Vbene U Khian Ya Sẹtin Gha Mwẹ Alaghodaro Vbe Odẹ Ne U Ya Na Erhunmwu

1-2. (a) De emwi nọ gha sẹtin yae gha lọghọ ne ima fannọ otọ ẹko ima ma e Jehova? (b) Vbe ima ya rẹn hẹ we Jehova gbehọkotọ danmwehọ erhunmwu ima?

U ZẸDIA roro ẹre wẹẹ, emwi ọkpa ọkpa ẹre u ghi ta vbe erhunmwu ra, kevbe wẹẹ, u i fannọ otọ ẹko ruẹ ma e Jehova ra? Adeghẹ erriọ ẹre nọ, ẹ i re uwẹ ọkpa. Rhunmwuda ne ima na mwẹ emwi ni bun ne ima ru vbe obọ, ma sẹtin do gha ya okhirhikhirhi na erhunmwu. Ra ọ sẹtin gha lọghọ ne ima fannọ otọ ẹko ima ma e Jehova rhunmwuda ma roro ẹre wẹẹ, ma ma sẹ nọ gha na erhunmwu gie ẹre.

² E Baibol gi ima rẹn wẹẹ, ẹ i re vbene erhunmwu ọghe ima rhiẹnrhiẹn sẹ hẹ ẹre Jehova ghee, sokpan emwi nọ ru ekpataki vbe aro e Jehova ọre ne erhunmwu ima ke ekhọe rre kevbe ne ima ya imuegberriotọ naẹn. Ọ “họn erhunmwu avbe ọmẹhẹ.” (Psm 10:17) Te ọ wa gbehọkotọ danmwehọ emwi hia ne ima ta vbe ima ghaa na erhunmwu rhunmwuda, ọ mwẹ ẹmwẹ ima vbe orhiọn.​—Psm 139:​1-3.

3. De ọta eso ne ima khian zẹ ewanniẹn yi vbe ako iruẹmwi na?

³ Ma sẹtin gha nọ wẹẹ: Vbọzẹ ne ima gha na sẹtin ya ekhọe hia na erhunmwu gie Jehova? Vbe ima khian ya sẹtin gha na erhunmwu vbe odẹ nọ gha ya ima sikẹ e Jehova sayọ? De vbene erhunmwu ne emwa ya ekhọe hia na vbe Baibol gha ya sẹtin ru iyobọ ne ima ya gha mwẹ alaghodaro vbe odẹ ne ima ya na erhunmwu? De emwi ne ima gha sẹtin ru, adeghẹ ima ma rẹn emwi ne ima khian tama e Jehova? Gi ima zẹ iro yan avbe inọta na.

GHA YA EKHỌE HIA NA ERHUNMWU GIE JEHOVA

4. Vbọ khian ru iyobọ ne ima ya sẹtin fannọ otọ ẹko ima ma e Jehova vbe erhunmwu? (Psalm 119:145)

⁴ Ma gha rẹn wẹẹ, ọse nẹi khian sẹtin sẹ ima rae, nọ vbe hoo ne ima musọe ẹre Jehova khin, ọ ghi ya ima gha ya ekhọe hia na erhunmwu gie ẹre. Aro vbenian ẹre ọmwa nọ gbẹn Psalm 119 ya gha ghee Jehova. Ọ werriẹ aro daa ọlọghọmwa eso. Emwa eso keghi ba ẹre u i gia siẹn. (Psm 119:​23, 69, 78) Na kha na abakuru ọghẹe vbe gha kpokpo ẹre vbe orhiọn. (Psm 119:5) Ọrheyerriọ, te ọ ye fannọ otọ ẹko ẹre ma e Jehova.​—Tie Psalm 119:145.

5. Vbọzẹ nọ ma na khẹke ne ima gi emwi rhọkpa mu idobo ye ima egbe ne ima ghẹ na erhunmwu gie Jehova? Ru igiemwi yọ.

⁵ E Jehova kue gie na tie emwa ni ru orukhọ nọ wegbe ne iran na erhunmwu gie irẹn. (Aiz 55:​6, 7) Ọ ma khẹke ne ima gi emwi rhọkpa mu idobo ye ima egbe ne ima ghẹ na erhunmwu gie Jehova. Vbe igiemwi, ọmwa nọ fi okọ ẹhoho rẹnrẹn wẹẹ, irẹn gha sẹtin gu emwa ni dia avbe okọ ẹhoho guan deghẹ irẹn na gha gualọ iyobọ. Adeghẹ ọ na ru abakuru, ra ọ na wii vbe odẹ, ọ gha rhunmwuda wẹẹ, ekhue muẹn nẹ ghẹ nọ iyobọ ra? Hiehie! Erriọ ẹre ọ vbe ye, adeghẹ ima na bibi odẹ ra ma na ru orukhọ, ma gha sẹtin ya ekhọe hia na erhunmwu gie Jehova nọ ru iyobọ ne ima.​—Psm 119:​25, 176.

VBENE IMA KHIAN YA SẸTIN GHA NA ERHUNMWU VBE ODẸ NỌ GHA YA IMA SIKẸ E JEHOVA SAYỌ

6-7. Ma ghaa muẹn roro aro ọmwa ne Jehova khin, vbọ khian ya ru iyobọ ne ima ya gha fannọ otọ ẹko ima ma rẹn? Ru igiemwi yọ. (Vbe ya ghee futnot.)

⁶ Ma ghaa fannọ otọ ẹko ima ma e Jehova, ma na vbe gha tama rẹn emwi nọ da ima vbe orhiọn, ọ ghi ya ima sikẹ ọre sayọ. Nọnaghiyerriọ, de emwi ne ima gha ru ne ima mieke na sẹtin gha fannọ otọ ẹko ima ma e Jehova?

⁷ Gha muẹn roro aro ọmwa ne Jehova khin.a Vbene ima ya muẹn roro aro ọmwa ne Jehova khin, erriọ ẹre ọ khian vbe ya gha khuẹrhẹ ne ima ya fannọ otọ ẹko ima ma rẹn. (Psm 145:​8, 9, 18) Gi ima guan kaẹn Ọtẹn Nokhuo Kristine ne erhae ghaa khọọ. Ọ khare wẹẹ: “Ọ ghaa lọghọ mwẹ ne I gha ghee Jehova zẹvbe Erha mwẹ rhunmwuda ọni, I ma sẹtin gha fannọ otọ ẹko mwẹ ma rẹn. I na gha roro ẹre wẹẹ, ẹ i khian zẹyọ mwẹ re rhunmwuda abakuru mwẹ.” De emwi nọ ghi do ruẹ vbekpa e Jehova nọ ghi ru iyobọ nẹẹn? Ọ khare wẹẹ: “Ahoẹmwọmwa nẹi beghe ne Jehova mwẹ keghi mu mwẹ orhiọn sẹ otọ. I rẹnrẹn wẹẹ, ẹ i khian sẹ mwẹ rae. Ọ gha khọnrẹn we I de, ọ ghi fẹko mu mwẹ kpaegbe. Ọna ẹre ọ ru iyobọ mẹ ya gha ya ekhọe hia fannọ otọ ẹko mwẹ ma e Jehova, I na vbe sẹtin gha tama rẹn emwi nọ kpokpo mwẹ vbe orhiọn.”

8-9. Vbọzẹ nọ na khẹke ne ima ka mu ẹmwẹ ne ima khian ta vbe erhunmwu roro nẹ ma ke suẹn gha na erhunmwu? Ru igiemwi yọ.

⁸ Gha muẹn roro emwi ne u khian ta. Vbene u te na erhunmwu, u sẹtin nọ egbuẹ ọta eso. Vbe igiemwi, u sẹtin nọ egbuẹ wẹẹ: ‘De ọlọghọmwa eso ne I ye nian? Ọ mwẹ ọmwa nọ khẹke ne I yabọ ra? Ọ mwẹ ọlọghọmwa ne I ye nian nọ ya mwẹ gualọ iyobọ e Jehova ra?’ (2 Ọba 19:​15-19) Ma sẹtin vbe lele igiemwi ọghe Jesu, ọni nọ wẹẹ, ma ghi muẹn roro emwi ne ima gha sẹtin nọ e Jehova vbekpa eni ẹnrẹn, Arriọba ọghẹe kevbe iho ọghẹe.​—Mat 6:​9, 10.

⁹ Ọbo ebo ghi tama ọtẹn nokhuo ọkpa na tie ẹre Aliska wẹẹ, ọdafẹn ọnrẹn i khian miẹn uhunmwu vbe kansa ọghe ẹrherhe nọ khuọnmwi, ọ kegha lọghọ ọtẹn nokhuo na nọ sẹtin gha na erhunmwu. Ọtẹn na khare wẹẹ: “Iro han mwẹ sẹrriọ wẹẹ, I ma sẹtin gha roro emwi ẹse amaiwẹ te I khian rẹn emwi nọ khẹke ya ta vbe erhunmwu.” Vbọ ru iyobọ nẹẹn? Ọ khare wẹẹ: “I ghi ya ẹghẹ eso mu emwi ne I khian ta roro I ke suẹn gha na erhunmwu, ọna ẹre ọ ru iyobọ mẹ na na miẹn wẹẹ, ẹ i re ọghe ne egbe mwẹ ọkpa ẹre I ghaa tama e Jehova. Obẹlẹ na wa mu mwẹ orhiọn sẹ otọ, ọ vbe ya mwẹ roro emwi ẹse vbene I te na erhunmwu.”

10. Vbọzẹ nọ ma na khẹke ne ima gha ya okhirhikhirhi na erhunmwu? (Vbe ya ghee avbe efoto.)

¹⁰ Ghẹ gha ya okhirhikhirhi na erhunmwu. Ẹmwata nọ wẹẹ, erhunmwu nọ ma tan gbe gha vbe sẹtin ya ima sikẹ e Jehova, sokpan, adeghẹ ima ma ya okhirhikhirhi na erhunmwu, ẹkpotọ sẹtin kie ne ima ya fannọ otọ ẹko ima ma e Jehova.b Elijah ne ọdafẹn Aliska khare wẹẹ: “I keghi hia ne I gha na erhunmwu inugba nọ khin vbe ẹdẹ, te I ghi wa sikẹ e Jehova sayọ rhunmwuda ne I i na ya okhirhikhirhi na erhunmwu. E Jehova mu egbe nọ ya danmwehọ erhunmwu mwẹ ọ gha khọnrẹn wẹẹ, ọ tan vbe otọ.” Emwi ne u gha sẹtin ru: Gualọ ẹghẹ kevbe ehe ne u gha na sẹtin na erhunmwu, ọ sẹtin gha re ehe ne u gha na sẹtin gha guan ladian vbene emwi rhọkpa i na rhie ruẹ ekhọe hin erhunmwu ne u na rre, u ghi vbe hia ne u ghẹ gha ya okhirhikhirhi na erhunmwu.

GHA MUẸN RORO ERHUNMWU NE EGUỌMWADIA E JEHOVA YA EKHỌE HIA NA VBE BAIBOL

11. Vbọ khian ya ru iyobọ ne ima hẹ deghẹ ima na gha muẹn roro erhunmwu ne emwa ya ekhọe hia na vbe Baibol? (Vbe ya ghee ẹkpẹti na, “U Werriẹ Aro Daa Egbe Ọlọghọmwa Ne Iran Werriẹ Aro Daa Ra?”)

¹¹ Ọ gha wa ru iyobọ nuẹn adeghẹ u na gha muẹn roro erhunmwu ne eguọmwadia e Jehova ya ekhọe hia na kevbe ihuan ugamwẹ ni rre uwu e Baibol. U ghaa muẹn roro vbene eguọmwadia Osanobua ya fannọ otọ ẹko iran, ọ ghi vbe ru iyobọ nuẹn ya fannọ otọ ẹko ruẹ ma Osanobua vbe erhunmwu. U sẹtin vbe miẹn ẹmwẹ eso ne u khian ya gha rho e Jehova vbe u ghaa na erhunmwu. Ẹ i mwẹ u ma vbe miẹn erhunmwu ọghe ọguọmwadia e Jehova nọ vbe miẹn egbe ọlọghọmwa ne uwẹ vbe ye.

12. De ọta eso ne ima gha sẹtin nọ vbe ima ghaa tie erhunmwu ne emwa na vbe Baibol?

¹² Zẹvbe ne u ya tie erhunmwu ne emwa na vbe Baibol, u sẹtin nọ egbuẹ wẹẹ: ‘De ọmwa nọ ta ẹmwẹ na, de ọlọghọmwa nọ ghaa ye? Emwi nọ ta vbe erhunmwu na yevbe emwi ne imẹ vbe la gberra ra? De emwi ne I miẹn ruẹ vbọ?’ A sẹtin miẹn wẹẹ, te u gha ru ezanzan ne u mieke na sẹtin miẹn ewanniẹn ọghe avbe ọta na, sokpan u gha wa miẹn ere vbọ. Gi ima ghee igiemwi eso.

13. De emwi ọkpa ne ima miẹn ruẹ vbe erhunmwu ọghe Hanna? (1 Samuẹl 1:​10, 11) (Vbe ya ghee efoto nọ rre.)

¹³ Tie 1 Samuẹl 1:​10, 11. Ọlọghọmwa eva nọ wegbe ẹre Hanna ghaa werriẹ aro daa vbe ọ na erhunmwu na. Agan ẹre ghaa nọ, ọrue ọre na vbe gha ya ẹmwẹ ọmọ kpee ẹre ofi. (1 Sam 1:​4-7) Adeghẹ ọlọghọmwa ne u ye ma fo vbe otọ, de emwi ne u gha miẹn ruẹ vbe erhunmwu ọghe Hanna? Orhiọn rẹn keghi sẹ otọ rhunmwuda nọ na rhie ẹghẹ ya tama e Jehova emwi nọ kpokpo ẹre vbe orhiọn. (1 Sam 1:​12, 18) Erriọ ẹre ọ vbe ye, ma gha gi e Jehova rẹn vbene emwi ye ima hẹ, te ima vbe “zẹ ọlọghọmwa [ọghe ima] obọ ne Jehova.”​—Psm 55:22.

14. (a) De emwi ọvbehe ne ima miẹn ruẹ vbe okha ọghe Hanna? (b) Adeghẹ ima na gha mu emwi ni rre Baibol roro, vbọ khian ya ya ima gha mwẹ alaghodaro vbe odẹ ne ima ya na erhunmwu? (Ya ghee futnot.)

¹⁴ Vbọ ghi rre ukpo eso ne Hanna biẹ e Samuẹl, ọ na rhie ẹre gie Ilai ne Ogie Ohẹn. (1 Sam 1:​24-28) Vbe erhunmwu ne Hanna naẹn, ọ keghi kha wẹẹ, irẹn mwẹ ilẹkẹtin wẹẹ, e Jehova gbaroghe emwa hia ni ya ekhọe hia gae.c (1 Sam 2:​1, 8, 9) A sẹtin miẹn wẹẹ, ọlọghọmwa nọ werriẹ aro daa ma he fo vbe otọ, sokpan ọ keghi rhie aro tua odẹ ne Jehova ya gha fiangbe ẹre. Vbe ima miẹn ruẹ vbe ọna? Ma gha sẹtin zin egbe ọlọghọmwa ne ima ye nian adeghẹ ima na rhie aro tua vbene Jehova ya ru iyobọ ne ima do sẹ ẹghẹ na.

15. Vbe ima miẹn ruẹ vbe erhunmwu ne Jerimaia na, nọ gha ru iyobọ ne ima adeghẹ emwa na gha ya obọ dan mu ima? (Jerimaia 12:1)

¹⁵ Tie Jerimaia 12:1. Ọ mwẹ asẹ ọkpa ne egbe ya wọọ e Jerimaia rhunmwuda nọ na bẹghe ẹre wẹẹ, ọ khọ we emwi wa dunna ne emwa dan. Ọ ma vbe gha ghọghọ rhunmwuda obọ ne Ivbi Izrẹl ne ihua ẹre ya gha muẹn. (Jer 20:​7, 8) Emwi vbenian wa vbe sunu daa ima vbe ima gha bẹghe ẹre wẹẹ, emwi dunna ne emwa dan kevbe deghẹ emwa na gha zaan ima. Agharhemiẹn we Jerimaia ta vbene emwi ghaa ye ẹre hẹ ma Osanobua, ọ ma gha mwẹ ẹghẹ ọkpa nọ ya kha wẹẹ, Osanobua i bu ohiẹn ata. Vbe ọ ghi bẹghe vbene Osanobua ya rhie emwa rẹn oya, ẹ i mwẹ ọ ma kakabọ gha mwẹ ilẹkẹtin wẹẹ, Osa nọ bu ohiẹn ata ẹre Jehova khin. (Jer 32:19) Ma gha vbe sẹtin ta vbene emwi ye ima hẹ ma e Jehova vbe erhunmwu, ma ghi vbe gha mwẹ ilẹkẹtin wẹẹ, ọ gha sọfurre ye uyinmwẹ a gbe ọmwa ekueku ne ima werriẹ aro daa vbe ẹghẹ nọ khẹke.

16. Vbe ima miẹn ruẹ vbe obọ ovbi Livai nọ gha ru iyobọ ne ima adeghẹ ima na gha roro ẹre wẹẹ, ọlọghọmwa ne ima ye i gi ima zẹ obọ zẹ owẹ? (Psalm 42:​1-4) (Vbe ya ghee avbe efoto.)

¹⁶ Tie Psalm 42:​1-4. Ovbi Livai na mu gha rrie imu nọ ma ghi sẹtin deba Ivbi Izrẹl ne ihua ẹre ga e Jehova ẹre ọ gbẹn ihuan na. Ihuan nọ gbẹn ya ima rẹn vbene emwi ghaa ye ẹre hẹ. Ma gha gele sẹtin rẹn vbene emwi ghaa ye ẹre hẹ adeghẹ ima ma sẹtin kpa hin owa rre rhunmwuda emianmwẹ, ra adeghẹ a na mu ima ye eghan rhunmwuda ne ima na ga e Jehova. Ẹko i khian wa gha rhiẹnrhiẹn ima vbe ẹghẹ hia, sokpan te ọ khẹke ne ima fannọ otọ ẹko ima ma e Jehova. Ọna gha ru iyobọ ne ima ya gha roro emwi ẹse, ọ ghi vbe ya ima rẹn aro nọ khẹke ne ima ya gha ghee ọlọghọmwa ne ima ye. Vbe igiemwi, ovbi Livai nii keghi do bẹghe ẹre wẹẹ, ẹkpotọ ọvbehe kie ne irẹn ya gha rhie ugamwẹ ne Jehova. (Psm 42:5) Ọ wa vbe gha muẹn roro vbene Jehova ya gha gbaroghe irẹn hẹ. (Psm 42:8) Ma ghaa fannọ otọ ẹko ima ma e Jehova, ọ gha ru iyobọ ne ima ya gha roro emwi ẹse, orhiọn ima ghi sẹ otọ, ma ghi vbe sẹtin zin egbe.

17. (a) De emwi ne ima miẹn ruẹ vbe erhunmwu ọghe akhasẹ ighẹ Jona? (Jona 2:​1, 2) (b)De vbene ẹmwẹ eso nọ rre ebe Psalm gha ya sẹtin ru iyobọ ne ima hẹ vbe ima ghaa rre uwu ọlọghọmwa? (Ya ghee futnot.)

¹⁷ Tie Jona 2:​1, 2. Uwu ẹko ehẹn nọkhua ẹre Jona ghaa ye vbe ọ na erhunmwu na. Agharhemiẹn wẹẹ, e Jona he ẹmwẹ ye Jehova obọ, te ọ ye gha mwẹ ilẹkẹtin wẹẹ, e Jehova gha họn erhunmwu irẹn. E Jona wa loo ẹmwẹ ni bun vbe ebe Psalm vbe erhunmwu nọ naẹn.d Ọ gha kẹ, ọ ka wa rẹn avbe ako na ye uhunmwu. Rhunmwuda nọ na gha mu ẹmwẹ nọ rre avbe ako na roro, ọ na do gha mwẹ ilẹkẹtin wẹẹ, e Jehova gha ru iyobọ ne irẹn. Erriọ ẹre ọ vbe ye, ma gha rẹn ako ọghe Baibol eso ye uhunmwu, ma gha sẹtin ye iran rre vbe ima ghaa rre uwu ọlọghọmwa, iran ghi vbe fu ima ẹko rre, vbe ima ghaa na erhunmwu.

YE GHA NA ERHUNMWU GIE JEHOVA

18-19. De ilẹkẹtin ne ebe Rom 8:​26, 27 rhie ne ima adeghẹ a na miẹn wẹẹ, ma ma rẹn emwi ne ima khian ta vbe erhunmwu? Ru igiemwi yọ.

¹⁸ Tie Rom 8:​26, 27. Ugbẹnso, iro sẹtin han ima sẹrriọ wẹẹ, ma i rẹn ẹmwẹ ne ima khian ta vbe ima ghaa na erhunmwu gie Jehova. De emwi nọ khian ru iyobọ ne ima? Egbe ẹghẹ vbenian ẹre orhiọn nọhuanrẹn ọghe Osanobua ya “rinmwian ne ima.” Odẹ vbo? E Jehova ẹre ọ ya orhiọn nọhuanrẹn dia emwa ya gbẹn erhunmwu ni bun ye uwu e Baibol. Adeghẹ ima ma rẹn emwi ne ima khian ta vbe erhunmwu, e Jehova sẹtin ghee ẹmwẹ eso ni rre erhunmwu ne eguọmwadia ẹre ya ekhọe hia na vbe Baibol zẹvbe emwi ne ima te hoo ne ima nọ vbe erhunmwu, ẹghẹ nii, ọ ghi họn erhunmwu ima.

¹⁹ Ọna ọre emwi nọ wa ru iyobọ ne ọtẹn nokhuo ọkpa na tie ẹre Yelena nọ rre Russia. A keghi muẹn ye eghan rhunmwuda nọ na gha na erhunmwu kevbe nọ na gha ruẹ e Baibol. Egbe wọọ Yelena sẹrriọ wẹẹ, ọna gha lọghọ ẹre nọ sẹtin gha na erhunmwu. Ọ khare wẹẹ: “I wa ye yerre wẹẹ, iro gha han mwẹ, I ma na rẹn emwi ne I khian ta vbe erhunmwu, e Jehova ghi wa miẹn ọnrẹn yi emwi ne eguọmwadia ẹre nẹdẹ nọ vbe erhunmwu . . . zẹvbe emwi ne I gha te hoo ne I nọ. . . . Ọna wa gele mu mwẹ orhiọn sẹ otọ ẹsẹsẹmwẹse vbe ẹghẹ ne I ya gha werriẹ aro daa ọlọghọmwa nọ wegbe.”

20. Vbọ khẹke ne ima ru ne orhiọn ima mieke na sẹ otọ ma te na erhunmwu?

²⁰ Ma ghaa rre uwu ibavbaro, ọ sẹtin gha lọghọ ne ima sẹtin rẹn ẹmwẹ nọ khẹke ya ta vbe ima ghaa na erhunmwu. Ma sẹtin kpee rẹkọdi ọghe ebe Psalm, ọna gha mu ima orhiọn sẹ otọ vbene ima te na erhunmwu. Ma sẹtin vbe gbẹnnẹ emwi nọ rre ima ekhọe ye otọ vbene Ọba ighẹ e Devid ru ẹre. (Psm 18, 34, 142; ifiẹmwẹ na gbẹnnẹ ye omuhẹn ọghe dọmwadẹ uhunmwu ebe na.) Ẹmwata nọ rrọọ ọre wẹẹ, ma gha sẹtin mu egbe ye otọ khẹ erhunmwu ne ima khian na vbe odẹ nọ rhirhi khọn ima. (Psm 141:2) Ru ne u rẹnrẹn wẹẹ, ọ gha fu ruẹ egbe.

21. Vbọzẹ ne u gha na sẹtin ya ekhọe hia na erhunmwu gie Jehova?

²¹ Ọ wa fu ima ẹko rre ne ima na rẹn wẹẹ, e Jehova rẹn vbene emwi ye ima hẹ uhiẹn ma ke tama rẹn. (Psm 139:4) Ọrheyerriọ, ọ hoo ne ima fannọ otọ ẹko ima ma rẹn ne ima ya rhie ẹre ma wẹẹ, ma mu ẹtin yan rẹn. Nọnaghiyerriọ, gha na erhunmwu gie Erhaa nọ rre ẹrinmwi vbe ẹghẹ hia. Hia ne u gualọ emwi ne u gha miẹn ruẹ vbe avbe erhunmwu ni rre Baibol. Gha ya ekhọe hia na erhunmwu. Gi e Jehova rẹn emwi nọ ya ruẹ sọyẹnmwẹ kevbe ọlọghọmwa ne u ye. Ọse nọ hoẹmwẹ ruẹ ẹre Jehova khin, rhunmwuda ọni ẹghẹ ọkpa i rrọọ nọ khian ya sẹ ruẹ rae!