WA GHA BODẸ!

Emwi Ne Otu Ugamwẹ Ughughan He Ru Vbekpa Okuo Nọ Rre Ukraine—De Emwi Ne Baibol Khare?

Gia ghee emwi eso na ta vbekpa avbe ọkaolotu ugamwẹ na họn usi ẹre rre, kevbe okuo nọ sunu vbe Ukraine:

“Ọkaolotu ugamwẹ ọghe Esọsi na tie ẹre Orthodox nọ rre Russia, ne eni ẹnrẹn e Patriarch Kirill, ma zẹdẹ gbe ikhaẹn yọ, ne Russia na mu okuo gha rrie Ukraine. . . . Esọsi ọghẹe wa na iyẹn ohoghe khian vbekpa Ukraine, iyẹn ohoghe na, ẹre Putin ghi da yi, nọ ghi ya gu e Ukraine khọn.”—EUobserver, March 7, 2022.
“Patriarch Kirill . . . wa rhie obọ ye Russia iyeke, vbe okuo ne iran khian gu e Ukraine khọn, ọ khare wẹẹ, odẹ ọkpa ne iran khian ya sẹtin dobọ orukhọ yi ẹre nọ.”—AP News, March 8, 2022.
“Ọkaolotu esọsi na tie ẹre Orthodox nọ rre Ukraine, Metropolitan Epiphanius I ọghe Kyiv, keghi na erhunmwu ne Ivbe Ukraine wẹẹ, “iran gha khọnmiotọ vbe okuo ne iran khian ya gu e Russia khọn . . . [Ọ] vbe kha wẹẹ, iran ma ru orukhọ rhọkpa, deghẹ iran na gbele Ivbiyokuo e Russia hia rua.”—Jerusalem Post, March 16, 2022.
“Ma ni rre otu ọghe [Ukrainian Council of Churches and Religious Organizations (UCCRO)] wa rhie obọ ye iyeke Ivbiyokuo ọghe Ukraine kevbe emwa ni ru iyobọ ne ima, ne obọ eghian ima ghẹ mieke na ke ukhunmwu ne ima; ma wa na erhunmwu ne ẹtin ghẹ fue iran.”—Ẹmwẹ ne UCCROa ta vbe, February 24, 2022.

Vbua ghee ẹmwẹ na hẹ? Ọ khẹke ne emwa ugamwẹ, ni wẹẹ iran lele ukpowẹ e Kristi, gha khama emwa ni rre ugamwẹ iran, ne iran gha khọn okuo ra? De emwi ne Baibol khare?

Vbene ugamwẹ nibun he ya gha mwẹ obọ vbe okuo hẹ

Ke otọ gha dee, ẹre ugamwẹ nibun ke ya emwa ike, ne iran gha khọn okuo, rhunmwuda iran ghee ẹre wẹẹ, ọ ma de emwi nọ rhia. Sokpan iran ghi ba gha ru wẹẹ, iran hoo ne ọfunmwegbe gha rre ehe hia. Ọwara ukpo nibun ẹre Avbe Osẹe Jehova ke vẹẹ ọre rua wẹẹ, emwa okeke ẹre avbe ugamwẹ na khin. Gia ghee emwi eso ne ebe iyẹn ọghomwa he ta vbekpa iran.

“The Crusades—A ‘Tragic Illusion’” gi ima rẹn wẹẹ, esọsi ọghe Roman Catholic, ẹre ọ si uwu ọghe ẹbo emwa nibun ni wulo vbe asẹ ọkpa; iran ghi ba wẹẹ te iran ru ẹre ne Osanobua kevbe Kristi.
“The Catholic Church in Africa” keghi gi ima rẹn, vbene ugamwẹ nibun ma he ya sẹtin dobọ ẹre yi, okuo ne ivbi ẹvbo ughughan khọn kevbe uniẹn na wabọ re rua.
Avbe uhunmwuta ni khare wẹẹ “Is Religion to Blame?,” “Religion’s Role in Man’s Wars,” kevbe “Religion Takes Sides” gi ima rẹn wẹẹ, avbe ọkaolutu esọsi ọghe Catholic, Orthodox kevbe Protestant, wa ya egbe hia ye ẹre ike ighẹ ẹvbo ughughan ni gu egbe iran khọn okuo.

Ọ khẹke ne Ivbiotu e Kristi gha ye emwa ni khọn okuo ike ra?

Emwi ne Jesu ma ima re: “Te u gha hoẹmwẹ ogieva ruẹ zẹvbe ne u hoẹmwẹ egbuẹ.” (Matiu 22:39) “Uwa gha hoẹmwẹ eghian uwa.”—Matiu 5:44-47.

Muẹn roro:Otu ugamwẹ rhọkpa gha sẹtin kha wẹẹ iran họn ẹmwẹ ne Jesu ra, nọ na wẹẹ ne ima gha hoẹmwe ogieva ima, vbene iran na ye emwa iran ike, ni iran gha khọn okuo? U gha miẹn ewanniẹn ọghe inọta na, deghẹ u na tie avbe uhunmwuta na “True Christians and War” kevbe “Is It Possible to Love One’s Enemies?”

Emwi ne Jesu khare: “Arriọba mwẹ i re ọghe agbọn na. Akpawẹ ọghe agbọn na, ẹre Arriọba mwẹ khin, te ekpayẹ mwẹ gha te gbinna mẹ, na ghẹ mu mwẹ.” (Jọn 18:36) “Rhunmwuda, ọmwaikọmwa nọ ya umozo gbinna, umozo ẹre a khian vbe ya gbe ẹre rua.”—Matiu 26:47-52.

Muẹn roro: Ugbẹnvbe a miẹn wẹẹ, e Jesu ma kue ne Ivbiotu e Kristi gbinna ne irẹn, vbe ẹghẹ nọ na gha rre agbọn, uwẹ yayi wẹẹ, ọ khẹke ne iran gha khọn okuo nian ra? Adeghẹ u hoo ne u rẹn vbene Ivbiotu e Kristi ni ghaa rrọọ vbe ẹghẹ nẹdẹ, ya lele ukpowẹ ọghe Jesu kevbe vbene iran ya rhie emwi nọ ma iran re ye uyinmwẹ hẹ, ya tie uhunmwuta nọ khare wẹẹ “Is War Compatible With Christianity?”

De emwi nọ khian sunu daa avbe ugamwẹ ni mwẹ obọ vbe okuo?

E Baibol gi ima rẹn wẹẹ, e Jehova i khian miẹn ọnrẹn yi, ugamwẹ ọghe emwa ni kha wẹẹ Ivbiotu e Kristi ẹre iran khin, vbene iran i na ya imamwaemwi ọghe Jesu ru emwi.—Matiu 7:21-23; Taitọs 1:⁠16.

Ebe Arhie Maan gi ima rẹn wẹẹ, Osanobua gha nọ avbe ugamwẹ na, rhunmwuda obọ iran ẹre ọ miẹn vbe uwu ọghe ẹbo “emwa na he gbelua vbe otagbọn.” (Arhie Maan 18:21, 24) Adeghẹ u hoo ne u rẹn evbọzẹe nọ na yerriọ, ya tie uhunmwuta nọ khare wẹẹ, “What Is Babylon the Great?”
E Jesu gi ima rẹn wẹẹ, ugamwẹ ke ugamwẹ ne Jehova ghi he ye otọ nẹ, ọ gha guọghọ iran rua, rhunmwuda uyinmwẹ dan ne iran yin, zẹvbe na gha vbe sẹtin “fiaẹn gbe otọ” erhan nọ kẹkẹ nẹi mọ ọmọ nọ maan, “a ghi fi ẹre fi erhẹn.” (Matiu 7:15-20) Ya tie uhunmwuta na “The End of False Religion Is Near!” ne u mieke na rẹn vbene ọna khian ya sunu hẹ.

Avbe Osẹe Jehova Lughaẹn Ne Ugamwẹ Ọvbehe

Avbe Osẹe Jehova ni rre Russia, Ukraine kevbe uhunmwu otagbọn hia, keghi lele iyi ne Jesu yi, nọ na wẹẹ, ne ima ghẹ gha mwẹ obọ vbe emwamwa otu azẹ ra okuo. Ọna ẹre ọ si ẹre ne ima i na mwẹ obọ vbe okuo nọ yọn na, ra ọvbehe nọ rhirhi gha khin. Emwa wa zẹ Avbe Osẹe Jehova kpokpo, rhunmwuda ne ima na ya ilele ni rre Baibol ru emwi. (Jọn 15:19, 20; 2 Timoti 3:12) Vbe igiemwi, arriọba ọghe Russia fi Avbe Osẹe Jehova nibun fi eghan nẹ, erriọ iran wa vbe gbe nibun ugbemwẹ a gha wu a rrie. Iran kue vbe miẹn ima owa ugamwẹ ughughan ne ima mwẹ nẹ. Adeghẹ u hoo ne rẹn sayọ vbekpa iyẹn na, gha rrie www.jw-russia.org.

Ya ghee e vidio ọghe ifuanro enẹ, ne uhunmwuta re khare wẹẹ: Jehovah’s Witnesses in Irkutsk Remain Faithful Despite Brutal Home Raids, ne u mieke na rẹn vbene Ivbi e Russia ya kpokpo Avbe Osẹe Jehova hẹ, rhunmwuda emwi ne iran yayi.
Ke otọ gha dee, ẹre a wa ya rẹn Avbe Osẹe Jehova, ye emwa nẹi mwẹ obọ vbe emwamwa otu azẹ. Ya ghee vidio nọ mwẹ uhunmwuta nọ khare wẹẹ Firm Under Opposition, ne u mieke na rẹn vbene Avbe Osẹe Jehova he ya mudia ẹse, vbe ẹghẹ ne Nazi Germany kevbe Soviet Union nọ ka gha rrọọ, ya gha kpokpo iran.

U sẹtin la e wẹbsait ọghe ima, ne u mieke na rẹn vbekpa emwi ne ima yayi. U gha vbe miẹn eyan ne Osanobua yan rẹn vbe Baibol, ọghe agbọn na i khian ghi na gha khọn okuo. (Aizaia 2:4; Jerimaia 29:11) U sẹtin gi ima rẹn, deghẹ u hoo ne u rẹn sayọ.

Ehe ughughan ne efoto ke rre. Ke obiyọmwa ya sẹ oberhọmwa: Emwa ni mu efoto na ọre Sefa Karacan/⁠Anadolu Agency/⁠Getty Images; Maxym Marusenko/⁠NurPhoto via Getty Images

a Emwa ni rre otu ọghe UCCRO, ra Ukrainian Council of Churches and Religious Organizations, keghi re esọsi 15 ne Orthodox, Greek kevbe Roman Catholic, Protestant kevbe Evangelical ya zẹ ihe egbe. Uhiẹn ya sẹ egbe ugamwẹ Ivbi e Ju kevbe Ivbi Emọle.