Gha Re Ọmwa Nọ Mwẹ “Ekhọe Itohan”

E LISA khare wẹẹ: “I i khian sẹtin mianmian obọ esi ne etẹn nikpia kevbe etẹn nikhuo ya mu mwẹ.”a Emwi nọ si ọtẹn nokhuo na la odẹ ẹmwata ẹre ọ guan kaẹn. Erriọ e Anne vbe ye, ọ khare wẹẹ, emwi nọ mobọ ya irẹn la odẹ ẹmwata na, ọre obọ esi ne etẹn ya gha mu irẹn, ẹi wa re emwi ne iran maa irẹn re ọkpa. Etẹn nikhuo na wa tie Baibol, erriọ iran vbe ya ru erria yan rẹn, sokpan obọ esi ne etẹn ya mu iran vbe ẹghẹ nọ gberra, wa ye ru iyobọ ne iran do sẹ ebanban.

Ọ khẹke ne ima gha ya obọ esi mu emwa ọvbehe, rhunmwuda ọ gha ru iyobọ ne iran. Vbe ima khian ya ru ọna hẹ? Gi ima guan kaẹn odẹ eva ne ima gha ya sẹtin ru ọnọna: ẹmwẹ ne ima ta, kevbe emwi ne ima ru. Iyeke ọni, ma ghi do guan kaẹn emwa nọ khẹke ne ima gha ya obọ esi mu.

GI ẸMWẸ NE U TA GHA RHIE ẸRE MA WẸẸ, U MWẸ “EKHỌE ITOHAN”

Ebe Itan uhunmwu ẹnrẹn 31 ghi guan kaẹn okhuo esi, ọ na wẹẹ ẹmwẹ nọ ta rhie ẹre ma wẹẹ, ọ mwẹ “ekhọe itohan.” (Itan 31:26) “Ekhọe itohan” na, ẹre ọ dia ẹmwẹ nọ ta kevbe vbe nọ ya mu ẹmwẹ ye owa hẹ. Ọ vbe khẹke ne avbe erha emọ gi “ekhọe itohan” gha dia ẹmwẹ ne iran ta. Evbibiẹ emọ nibun rẹnrẹn wẹẹ, iran ghaa kpankan ivbi iran, ẹi zẹdẹ mwẹ iyobọ nọ ye ne ivbi iran, a sẹtin vbe miẹn wẹẹ iran i khian danmwehọ iran. Sokpan iran ghaa ya urhu ne khuẹrhẹ gu iran guan, ẹi mwẹ ivbi iran ma danmwehọ.

Adeghẹ evbibiẹ emọ ẹre u khin ra u i re ọre, de emwi nọ khian ru iyobọ nuẹn ne ẹmwẹ ne u ta mieke na gha rhie ẹre ma wẹẹ, u mwẹ ekhọe itohan? Abọ nokaro vbe ebe Itan 31:26 gi ima rẹn emwi nọ gha ru iyobọ ne ima, ọ khare wẹẹ: “Ẹwaẹn ọmẹhẹ ẹre ọ ya guan.” Ọni rhie ma wẹẹ, ẹi re emwi nọ rhirhi la ima ekhọe ma khian wa gha ta, ọ khẹke ne ima ka roro ẹre nẹ. Nọ egbuẹ wẹẹ, ‘Ẹmwẹ ne I khian ta na gha ya ohu mu ọmwa ọvbehe ra, ra ọ gha sọfurre ye ẹzọ nọ rre otọ?’ (Itan 15:1) Vbene ẹmwata, te ọ khẹke ne ima gha roro ẹmwẹ nẹ ma ke tae.

Ebe Itan vbe kha wẹẹ: “Te ẹmwẹ ekpọ balọ vbene a miẹn wẹẹ te a ya umozo so ọmwa.” (Itan 12:18) Ma ghaa muẹn roro vbene ẹmwẹ ne ima ta kevbe odẹ ne ima ya tae khian gha ye emwa ọvbehe hẹ vbe egbe, ọ ghi ru iyobọ ne ima ya gha mu ẹmwẹ roro nẹ ma ke tae. Ọghe ne ẹmwata, “ekhọe itohan” gha ru iyobọ ne ima ne ẹmwẹ nọ wegbe ra ẹmwẹ ekpọ ghẹ gha ke ima unu ladian, ma ghi vbe gha ya urhu ne khuẹrhẹ gu emwa guan. (Ẹfis 4:​31, 32) Ọ ma khẹke ne ima gha ziro dan ra ne ima gha ta ẹmwẹ dan, nọghayayerriọ ẹmwẹ nọ maan, nọ rhie igiọdu ne ọmwa ẹre ọ khẹke nọ gha ke ima unu ladian. E Jehova wa rhie igiemwi esi yotọ vbe ẹghẹ nọ na rhie igiọdu ne Ẹlaija vbe ohan ghaa muẹn. Odibosa ne Jehova ya rhie igiọdu ne Ẹlaija keghi ya “ovbi urhu ne rọkhọọ” gu ẹre guan. (1 Ọba 19:12) Ẹi re ẹmwẹ nọ maan ọkpa ne ọmwa ta ẹre a ya rẹn wẹẹ, ọ mwẹ ekhọe itohan, ọ vbe khẹke nọ gha ru emwi esi. Odẹ vbo?

VBENE EMWI ESI NE IMA RU YA RU IYOBỌ NE EMWA ỌVBEHE

Deghẹ ima hoo ne ima ya egbe taa e Jehova, ẹi re ẹmwẹ nọ maan ọkpa ẹre ọ khẹke ne ima gha ta, ọ vbe khẹke ne ima gha ru emwi esi. (Ẹfis 4:32; 5:​1, 2) E Lisa ne ima ka guan kaẹn sin, keghi guan kaẹn obọ esi ne Avbe Osẹe Jehova ya mu irẹn. Ọ khare wẹẹ: “Vba wẹẹ ne ima kpa hin owa ne ima ye rre, ovbi ẹghẹ kherhe ẹre iran wa rhie ne ima, ne ima ya si kpa. Ọdọ vbe amwẹ eva ni re Osẹe Jehova keghi rhie ẹdẹ vbe iwinna, ne iran mieke na do ru iyobọ ne ima ya si kpa. Vbe ẹghẹ na kha na, I ma he suẹn gha ruẹ e Baibol!” Obọ esi ne etẹn ya mu e Lisa ẹre ọ ghi yae gha hoo nọ ruẹ e Baibol.

E Anne na ka guan kaẹn sin wa vbe gbọyẹmwẹ ye obọ esi ne Avbe Osẹe Jehova ya muẹn. Ọ khare wẹẹ: “Rhunmwuda obọ ne emwa ya mu emwa vbe agbọn ne ima sẹ fi na, I ma sẹtin gha sikẹ emwa ọvbehe, te ohan wa gha mu mwẹ. Rhunmwuda ọni vbe I ghi miẹn Avbe Osẹe Jehova, I ma ka gba ẹko iran. I na gha nọ egbe mwẹ wẹẹ, ‘Vbọzẹ ne iran na hoo ne iran si mwẹ kẹ egbe?’ Sokpan vbe I ghi bẹghe ẹre wẹẹ ọmwa nọ ya e Baibol maa mwẹ emwi gele hoẹmwẹ mwẹ, I na do gba ẹko ẹre. Ke evba kpa ẹre emwi ne I ruẹ na do gha mu mwẹ ekhọe.”

Ma bẹghe ẹre wẹẹ, obọ ne etẹn ya mu e Lisa vbe Anne wa gele ru iyobọ ne iran, ẹre ọ vbe zẹe ne iran na gha hoo ne iran do rẹn odẹ ọghe ẹmwata. Vbe deba ọni, ọ vbe ya iran mu ẹtin yan e Jehova kevbe emwa rẹn.

YA EGBE TAA OSANOBUA NE U GHA TOHAN EMWA

Emwa eso wa mobọ tohan emwa ọvbehe, erriọ iran vbe ya mumu ogiẹ, rhunmwuda vbene a ya koko iran waan kevbe rhunmwuda ẹdogbo ne iran na waan. Emwi esi wa nọ deghẹ ọmwa na gha ya obọ esi mu emwa ọvbehe rhunmwuda vbene a ya koko ẹre waan. Sokpan deghẹ a na miẹn wẹẹ ọni ọkpa ẹre ọ ya ọmwa ya obọ esi mu emwa ọvbehe, a sẹtin miẹn wẹẹ, ọmwa vberriọ i ya egbe taa Osanobua.​—Yae taa Iwinna 28:2.

Orhiọn nọhuanrẹn ọghe Osanobua ẹre ọ gele ya ọmwa mwẹ ekhọe itohan. (Gal 5:​22, 23) Ne ima mieke na gele gha mwẹ ekhọe itohan, te ọ khẹke ne ima kie ẹkpotọ yọ ne orhiọn nọhuanrẹn gha dia ima. Ma gha ru vberriọ, ọ rhie ma wẹẹ ima ya egbe taa e Jehova kevbe Jesu. Vbe deba ọni, zẹvbe Ivbiotu e Kristi, ọ khẹke ne ima gha mwẹ ẹmwẹ emwa ọvbehe vbe orhiọn. Nọnaghiyerriọ, ahoẹmwọmwa ne ima mwẹ ne Jehova kevbe ogieva ima, ẹre ọ khẹke nọ gua ima kpa ya ru ọna. Ma gha ru vberriọ, ẹre ima khian na sẹtin kha wẹẹ ima gele ya obọ esi mu emwa ọvbehe, ọna ẹre Osanobua gualọ.

DE EMWA NỌ KHẸKE NE IMA GHA YA OBỌ ESI MU?

Emwa ni ru ẹse ne ima ra emwa ne ima rẹnrẹn, ẹre ima mobọ hoo ne ima gha ya obọ esi mu. (2 Sam 2:6) Odẹ ọkpa ne ima ya ru ọna, ọre ne ima gha kpọnmwẹ iran ye ẹse ne iran ru ne ima. (Kọl 3:15) Sokpan, vbọ khẹke ne ima ru adeghẹ ima ghee ẹre wẹẹ, ọ mwẹ emwa eso nọ ma khẹke ne ima ya obọ esi mu?

E Jehova ẹre ọ ghi rhie igiemwi nọ maan sẹ yotọ, rhunmwuda ọ mwẹ itohan daa ima agharhemiẹn wẹẹ ọ ma te khẹke ima. Evbagbẹn Nọhuanrẹn vbe maa ima emwi ne kpataki vbekpa na gha mwẹ itohan daa emwa ọvbehe. Ẹi re avbiẹ inugba ẹre a loo ẹmwẹ na ighẹ “itohan nọ ma te khẹke” vbe abọ ọghe Evbagbẹn Nọhuanrẹn na ya urhuẹvbo e Grik gbẹn. De vbene Osanobua ya tohan ima?

Ai miẹn ọmwa ne Jehova ma he tohan rẹn, ọ keghi kpemehe emwi na ya yin agbọn ne iran. (Mat 5:45) Uhiẹn, e Jehova kue suẹn gha tohan emwa nagbọn nẹ, vbene iran te rẹn ọnrẹn. (Ẹfis 2:​4, 5, 8) Vbe igiemwi, ọ keghi gie Ovbi ẹre ne ukpọmọkpa, nọ do wu ne emwa nagbọn. Vbe ukọ e Pọl ghi guan kaẹn izọese adẹwerriegbe ne Jehova ya ru ima ẹse, ọ keghi kha wẹẹ, “u miẹn vbene ẹse ọhẹ nọ ke obọ Osanobua rre kpọlọ hẹ.” (Ẹfis 1:7) Yevbesọni, agharhemiẹn wẹẹ ẹghẹ hia ima ya ru emwi nọ sọnnọ e Jehova, te ọ ye maa ima emwi, erriọ vbe ya dia ima ye odẹ nọ khẹke. Te odẹ ne Jehova ya maa ima emwi, yevbe “amẹ nọ wẹwẹ.” (Diut 32:2) Vbene ẹmwata, ma i khian sẹtin san e Jehova ẹse, ye emwi hia nọ he ru ne ima. Ẹmwata nọ rrọọ ọre wẹẹ, vbe ẹi re ne Jehova na tohan ima, ọghe ima te wa fo.​—Yae taa 1 Pita 1:13.

Vbene ẹmwata, itohan ne Jehova mwẹ ne ima keghi ya ima sikẹ ọre, ọ vbe gua ima kpa ne ima ya tohan emwa ọvbehe. Rhunmwuda ọni, ọ ma khẹke ne ima gha ghee emwa aro ma ke ru ẹse ne iran, sokpan te ọ khẹke ne ima ya egbe taa e Jehova, ne ima gi obọ ẹse gha tọlọ ima. (1 Tẹs 5:15) Ma ghaa tohan emwa vbe ẹghẹ hia, ma ghi yevbe erhẹn nọ ya egbe mwẹ ọghae vbe ẹghẹ ne oni ya fi. Ma ghaa ru vberriọ, afiangbe nọkhua ẹre ima khian gha khin ne emwa ima vbe uwu ẹgbẹe, etẹn ne ima gba ga, emwa ne ima gba winna, emwa ne ima gba yo esuku, kevbe emwa ni rre ẹdogbo ne ima ye.

Gha muẹn roro, vbene ẹmwẹ nọ maan nọ ke ruẹ unu ladian kevbe emwi ne u ru gha ya sẹtin ru iyobọ ne emwa ruẹ vbe uwu ẹgbẹe ra etẹn ni rre uwu iko. A sẹtin miẹn wẹẹ ọmwa rre iko ne u ye nọ wa gualọ iyobọ. Ọ sẹtin gha gualọ ọmwa nọ khian gu irẹn ru iwinna owa, ra ọmwa nọ khian gha yo ẹki ne irẹn. Vbe deba ọni, u gha miẹn ọmwa nọ gualọ iyobọ vbe ikporhu, hia ne u ru iyobọ nọ khẹke nẹẹn.

Nọnaghiyerriọ, wa gi ima gha ya egbe taa e Jehova, ne ẹmwẹ ne ima ta kevbe emwi ne ima ru gha rhie ẹre ma wẹẹ, ima mwẹ “ekhọe itohan.”