Ru Iyobọ Ne Emwa Ne U Gu Ruẹ E Baibol Ya Sẹtin Dobọ Mu Ẹmwata

1-2. (a) Vbọzẹ nọ na lọghọ emwa eso ne ima gu ruẹ e Baibol ya do sẹtin dobọ mu ẹmwata? (b) Vbe ima khian zẹ iro yan vbe ako iruẹmwi na?

EMWI eso rrọọ nọ te ya ruẹ gha si egbe ne u ya do khian ọkpa vbe Avbe Osẹe Jehova ra? Ọ gha kẹ, te u ghaa mu ohan wẹẹ, emwa ne uwa gba winna, avbe ọse ruẹ ra emwa ruẹ vbe uwu ẹgbẹe gha yangbuẹ. Ra te u ghaa roro ẹre wẹẹ, ọ gha lọghọ ne u sẹtin do gha lele uhi ọghe Jehova vbe nọ khẹke. Adeghẹ erriọ ẹre nọ, ọ rhie ma wẹẹ, u rẹn evbọzẹe nọ na lọghọ emwa eso ne ima gu ruẹ e Baibol ne iran sẹtin do dobọ mu ẹmwata.

² E Jesu rẹnrẹn wẹẹ, ọmwa ghaa mu ohan vbenian, ọ gha lọghọ nọ sẹtin do ga e Jehova ẹse. (Mat 13:​20-22) Emwa eso ghaa rrọọ ni ghaa si egbe ne iran ya lele Jesu, sokpan, e Jesu ma gi egbe iran wọọ re. Nọghayayerriọ, ọ keghi ma avbe erhuanegbe ẹre vbene iran khian ya sẹtin ru iyobọ ne egbe emwa vbenian (1) ya rẹn emwi eso nọ si iran ghee iyeke, (2) ya do hoẹmwẹ e Jehova sayọ, (3) ya mu ugamwẹ e Jehova karo vbe ẹdagbọn iran, kevbe (4) emwi ne iran gha sẹtin ru vbe emwa ghaa gbe iran odan. Vbe ima khian ya rhie owẹ lele emwi ne Jesu ma emwa re vbe ima ghaa loo ebe na tie ẹre Sọyẹnmwẹ Arrọọ Vbe Etẹbitẹ! ya gu emwa ruẹ e Baibol, ne ima mieke na sẹtin ru iyobọ ne iran ya dobọ mu ẹmwata?

RU IYOBỌ NE ỌMWA NE U GU RUẸ E BAIBOL YA RẸN EMWI ESO NỌ SI ẸRE GHEE IYEKE

3. De emwi ne ima yayi wẹẹ, ẹre ọ si ẹre nọ na gha lọghọ e Nikodimọs nọ do khian ọrhuanegbe Jesu?

³ Ọkaolotu ọghe Ivbi e Ju na họn usi ẹre, ẹre Nikodimọs ghaa khin, ọ mwẹ emwi eso nọ ghaa si ẹre ghee iyeke, nọ si ẹre nọ ma na khian ọrhuanegbe Jesu. Odẹ uki ehan kẹkan ẹre ọ ghaa ye vbe Jesu suẹn iwinna ikporhu ọghẹe, vbe Nikodimọs rẹnrẹn wẹẹ, e Jesu ọre ọmwa ne Osanobua ya zẹ ihegbe. (Jọn 3:​1, 2) Vbọrhirhighayehẹ, e Nikodimọs keghi ya miẹn Jesu vbe ẹkhokho “rhunmwuda ne ohan Ivbi e Ju na gha” muẹn. (Jọn 7:13; 12:42) A sẹtin miẹn wẹẹ, te ọ ghaa roro ẹre wẹẹ, emwi ni bun gha wii irẹn deghẹ irẹn na do khian ọrhuanegbe Jesu.a

4. De vbene Jesu ya ru iyobọ ne Nikodimọs ya rẹn emwi ne Jehova hoo nọ ru?

⁴ Ọmwa nọ wa rẹn Uhi e Mozis ẹre Nikodimọs ghaa khin, sokpan, te ọ khẹke na ru iyobọ nẹẹn ya sẹtin rẹn emwi ne Jehova hoo nọ ru. De vbene Jesu ya ru iyobọ nẹẹn hẹ? E Jesu wa gha mwẹ ẹghẹ ne Nikodimọs, uhiẹn ọ na kue kie ẹkpotọ yọ ne iran miẹn egbe vbe asọn. E Jesu keghi gi e Nikodimọs rẹn emwi nọ khẹke nọ ru nọ mieke na do khian ọrhuanegbe irẹn, ọni ọre, nọ roro iro fi uyinmwẹ werriẹ, nọ dinmwiamẹ kevbe nọ mu ẹtin yan Ovbi Osanobua.​—Jọn 3:​5, 14-21.

5. Vbe ima khian ya ru iyobọ ne ọmwa ne ima gu ruẹ e Baibol ya rẹn emwi nọ si ẹre ghee iyeke nọ ma na he ye suẹn gha ga e Jehova?

⁵ Ọ gha khọnrẹn wẹẹ, ọmwa ne u gu ruẹ e Baibol rẹn Ebe Nọhuanrẹn, u sẹtin ye ru iyobọ nẹẹn ya rẹn emwi nọ si ẹre ghee iyeke, nọ ma na he ye suẹn gha ga e Jehova. A sẹtin miẹn wẹẹ, iwinna nọ ru ra ukpokpo nọ miẹn vbe obọ ẹgbẹe ọre ẹre ọ si ẹre ghee iyeke. Nọnaghiyerriọ, gha mwẹ ẹghẹ ne ọmwa ne u gu ruẹ e Baibol. U sẹtin tie ẹre ne uwa gba ya rri evbare ra ne uwa gba ya khian ẹlẹ. Vbe egbe ẹghẹ vbenian, u sẹtin ru iyobọ nẹẹn ya ta ọlọghọmwa nọ la gberra ma ruẹ. Ru iyobọ ne ọmwa ne u gu ruẹ e Baibol ya ru afiwerriẹ nọ khẹke, ẹ i re nọ ya ya ẹko rhiẹnrhiẹn ruẹ, sokpan, nọ ya rhie ẹre ma wẹẹ, irẹn hoẹmwẹ e Jehova.

6. Vbua khian ya sẹtin ru iyobọ ne ọmwa ne u ma ẹre emwi ya sẹtin rhie emwi nọ ruẹ ye uyinmwẹ? (1 Kọrint 16:13)

⁶ Ọmwa na gu ruẹ e Baibol ghaa mwẹ ilẹkẹtin wẹẹ, e Jehova gha ru iyobọ ne irẹn ya gha lele uhi kevbe ilele ọghẹe, ọ ghi sẹtin gha rhie emwi nọ ruẹ ye uyinmwẹ. (Tie 1 Kọrint 16:13.) A sẹtin ya emwi ne u ru na gie iwinna ne ọmamwaemwi ru vbe esuku. Vbe igiemwi, de ọmamwaemwi ne ẹmwẹ ọnrẹn yẹẹ ruẹ sẹ vbe u rre esuku? Ọ gha kẹ, ọmamwaemwi nọ ya izinegbe ru iyobọ nuẹn ya sẹtin rẹn wẹẹ, u gha sẹtin ru emwi na we ne u ru ẹre ẹmwẹ ọnrẹn yẹẹ ruẹ sẹ. Erriọ ẹre ọ vbe ye, ọmamwaemwi nọ maan i wa ma ọmwa nọ gu ruẹ e Baibol emwi ne Osanobua we nọ ru kẹkan, sokpan, ọ ghi vbe gi ẹre rẹn wẹẹ, Osanobua gha ru iyobọ nẹẹn ya sẹtin ru afiwerriẹ nọ khẹke vbe ẹdagbọn ọnrẹn. Vbua khian ya ru ọna hẹ?

RU IYOBỌ NE ỌMWA NE U GU RUẸ E BAIBOL YA DO HOẸMWẸ E JEHOVA SAYỌ

7. De vbene Jesu ya ru iyobọ ne emwa ni ghaa danmwehọ ẹre ya do hoẹmwẹ e Jehova sayọ?

⁷ E Jesu rẹnrẹn wẹẹ, ahoẹmwọmwa ne erhuanegbe ẹre mwẹ ne Osanobua ẹre ọ khian gua iran kpa ya rhie emwi ne iran ruẹ ye uyinmwẹ. Ẹghẹ hia ẹre ọ ya gha ma erhuanegbe ẹre emwi nọ gha ya iran hoẹmwẹ Erha iran nọ rre ẹrinmwi. Vbe igiemwi, ọ keghi ya e Jehova gie erha nọ viọ emwi esi ne ivbi ẹre. (Mat 7:​9-11) A sẹtin miẹn wẹẹ, emwa eso ni ghaa danmwehọ e Jesu ma gha mwẹ egbe erha vbenian. Muẹn roro vbene ọ khian gha ye iran hẹ vbe iran họn erre ne Jesu zẹ ọghe erha nọ mwẹ ekhọe agiẹngiẹn, nọ rhan obọ miẹn ovbi ẹre nọ ru orukhọ ni bun werriegbe. Iran keghi sẹtin bẹghe ekhọe agiẹngiẹn ne Jehova mwẹ ne ivbi ẹre ni rre uhunmwu otagbọn na.​—Luk 15:​20-24.

8. Vbua khian ya ru iyobọ ne ọmwa ne u gu ruẹ emwi ya do hoẹmwẹ e Jehova sayọ?

⁸ U gha vbe sẹtin ru iyobọ ne ọmwa ne u gu ruẹ e Baibol ya do hoẹmwẹ e Jehova sayọ adeghẹ u na gie ẹre rẹn aro ọmwa ne Jehova khin vbe u ghaa ma ẹre emwi. Ẹghẹ ke ẹghẹ ne uwa ya ruẹ emwi ru iyobọ nẹẹn ya rẹn vbene emwi nọ ruẹ ya rhie ẹre ma wẹẹ, e Jehova hoẹmwẹ ima. Wa ghaa guan kaẹn izọese adẹwerriegbe, ru iyobọ nẹẹn ya rẹn wẹẹ, ọ rre usun emwa ne Jehova ya Ovbi ẹre zọ ese na. (Rom 5:8; 1 Jọn 4:10) Adeghẹ ọmwa na gu ruẹ emwi na gha muẹn roro vbe ẹghẹ hia vbene Jehova hoẹmwẹ irẹn hẹ, ọ gha ru iyobọ nẹẹn ya do hoẹmwẹ e Jehova.​—Gal 2:20.

9. Vbọ ru iyobọ ne okpia ọkpa na tie ẹre Michael ya ru afiwerriẹ nọ khẹke vbe ẹdagbọn ọnrẹn?

⁹ Gi ima guan kaẹn e Michael, nọ ke Indonesia rre. Ọ rẹn vbekpa ẹmwata zẹvbe nọ ya gha waan dee sokpan, ọ ma dinmwiamẹ. Vbe ọ ghi rre ukpo 18, ọ keghi kpa gha rrie isi, imọto nọkhua na tie ẹre truck ẹre ọ ghaa fi vbe odọ. Ọ ghi sẹ ẹghẹ, ọ na do ru orọnmwẹ vbe ẹvbo ẹre, iyeke ọni, ọ na dọlegbe kpa gha rrie isi. Vbe uwu ẹghẹ na, ọvbokhan rẹn vbe ovbi ẹre nokhuo na suẹn gha ruẹ e Baibol, iran na vbe gha mwẹ alaghodaro. Vbe iye Michael ghi wu, e Michael na dọlegbe gha die owa nọ do gbaroghe erhae, ọ na ghi kue yọ na gha gu irẹn ruẹ e Baibol. Vbe iran ghi zẹ iro yan abọ ọghe “Gualọ Otọ Re Sayọ” vbe iruẹmwi nogie 27 vbe ebe na tie ẹre Sọyẹnmwẹ Arrọọ Vbe Etẹbitẹ!, emwi ne iran ghaa zẹ iro yan keghi kakabọ mu Michael ekhọe. E Michael ghi muẹn roro obalọ ne Jehova miẹn vba gbe Ovbi ẹre rua, ameve na rhọọ kua vbe aro ẹre. Ọ na kakabọ do gbọyẹmwẹ ye izọese adẹwerriegbe, ọ na ghi ru afiwerriẹ nọ khẹke vbe ẹdagbọn ọnrẹn, ẹre ọ na ghi dinmwiamẹ.

RU IYOBỌ NE ỌMWA NE U GU RUẸ E BAIBOL YA MU UGAMWẸ E JEHOVA KARO VBE ẸDAGBỌN ỌNRẸN

10. De vbene Jesu ya ru iyobọ ne erhuanegbe ẹre ya rẹn wẹẹ, iwinna ikporhu ẹre ọ khẹke ne iran mu karo? (Luk 5:​5-11) (Vbe ya ghee efoto.)

¹⁰ Erhuanegbe Jesu eso wa rherhe rẹn wẹẹ, Jesu ọre Mezaia, sokpan te ọ khẹke na ru iyobọ ne iran ya rẹn wẹẹ, iwinna ikporhu ẹre ọ khẹke ne iran mu karo. Erhuanegbe Jesu ẹre Pita vbe Andru ghaa khin vbe ẹghẹ eso, a te miẹn we Jesu tama iran ne iran sẹ iwinna ọghe iran rae ne iran do gha lele irẹn khian. (Mat 4:​18, 19) Ọgbehẹn ẹre iran vbe Jems kevbe Jọn ghaa khin, iran wa gha miẹn ere vbe iwinna na. (Mak 1:​16-20) Vbe Andru vbe Pita sẹ “ọga ne iran ya gbe ehẹn rae,” a sẹtin miẹn wẹẹ, iran ru emwamwa ne iran khian ya gha gbaroghe ẹgbẹe ọghe iran, ugbẹnvbe a miẹn we Jesu ẹre iran ghi lele khian. De emwi nọ ya iran sẹ iwinna ne iran ru rae ne iran mieke na sẹtin mu iwinna ikporhu karo? Ebe Luk gi ima rẹn wẹẹ, Jesu ru emwi ọyunnuan nọ ya iran gha mwẹ ilẹkẹtin wẹẹ, e Jehova gha sẹtin kpemehe ne iran.​—Tie Luk 5:​5-11.

11. De emwi ne ima gha tama ọmwa ne ima gu ruẹ e Baibol nọ gha ya amuẹtinyan ọghẹe wegbe?

¹¹ Ma i khian sẹtin ru emwi ọyunnuan vbene Jesu ru ẹre, sokpan ma gha sẹtin gi emwa rẹn vbene Jehova ya kpemehe ne emwa ni mu ugamwẹ ọnrẹn karo. Vbe igiemwi, u ye yerre, odẹ eso ne Jehova ya ru iyobọ nuẹn vbe u da suẹn gha yo iko ra? Ọ gha kẹ, ọ mwẹ ẹghẹ ne u ya tama ọmwa nọ rhie ruẹ vbe iwinna wẹẹ, u i khian sẹtin gha rhie ẹghẹ ba ẹghẹ ya winna rhunmwuda, ọ miẹn ruẹ ẹghẹ ne u ya yo iko. Zẹvbe ne u ya tama ọmwa ne u gu ruẹ e Baibol vbene Jehova ya ru iyobọ nuẹn, u ghi gi ẹre rẹn vbene iyobọ ne Jehova ru nuẹn rhunmwuda ne u na mu ugamwẹ ọnrẹn karo ya ya amuẹtinyan ruẹ wegbe sayọ.

12. (a) Vbọzẹ nọ na khẹke ne ima gha rhie etẹn ughughan lele egbe vbe ima gha khian ya gu ọmwa ruẹ emwi? (b) Vbua khian ya loo e vidio ya ru iyobọ ne emwa ne u gu ruẹ e Baibol? Ru igiemwi yọ.

¹² Ọmwa ne u gu ruẹ e Baibol gha wa vbe miẹn ere vbọ, adeghẹ etẹn ọvbehe na tama rẹn afiwerriẹ ne iran ru, ne iran mieke na sẹtin mu ugamwẹ e Jehova karo. Nọnaghiyerriọ, tama etẹn ni kẹ ẹvbo ughughan rre ne iran deba ruẹ vbe u gha khian gu ẹre ruẹ emwi. Nọ iran vbene iran ya la odẹ ọghe ẹmwata hẹ, kevbe vbene iran ya sẹtin do mu ugamwẹ e Jehova karo vbe ẹdagbọn iran. Vbe deba ọni, hia ne u rhie ẹghẹ ya deba ẹre ghee avbe vidio ni rre abọ na tie ẹre “Gualọ Otọ Re Sayọ” ra “Ruẹ Sayọ” vbe Sọyẹnmwẹ Arrọọ Vbe Etẹbitẹ! Vbe igiemwi, vbe uwa ghaa ruẹ iruẹmwi 37, u sẹtin ya unu kaẹn avbe ilele ni rre vidio nọ mwẹ uhunmwuta nọ khare wẹẹ, E Jehova Gha Kpemehe Ne Ima.

RU IYOBỌ NE ỌMWA NE U GU RUẸ E BAIBOL YA SẸTIN ZIN EGBE VBE EMWA GHAA GBE ẸRE ODAN

13. De vbene Jesu ya ru iyobọ ne erhuanegbe ẹre ya mu egbe khẹ ukpokpo?

¹³ Ẹ i re avbiẹ inugba ẹre Jesu tama erhuanegbe ẹre wẹẹ, iran gha werriẹ aro daa ukpokpo vbe obọ emwa ọvbehe, uhiẹn ya sẹ egbe emwa iran vbe uwu ẹgbẹe. (Mat 5:11; 10:​22, 36) Vbọ ghi bu ẹghẹ ne Jesu khian ya ru iwinna rẹn fo vbe uhunmwu otagbọn, ọ keghi ya obọ sekhae ne erhuanegbe ẹre wẹẹ, emwa sẹtin kue gbe iran rua. (Mat 24:9; Jọn 15:20; 16:2) Ọ keghi rhie igiọdu ne iran, ne iran gha begbe vbe iwinna ikporhu. Ọ na vbe bu iran ude ne iran ghẹ gha gu emwa ni gbodan ghee iran muan ẹmwẹ, kevbe ne iran gha begbe vbe nọ dekaẹn ẹmwẹ ne iran ta kevbe emwi ne iran ru, ne iran mieke na sẹtin ye gha kporhu.

14. De vbene ima khian ya ru iyobọ ne ọmwa ne ima gu ruẹ e Baibol ya mu egbe khẹ ukpokpo? (2 Timoti 3:12)

¹⁴ Ma gha vbe sẹtin ru iyobọ ne ọmwa ne ima gu ruẹ e Baibol ya mu egbe khẹ ukpokpo adeghẹ ima na gi ẹre rẹn emwi eso ne emwa ne iran gba winna, avbe ọse kevbe emwa rẹn vbe uwu ẹgbẹe gha sẹtin tama rẹn rhunmwuda nọ na ruẹ e Baibol. (Tie 2 Timoti 3:12.) Emwa eso ne iran gba winna sẹtin gha zaan rẹn rhunmwuda nọ na ruẹ e Baibol. Emwa ọvbehe, uhiẹn ya sẹ egbe emwa rẹn vbe uwu ẹgbẹe sẹtin gha gbodan ghee emwi nọ yayi. Te ọ wa khẹke ne ima rherhe suẹn gha ru iyobọ ne emwa ne ima ma ẹre emwi ya mu egbe khẹ ukpokpo, na mieke na miẹn wẹẹ, ukpokpo gha rre, iran ghi rẹn emwi nọ khẹke ya ru.

15. De emwi nọ gha ru iyobọ ne ọmwa ne ima ma ẹre emwi ya sẹtin zin egbe vbe emwa rẹn vbe uwu ẹgbẹe ghaa zẹ ọre kpokpo?

¹⁵ Adeghẹ emwa rẹn vbe uwu ẹgbẹe na gha zẹ ọre kpokpo, u sẹtin tama rẹn nọ muẹn roro, evbọzẹe ne ohu na mu iran wẹẹ, ọ ruẹ e Baibol. A sẹtin miẹn we te iran roro ẹre wẹẹ, te a bibi ẹre odẹ, ra a sẹtin miẹn wẹẹ, te iran roro ẹre we emwa dan ẹre Avbe Osẹe Jehova khin. Uhiẹn, etiẹn Jesu vbe gha gbodan ghee Jesu. (Mak 3:21; Jọn 7:5) Te ọ khẹke ne u ma ọmwa ne u gu ruẹ e Baibol vbene ọ khian ya gha ya ẹwaẹn kevbe ọghọ vbe ute zẹ ẹmwẹ wanniẹn emwa ọvbehe kevbe emwa rẹn vbe uwu ẹgbẹe.

16. De vbene ima khian ya ru iyobọ ne ọmwa ne ima ma ẹre emwi ya rhan otọ emwi nọ yayi vbe odẹ ọghe ọghọ vbe ute?

¹⁶ Adeghẹ ẹgbẹe ọghe ọmwa na gu ruẹ e Baibol na gha hoo ne iran rẹn ẹmwata nọ rre uwu e Baibol, te ọ khẹke nọ loo ẹwaẹn, nẹ ghẹ wa ta emwi hia nọ rẹnrẹn ma iran uhukpa. Rhunmwuda, ọ gha ru vberriọ, egbe sẹtin wa wọọ iran, ẹghẹ nii, iran i ghi hoo ne iran gu ẹre zẹ iro vbe ẹdẹ ọvbehe. Nọnaghiyerriọ, rhie igiọdu nẹẹn nẹ ghẹ talọ ẹmwẹ nọ bun gbe vbe ọ ghaa rhan otọ emwi nọ yayi ma emwa rẹn vbe uwu ẹgbẹe, ne ẹkpotọ mieke na kie nẹẹn ya kporhu ma iran vbe ẹdẹ ọvbehe. (Kọl 4:6) Ọ sẹtin tama emwa rẹn vbe uwu ẹgbẹe ne iran gha rrie jw.org. Ọna gha kie ẹkpotọ ne iran ya ruẹ emwi ni bun vbekpa Avbe Osẹe Jehova vbe ẹghẹ nọ rhirhi khọn iran.

17. Vbua khian ya ru iyobọ ne ọmwa ne u gu ruẹ e Baibol ya rhie ewanniẹn ye ọta eso ne emwa gha sẹtin nọ vbekpa Avbe Osẹe Jehova? (Vbe ya ghee efoto.)

¹⁷ U sẹtin loo uhunmwuta nọ rre jw.org nọ khare wẹẹ, “Avbe Inọta Ne Emwa Mọbọ Nọ” ya ru iyobọ ne ọmwa ne u gu ruẹ e Baibol ya rẹn ewanniẹn nọ gha zẹ vbe ọmwa ne iran gba winna ra emwa rẹn vbe uwu ẹgbẹe gha nọ rẹn ọta. (2 Tim 2:​24, 25) Ẹghẹ ke ẹghẹ ne uwa ya ruẹ emwi fo, uwa ghi zẹ iro yan abọ nọ mwẹ uhunmwuta nọ khare wẹẹ, “Emwa Eso Keghi Kha Wẹẹ” vbe ebe na tie ẹre Sọyẹnmwẹ Arrọọ Vbe Etẹbitẹ!. Rhie igiọdu nẹẹn nọ ruẹ ọre ye otọ vbene ọ khian ya zẹ ẹmwẹ wanniẹn emwa hẹ. U sẹtin vbe ru iyobọ nẹẹn ya rẹn odẹ nọ maan sẹ nọ gha ya sẹtin ru iyobọ ne emwa. Ọ ghaa mu egbe ye otọ vbenian, ọ gha ru iyobọ nẹẹn ya sẹtin ya udinmwẹ ru iyobọ ne emwa ọvbehe.

18. Vbua khian ya ru iyobọ ne ọmwa ne u ma ẹre emwi ya sẹtin gha ladian vbe ikporhu? (Matiu 10:27)

¹⁸ Jesu keghi rhie igiọdu ne erhuanegbe ẹre ne iran gha kporhu ma emwa hia. (Tie Matiu 10:27.) Ọmwa ne u gu ruẹ e Baibol gha ghi suẹn gha ladian nẹ vbe kporhu, ọ ghi ru iyobọ nẹẹn ya mu ẹtin yan Jehova sayọ. Vbua khian ya ru iyobọ ne ọmwa ne u gu ruẹ emwi ya sẹtin ru ọnọna? Adeghẹ a na yae wewe wẹẹ, emwamwa ikporhu ne kpataki rrọọ, ru iyobọ ne ọmwa ne u gu ruẹ e Baibol ya rẹn emwi nọ gha sẹtin ru nọ mieke na sẹtin do gha re ọtẹn nọ ya iyẹn wewe vbe iko. U ghi vbe gi ẹre rẹn evbọzẹe nẹi na lọghọ etẹn eso ne iran sẹtin kporhu vbe egbe ẹghẹ vbenian. Ọ gha wa vbe miẹn ere vbọ adeghẹ ọ na hia nọ do gha ya ọta guan vbe iko na do vbe uwu uzọla. Ọ gha sẹtin ru vberriọ, ọ ghi sẹtin gha si agbada vbe unu rhan otọ emwi nọ yayi.

GI ỌMWA NE U GU RUẸ E BAIBOL RẸN WẸẸ, Ọ GHA SẸTIN RU EMWI NỌ YA ẸKO RHIẸNRHIẸN E JEHOVA

19. De vbene Jesu ya rhie ẹre ma we irẹn yayi wẹẹ, erhuanegbe ẹre gha ru emwi nọ khẹke, vbe ima khian ya ya egbe taa ẹre hẹ?

¹⁹ Vbene Jesu te kpa gha rrie ẹrinmwi, ọ keghi tama erhuanegbe ẹre wẹẹ, ẹghẹ dee ne irẹn khian ya werriegbe gha gu iran rrọọ. Iran ma rẹn wẹẹ, ẹghẹ ne iran khian ya gha rrie ẹrinmwi ẹre Jesu ghaa guan kaẹn. Agharhemiẹn wẹẹ, iran ghaa gbawawẹ, Jesu na ye rhie aro tua ẹkoata ne iran ghaa mwẹ. (Jọn 14:​1-5, 8) Ọ rẹnrẹn wẹẹ, ọ gha rhie ẹghẹ iran ke sẹtin do rẹn otọ emwi eso, vbe na ghee emwi nọ tama iran vbe ọ khare wẹẹ, iran gha yo ẹrinmwi. (Jọn 16:12) Vbe na ghee Jesu, ma gha vbe sẹtin rhie ẹre ma wẹẹ, ma mwẹ ilẹkẹtin wẹẹ, ọmwa ne ima gu ruẹ e Baibol gha ru emwi nọ ya ẹko rhiẹnrhiẹn e Jehova.

20. De vbene ọtẹn nokhuo ọkpa nọ rre Malawi ya rhie ẹre ma we irẹn yayi wẹẹ, ọmwa nọ gu ruẹ emwi gha ru emwi nọ khẹke?

²⁰ Ma ya aro yọ wẹẹ, ọmwa ne ima gu ruẹ e Baibol hoo nọ ru emwi nọ khẹke. Gia guan kaẹn ọtẹn nokhuo ọkpa nọ rre Malawi, na tie ẹre Chifundo. Ọ keghi suẹn gha gu okhuo ọkpa nọ yo esosi e Catholic ruẹ ebe na tie ẹre Sọyẹnmwẹ Arrọọ Vbe Etẹbitẹ!, eni okhuo na ọre Alinafe. Iran ghi ruẹ iruẹmwi nogie 14 fo nẹ, e Chifundo keghi nọ okhuo na vbe nọ ghee ẹre hẹ, na gha loo amazẹ ya ga Osanobua. Ọta na keghi kakabọ gbe Alinafe egbe, ẹre ọ na kha wẹẹ, “Dọmwadẹ ọghẹe ẹre ọ khian zẹ ne egbe ẹre!” E Chifundo kegha roro ẹre wẹẹ, vbe nọ ghi de na, ẹdẹrriọ ẹre iran khian ghi ruẹ emwi sẹ. Sokpan, ọ ma gi egbe wọọ ẹre, ọ na ye gha gu Alinafe ruẹ emwi, ọ na gha mwẹ ọnrẹn vbe ekhọe wẹẹ, ẹdẹ ọkpa khẹ ẹdẹ ọkpa, ọ gha rẹn otọ emwi na ma ẹre re. Uki eso ghi gberra nẹ, e Chifundo keghi nọ Alinafe ọta nọ rre iruẹmwi 34 nọ khare wẹẹ: “De afiangbe ne u he miẹn ke ne u ya suẹn gha ruẹ e Baibol kevbe ne u ya suẹn gha ruẹ vbekpa e Jehova nọ re Osa ọghe ẹmwata?” E Chifundo ghi guan kaẹn ewanniẹn ne Alinafe zẹ ye ọta na, ọ na kha wẹẹ, “Ọ keghi ya unu kaẹn olika ẹmwẹ ni bun, ọkpa vbe usun olika ẹmwẹ nọ ya unu kaẹn ọre wẹẹ, ọ ma khẹke ne Avbe Osẹe Jehova gha mwẹ obọ vbe uyinmwẹ nọ ma gua emwi nọ rre Baibol ro.” Vbọ ma he kpẹẹ vba, Alinafe ma ghi gha loo amazẹ ya ga Osanobua, ẹre ọ na ghi dinmwiamẹ.

21. Vbe ima khian ya ru iyobọ ne ọmwa ne ima gu ruẹ emwi ya sẹtin dobọ mu ẹmwata?

²¹ Agharhemiẹn wẹẹ, e Jehova “ẹre ọ yae waan,” ma tobọ ima wa vbe mwẹ emwi kpataki ne ima gha ru nọ gha ru iyobọ ne ọmwa ne ima ma ẹre emwi ya gha mwẹ alaghodaro. (1 Kọr 3:7) Ẹ i re emwi ne Osanobua hoo nọ ru ọkpa ma khian gha ma ẹre re. Sokpan, te ima gha ru iyobọ nẹẹn ne ahoẹmwọmwa nọ mwẹ ne Jehova mieke na gha wegbe sayọ. Ma ghi rhie igiọdu nẹẹn nọ mu ugamwẹ e Jehova karo nọ ya rhie ẹre ma wẹẹ, irẹn hoẹmwẹ ọnrẹn. Ma ghi vbe ru iyobọ nẹẹn ya rẹn wẹẹ, ọ gha sẹtin mu ẹtin yan e Jehova vbe ọ ghaa rre uwu ọlọghọmwa. Ma ghaa rhie ẹre ma we ima mwẹ ilẹkẹtin wẹẹ, ọ hoo nọ ru emwi nọ khẹke, te ima ru iyobọ nẹẹn ya rẹn wẹẹ, ọ gha sẹtin ru emwi nọ yẹẹ e Jehova nọ vbe dobọ mu ẹmwata gbain.