Emwi Nọ Gha Ru Iyobọ Nuẹn Vbe U Ghaa Ruẹ Emwi

De Emwi Nọ Khẹke Ne U Ka Ruẹ?

Ima hia i mobọ loo ẹghẹ nọ bun gbe ya ruẹ e Baibol ne egbe ima rhunmwuda, ẹghẹ i mobọ rrọọ vberriọ. Nọnaghiyerriọ, de vbene ima khian ya gele loo ẹghẹ ọghe ima ẹse hẹ? Okaro, rhie ẹghẹ ya ruẹ emwi ne u tie. Ọghe ne ẹmwata, u gha gele gbarokotọ tie ako ne kuẹi, ẹre ọ khian maan sẹ, ne u gha te ya rhie aro la ako nibun.

Hia ne u rẹn ako ne u hoo ne u ka tie. (Ẹfis 5:15, 16) Emwi eso ni rre ototọ mwa gha sẹtin ru iyobọ nuẹn:

• Gha tie Baibol vbe ẹdẹgbegbe. (Psm 1:2) U sẹtin ya ako ọghe Baibol ne ima ruẹ vbe iko na do vbe uwu uzọla suẹn.

• Mu egbe ebe Owa Ọkhẹ na ruẹ vbe iko yotọ, vbe mu egbe iko na do vbe uwu uzọla yotọ ẹse, ne u mieke na sẹtin zẹ ewanniẹn.—Psm 22:22.

• U gha miẹn obọ, hia ne u tie avbe ebe ọghomwa kevbe uhunmwuta ughughan ni rre jw.org, u ghi vbe hia ne u ghee avbe vidio ni rrọọ.

• Hia ne u ru ezanzan vbekpa emwi eso ne u gha hoo ne u rẹn otọ ọre sayọ. U sẹtin ru ezanzan vbekpa ọlọghọmwa ne u ye, inọta nọ kpokpo ruẹ vbe orhiọn ra uhunmwuta eso ni rre Baibol ne u gha hoo ne u rẹn otọ ọre sayọ. Vbe ya ghee ako na tie ẹre “Bible Study Activities” vbe jw.org.