹre ghi yevbe na ghee emianmwẹ. Ọ wegbe sẹrriọ wẹẹ, ọdafẹn okhuo na, na dobọ iko na yo yi. Ọtẹn ima nokhuo na keghi kha wẹẹ, “Obalọ nọ si yọ mwẹ egbe i re ne kherhe. Emwamwa ne ima te mwẹ zẹvbe ẹgbẹe na wa zagha.” Ọrheyerriọ, ọtẹn ima nokhuo na, na ye gha mwẹ izinegbe vbe egbe ọdafẹn ọnrẹn. Ọ keghi mu ẹtin yan e Jehova, ọ ma gi egbe wọọ re. Ọtẹn nokhuo na keghi ya egbe tae Jehova, ọ na gha rhie aro tua akpa esiesi ne ọdafẹn ọnrẹn mwẹ, nọ gha te ya rhie aro tua eke ne ọdafẹn ọnrẹn i na hia. Ọtẹn ima nokhuo na keghi kha wẹẹ, “Ọmwa esi ẹre ọdafẹn mwẹ khin. Ọ vbe hia nẹ kherhe kherhe nẹ ghẹ ghi si osi.” U miẹn vbene ọ ru ekpataki hẹ ne ima gha mwẹ izinegbe vbe egbe emwa ima vbuwe ẹgbẹe kevbe etẹn ni rre uwu iko, ni rre uwu ọlọghọmwa!

19. Vbọ khẹke nọ gha re atamuolọyan ọghe ima?

¹⁹ Vbe Jehova yi agbọn na vbe ẹghẹ omuhẹn, te Jesu kevbe avbe odibosa wa gha sọyẹnmwẹ. Muẹn roro, vbene ọ khian gha ye iran hẹ, vbe iran gha bẹghe ẹre wẹẹ, emwa ni gbae, ni hoẹmwẹ e Jehova kevbe ni vbe gae ẹre ọ ghi vuọn uhunmwu otagbọn na. Muẹn roro vbene ọ khian vbe gha ye hẹ vbe ekhọe ọghe emwa ni khian deba e Kristi kha, vbe iran gha bẹghe ẹre wẹẹ emwa nagbọn sọyẹnmwẹ, rhunmwuda iwinna ne iran ru zẹvbe ọba kevbe ohẹn. (Arhie 4:4, 9-11; 5:9, 10) Muẹn roro vbene ọ khian vbe gha ye hẹ, vbe ima ghaa rre agbọn ne obalọ i ghi ye, ne emianmwẹ i ye, ne akhiẹ i ye, ne uwu i ghi ye. Ẹghẹ nii, ma ghi gha viẹ eve oghọghọ. (Arhie 21:4) Vbene ọ te sẹ ẹghẹ nii, gi ẹre gha re atamuolọyan ọghuẹ, ne u ya yegbe taa Erha mwa nọ rre ẹrinmwi, nọ re Osa nọ mwẹ ahoẹmwọmwa, ẹwaẹn kevbe izinegbe. U gha ru vberriọ, u gha sẹtin gha sọyẹnmwẹ, ọ gha khọnrẹn ne u gha werriẹ aro daa ọlọghọmwa ughughan. (Jems 1:2-4) U miẹn vbene ọ sẹ ima ọyẹnmwẹ hẹ, ne Jehova na yan wẹẹ, “arhiọkpaegbe a gha rrọọ”!—Iwinna 24:15, NW.