Ọta Ne Emwa Nọ
Ọmwa nọ gbẹn ebe Itan 30:18, 19 khare wẹẹ, “okpia kevbe okhuo ni hoẹmwẹ egbe” keghi re emwi nọ ma gi irẹn ‘rẹn otọ ẹre.’ Vbe ọ ya ọna kha?
Ọ kpẹẹ re ne emwa ni bun ke gualọ otọ emwi na ya ẹmwẹ nọ rre ako na kha, uhiẹn ya sẹ egbe emwa ni rri egie ebe vbe iruẹmwi e Baibol. Ako na vbe New World Translation khare wẹẹ: “Emwi eha ẹre ọ rrọọ nọ kpa mwẹ odin kevbe emwi enẹ nẹi gu mwẹ rẹn otọ ẹre: Oghohọn nọ tin vbe iso, ẹyẹn nọ hiọrọ vbe uhunmwu okuta, okọ na gua la okun khian, deba okpia kevbe okhuo ni hoẹmwẹ egbe.”—Itan 30:18, 19.
Ma ka gha roro ẹre wẹẹ, emwi dan ẹre ẹmwẹ na nọ re “okpia kevbe okhuo ni hoẹmwẹ egbe” demu. Vbọzẹ? Uviẹn eso vbe ebe Itan uhunmwu ẹnrẹn 30 ya unu kaẹn, emwi eso nẹi kha wẹẹ, “ọni sẹ.” (Itan 30:15, 16) Vbene uviẹn ọnrẹn 20 na guan kaẹn “okhuo nọ ma gua obọ ọdọ” nọ fi owẹ ye oha, nọ khare we irẹn ma ru a i ghẹ ru. Rhunmwuda ọni, ma kegha roro ẹre wẹẹ, vbene oghohọn tin vbe orere iso, vbene ẹyẹn hiọrọ la uhunmwu okuta, ra vbene okọ la uhunmwu okun gberra vbene ọmwa rhọkpa i na rẹn, erriọ ẹre ọmwa gha vbe sẹtin ru emwi vbene ọmwa rhọkpa i na rẹn vbekpa ẹre. Ọna ẹre ọ si ẹre ne ima na te gha roro ẹre wẹẹ, ifiẹmwẹ na ighẹ “okpia kevbe okhuo ni hoẹmwẹ egbe” dekaẹn uyinmwẹ dan, ọni ọre vbene okpia ya fẹko rẹrẹ okhuo nọ ma fiẹnro, ọ ghi gu ẹre ru emwi ọdọ vbe amwẹ.
Vbọrhirhighayehẹ, ọ khọ we osẹ rrọọ nọ rhie ẹre maan wẹẹ, ẹ i re emwi dan ẹre ako na guan kaẹn. Te ọmwa nọ gbẹn ako na wa ya unu kaẹn emwi eso nọ ghaa kpa ẹre odin.
Ẹmwẹ Hibru na ke zedu ẹmwẹ nọ rre ako na vbe so igiẹ yọ wẹẹ, ẹ i re emwi dan ẹre ako na guan kaẹn. Zẹvbe ne ebe ọkpa na tie ẹre Theological Lexicon of the Old Testament khare, emwi ọvbehe na ya ẹmwẹ Hibru na ke zedu “kpa mwẹ odin” kha vbe ebe Itan 30:18 “ọre emwi eso nọ sunu . . . nọ yan ọmwa unu ruan, kevbe emwi nai miẹn egbe ọre.”
E Professor Crawford H. Toy ọghe Harvard University nọ rre United States vbe kha wẹẹ, ẹ i re emwi dan ẹre ako ọghe Baibol na guan kaẹn, ọ wẹẹ: “Vbene emwi na sunu yi vbe ako na ya kpa ọmwa odin, ẹre ako na guan kaẹn.”
Nọnaghiyerriọ, ma gha sẹtin kha wẹẹ, emwi ọyunnuan, uhiẹn emwi nẹi gia rẹn otọ ẹre, ẹre ebe Itan 30:18, 19 guan kaẹn. Vbe na ghee ọmwa nọ gbẹn ako e Baibol nii, te ọ wa kpa ima odin vbene oghohọn ya tin khian vbe orere iso, vbene ẹyẹn nẹi mwẹ owẹ ya hiọrọ la uhunmwu okuta, vbene okọ nọkhua ya la uhunmwu okun gberra, kevbe vbene okpia vbe okhuo ni re igbama ya hoẹmwẹ egbe, iran ghi gha sọyẹnmwẹ ẹdagbọn iran.