Vbene Avbe Ediọn Ya Rhie Ẹre Ma We Iran Mwẹ Ahoẹmwọmwa Kevbe Itohan Daa Emwa Ni Ru Orukhọ

1. De emwi nọ gha sẹtin sunu vbe ọmwa gha ru orukhọ nọ wegbe?

VBE ako iruẹmwi nọ lae, ma guan kaẹn emwi ne Pọl we ne etẹn ru vbe okpia ọkpa ru orukhọ nọ wegbe vbe iko nọ rre Kọrint. Ọmwa orukhọ nii ma fi werriẹ, rhunmwuda ọni, a na rhie ẹre hin uwu iko rre. Vbọrhirhighayehẹ, zẹvbe ne ako ọghe evbagbẹn nọhuanrẹn ne ako iruẹmwi na hẹnhẹn egbe yan khare, a gha sẹtin ru iyobọ ne emwa ni ru orukhọ ya fi werriẹ. (Rom 2:4) De vbene ediọn khian ya sẹtin ru iyobọ ne iran ya fi werriẹ hẹ?

2-3. Vbọ khẹke ne ima ru vbe ima gha bẹghe ẹre wẹẹ, ọtẹn vbe uwu iko ru orukhọ nọ wegbe, kevbe wẹẹ, vbọzẹ?

² Te ọ khẹke ne ediọn rẹn emwi hia nọ sunu, ne iran mieke na sẹtin ru iyobọ ne ọmwa nọ ru orukhọ. Nọnaghiyerriọ, vbọ khẹke ne ima ru vbe ima gha bẹghe ẹre wẹẹ, ọtẹn vbe uwu iko ru orukhọ nọ wegbe, na gha sẹtin rhunmwuda ẹre rhie ẹre hin uwu iko rre? Te ọ khẹke ne ima tama rẹn nọ bu ediọn ne iran ru iyobọ nẹẹn.​—Aiz 1:18; Iwinna 20:28; 1 Pit 5:2.

³ Deghẹ a na ghi miẹn wẹẹ, ọ ma hoo nọ tama ediọn ghi vbo? Ọ ghaa yerriọ, ma ghi tobọ ima ya tama ediọn, ne iran ru iyobọ nọ khẹke nẹẹn. Ma gha ru vberriọ, te ima rhie ẹre ma wẹẹ, ima hoẹmwẹ ọtẹn nii rhunmwuda, ma ma hoo nọ khian oghian e Jehova. Deghẹ ọmwa orukhọ nii ma fi werriẹ, ọ ghi do khian oghian e Jehova. Ọ sẹtin sa ọrho ye eni e Jehova, ọ sẹtin vbe ya emwa gha ya aro dan ghee etẹn ni rre uwu iko. Rhunmwuda ahoẹmwọmwa ne ima mwẹ ne Jehova kevbe ọtẹn nọ ru orukhọ, te ọ khẹke ne ima zẹ emwi ru vbobọvbobọ, ọ gha khọnrẹn nọ gha lọghọ ne ima ru vberriọ.​—Psm 27:14.

VBENE EDIỌN YA RU IYOBỌ NE EMWA NI RU ORUKHỌ NỌ WEGBE

4. De emwi ne ediọn hia ne iran ru vbe iran ghaa ru iyobọ ne ọmwa nọ ru orukhọ nọ wegbe?

⁴ Ọmwa gha ru orukhọ nọ wegbe vbe uwu iko, ẹbu ediọn ghi zẹ ediọn eha ni gbegba ne iran ru iyobọ ne ọmwa orukhọ nii.a Te ọ khẹke ne avbe ediọn na gha re emwa ni ru emwi ye oreghe kevbe ni mu egbe rriotọ. Zẹvbe ne iran ya hia ne iran ru iyobọ ne ọmwa, nọ mieke na roro iro fi uyinmwẹ werriẹ, te ọ khẹke ne iran kọe ye orhiọn wẹẹ, iran i khian sẹtin kpikpi ẹre nọ fi werriẹ. (Diut 30:19) Avbe ediọn rẹnrẹn wẹẹ, ẹ i re emwa orukhọ hia ẹre ọ khian fi werriẹ vbe na ghee Ọba ighẹ e Devid. (2 Sam 12:13) Emwa orukhọ eso sẹtin bizugbe ibude nọ ke obọ e Jehova rre. (Gẹn 4:​6-8) Ọrheyerriọ, emwi nọ khẹke ne ediọn ru ọre, ne iran hia vbe odẹ ke odẹ ne iran ru iyobọ ne ọmwa orukhọ ya sẹtin roro iro fi uyinmwẹ werriẹ. De ilele eso nọ khẹke ne iran kọ ye orhiọn vbe iran ghaa ru iyobọ ne ọmwa nọ ru orukhọ?

5. De ibude nọ khẹke ne ediọn lele vbe iran ghaa ru iyobọ ne ọmwa nọ ru orukhọ? (2 Timoti 2:​24-26) (Vbe ya ghee efoto.)

⁵ Te ọ khẹke ne ediọn gha ghee ọmwa nọ ru orukhọ zẹvbe ohuan nọ wiri ne Jehova hoẹmwẹ ọnrẹn. (Luk 15:​4, 6) Rhunmwuda ọni, iran ghaa ru iyobọ ne ọmwa nọ ru orukhọ, iran i ta ẹmwẹ nọ wegbe, ra ne iran gha fi ọkpanike, ra ne iran wa gha roro ẹre wẹẹ, emwi ọkpa kẹkan nọ wa khẹke ne iran ru ọre, ne iran wa gha zọlọ ọre ọta ne iran mieke na rẹn ẹmwata nọ rrọọ. Nọghayayerriọ, iran ghi hia ne iran lele emwi nọ rre ebe 2 Timoti 2:​24-26. (Tie ẹre.) Iran ghi gha re emwa ni fu, nẹi rherhe mu ohu, iran ghi vbe gha mwẹ ekhọe itohan zẹvbe ne iran ya hia ne iran ru iyobọ ne ọmwa orukhọ nii ya fi iziro ọghẹe werriẹ.

6. De vbene ediọn khian ya gualọ adia vbe obọ e Jehova vbene iran te bu ọmwa nọ ru orukhọ? (Rom 2:4)

⁶ Ediọn ghi hia ne iran gualọ adia vbe obọ e Jehova. Te ọ khẹke ne iran hia vbe odẹ ke odẹ ne iran ya egbe taa e Jehova vbe iran ghaa ru iyobọ ne ọmwa nọ ru orukhọ, iran ghi vbe kọe ye orhiọn ẹmwẹ ne ukọ ighẹ e Pọl tae nọ na wẹẹ: “Rhunmwuda ne Osanobua na tohan ruẹ, ẹre ọ si ẹre nọ na hia nọ ru iyobọ nuẹn ne u mieke na roro iro fi uyinmwẹ werriẹ.” (Tie Rom 2:4.) Te ọ khẹke ne ediọn yerre wẹẹ, avbe ọsuohuan ni rre ototọ ọdakha ọghe Kristi ẹre iran khin. (Aiz 11:​3, 4; Mat 18:​18-20) Vbene ediọn te bu ọmwa nọ ru orukhọ nii, iran ghi ka na erhunmwu ne Jehova ru iyobọ ne iran, ne iran mieke na sẹtin ru iyobọ ne ọmwa orukhọ nii ya fi werriẹ. Iran ghi ya avbe ebe ọghomwa ru ezanzan, iran ghi vbe na erhunmwu ne Jehova rhie ẹwaẹn ne iran. Iran ghi hia ne iran rẹn emwi eso vbekpa ọmwa nii, vbe na ghee, vbene ọ ya waan hẹ, kevbe vbene emwi ye ẹre hẹ, ọna gha ru iyobọ ne iran ya rẹn evbọzẹe nọ na ru emwi vberriọ kevbe evbọzẹe nọ na mwẹ egbe iziro vberriọ.​—Itan 20:5.

7-8. De vbene avbe ediọn khian ya lele igiemwi ọghe Jehova vbe iran gha khian ru iyobọ ne ọmwa nọ ru orukhọ nọ wegbe?

⁷ Avbe ediọn keghi hia ne iran gha mwẹ izinegbe vbe na ghee Jehova. Iran keghi hia ne iran gha ye ẹre rre, obọ ne Jehova ya mu emwa ni ru orukhọ vbe ẹghẹ nọ gberra. Vbe igiemwi, Jehova keghi mwẹ izinegbe vbe egbe Ken, ọ na fẹko gu ẹre zẹ iro, ọ na gi ẹre rẹn ẹbe nọ gha kẹrikian deghẹ ọ na ru orukhọ, kevbe afiangbe nọ gha miẹn deghẹ ọ na roro iro fi uyinmwẹ werriẹ. (Gẹn 4:​6, 7) E Jehova keghi loo akhasẹ ighẹ e Netan ya dia e Devid ye odẹ, e Netan keghi loo igiemwi ya ru iyobọ ne Devid ya sẹtin roro iro fi uyinmwẹ werriẹ. (2 Sam 12:​1-7) “Ẹghẹ hia” ẹre Jehova ya gha gie avbe akhasẹ ọghẹe gie Ivbi Izrẹl ni zẹ utun vbe ehọ. (Jer 7:​24, 25) Ọ ma mudia ne iran ka fi werriẹ nẹ, ọ ke ru iyobọ ne iran. Nọghayayerriọ, ọ keghi rhie igiọdu ne iran, ne iran fi werriẹ, vbe iran ye fuẹn vbe uwu orukhọ.

⁸ Avbe ediọn keghi lele igiemwi ọghe Jehova vbe iran gha khian ru iyobọ ne ọmwa nọ ru orukhọ nọ wegbe. Zẹvbe ne ebe 2 Timoti 4:2 khare, ediọn keghi mwẹ “izinegbe” vbe egbe ọtẹn nọ ru orukhọ. E study note nọ rre ako na khare wẹẹ, “Te ọ khẹke ne ediọn gele gbe ibiẹ rrie, zẹvbe ne iran ya hia ne iran ru iyobọ ne ọmwa nọ ru orukhọ, nọ mieke na sẹtin roro iro fi uyinmwẹ werriẹ. Adeghẹ ediọn na gi ohu mu iran, ọ gha lọghọ ne ọmwa nọ ru orukhọ nii lele adia na rhie nẹẹn kevbe nọ sẹtin roro iro fi uyinmwẹ werriẹ.”

9-10. De vbene ediọn khian ya ru iyobọ ne ọmwa nọ ru orukhọ nọ mieke na muẹn roro emwi nọ ya ẹre ru orukhọ daa e Jehova?

⁹ Avbe ediọn keghi hia ne iran rẹn owẹ ne ọmwa nii ka zẹ nọ si ẹre fi orukhọ. Vbe igiemwi, de emwi nọ ya ẹre de ghee iyeke vbe odẹ ọghe orhiọn, te ọ ma ghi gha ruẹ e Baibol ne egbe ẹre vbe ẹghẹ hia ra, ra te ọ ghi ban ikporhu na yo? Ọ ye na erhunmwu gie Jehova vbe ẹghẹ hia ra? Te ọ gi iziro dan gbọzinian vbe ekhọe ọre ra? Ọ gu avbe ọse dan mu obọ ra? Emwi nọ ma khẹke ẹre ọ ya sọyẹnmwẹ egbe ra? De vbene avbe emwi na he ya mu ẹre ekhọe rhia hẹ? Ọ rẹn aro ne Jehova ya ghee orukhọ nọ wegbe ra?

¹⁰ Te ọ khẹke ne ediọn ya ẹwaẹn nọ ọmwa nii ọta, ne iran mieke na rẹn emwi nọ rre ọre ekhọe, iran ghi vbe nọ ọnrẹn ọta nọ gha ru iyobọ nẹẹn ya muẹn roro emwi nọ ya ẹre ru orukhọ daa e Jehova, sokpan ọ ma khẹke ne iran gha nọ ọta vbekpa emwi eso nọ ma kaẹn iran. (Itan 20:5) Vbe deba ọni, avbe ediọn sẹtin loo igiemwi ya ru iyobọ nẹẹn, nọ mieke na rẹn vbene orukhọ nọ ru wegbe sẹ hẹ, vbene Netan vbe ya ru iyobọ ne Devid. Ọ gha kẹ, vbe ẹghẹ okaro ne ediọn ya bu ọmwa nii ne iran ru iyobọ nẹẹn, ọ ghi gha gbe I ma rẹn ye orukhọ nọ ru. Ọ sẹtin kue roro iro fi uyinmwẹ werriẹ.

11. De obọ ne Jesu ya mu emwa orukhọ?

¹¹ Avbe ediọn keghi hia ne iran ya egbe tae Jesu. Vbe Jesu nọ rhiọ kpaegbe nẹ, ghi ru iyobọ ne Sọl nọ ke Tasọs rre, ọ na ya ẹwaẹn nọ rẹn ọta wẹẹ: “Sọl, Sọl, vbọzẹ ne u na zẹ mwẹ kpokpo?” Odẹ vbenian te Jesu ru iyobọ nẹẹn ya rẹn wẹẹ, emwi dan ẹre ọ ghaa ru. (Iwinna 9:​3-6) Vbe nọ dekaẹn “okhuo nii . . . ighẹ e Jezibẹl,” Jesu khare wẹẹ: “I te rhie ẹghẹ nẹẹn nọ ya roro iro fi uyinmwẹ werriẹ.”​—Arhie 2:​20, 21.

12-13. De emwi ne ediọn gha ru nọ gha rhie ẹre ma wẹẹ, iran rhie ẹghẹ ne ọmwa nọ ru orukhọ ya fi werriẹ? (Vbe ya ghee efoto.)

¹² Vbe na ghee Jesu, avbe ediọn i wa rherhe kha wẹẹ, ọmwa nọ ru orukhọ i sẹtin fi werriẹ ẹdẹ. Emwa eso ni ru orukhọ sẹtin wa fi werriẹ vbe ẹghẹ okaro ne ediọn ya gu iran do iko, sokpan, ọghe emwa eso sẹtin rhie ẹghẹ. Rhunmwunda ọni, ediọn sẹtin zẹ ọre vbe iro wẹẹ, ẹ i re uhukpa ẹre iran khian gu ọmwa nii do iko. Ọ gha kẹ, ediọn gha ghi gu ẹre do iko nokaro nẹ, ọ sẹtin do kakabọ gha muẹn adia ne ediọn rhie nẹẹn roro. Ọ sẹtin mu egbe rriotọ, ọ ghi na erhunmwu gie Jehova nọ yabọ irẹn. (Psm 32:5; 38:18) Nọnaghiyerriọ, ediọn gha ghi dọlegbe gu ẹre do iko, a sẹtin miẹn wẹẹ, ẹ i khian ghi yin vbene ọ ka ya yin vbe iran ka do ru iyobọ nẹẹn.

¹³ Te ọ khẹke ne ediọn gha mwẹ ekhọe agiẹngiẹn kevbe ekhọe itohan ne iran mieke na sẹtin ru iyobọ ne ọmwa orukhọ ya roro iro fi uyinmwẹ werriẹ. Erhunmwu ne iran na, ọre ne Jehova fiangbe ẹrhiọn ne iran loo ro ne ọmwa orukhọ nii sẹtin roro iro fi uyinmwẹ werriẹ.​—2 Tim 2:​25, 26.

14. De ọmwa nọ khẹke na rhie etian na vbe ọmwa orukhọ gha fi werriẹ kevbe wẹẹ, vbọzẹ?

¹⁴ Emwi ọyẹnmwẹ nọ vbe ọmwa orukhọ gha fi werriẹ! (Luk 15:​7, 10) Sokpan, de ọmwa nọ khẹke na rhie etian na vbe ọmwa orukhọ gha fi werriẹ? Ediọn nọ ra? Ghẹ mianmian emwi ne Pọl gbẹn vbekpa emwa orukhọ, vbe ọ khare wẹẹ: “Egbọre, Osanobua gha rhie ẹkpotọ ne iran ya roro iro fi uyinmwẹ werriẹ.” (2 Tim 2:25) E study note nọ rre ako na khare wẹẹ: “Ọmwa orukhọ gha fi werriẹ, ọ ma khẹke na rhie etian ne ọmwa ọvbehe, e Jehova ọkpa ẹre ọ khẹke na rhie etian na, rhunmwuda irẹn ẹre ọ ru iyobọ ne ọmwa orukhọ nii ya sẹtin fi werriẹ. E Pọl ya unu kaẹn afiangbe ne ọmwa orukhọ nii khian lae miẹn vbe ọ gha roro iro fi uyinmwẹ werriẹ; ọ ghi do gha mwẹ irẹnmwi nọ gbae ọghe ẹmwata, aro ghi do gbannọ ọnrẹn, ọ ghi vbe sẹtin lẹẹ fe vbe ifi ọghe Esu.​—2 Tim 2:26.”

15. De vbene ediọn khian ya sẹtin ye gha ru iyobọ ne ọmwa orukhọ nọ fi werriẹ?

¹⁵ Ọmwa orukhọ gha roro iro fi uyinmwẹ werriẹ, ediọn ni ru iyobọ nẹẹn ghi ru emwamwa ne iran ya gha mu otuẹ gie ẹre, ne iran mieke na ru iyobọ nẹẹn, nọ ye gha lele odẹ nọ dia khian kevbe nẹ ghẹ dẹ ye ifi ọghe Esu. (Hib 12:​12, 13) Sokpan, ọ ma khẹke ne ediọn gi emwa ọvbehe rẹn orukhọ ne ọtẹn na ru. Nọnaghiyerriọ, de emwi na khian ghi tama etẹn ni rre iko?

“GU ỌMWA NỌ RU ORUKHỌ GUI SIRRA EMWA HIA”

16. Zẹvbe nọ rre ebe 1 Timoti 5:​20, gha re “emwa hia” ne Pọl ghaa guan kaẹn?

¹⁶ Tie 1 Timoti 5:20. E Timoti nọ vbe re ọdiọn vbe iko ẹre Pọl gbẹn ẹmwẹ na gie nọ ya gi ẹre rẹn obọ nọ khẹke na ya mu “ọmwa nọ ru orukhọ.” Vbe ọ ya ọna kha? “Emwa hia” ne Pọl guan kaẹn vbe ako na i wa re etẹn hia ni rre uwu iko. Sokpan, emwa eso ni rẹn vbekpa orukhọ nọ ru ẹre ọ ghaa guan kaẹn. Ọ sẹtin gha re emwa ne aro iran sẹ orukhọ nọ ru, ra emwa nọ tobọre tama. Ediọn ghi ya ẹwaẹn tama emwa vbenian wẹẹ, iran zuze ye ẹmwẹ na nẹ kevbe wẹẹ, iran dia ọmwa nii ye odẹ nẹ.

17. Adeghẹ etẹn nibun vbe uwu iko na rẹn vbekpa orukhọ ne ọtẹn ru ra a na miẹn wẹẹ, iran sẹtin rẹn vbekpa ẹre vbe ẹghẹ eso gha gberra nẹ, de emwi na khian ya wewe ma iko, kevbe wẹẹ, vbọzẹ?

¹⁷ Ugbẹnso, etẹn nibun ni rre iko sẹtin wa rẹn vbekpa orukhọ ne ọtẹn ru ra ọ gha kẹ, iran sẹtin rẹn vbekpa ẹre vbe ẹghẹ eso gha gberra nẹ. Ọ gha sunu vbenian, “emwa hia” ne Pọl guan kaẹn ghi gha re etẹn hia ni rre uwu iko. Rhunmwuda ọni, ọdiọn ọkpa ghi yae wewe ma iko wẹẹ, a mu nene ọtẹn nọ ru orukhọ aburho. Vbọzẹ? E Pọl khare wẹẹ: “Ne emwa nikẹre mieke na yae wan ne egbe,” ne iran ghẹ mieke na ya ru orukhọ.

18. De obọ nọ khẹke ne ediọn ya mu etẹn ni dinmwiamẹ nẹ ni ma he sẹ ukpo 18 ni ru orukhọ nọ wegbe? (Vbe ya ghee efoto.)

¹⁸ Adeghẹ etẹn ni dinmwiamẹ nẹ ni ma he sẹ ukpo 18 na ghi ru orukhọ nọ wegbe ghi vbo? Ẹbu ediọn ghi ru emwamwa ne ediọn eva ya gu irẹn vbe evbibiẹ ọre, nọ re Ovbi Otu e Kristi do iko.b Ediọn nii ghi hia ne iran rẹn emwi ne evbibiẹ emọ nii he ru ne iran ya ru iyobọ ne ovbi iran ya fi werriẹ. Adeghẹ ọmọ nii lele adia ne evbibiẹ ọre rhie nẹẹn, evbibiẹ ọre na ye gha hia vbene ẹtin iran sẹ, ediọn eva nii sẹtin sẹ emwi hia ye obọ evbibiẹ ọre ne iran tobọ iran ru iyobọ nẹẹn. Rhunmwuda, a gha gele we na ghee ẹre, evbibiẹ emọ ẹre Osanobua mu iwinna nii ye ọre bọ, ne iran gha dia ivbi iran ye odẹ. (Diut 6:​6, 7; Itan 6:20; 22:6; Ẹfis 6:​2-4) Ke ẹghẹ ya fi ẹghẹ, ediọn ghi hia ne iran gha nọ vbene emwi ye hẹ, ne iran mieke na rẹn deghẹ evbibiẹ ọmọ nii gele ru iyobọ nọ khẹke ne ọmọ nii. Sokpan, deghẹ a na ghi miẹn wẹẹ, ọmọ nii ma kie werriegbe vbe orukhọ nọ ru ghi vbo? Ọ gha sunu vberriọ, ediọn eha ẹre ọ khian ghi gu irẹn vbe evbibiẹ ọre, nọ re Ovbi Otu e Kristi do iko.

“OSA NỌ MWẸ EKHỌE AGIẸNGIẸN KEVBE ITOHAN ẸRE JEHOVA KHIN”

19. De vbene ediọn ya ya egbe taa e Jehova vbe iran ghaa ru iyobọ ne etẹn ni ru orukhọ?

¹⁹ Avbe ediọn ni ru iyobọ ne ọmwa nọ ru orukhọ nọ wegbe rẹnrẹn wẹẹ, iwinna nọ bi ye iran egbe nọ, ne iran kpe iko ọghe Jehova huan. (1 Kọr 5:7) Ọrheyerriọ, iran vbe hoo ne ọmwa nọ ru orukhọ fi werriẹ. Rhunmwuda ọni, iran ghaa ru iyobọ ne ọmwa nọ ru orukhọ, iran wa ya aro yọ wẹẹ, ọ gha fi werriẹ. Vbọzẹ? Rhunmwuda, iran hoo ne iran ya egbe taa e Jehova, nọ re “Osa nọ mwẹ ekhọe agiẹngiẹn kevbe itohan.” (Jems 5:11) Obọ vbenian ẹre ukọ ighẹ e Jọn wa ya mu etẹn ni rre iko. Ọ khare wẹẹ: “Ivbi mwẹ ni ghaan, te I gbẹnnẹ avbe emwi na gie uwa, ne uwa ghẹ miehe na ru orukhọ. Ọrheyerriọ, adeghẹ ọmwaikọmwa na ru orukhọ, ma mwẹ ọyọmwabọ nọ rre ehe ne Evbavba ye, ọni ọre Jesu Kristi ne ọmwa ata.”​—1 Jọn 2:1.

20. Vbe ima khian zẹ iro yan vbe ako iruẹmwi nokiekie nọ rre ebe Owa Ọkhẹ na?

²⁰ Ọ keghi re emwi da ọmwa wẹẹ, ugbẹnso etẹn eso i kue fi werriẹ. Ọ gha sunu vberriọ, a ghi rhie ẹre hin iko rre. De obọ ne ediọn ya mu egbe etẹn vbenian? Ọna ẹre ima khian zẹ iro yan vbe ako iruẹmwi nokiekie nọ rre ebe Owa Ọkhẹ na.