Gha Lele Emwamwa Ne U Ya Tie Baibol Vbe Ẹdẹgbegbe

Rhunmwuda ne u na mwẹ emwi ni bun ne u ru vbe obọ, ọ lọghọ ruẹ ne u sẹtin gha lele emwamwa ọghe Baibol ne u tie vbe ẹdẹgbegbe ra? (Jọs 1:8) Adeghẹ erriọ ẹre nọ, hia ne u ru avbe emwi na khian sunu yi na:

• Gha mwẹ emwi nọ khian gha ya ruẹ yerre vbe ẹdẹgbegbe. U sẹtin sẹt alarm ye efoni ruẹ, nọ khian gha ye ruẹ ẹre rre ne u tie Baibol vbe ẹdẹgbegbe.

• Mu e Baibol ruẹ ye eke ne u gha na rherhe gha bẹghe ẹre. Deghẹ e Baibol na print ladian ẹre u loo, muẹn ye eke ne u khian na rherhe gha fi aro muẹn vbe ẹdẹgbegbe.​—Diut 11:18.

• Gha danmwehọ avbe ako ọghe Baibol na rẹkọdi. Gha danmwehọ avbe ako ọghe Baibol na rẹkọdi vbe u ghaa ru emwi vbe ẹdẹgbegbe. Ọ mwẹ ọtẹn nokhuo ọkpa na tie ẹre Tara nọ re arọndẹ ọghe ẹghẹ hia, iye ọmọ ẹre nọ, asọn ẹre ọ vbe ya winna, ọ khare wẹẹ, “Ne I na danmwehọ ako ọghe Baibol na rẹkọdi vbe I ghaa ru iwinna owa wa ru iyobọ mẹ ya gha lele emwamwa ọghe Baibol ne I tie vbe ẹdẹgbegbe.”

• Ghẹ gi egbe wọọ ruẹ. Adeghẹ emwi eso na ya egbe kaan egbe nọ ghi zẹe wẹẹ, u ma sẹtin tie Baibol vbe ẹghẹ ne u te mwamwa yọ, hia ne u ye tie kherhe vbọ u ke lovbiẹ. U gha wa miẹn ere vbọ, a gha we uviẹn kherhe ẹre u sẹtin tie vbe ẹdẹgbegbe.​—1 Pit 2:2.