Gha Ya Egbe Taa E Jehova Vbe Jesu Vbe Odẹ Ne U Ya Roro Emwi

1-2. Vbọ demu na hoẹmwẹ e Jehova, kevbe wẹẹ, de vbene Jesu ya rhie ẹre ma wẹẹ, irẹn gele hoẹmwẹ e Jehova?

“TE U gha ya otọ ẹko ruẹ hia, arrọọ ruẹ hia, ẹtin ruẹ hia kevbe ekhọe ruẹ hia hoẹmwẹ e Jehova ne Osanobua ruẹ.” (Luk 10:27) E Jesu gi ima rẹn wẹẹ, ọna ọre uhi nọ ghi ru ekpataki sẹ vbe Uhi e Mozis. Yẹrẹro wẹẹ, te ọ khẹke ne ahoẹmwọmwa ne ima mwẹ ne Jehova gha re nọ ke ekhọe rre, ọna dekaẹn emwi nọ yẹẹ ima kevbe vbene emwi ye ima hẹ. Ọ vbe rhie ma wẹẹ, te ọ khẹke ne ima gha ya ekhọe hia, ẹrhiọn kevbe ẹtin ọghe ima ga e Jehova. Ọ ma fo ye evba, ọ vbe khẹke ne ima ya ekhọe ima hia hoẹmwẹ e Jehova, ọna dekaẹn vbene ima ya roro emwi hẹ. Ẹmwata nọ rrọọ ọre wẹẹ, ma i khian wa sẹtin rẹn otọ ọre fo ighẹ vbene Jehova ya roro emwi hẹ. Sokpan ma gha sẹtin rẹn vbene Jehova ya roro emwi vbe ima gha rẹn “ekhọe Kristi” rhunmwuda, vbene Jehova ya roro emwi erriọ ẹre Jesu vbe ya roro emwi.​—1 Kọr 2:16 kevbe study note nọ khare wẹẹ, “we do have the mind of Christ.”

² Ekhọe hia ẹre Jesu ya hoẹmwẹ e Jehova. Ọ rẹn emwamwa ne Osanobua mwẹ ne irẹn, erriọ ẹre ọ vbe mu egbe nọ ya ru emwi nọ gha ya emwamwa nii mwẹ uhunmwu, agharhemiẹn wẹẹ, ọ gha rri oya ye emwi nọ ma na rẹn ọkpa rẹn eva. Ahoo ọghe Erhae ẹre Jesu wa mu ye okaro vbe ẹdagbọn ọnrẹn, rhunmwuda, ọ ma hoo nọ ru emwi nọ gha sọnnọ Erhae.

3. De emwi ne ukọ ighẹ e Pita miẹn ruẹ vbe obọ e Jesu, de emwi nọ rhie igiọdu ne Ivbi Otu e Kristi ne iran ru? (1 Pita 4:1)

³ Egie nọkhua ẹre Pita vbe erhuanegbe nikẹre wa gha ye, rhunmwuda, ẹkpotọ keghi kie ne iran ya gu e Jesu gha rrọọ, iran na vbe miẹn emwi ruẹ vbe odẹ nọ ya ma emwa emwi. Vbe Pita gbẹn elẹta ọghẹe nokaro, ọ keghi rhie igiọdu ne Ivbi Otu e Kristi ne iran gha mwẹ egbe ekhọe ne Kristi ghaa mwẹ. (Tie 1 Pita 4:1.) Ẹmwẹ e Grik ne Pita loo ro vbe elẹta nii ọre: “Han ye egbe,” ẹmwẹ na keghi re na loo ginna ivbiyokuo ni ya emwi igbinna ughughan han. Nọnaghiyerriọ, Ivbi Otu e Kristi ghaa ya egbe taa Jesu vbe odẹ nọ ya roro emwi, ọ ghi ru iyobọ ne iran ya sẹtin khọnmiotọ yan iziro dan kevbe agbọn dan na ne Esu kha yan.​—2 Kọr 10:​3-5; Ẹfis 6:12.

4. De vbene ako iruẹmwi na gha ya ru iyobọ ne ima ya lele ibude ọghe Pita?

⁴ Ma gha guan kaẹn odẹ ne Jesu ya roro emwi kevbe vbene ima khian ya ya egbe taa ẹre hẹ. Ma gha vbe guan kaẹn (1) vbene ima gha ya ya egbe taa e Jehova vbe odẹ nọ ya roro emwi, ọna gha ru iyobọ ne ima ya gha mwẹ ekhọe ọkpa, (2) ma gha vbe guan kaẹn vbene ima khian ya gha mu egbe rriotọ, kevbe (3) vbene ima khian ya gha na erhunmwu gie Jehova ne ima mieke na gha re emwa ni roro emwi ẹse.

GHA YA EGBE TAA E JEHOVA VBE ODẸ NỌ YA RORO EMWI

5. De asẹ ọkpa ne Pita ya rhie ẹre ma wẹẹ, irẹn i roro emwi vbene Jehova ya roro emwi?

⁵ Gia guan kaẹn asẹ ọkpa ne Pita ya rhie ẹre ma wẹẹ, irẹn i roro emwi vbene Jehova ya roro emwi. E Jesu ka tama avbe ukọ ọghẹe wẹẹ, ẹ i mwẹ irẹn ma yo e Jerusalẹm, a ghi mu irẹn ye obọ avbe ọkaolotu ugamwẹ, irẹn ghi rri oya, a ghi vbe gbe irẹn rua. (Mat 16:21) Ọ sẹtin gha lọghọ e Pita nọ yayi wẹẹ, e Jehova gha wa kue ne Jesu nọ re Mezaia, ne Ivbi Izrẹl ya aro kọ, wa wu vberriọ. (Mat 16:16) Ẹre Pita na rhie Jesu ghee okhiẹ, ọ na tama rẹn wẹẹ: “Wẹ vbe gha tohan egbuẹ, Enọyaẹnmwa; a wa wua, egbe emwi vbenian i khian sunu vbe egbuẹ.” (Mat 16:22) Rhunmwuda ne Pita ma na gha roro emwi vbene Jehova ya roro emwi, ọ ma kue ye ẹmwẹ ne Jesu ta.

6. De vbene Jesu ya rhie ẹre ma wẹẹ, odẹ ne Jehova ya roro emwi ẹre irẹn ya roro emwi?

⁶ Odẹ ne Jehova wa ya roro emwi ẹre Jesu wa ya roro emwi. Ẹre Jesu na ghi tama e Pita wẹẹ: “Gberra ghee iyeke mwẹ, Setan! Idobo ẹre u khin mwẹ re, rhunmwuda, iro ne u zẹ, ọghe emwa nagbọn nọ, ẹ i re ọghe Osanobua.” (Mat 16:23) A sẹtin miẹn wẹẹ, ekhọe esi ẹre Pita te ya ta ẹmwẹ na, sokpan, Jesu ma miẹn adia ọghẹe yi. Vbe ima miẹn ruẹ vbe ọna? Ahoo ọghe Jehova ọre ne Jesu do wu ne emwa nagbọn. Rhunmwuda ọni, e Pita keghi levba rẹn wẹẹ, te ọ khẹke ne irẹn gha roro emwi vbene Jehova ya roro emwi.

7. De vbene Pita ya rhie ẹre ma wẹẹ, irẹn hoo ne irẹn gha roro emwi vbene Jehova ya roro emwi? (Ghee efoto .)

⁷ Vbene ẹghẹ ya khian e Pita keghi rhie ẹre ma wẹẹ, irẹn hoo ne irẹn gha roro emwi vbene Jehova ya roro emwi. Ọ ghi sẹ ẹghẹ ne Jehova khian ya kpasẹ yọ ne emwa nẹi re Ivbi e Ju do gha re ọkpa vbe emwa rẹn. Ọ na gie Pita nọ ya kporhu ma okpia ọkpa na tie ẹre Kọniliọs nẹi re Ovbi e Ju, okpia na ẹre ọ ghi do gha re ọkpa vbe usun emwa nẹi re Ivbi e Ju ni ka wa suẹn gha ga Osanobua. Ivbi e Ju vbe emwa nẹi re Ivbi e Ju ma gha la ẹvbo egbe, rhunmwuda ọni, te ọ khẹke ne Pita fi iziro ọghẹe werriẹ nọ mieke na sẹtin ru iwinna na. E Pita ghi rẹn aro ne Jehova ya ghee emwa nẹi re Ivbi e Ju, ọ keghi fi iziro ọghẹe werriẹ. Rhunmwuda ọni, e Kọniliọs ghi gie na tie Pita, e Pita ma “roro ẹre igba eva” vbe ọ bu ẹre. (Iwinna 10:​28, 29) Ọ keghi kporhu ma e Kọniliọs kevbe igiowa ẹre, iran na ghi dinmwiamẹ.​—Iwinna 10:​21-23, 34, 35, 44-48.

8. Vbe ima khian ya rhie ẹre ma wẹẹ, ma roro emwi vbene Jehova ya roro emwi? (1 Pita 3:8 kevbe futnot)

⁸ Ukpo eso ghi gberra nẹ, e Pita keghi rhie igiọdu ne Ivbi Otu e Kristi ne iran gha “si irri ọkpa.” (Tie 1 Pita 3:8 kevbe futnot.) Zẹvbe eguọmwadia e Jehova, ma gha sẹtin gha si rri ọkpa deghẹ ima na gi iziro ọghe ima gua emwi nọ rre Baibol ro. Vbe igiemwi, e Jesu keghi rhie igiọdu ne erhuanegbe ẹre ne iran mu ẹmwẹ Arriọba Osanobua karo vbe ẹdagbọn iran. (Mat 6:33) Ne ima na mwẹ ọna vbe ekhọe, ọtẹn vbe uwu iko sẹtin kha we irẹn khian rhie egbe ye ugamwẹ ẹghẹ hia. Ne u gha te ya tama rẹn nọ tohan egbe ẹre, ọ khẹke ne u rhie igiọdu nẹẹn, u ghi vbe ru iyobọ nọ khẹke nẹẹn.

GHA MU EGBE RRIOTỌ

9-10. De vbene Jesu ya rhie ẹre ma wẹẹ, ọmwa nọ gele mu egbe rriotọ ẹre irẹn khin?

⁹ Vbe asọn nọ gbe fi ẹdẹ ne Jesu wu, Jesu keghi ma e Pita kevbe erhuanegbe ẹre nikẹre emwi kpataki vbekpa imuegberriotọ. Vbene ọ te sẹ ẹghẹ na, Jesu keghi gie Pita vbe Jọn ne iran ya mwamwa ehe nọ khian na gu erhuanegbe ẹre rri evbare nokiekie vbene ọ te wu. A sẹtin miẹn wẹẹ, iran vbe hia na miẹn we ọkpan kevbe ukpọn na ya khiẹn egbe rre evba, ne emwa ni rre mieke na sẹtin kpee owẹ ọghe iran iran ke rri evbare. Sokpan de ọmwa nọ khian ru iwinna ọviẹn ọmwa na?

¹⁰ E Jesu keghi rhie ẹre ma wẹẹ, ọmwa nọ gele mu egbe rriotọ ẹre irẹn khin, ọ na ru iwinna na. Ọna keghi kpa avbe ukọ ọghẹe odin, rhunmwuda, iwinna ne ọviẹn ru ẹre Jesu ru na. E Jesu keghi kie ẹwu nọ yọ ke odukhunmwu, ọ na ya ukpọn na ya khiẹn egbe gba ẹkun, ọ na sa amẹ ye ọkpan, ọ na suẹn gha khiẹn erhuanegbe ẹre owẹ. (Jọn 13:​4, 5) Ọ sẹtin rhie ẹghẹ Jesu ke khiẹn owẹ avbe ukọ ọghẹe iweva fo, ya sẹ egbe Judas, nọ khian yae dẹ. Ọrheyerriọ, e Jesu na ye mu egbe rriotọ ru iwinna na fo. Ẹre Jesu na ghi fẹko tama iran wẹẹ: “Wa rẹn emwi nọ si ẹre, ne I na ru emwi ne I ru na ra? Wa tie mwẹ ‘Ọmamwaemwi’ kevbe ‘Enọyaẹnmwa.’ Ẹre I gele khin, wa ma baeku hiehie. Adeghẹ imẹ ne Enọyaẹnmwa kevbe Ọmamwaemwi kpe uwa owẹ, te ọ vbe khẹke ne uwa gha kpe egbe owẹ.”​—Jọn 13:​12-14.

11. De vbene Pita ya rhie ẹre ma wẹẹ, irẹn ruẹ emwi vbe obọ e Jesu vbe nọ dekaẹn odẹ nọ ya mu egbe rriotọ? (1 Pita 5:5) (Vbe ya ghee efoto.)

¹¹ E Pita wa miẹn emwi ruẹ vbe odẹ ne Jesu ya mu egbe rriotọ. Jesu ghi kpa gha rrie ẹrinmwi nẹ, e Pita keghi ru emwi ọyunnuan, ọ na mu okpia ọkpa na biẹ ọre uke egbe rran. (Iwinna 1:​8, 9; 3:​2, 6-8) Emwi ne Pita ru na, ọsughe nọ, rhunmwuda ọni, emwa keghi ma ga e Pita. (Iwinna 3:11) Te Pita khian ghi gha ru vbe na miẹn wẹẹ, a i ta ne irẹn ye ra, rhunmwuda na na miẹn wẹẹ, agbẹnvbo ne emwa na hoo na gha ghee iran gidii ẹre ọ ke rre? Hiehie, E Pita keghi rhie uyi nii gie Jehova vbe Jesu, ọ na tama iran wẹẹ: “Okpia na ne uwa rẹnrẹn kevbe ne uwa bẹghe na, eni Jesu ẹre ima ya mu ẹre egbe rran; te ima mu ẹtin yan eni ẹnrẹn.” (Iwinna 3:​12-16) Ẹmwẹ ne Pita loo ro vbe elẹta nọ gbẹn gie etẹn vbe ọ bu iran ude ne iran gha mu egbe rriotọ, sẹtin ya ima ẹre rre, ẹghẹ ne Jesu ya ya ukpọn na ya khiẹn egbe gba ẹkun, vbe ọ khiẹn erhuanegbe ẹre owẹ.​—Tie 1 Pita 5:5.

12. Vbe na ghee Pita, vbe ima khian ya gha rhie ẹre ma vbe ẹghẹ hia wẹẹ, ma mu egbe rriotọ?

¹² Ma gha sẹtin ya egbe taa e Pita, ne ima vbe gha mu egbe rriotọ. Yerre wẹẹ, ẹ i re ẹmwẹ ne ima ta ọkpa ẹre ọ khian rhie ẹre ma wẹẹ, ma gele mu egbe rriotọ. Emwi ne ẹmwẹ ne Pita loo ro vbe ọ guan kaẹn “imuegberriotọ” demu, ọre aro ne ima ya ghee egbe ima kevbe ne ima ya ghee emwa ọvbehe. Ma keghi ru ẹse ne emwa ọvbehe rhunmwuda ma hoẹmwẹ e Jehova kevbe emwa ọvbehe, ẹ i re rhunmwuda wẹẹ, ma hoo ne emwa gha tian ima. Adeghẹ ima na gha ya ọyẹnmwẹ ga e Jehova, ma na vbe gha ya ekhọe hia ru iyobọ ne etẹn ima, ọ gha khọnrẹn wẹẹ, emwa ma gbọyẹmwẹ ye emwi ne ima ru, te ima rhie ẹre ma wẹẹ, ma mu egbe rriotọ.​—Mat 6:​1-4.

GHA “RORO EMWI ẸSE”

13. Vba yae kha vba gha we na gha “roro emwi ẹse”?

¹³ Vba yae kha vba gha we na gha “roro emwi ẹse”? (1 Pit 4:7) Ovbi Otu e Kristi nọ roro emwi ẹse keghi hia nọ ru azẹ nọ gua ilele ọghe Jehova ro. Ovbi Otu e Kristi vberriọ rẹnrẹn wẹẹ, emwi nọ ghi ru ekpataki sẹ vbe ẹdagbọn irẹn ọre ne irẹn na re ọsie Jehova. Ẹ i ghee egbe ẹre gidii, rhunmwuda, ọ rẹnrẹn wẹẹ, emwi ni bun rrọọ ne irẹn ma rẹn. Erriọ ẹre ọ vbe ya gualọ adia vbe obọ e Jehova, ọ gha khian ru azẹ, ọ ghi na erhunmwu ne Jehova ru iyobọ ne irẹn.a

14. Vbe asẹ ọkpa, de emwi ne Pita ru nọ rhie ẹre ma wẹẹ, ọ ma mu ẹtin yan e Jehova?

¹⁴ Vbe asọn nọ gbe fi ẹdẹ ne Jesu wu, ọ keghi ya obọ sekhae ne erhuanegbe ẹre wẹẹ: “Vbe asọn na, wa hia fẹẹrẹ gha rrua owẹ, rhunmwuda emwi nọ khian sunu daa mwẹ.” E Pita keghi mu ẹtin yan egbe ẹre, ọ na kha wẹẹ: “Ọ gha khọnrẹn ne iran hia nikẹre rrua owẹ, rhunmwuda emwi nọ khian sunu daa ruẹ, mẹ i khian rrua owẹ hiehie!” Vbe asọn nii, e Jesu na vbe rhie ibude ne erhuanegbe ẹre eso, ọ na tama iran wẹẹ: “Wa gha bodẹ, ne uwa ye gha na erhunmwu.” (Mat 26:​31, 33, 41) Akpawẹ, e Pita lele ibude nii, ọ gha te gha mwẹ udinmwẹ nọ ya kha wẹẹ, ọrhuanegbe Jesu ẹre irẹn khin. Nọghayayerriọ, e Pita keghi siẹn Arowa ẹre, ọ na ghi do gha gbe I ma rẹn vbe okiekie.​—Mat 26:​69-75.

15. De emwi nọ ru iyobọ ne Jesu ya gha roro emwi ẹse vbe asọn nokiekie nọ gbe vbe agbọn?

¹⁵ Te Jesu wa gele mu ẹtin yan e Jehova. Agharhemiẹn wẹẹ, ọmwa nọ gbae ẹre Jesu ghaa khin, ẹghẹ hia ẹre ọ ya gha na erhunmwu. Ọna keghi ru iyobọ nẹẹn ya gha ya udinmwẹ ru emwi ne Jehova hoo nọ ru. (Mat 26:​39, 42, 44; Jọn 18:​4, 5) Ẹ i mwẹ e Pita ma miẹn emwi kpataki ruẹ vbe odẹ ne Jesu ya rhiegba ye erhunmwu na na.

16. De vbene Pita ghi ya rhie ẹre ma wẹẹ, irẹn roro emwi ẹse? (1 Pita 4:7)

¹⁶ Vbene ẹghẹ ya khian, e Pita keghi vbe rhiegba ye erhunmwu na na. E Jesu ghi rhiọkpaegbe nẹ, ọ keghi tama e Pita kevbe avbe ukọ nikẹre wẹẹ, iran gha miẹn iyobọ orhiọn nọhuanrẹn, ne iran mieke na sẹtin ru iwinna ikporhu ne irẹn waa iran re. Vbọrhirhighayehẹ, Jesu keghi tama iran, ne iran gha rrie Jerusalẹm, ọ te sẹ ẹghẹ nii. (Luk 24:49; Iwinna 1:​4, 5) De emwi ne Pita ru zẹvbe nọ ya gha khẹ ne Jesu mu eyan na sẹ? E Pita kevbe etẹn nikẹre kegha “na erhunmwu vbe ẹghẹ hia.” (Iwinna 1:​13, 14) Ọ ghi sẹ ẹghẹ, vbe Pita ghi gbẹn elẹta nokaro gie etẹn, ọ keghi rhie igiọdu ne iran, ne iran gha roro emwi ẹse kevbe ne iran gha na erhunmwu. (Tie 1 Pita 4:7.) E Pita keghi do mu ẹtin yan e Jehova, ọ na ghi do gha re ọkpa vbe ikadẹlẹ nọ da iko ọghe Ivbi Otu e Kristi yi.​—Gal 2:9.

17. Ọ gha khọnrẹn wẹẹ, ma fiẹnro vbene a ya ru emwi eso hẹ, vbọ khẹke ne ima ye gha ru? (Vbe ya ghee efoto.)

¹⁷ Deghẹ ima hoo ne ima gha roro emwi ẹse, te ọ khẹke ne ima gha na erhunmwu gie Jehova vbe ẹghẹ hia. Ọ gha khọnrẹn na miẹn wẹẹ, ọ wa mwẹ emwi ọkpa ne ima wa kakabọ fiẹnro ẹre, te ọ ye khẹke ne ima gha gualọ adia vbe obọ e Jehova vbe erhunmwu. Rhunmwuda ọni, ma gha khian ru azẹ ne kpataki te ọ wa khẹke ne ima na erhunmwu gie Jehova nọ ru iyobọ ne ima, ma ghi vbe gha mwẹ ilẹkẹtin wẹẹ, ọ rẹn emwi nọ gha ya agbọn maan ima.

18. Vbọ khian ru iyobọ ne ima ya sẹtin gha roro emwi vbene Jehova ya roro emwi?

¹⁸ Ma wa ya ekhọe hia kpọnmwẹ e Jehova nọ na yi ima ne ima sẹtin gha ya egbe taa irẹn. (Gẹn 1:26) Ẹmwata nọ wẹẹ, ma i khian wa sẹtin gha yevbe na ghee Jehova. (Aiz 55:9) Sokpan, vbe na ghee Pita, ma gha sẹtin hia ne ima gha roro emwi vbene ọ ya roro emwi. Ma ghi gha rhie ọna ma vbe emwi ne ima ru, ma ghi gha mu egbe rriotọ, ma ghi vbe gha roro emwi ẹse.