Obọ Ne Jehova Hoo Ne Etẹn Ya Gha Mu Emwa Ni Ru Orukhọ

1. De emwi ne Jehova hoo ne emwa hia sọyẹnmwẹ ọnrẹn?

TE JEHOVA yi ima ne ima sẹtin gha zẹ ne egbe ima, ẹse ọhẹ na ẹre ima loo vbe ima gha khian ru azẹ nọ rhirhi gha khin. Azẹ nọ ghi ru ekpataki sẹ ne ọmwa gha sẹtin ru ọre nọ ya egbe ẹre fiohan ne Jehova, ọ ghi do gha re ọkpa vbe ẹgbẹe ọre. Emwi ne Jehova hoo ne emwa hia ru ẹre na khin. Vbọzẹ? Rhunmwuda, ọ hoẹmwẹ emwa, ọ vbe hoo ne agbọn maan iran. Ọ hoo ne iran gha re ọsie irẹn kevbe ne iran gha rrọọ vbe etẹbitẹ.​—Diut 30:​19, 20; Gal 6:​7, 8.

2. De emwi ne Jehova hoo ne emwa orukhọ ru? (1 Jọn 2:1)

² Vbọrhirhighayehẹ, e Jehova i kpikpi emwa ne iran do ga irẹn. Ọ hoo ne dọmwadẹ ọghẹe ya ekhọe ọre zẹ ne egbe ẹre. Ovbi Otu e Kristi nọ dinmwiamẹ nẹ, gha ghi ru orukhọ nọ wegbe ghi vbo? Adeghẹ ọ ma na fi werriẹ, a ghi rhie ẹre hin iko rre. (1 Kọr 5:13) Ọrheyerriọ, e Jehova wa hoo ne ọmwa nọ ru orukhọ werriegbe bu irẹn gha dee, uhiẹn, ọni ẹre ọ si ẹre nọ na kpemehe izọese adẹwerriegbe, nọ mieke na sẹtin yabọ ọmwa orukhọ nọ roro iro fi uyinmwẹ werriẹ. (Tie 1 Jọn 2:1.) Osa nọ mwẹ ahoẹmwọmwa ne ima ga keghi rhie igiọdu ne emwa orukhọ ne iran roro iro fi uyinmwẹ werriẹ.​—Zẹk 1:3; Rom 2:4; Jems 4:8.

3. Vbe ima khian zẹ iro yan vbe ako iruẹmwi na?

³ Aro ne Jehova ya ghee orukhọ, ẹre ọ vbe hoo ne ima vbe ya gha ghee ẹre, obọ nọ ya mu emwa orukhọ, ẹre ọ hoo ne ima vbe ya gha mu iran. Ma gha guan kaẹn vbene ima gha ya sẹtin ru ọna hẹ vbe ako iruẹmwi na. Zẹvbe ne u ya tie ako iruẹmwi na, hia ne u yẹrẹro (1) obọ na ya mu okpia ọkpa nọ ru orukhọ nọ wegbe vbe iko nọ ghaa rre Kọrint, (2) emwi ne ukọ ighẹ e Pọl we ne etẹn ru vbe okpia nii ghi fi werriẹ nẹ (3) kevbe emwi ne okha na ma ima re vbekpa etẹn ni ru orukhọ nọ wegbe.

OBỌ NA YA MU OKPIA ỌKPA NỌ RU ORUKHỌ NỌ WEGBE VBE IKO NỌ GHAA RRE KỌRINT

4. De emwi nọ sunu vbe iko nọ ghaa rre Kọrint? (1 Kọrint 5:​1, 2)

⁴ Tie 1 Kọrint 5:​1, 2. Vbe ẹghẹ nogie eha ne ukọ ighẹ e Pọl ya mu okhian gha rrie ehe ughughan ya kporhu, ọ keghi họn okhekhe ọghe emwi nọ wegbe nọ ghaa sunu vbe iko nọ rre Kọrint. Ọtẹn nokpia ọkpa nọ ghaa rre iko nii kegha gu ọvbokhan erhae ru emwi ọdọ vbe amwẹ. Awua nọ fian ihue ẹre ọna wa gha khin, “emwa ni rre uwu agbọn i kue vbe yin egbe uyinmwẹ alama oghẹ vberriọ”! Etẹn ni rre uwu iko na kegha roro ẹre wẹẹ, ọ ma de emwi nọ rhia deghẹ ọtẹn na, na ye gha rre uwu iko, ẹ i vbe re ọni ọkpa, a sẹtin miẹn wẹẹ, te iran kue gha kpe obọ ye ọre. Ọ gha kẹ, te eso ghaa roro ẹre wẹẹ, ne iran na ru vberriọ, te iran tohan ọmwa nii vbene Osanobua tohan emwa orukhọ. Sokpan, e Jehova i kue ne emwa rẹn rhie obọ ye emwi nọ ma gba. Ẹ i mwẹ uyinmwẹ ifavbaro ne okpia na yinrin ma ya emwa ọvbehe gha ya aro dan ghee etẹn ni rre iko. A sẹtin miẹn wẹẹ, uyinmwẹ ọnrẹn vbe gha mu uyinmwẹ ọghe etẹn ni ghaa gu ẹre mu obọ rhia. Nọnaghiyerriọ, de emwi ne Pọl we ne etẹn ni rre iko ru?

5. De emwi ne Pọl tama etẹn we ne iran ghẹ gha ru, kevbe wẹẹ, vbe ọ yae kha? (1 Kọrint 5:13) (Vbe ya ghee efoto.)

⁵ Tie 1 Kọrint 5:13. Osanobua keghi loo e Pọl ya gbẹn elẹta gie etẹn, vbe elẹta nii, ọ na we ne iran rhie ọmwa orukhọ nii, nọ ma fi werriẹ hin iko rre. De obọ nọ ghi khẹke ne etẹn ni hoẹmwẹ e Jehova ya gha muẹn? E Pọl keghi tama iran wẹẹ, ne iran ghẹ ghi gu ẹre “mu obọ.” Vbe ọ ya ọna kha? Ọ keghi rhan otọ re wẹẹ, ọ ma kue khẹke ne iran “gu ọmwa vberriọ rri evbare.” (1 Kọr 5:11) Ma gha tota gu ọmwa gha rri evbare vbene ima te rẹn ma suẹn gha gu ọmwa nii rri ọta nẹ. Nọnaghiyerriọ, emwi ne Pọl ya ọna kha ọre wẹẹ, ne etẹn ghẹ zẹdẹ gha gu ẹre mu obọ. Ọna gha ru iyobọ ne etẹn ni rre iko ne uyinmwẹ okpia nii ghẹ do mu ọghe iran rhia. (1 Kọr 5:​5-7) Vbe deba ọni, iran ma na gha gu ẹre mu obọ, ọ gha ru iyobọ nẹẹn ya rẹn wẹẹ, irẹn khian rree ne Jehova nẹ, ekhue emwi nọ ru ghi gha muẹn, iyeke ọni, ọ ghi do gha hoo nọ roro iro fi uyinmwẹ werriẹ.

6. De emwi ne etẹn ru vbe iran miẹn elẹta ne Pọl gbẹn rre, de emwi ne okpia nii nọ ghaa ru orukhọ nọ wegbe vbe ru?

⁶ Vbe Pọl ghi gbẹn elẹta gie etẹn ni rre Kọrint nẹ, ọ kegha roro ẹre deghẹ iran gha ya emwi nọ rre elẹta nii ru emwi. Vbene ẹghẹ ya khian, e Taitọs keghi do na iyẹn oghọghọ ma e Pọl. Etẹn ni rre iko wa miẹn elẹta nii yi. (2 Kọr 7:​6, 7) Iran keghi lele adia nọ rhie ne iran. Vbe deba ọni, vbe Pọl ghi gbẹn elẹta na nẹ, uki eso kẹkan ẹre ọ gberra, vbe okpia nii roro iro fi uyinmwẹ werriẹ! Ọ keghi dobọ uyinmwẹ esakan nọ te gua ẹre obọ ro yi, ọ na vbe suẹn gha ya ilele ọghe Jehova ru emwi. (2 Kọr 7:​8-11) De emwi ne Pọl ghi tama etẹn ni rre iko ne iran ru?

OBỌ NỌ KHẸKE NE ETẸN NI RRE IKO YA MU OKPIA NII NỌ RORO IRO FI UYINMWẸ WERRIẸ

7. Vbọ ke ẹre ladian rhunmwuda na na rhie okpia nii hin iko rre? (2 Kọrint 2:​5-8)

⁷ Tie 2 Kọrint 2:​5-8. E Pọl keghi kha wẹẹ, “Oya ne nibun sẹ vbe uwa rri okpia nii re, vbe sẹ vberriọ.” Nọ rhie ma wẹẹ, emwi nọ maan wa ke ẹre ladian, na na rhie okpia nii hin iko rre. Vbe ọni a khin? Ọ keghi ru iyobọ nẹẹn ya roro iro fi uyinmwẹ werriẹ.​—Hib 12:11.

8. De emwi ọvbehe ne Pọl ghaa hoo ne etẹn ni rre iko ru?

⁸ E Pọl keghi tama etẹn ni rre iko wẹẹ: “Ọ khẹke ne uwa [yabọ ọtẹn nii nọ ru orukhọ], ne uwa vbe fu ẹre ẹko rre . . . wa gi ẹre rẹn wẹẹ uwa hoẹmwẹ ọnrẹn.” Yẹrẹro wẹẹ, emwi ne Pọl ghaa hoo ne etẹn ru gberra ne iran wa rhie okpia nii werriegbe. Ọ ghaa hoo ne iran gha rhie ẹre ma vbe ẹmwẹ ne iran ta kevbe emwi ne iran ru wẹẹ, iran yabọ okpia nii nẹ kevbe wẹẹ, iran hoẹmwẹ ọnrẹn. Ọna gha rhie ẹre ma wẹẹ, iran ghọghọ yọ, nọ na dọlegbe bu e Jehova gha dee.

9. Vbọzẹ nọ na gha lọghọ etẹn eso ne iran sẹtin dọlegbe miẹn okpia nii nọ fi werriẹ yi?

⁹ Ọ ghaa lọghọ etẹn eso ne iran sẹtin rhan obọ miẹn okpia nii nọ roro iro fi uyinmwẹ werriẹ yi ra? E Baibol ma tama ima sokpan, ọ gha kẹ, etẹn eso ghaa rrọọ vberriọ. A gha gele we na ghee ẹre, emwi nọ ru wa si ọlọghọmwa gie etẹn ni rre iko, kevbe wẹẹ, ọ vbe ya ekhue mu emwa eso vbe uwu iko. Ọ gha kẹ, emwa eso ni rre uwu iko ni wa kakabọ gha hia ne iran gha ru emwi esi sẹtin do gha roro ẹre wẹẹ, ọ ma khẹke na rhan obọ miẹn okpia nọ wa ru egbe orukhọ vbenian yi. (Yae taa Luk 15:​28-30.) Vbọzẹ nọ na kakabọ ru ekpataki ne etẹn ni rre iko rhie ẹre ma wẹẹ, iran gele hoẹmwẹ ọtẹn na?

10-11. De emwi nọ gha te sẹtin sunu akpawẹ ediọn ma yabọ ọtẹn nii nọ fi werriẹ?

¹⁰ Muẹn roro emwi nọ gha te sunu akpawẹ, avbe ediọn ma rhie okpia nii werriegbe ra vbe ọ ghi vbe rre nẹ, etẹn ni rre uwu iko ma rhan obọ miẹn ọnrẹn yi. “Akhiẹ nọ vuọn ọnrẹn ẹko” gha te wa sẹtin ya iro han rẹn. Ọ sẹtin do gha roro ẹre wẹẹ, e Jehova kevbe etẹn ni rre iko i khian ghi sẹtin miẹn irẹn yi. Ọ sẹtin do gha roro ẹre wẹẹ, esa i rrọọ ne irẹn khian ya fi werriẹ, rhunmwuda irẹn i khian ghi sẹtin gha re ọsie Jehova.

¹¹ Nọ ghi wa khọọ sẹ ọre wẹẹ, adeghẹ etẹn ni rre iko ma na yabọ ọtẹn nii nọ fi werriẹ, iran tobọ iran sẹtin do khian oghian e Jehova. Vbọzẹ? Rhunmwuda, ọ rhie ma wẹẹ, iran ma ya egbe taa e Jehova nọ re Osa nọ mu egbe vbe ẹghẹ hia nọ ya yabọ emwa orukhọ ni fi werriẹ, nọghayayerriọ, Esu nọ mwẹ ekhọe atosi ẹre iran ya egbe taa. Odẹ vberriọ, te iran ghi kie ẹkpotọ ne Esu ya loo iran, ya gbe orhiọn okpia nii mu otọ, nẹ ghẹ ghi ga e Jehova.​—2 Kọr 2:​10, 11; Ẹfis 4:27.

12. De vbene etẹn ni rre uwu iko khian ya sẹtin ya egbe taa e Jehova hẹ?

¹² Nọnaghiyerriọ, de vbene etẹn ni rre iko nọ ghaa rre Kọrint khian ya rhie ẹre ma hẹ wẹẹ, e Jehova ẹre iran ya egbe taa, ẹ i re Esu? Etẹn na ghi hia na miẹn wẹẹ, obọ ne Jehova ya mu emwa ni ru orukhọ nọ fi werriẹ, ẹre iran vbe ya mu iran. Yẹrẹro emwi ne emwa eso ni gbẹn e Baibol tae vbekpa e Jehova. E Devid khare wẹẹ, “Uwẹ maan ne ima e Jehova, u keghi vbe ya orukhọ bọ.” (Psm 86:5) E Maika khare wẹẹ: “Osa nọ yevbe ruẹ i rrọọ Nọyaẹnmwa, wẹ ya orukhọ bọ.” (Mai 7:18) Aizaia vbe kha wẹẹ: “We ne ọmwa dan fi uyinmwẹ ọnrẹn werriẹ, nọ vbe fi iziro dan nọ rrọọ ọre ekhọe werriẹ, nọ bu e Jehova gha dee, ọ gha tohan rẹn. Ọ ghi bu Osanobua mwa gha dee, rhunmwuda, ọ ya ekhọe hia yabọ.”​—Aiz 55:7.

13. Vbọzẹ nọ na khẹke na rhie ọtẹn nii nọ ru orukhọ, nọ ghi do fi werriẹ werriegbe? (Ya ghee ẹkpẹti nọ mwẹ uhunmwuta nọ khare wẹẹ, “De Ẹghẹ Na Ya Rhie Okpia Nii Nọ Ghaa Rre Iko Nọ Rre Kọrint Werriegbe?”)

¹³ Te ọ khẹke ne etẹn ni ghaa rre iko nọ rre Kọrint, rhan obọ miẹn okpia nii yi, iran ghi vbe rhie ẹre ma we iran hoẹmwẹ ọnrẹn, odẹ vberriọ te iran ya egbe taa e Jehova. Adeghẹ etẹn na ya emwi ne Pọl tae ru emwi, iran na rhan obọ miẹn ọtẹn nii nọ fi werriẹ yi, te iran rhie ẹre ma wẹẹ, iran “họn ẹmwẹ vbe ẹghẹ hia.” (2 Kọr 2:9) Uki eso kẹkan ẹre ọ he ye vbe a rhie okpia nii hin iko rre, vbe ọ roro iro fi uyinmwẹ werriẹ. Rhunmwuda ọni, esa i rrọọ ne ediọn khian ya gha si egbe ne iran ghẹ rhie ẹre werriegbe.

YA EGBE TAA E JEHOVA VBE ODẸ NỌ YA BU OHIẸN ATA KEVBE ODẸ NỌ YA RHIE ITOHAN MA

14-15. Vbe ima miẹn ruẹ vbe obọ ne etẹn ya mu okpia nii nọ ru orukhọ nọ wegbe vbe iko nọ ghaa rre Kọrint? (2 Pita 3:9) (Vbe ya ghee efoto.)

¹⁴ Te a gbẹn okha ọghe okpia nii nọ ru orukhọ nọ wegbe, nọ rre iko nọ ghaa rre Kọrint yotọ kevbe obọ na ya muẹn “na ya ma ima emwi.” (Rom 15:4) Okha na gi ima rẹn wẹẹ, e Jehova i kue ne ọmwa nọ ru orukhọ nọ wegbe gha rre uwu ẹbu emwa rẹn. Emwa eso sẹtin gha roro ẹre wẹẹ, rhunmwuda ne Jehova na re Osa nọ mwẹ “itohan,” ọ gha kue ne ọmwa orukhọ nọ ma fi werriẹ ye gha rre uwu iko, sokpan, e Jehova i ru egbe emwi vberriọ. Osa nọ mwẹ itohan ẹre Jehova khin, sokpan ẹ i gbe gue orukhọ; ẹ i vbe fi ilele ọghẹe werriẹ. (Jude 4) Adeghẹ e Jehova na kue ne emwa orukhọ ye gha rre uwu iko, ẹ i re te ọ tohan iran, rhunmwuda, ọna sẹtin mu uyinmwẹ etẹn ọvbehe rhia.​—Itan 13:20; 1 Kọr 15:33.

¹⁵ Ọrheyerriọ, e Baibol gi ima rẹn wẹẹ, e Jehova ma hoo ne ọmwa rhọkpa fuan. Ọ wa hia vbe odẹ ke odẹ nọ ru iyobọ ne emwa orukhọ, ne iran mieke na sẹtin miẹn fan. Ọ keghi tohan emwa ni roro iro fi uyinmwẹ werriẹ kevbe ni vbe hoo ne iran dọlegbe do gha re ọsiọre. (Ẹzik 33:11; tie 2 Pita 3:9.) Rhunmwuda ọni, vbe okpia nii nọ ru orukhọ nọ ghaa rre iko nọ rre Kọrint fi werriẹ, e Jehova keghi loo ukọ ighẹ e Pọl ya tama etẹn ni rre iko we ne iran yabọe kevbe ne iran rhan obọ miẹn ọnrẹn yi.

16. De emwi ne obọ na ya muẹn okpia nii nọ ru orukhọ nọ wegbe vbe iko nọ ghaa rre Kọrint ma ruẹ re vbekpa e Jehova?

¹⁶ Okha ọghe okpia nii nọ ru orukhọ nọ wegbe vbe iko nọ ghaa rre Kọrint kevbe obọ na ya muẹn, ma ima re wẹẹ, Osa nọ mwẹ ahoẹmwọmwa, nọ ru emwi nọ gbae kevbe nọ bu ohiẹn ata ẹre Jehova khin. (Psm 33:5) Ọna ma sẹ nọ gha ya ruẹ gha hoo ne u rho e Jehova sayọ ra? A gha we na do ghee ẹre, emwa orukhọ ẹre ima hia khin, ma wa vbe gualọ ayabọ. Te ọ khẹke ne dọmwadẹ ima gha kpọnmwẹ e Jehova ye izọese adẹwerriegbe nọ kpemehe ẹre, nọ zẹ ighẹ a gha sẹtin ya orukhọ ọghe ima bọ ima. U miẹn vbene orhiọn ima sotọ hẹ, ne ima na rẹn wẹẹ, e Jehova gele hoẹmwẹ emwa rẹn kevbe wẹẹ, ọ hoo ne agbọn maan iran!

17. Vbe ima khian guan kaẹn vbe ako iruẹmwi eva nọ ghi lelẹe?

¹⁷ De obọ nọ khẹke na ya mu emwa ni ru orukhọ vbe ẹdẹnẹrẹ? De vbene ediọn khian ya ya egbe taa e Jehova hẹ vbe iran ghaa ru iyobọ ne ọmwa orukhọ ya fi werriẹ? De obọ nọ khẹke ne etẹn ya gha mu emwa na rhie hin iko rre kevbe emwa na rhie werriegbe? Ma gha guan kaẹn avbe inọta na vbe ako iruẹmwi eva nọ ghi lelẹe.